Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

Ռուսական բանակը ոչնչացրել է Ուկրաինայի ռազմական ենթակառուցվածքի 975 օբյեկտ․ ՌԴ ՊՆ խոսնակ Իգոր Կոնաշենկով

Ռուսական բանակը ոչնչացրել է Ուկրաինայի ռազմական ենթակառուցվածքի 975 օբյեկտ։ «Ռիա Նովոստի»-ի փոխանցմամբ՝ այս մասին լրագրողներին հայտնել է ՌԴ ՊՆ խոսնակ, գեներալ-մայոր Իգոր Կոնաշենկովը։ «Այսօրվա դրությամբ՝ Ռուսաստանի զինված ուժերը հարվածել են Ուկրաինայի ռազմական ենթակառուցվածքի 975 օբյեկտների։ Դրանց թվում են Ուկրաինայի Զինված ուժերի 23 հրամանատարական կետեր և կապի կենտրոններ, երեք ռադիոտեղորոշիչ, 31 С-300, «Բուկ Մ-1» և «Օսա» զենիթահրթիռային համակարգեր, 48 ռադիոլոկացիոն կայան, ութ մարտական ինքնաթիռ և յոթ ուղղաթիռ։ Խոցվել է 11 անօդաչու թռչող սարք, երկու մարտավարական «Տոչկա-Ու» հրթիռներ»,- ասել է Կոնաշենկովը։ Նաև, ըստ նրա, ոչնչացվել են «223 տանկ և այլ զրահատեխնիկա, 28 ինքնաթիռ (ցամաքում), 39 բազմակի հրթիռահրետանային կայանք, 86 դաշտային հրետանային ատրճանակ և ականանետ, 143 միավոր հատուկ ռազմական մեքենա»։

10:56 - 27 փետրվարի, 2022

Ռուսական ստորաբաժանումները շրջափակել են Խերսոն և Բերդյանսկ քաղաքները, վերահսկողության տակ են վերցրել Գենիչեսկը․ ՌԴ ՊՆ խոսնակ Իգոր Կոնաշենկով

Ռուսական ստորաբաժանումները շրջափակել են Խերսոն և Բերդյանսկ քաղաքները, վերահսկողության տակ են վերցրել Գենիչեսկը, Խերսոնի մերձակայքում գտնվող Չեռնոբաևկա օդանավակայանը։ Այս մասին կիրակի օրը կայացած ճեպազրույցում հայտնել է ՌԴ պաշտպանության նախարարության խոսնակ Իգոր Կոնաշենկովը։ «Վերջին օրվա ընթացքում Խերսոն և Բերդյանսկ քաղաքներն ամբողջությամբ շրջափակվել են Ռուսաստանի Դաշնության զինված ուժերի կողմից, վերահսկողության տակ են վերցվել նաև Գենիչեսկ քաղաքը և Խերսոնի մերձակայքում գտնվող Չեռնոբաևկա օդանավակայանը», - ասել է Կոնաշենկովը։

10:28 - 27 փետրվարի, 2022

Խարկովի ղեկավարը հայտնել է ռուսական տեխնիկայի քաղաք ներխուժման մասին

Խարկով քաղաքում «թշնամու թեթև տեխնիկայի ճեղքում է եղել։ Այդ թվում՝ քաղաքի կենտրոնական հատվածում»։ Այս մասին ֆեյսբուքյան իր էջում հայտնել է Խարկովի շրջանային վարչակազմի ղեկավար Օլեգ Սինեգուբովը։ Ղեկավարը հորդորել է քաղաքացիներին դուրս չգալ ապաստաններից։

09:59 - 27 փետրվարի, 2022

Մեծ յոթնյակի երկրները կքննարկեն Ուկրաինայի շուրջ ստեղծված իրավիճակը

Մեծ յոթնյակի (G7) երկրների արտաքին գործերի նախարարները կիրակի օրը հանդիպում կունենան, որի ընթացքում կքննարկեն Ուկրաինայի և Ռուսաստանի ռազմական գործողության շուրջ ստեղծված իրավիճակը։ ՏԱՍՍ-ի փոխանցմամբ՝ այս մասին կիրակի NHK հեռուստաալիքի եթերում հայտարարել է Ճապոնիայի արտգործնախարար Յոսիմասա Հայաշին։ «Մեծ յոթնյակի ԱԳ նախարարների հանդիպումը նախատեսված է այսօր»,- ասել է նա: Հայաշիի խոսքով՝ G7 երկրները կիսում են ընդհանուր արժեքները և պետք է շարունակեն սերտորեն համակարգել Ուկրաինայի շուրջ ստեղծված իրավիճակը։

09:50 - 27 փետրվարի, 2022

Պատժամիջոցների ենթարկված ռուսական բանկերը դուրս կմնան SWIFT-ից. ԱՄՆ-ն և ԵՄ-ն համաձայնության են եկել

Այս գիշեր ԱՄՆ-ը, Ֆրանսիան, Կանադան, Իտալիան, Մեծ Բրիտանիան, Եվրահանձնաժողովը և Գերմանիան որոշում են կայացրել` լրացուցիչ կոշտ ֆինանսական պատժամիջոցներ կիրառելու Ռուսաստանի դեմ՝ ի պատասխան Ուկրաինայում ռուսական զորքերի շարունակվող հարձակումներին: Այս մասին հայտնում է Գերմանիայի կառավարության մամուլի ծառայությունը։ Ռուսական բոլոր բանկերը, որոնց նկատմամբ արդեն միջազգային պատժամիջոցներ են կիրառվել, անհրաժեշտության դեպքում նաև ռուսական մյուս բանկերը դուրս կմնան միջազգային վճարային ծառայության SWIFT համակարգից։ Սրա նպատակն է, ըստ Գերմանիայի կառավարության հաղորդագրության, մեկուսացնել այդ ինստիտուտները միջազգային ֆինանսական հոսքերից, ինչը զգալիորեն կսահմանափակի նրանց գլոբալ գործունեությունը: Կդադարեցվի մեծահարուստ ռուսաստանցիների, այսպես կոչված, «ոսկե անձնագիրը», և, հետևաբար, նրանց և նրանց ընտանիքների համար եվրոպական քաղաքացիություն ստանալու հնարավորությունը։ ԱՄՆ-ի և Եվրամիության ներկայացուցիչների մասնակցությամբ կստեղծվի աշխատանքային խումբ՝ ապահովելու պատժամիջոցների արագ իրականացումը, սառեցնելով անհատների, նրանց ընտանիքների և ընկերությունների ակտիվները։ Երկրներն ընդգծել են իրենց պատրաստակամությունը՝ ձեռնարկելու հետագա քայլեր, եթե Ռուսաստանը չդադարեցնի իր հարձակումն Ուկրաինայի դեմ։

02:29 - 27 փետրվարի, 2022

Բորելը վաղը Ուկրաինայի հարցով ԵՄ ԱԳ նախարարների արտահերթ հանդիպում է հրավիրել

ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ջոզեֆ Բորելը հայտնում է, որ վաղը հրավիրել է Եվրամիություն արտաքին գործերի նախարարների արտահերթ հեռավար հանդիպում։ Այս մասին ԵՄ պաշտոնյան գրել է իր թվիթերյան էջում։ «Վաղը՝ ժամը 18.00-ին, հրավիրում եմ ԵՄ արտգործնախարարների հեռավար հանդիպում՝ ընդդեմ Ռուսաստանի ագրեսիայի Ուկրաինային աջակցելու նպատակով հետագա քայլերը որոշելու համար։ Ես կառաջարկեմ Ուկրաինայի Զինված ուժերին անհապաղ օգնության փաթեթ՝ աջակցելու նրանց իրենց հերոսական պայքարում»,- գրել է նա։

00:56 - 27 փետրվարի, 2022

Հունգարիան առաջարկել է Ռուսաստանի և Ուկրաինայի միջև բանակցություններ վարել Բուդապեշտում

Հունգարիան առաջարկել է, որ Ռուսաստանի և Ուկրաինայի միջև բանակցություններն ընթանան երկրի մայրաքաղաք Բուդապեշտում, և դեռ մերժում չի ստացել։ Այս մասին, ինչպես փոխանցում է «Ռիա նովոստին», ասել է Հունգարիայի արտաքին գործերի նախարար Պետեր Սիյարտոն։ «Անցած գիշեր զանգահարեցի ՌԴ ԱԳ նախարար Սերգեյ Լավրովին, իսկ հետո՝ Ուկրաինայի նախագահի աշխատակազմի ղեկավար Անդրեյ Երմակին և ասացի, որ Բուդապեշտը պատրաստ է ընդունել երկու պատվիրակություններին։ Մենք պատրաստ ենք հարթակ տրամադրել ապահով և արդար պայմաններով բանակցությունների համար, որպեսզի մեր տարածաշրջանում, որքան հնարավոր է շուտ, խաղաղություն հաստատվի։ Երկու զրուցակիցներն էլ շնորհակալություն հայտնեցին առաջարկի համար։ Նրանցից ոչ մեկը չմերժեց այն։ Նրանք նշեցին, որ դեռ պետք է շարունակեն ներքին բանակցությունները։ Հուսով եմ, որ բանակցությունները, որտեղ էլ որ անցկացվելու լինեն, կսկսվեն հնարավորինս շուտ»,- ասել է նա ֆեյսբուքյան տեսաուղերձում։

00:48 - 27 փետրվարի, 2022

Պուտինն ու Ալիևը քննարկել են Ուկրաինայում ՌԴ հատուկ գործողության հետ կապված իրադրության զարգացումը

ՌԴ նախագահ Վլադիմիր Պուտինն ու Ադրբեջանի նախագահ Իլհամ Ալիևը հեռախոսազրույց են ունեցել։ Այս մասին հայտնում են Կերմլի մամուլի ծառայությունից։ Ըստ հաղորդագրության՝ հեռախոսազրույցի ընթացքում, ի թիվս այլ հարցերի, քննարկվել է նաև Ուկրաինայում Ռուսաստանի հատուկ գործողության հետ կապված իրադրության զարգացումը։ Հիշեցնենք, որ ավելի վաղ Ուկրաինայի նախագահ Վլադիմիր Զելենսկին հայտնել էր, որ Ադրբեջանի և Թուրքիայի նախագահներն առաջարկել են ՌԴ-ի հետ բանակցություններ կազմակերպել։

00:30 - 27 փետրվարի, 2022

Գերմանիան մեղմացնում է ռուսական մուտքը SWIFT սահմանափակելու իր դիրքորոշումը

Գերմանիան փոխել է իր դիրքորոշումը SWIFT գլոբալ միջբանկային վճարային համակարգին Ռուսաստանի մուտքի սահմանափակումներ մտցնելու վերաբերյալ և միացել այլ արևմտյան ուժերին՝ աջակցելով ավելի կոշտ պատժամիջոցներին, որոնց նպատակն է կասեցնել Ռուսաստանի ներխուժումն Ուկրաինա: Տեղեկությունը փոխանցում է Reuters-ը։ «Մենք հրատապ աշխատանք ենք տանում, որ սահմանափակենք SWIFT-ից անջատելու հետևանքով առաջացող կողմնակի վնասը, որպեսզի այդ գործընթացն ազդեցություն ունենա ճիշտ մարդկանց վրա: Մեզ անհրաժեշտ է SWIFT-ի նպատակային սահմանափակում»,- ասել են Գերմանիայի արտաքին գործերի նախարար Աննալենա Բաերբոկը և էկոնոմիկայի նախարար Ռոբերտ Հաբեկն իրենց հայտարարության մեջ։ Գերմանիան ի սկզբանե հայտարել էր, որ նախ պետք է կշռադատի նման քայլի տնտեսական հետևանքները:

00:18 - 27 փետրվարի, 2022

Ուկրաինացի դիվանագետները շուրջօրյա աշխատում են, որ եվրոպական երկրները համաձայնության գան ՌԴ-ին SWIFT-ից հեռացնելու որոշման շուրջ․ Զելենսկի

Ուկրաինայի նախագահ Վլադիմիր Զելենսկին վերջին ուղերձի ժամանակ հայտարարել է, որ Ուկրաինացի դիվանագետները շուրջօրյա աշխատում են, որ եվրոպական երկրները համաձայնության գան Ռուսաստանին SWIFT համակարգից (Համաշխարհային միջբանկային ֆինանսական հեռահաղորդակցության կազմակերպություն) հեռացնելու որոշման շուրջ։ Այս մասին հայտնում է Ukrinform-ը։ «Կարծես թե Ուկրաինան հասել է ողջ քաղաքակիրթ աշխարհի անկեղծությանն ու ուշադրությանը։ Իսկ գործնական արդյունքը SWIFT-ն է: Ռուսաստանի Դաշնության համար այս բառի մեջ մեծ նշանակություն կա՝ անջատում համաշխարհային ֆինանսական քաղաքակրթությունից: Մեր դիվանագետները շուրջօրյա պայքարում են, որ Եվրոպայի բոլոր երկրները համաձայնության գան Ռուսաստանին միջազգային միջբանկային ցանցից կտրելու ուժեղ և արդար որոշման շուրջ»,- ասել է նա։ Զելենսկին հայտարարել է, որ դա Ռուսաստանի համար նշանակում է միլիարդավոր կորուստներ։ Նա ընդգծել է, որ դա կոնկրետ գին է Ուկրաինա ներխուժման համար։

23:20 - 26 փետրվարի, 2022

Բելգիան վառելիք և զենք է տրամադրում Ուկրաինային |azatutyun.am|

azatutyun.am: Բելգիան Ուկրաինային հատկացում է 3 հազար 800 տոննա վառելիք և 2 հազար գնդացիր։ Թվիթերյան գրառմամբ տեղեկացնում է Բելգիայի վարչապետ Ալեքսանդր դե Կրոոն։ «Ուկրաինան Բելգիայից վառելիք է խնդրել իր բանակի մատակարարումների համար։ Մեր երկիրը որոշել է և կհատկացնի 3 հազար 800 տոննա վառելիք։ Բելգիան ուկրաինական բանակին կհատկացնի նաև 2 հազար գնդացիր»,- գրել է Բելգիայի վարչապետը։ Հիշեցնենք, որ դեռ երեկ ՆԱՏՕ-ի գլխավոր քարտուղար Յենս Ստոլտենբերգը ուրբաթ հայտարարեց, որ դաշինքը շարունակում է իր արձագանքման ուժերի տեղակայումը և կշարունակի զենք ուղարկել Ուկրաինա, այդ թվում՝ հակաօդային պաշտպանության միջոցներ։

23:05 - 26 փետրվարի, 2022

Վոլեյբոլի միջազգային ֆեդերացիան Ազգերի Լիգայի հանդիպումները տեղափոխել է Ռուսաստանից

Վոլեյբոլի միջազգային ֆեդերացիան տղամարդկանց և կանանց 2022 թվականի Ազգերի Լիգայի հանդիպումները տեղափոխել Է Ռուսաստանից: Այս մասին հայտնում են կազմակերպության մամուլի ծառայությունից։ Տղամարդկանց մրցաշարի հինգ տուրերը պետք է տեղի ունենային Կեմերովոյում հուլիսի 5-10-ը: Կանանց մրցաշարի չորս տուրերը պետք է ընդուներ Ուֆան հունիսի 28-ից հուլիսի 3-ը: «ՎՄՖ-ն այսօր Վոլեյբոլի համառուսաստանյան ֆեդերացիային տեղեկացրել է, որ Ազգերի լիգայի առաջիկա երկու տուրերը, որոնք պետք է անցկացվեին Ռուսաստանում հունիսին և հուլիսին, հետաձգվել են», - ասված Է հայտարարության մեջ: Ազգերի լիգայի առաջին խաղարկությունը կայացել է 2018 թվականին։ Ռուս վոլեյբոլիստները մրցաշարում հաղթել են երկու անգամ, վոլեյբոլիստուհիները՝ ոչ մի անգամ։

22:50 - 26 փետրվարի, 2022

Բայդենը հայտարարել է, որ ՌԴ դեմ պատժամիջոցների այլընտրանքը կարող էր լինել «երրորդ համաշխարհային պատերազմը»

ԱՄՆ նախագահ Ջո Բայդենը կարծում է, որ Մոսկվայի դեմ Վաշինգտոնի սահմանած խիստ պատժամիջոցների այլընտրանքը կարող էր լինել «Երրորդ համաշխարհային պատերազմը»։ Այս մասին ԱՄՆ առաջնորդը հայտարարել է բլոգեր Բրայան Քոենին տված հարցազրույցի ժամանակ, փոխանցում է ՏԱՍՍ-ը։ «Կար երկու տարբերակ՝ սկսել Երրորդ համաշխարհային պատերազմ, սկսել ֆիզիկական պատերազմ Ռուսաստանի դեմ, կամ էլ երկրորդ տարբերակը՝ անել այնպես, որ միջազգային իրավունքներին այդքան հակառակվող երկիրը վճարի իր արարքների համար»,- ասել է Միացյալ Նահանգների նախագահը։ Նա ընդգծել է, որ մինչ այժմ սահմանված պատժամիջոցները դարձել են, իր կարծիքով, «պատմության մեջ ամենամասշտաբային սանկցիաները»։ «Եվ Ռուսաստանը դրա համար լուրջ գին կվճարի ինչպես կարճաժամկետ, այնպես էլ երկարաժամկետ հեռանկարում, հատկապես երկարաժամկետ հեռանկարում»,- հավելել է Բայդենը։

22:43 - 26 փետրվարի, 2022

Գերմանիան 1000 հակատանկային միջոց և 500 «Stinger» զենիթահրթիռային համակարգ կուղարկի Ուկրաինա

Գերմանիան օգնություն է ուղարկում Ուկրաինային։ Գերմանիայի կառավարությունից հայտնում են, որ այսօր Դաշնային կառավարությունը որոշել է Ուկրաինայի Զինված ուժերին աջակցելու նպատակով մատակարարել 1000 հակատանկային միջոց և 500 «Stinger» զենիթահրթիռային համակարգ։ Հիշեցնենք, որ դեռ երեկ ՆԱՏՕ-ի գլխավոր քարտուղար Յենս Ստոլտենբերգը ուրբաթ հայտարարեց, որ դաշինքը շարունակում է իր արձագանքման ուժերի տեղակայումը և կշարունակի զենք ուղարկել Ուկրաինա, այդ թվում՝ հակաօդային պաշտպանության միջոցներ։ Ուկրաինայի շուրջ թարմացումներին կարող եք հետևել այստեղ: Լուսանկարում փետրվարի 13-ին Լիտվայից ռազմական օգնությունն է Կիևի Բորիսպիլի օդանավակայանում | Սերգեյ Սուպինսկի

22:37 - 26 փետրվարի, 2022

ԱՄՆ-ն ու նրա դաշնակիցները շահագրգռված չեն Ուկրաինայում ճգնաժամային իրավիճակի կարգավորմամբ․ Զախարովան՝ ՆԱՏՕ-ի գագաթնաժողովի վերաբերյալ

Փետրվարի 25-ին տեղի ունեցավ ՆԱՏՕ անդամ երկրների ղեկավարների հեռավար հանդիպումը։ Նրանք ամեն կերպ ցույց տվեցին իրենց աջակցությունը «անկախ, խաղաղ և ժողովրդավարական» Ուկրաինային՝ մի երկրի, որը Արևմուտքի թողտվությամբ վերածվել է նացիստական գաղափարախոսության օջախի։ Այս մասին հայտնել է ՌԴ ԱԳՆ մամուլի խոսնակ Մարիա Զախարովան՝ մեկնաբանելով ՆԱՏՕ-ի գագաթնաժողովի արդյունքները։ «ՆԱՏՕ անդամ երկրները մի կողմ էին քաշվել, երբ Վաշինգտոնը միակողմանիորեն դուրս եկավ «Միջին ու փոքր հեռահարության հրթիռների ոչնչացման մասին» պայմանագրից։ Արդյո՞ք ՆԱՏՕ-ի դաշնակիցները չեն, որ մասնակցել են Հարավսլավիայի ռմբակոծմանը, Լիբիայի վրա հարձակմանը, Իրաք նեխուժմանը։ 20 տարի շարունակ Աֆղանստանում իրավիճակը հասցրին լիակատար դեգրադացիայի, իսկ այնտեղից փախչելով՝ թողեցին միլիարդավոր դոլարների զենքեր։ Մինչ Ռուսաստանին Ուկրաինայի ապառազմականացման և ապազգայնացման գործողության համար, պատասխանատվության կանչելը Հյուսիսատլանտյան դաշինքի երկրները թող պատասխան տան իրենց ռազմական արկածախնդրության, ինչպես նաև Կիևի ռեժիմին Դոնբասի խնդիրը խաղաղ ճանապարհով լուծելուն մղելու հարցում աանգործության համար։ Ութ տարի շարունակ Արևմուտքի երկրները անխռով հետևում են Ուկրաինայի հարավ-արևելքում հազարավոր խաղաղ բնակիչների սպանություններին և բռնություններին: Նրանք, փաստորեն, մեղսակից են դարձել ԼԺՀ-ի և ԴԺՀ-ի բնակիչների երկարամյա ցեղասպանությանը։ ՆԱՏՕ-ի մտադրությունը՝ շարունակելու զենք, այդ թվում՝ հակաօդային պաշտպանության համակարգեր ուղարկել Ուկրաինա, խոսում է մեկ բանի մասին․ ԱՄՆ-ն ու նրա դաշնակիցները շահագրգռված չեն այս երկրում ճգնաժամային իրավիճակի կարգավորմամբ»,- նշված է հայտարարության մեջ։

22:04 - 26 փետրվարի, 2022

ՌԴ և Բելառուսի դրոշները չեն տեղադրվի, իսկ օրհներգերը չեն հնչի միջոցառումների ժամանակ․ Մարմնամարզության միջազգային ֆեդերացիա

Մարմնամարզության միջազգային ֆեդերացիայի Գործադիր կոմիտեն այսօրվա նիստում մտահոգություն է հայտնել Ուկրաինա Ռուսաստանի ռազմական ներխուժման կապակցությամբ։ Այս մասին տեղեկանում ենք ֆեդերացիայի պաշտոնական էջից։ Որոշում է ընդունվել հետևյալ միջոցառումների մասին. Ռուսաստանի և Բելառուսի պետական դրոշները չպետք է տեղադրվեն, իսկ օրհներգերը չպետք է հնչեն ՄՄՖ-ի կողմից արտոնված միջոցառումների ժամանակ։ ՄՄՖ-ի գավաթի խաղարկության բոլոր միջոցառումները, որոնք նախատեսվում են անցկացնել Ռուսաստանում և Բելառուսում, չեղյալ են հայտարարվել, և ՄՄՖ-ի այլ միջոցառումներ չեն անցկացվի Ռուսաստանում կամ Բելառուսում։ Ռուսաստանում և Բելառուսում անցկացվելիք ՄՄՖ-ի բոլոր արտոնված միջոցառումները հեռացվում են ՄՄՖ-ի օրացույցից և այլևս չեն ճանաչվի ՄՄՖ-ի կողմից։ Ռուսաստանում և Բելառուսում տեղի ունեցող որևէ այլ իրադարձություն չի արտոնվի ՄՄՖ-ի կողմից։ «Որպես մարզական ղեկավար մարմին՝ մեր առաջին պարտականությունն է պաշտպանել մեր բոլոր մարզիկներին, այդ թվում քաղաքական ճնշումից»,- հայտարարել է ՄՄՖ-ի նախագահ Մորինարի Ուատանաբեն: «Մեր մտքերն Ուկրաինայում մարմնամարզական համայնքի անդամների հետ են։ Սպորտը բարեկամություն և համերաշխություն է: Մենք պետք է համերաշխություն ցուցաբերենք մեր ընտանիքի անդամներին, ովքեր հուսահատության մեջ են և օգնության ձեռք մեկնենք՝ նրանց ապագան ապահովելու համար»։ ՄՄՖ-Ն ՄՄՖ-ի համերաշխության հիմնադրամին կխնդրի հատուկ օգնություն հատկացնել ուկրաինացի մարզիկների և Ուկրաինայի մարմնամարզության ֆեդերացիայի մյուս անդամների աջակցության համար, որոնք տուժել են պատերազմից։

21:57 - 26 փետրվարի, 2022