ՀՀ կառավարություն

Կառավարությունը գործադիր իշխանության բարձրագույն մարմինն է: Կառավարությունն իր ծրագրի հիման վրա մշակում եւ իրականացնում է պետության ներքին եւ արտաքին քաղաքականությունը, իրականացնում է պետական կառավարման համակարգի մարմինների ընդհանուր ղեկավարումը: Կառավարության լիազորությունները սահմանվում են Սահմանադրությամբ եւ օրենքներով: Կառավարության իրավասությանն են ենթակա գործադիր իշխանությանը վերաբերող բոլոր այն հարցերը, որոնք վերապահված չեն պետական կառավարման կամ տեղական ինքնակառավարման այլ մարմինների: Կառավարությունը կազմված է վարչապետից, փոխվարչապետներից եւ նախարարներից:

Հանրապետության նախագահը վարչապետ է նշանակում խորհրդարանական մեծամասնության ընտրած թեկնածուին, իսկ փոխվարչապետները եւ նախարարները նշանակվում են Հանրապետության նախագահի կողմից՝ վարչապետի առաջարկությամբ: Այժմ գործում է Նիկոլ Փաշինյանի գլխավորած կառավարությունը։

Կառավարությունն սկսել է «Վարձկանների հավաքագրման, օգտագործման, ֆինանսավորման և ուսուցման դեմ» ՄԱԿ-ի միջազգային կոնվենցիան վավերացնելու նախաձեռնություն |civilnet.am|

civilnet.am: Կառավարությունն սկսել է «Վարձկանների հավաքագրման, օգտագործման, ֆինանսավորման և ուսուցման դեմ» ՄԱԿ-ի միջազգային կոնվենցիան վավերացնելու նախաձեռնությունը։ Այդ նպատակով կառավարությունը դիմել է սահմանադրական դատարան՝ միջազգային պայմանագրում ամրագրված պարտավորությունների՝ ՀՀ սահմանադրությանը համապատասխանությունը որոշելու նպատակով, այնուհետև պետք է դիմել Ազգային ժողով։ Կոնվենցիան արգելում է վարձկանների հավաքագրումը, վերապատրաստումը, օգտագործումը և ֆինանսավորումը: Դրան միացել է ավելի քան 30 երկիր, այդ թվում՝ Ադրբեջանը։ Կոնվենցիան վավերացրած պետություններն ընդունում են, որ վարձկանների հետ կապված գործունեությունը համարվում է հանցագործություն, և դրանք կատարած անձինք կամ պետք է քրեական պատժի ենթարկվեն, կամ արտահանձվեն։ Դեռ սեպտեմբերի 27-ից առաջ Հայաստանը հայտարարել էր, որ իր տեղեկություններով՝ Թուրքիան Ադրբեջան սիրիացի վարձկանների է տեղափոխել։ Թուրքիան և Ադրբեջանը հերքում են այդ լուրերը, մինչ զուգահեռ միջազգային մամուլում և սոցցանցերում դրանք հաստատող բազմաթիվ վկայություններ և տեսանյութեր են հայտնվում։

15:12 - 15 հոկտեմբերի, 2020

Տեղի է ունեցել Անվտանգության խորհրդի արտահերթ նիստ

Վարչապետ Նիկոլ Փաշինյանի գլխավորությամբ կառավարությունում տեղի է ունեցել Անվտանգության խորհրդի արտահերթ նիստ: Նիստին, բացի ԱԽ անդամներից, մասնակցել են նաև ՀՀ նախագահ Արմեն Սարգսյանը, Ազգային ժողովի նախագահ Արարատ Միրզոյանը, վարչապետի աշխատակազմի ղեկավար Էդուարդ Աղաջանյանը: Նիստի ընթացքում քննարկվել են ադրբեջանաթուրքական ահաբեկչական ագրեսիային դիմագրավելու ուղղությամբ գործողություններն ու հետագա քայլերը:

18:44 - 14 հոկտեմբերի, 2020

ՄԻԵԴ են ներկայացվել ռազմական գործողություններին Թուրքիայի մասնակցության վերաբերյալ նոր ապացույցներ

ՀՀ կառավարությունը շարունակում է ՄԻԵԴ ներկայացնել Ադրբեջանի կողմից մարդու իրավուքների խախտման վերաբերյալ անհերքելի ապացույցներ: Այս մասին հայտնում է ՄԻԵԴ-ում ՀՀ ներկայացուցիչը։Նախորդ օրերի ընթացքում ՄԻԵԴ են ներկայացվել նաև ռազմական գործողություններին Թուրքիայի մասնակցության վերաբերյալ նոր ապացույցներ:Ներկայացված ապացույցների հիման վրա Ադրբեջանը պատասխանատվության է ենթարկվելու Մարդու իրավունքների եվրոպական կոնվենցիայի մի շարք խախտումների համար:

23:20 - 10 հոկտեմբերի, 2020

Կառավարությունն առաջարկում է պետական ծառայողների սոցիալական փաթեթների գումարներն ուղղել պետական հիմնադրամի |hetq.am|

hetq.am: Կառավարությունը խորհրդարան է ուղարկել «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություն կատարելու նախագիծ` առաջարկելով սոցիալական փաթեթի շրջանակներում ուղղվող գումարները հայեցողությամբ փոխանցել պետական հիմնադրամի: Նշվում է, որ սոցիալական փաթեթի շրջանակներում հատկացվող գումարները պետական պաշտոն և պետական ծառայության պաշտոն զբաղեցնող անձանց հայեցողությամբ կարող են փոխանցվել նաև այն հիմնադրամներին, որոնց գործունեությունն ուղղված է Հայաստանի Հանրապետության կայուն ու համաչափ զարգացում ապահովվող ծրագրերի իրականացմանը, տնտեսության կայունացման օժանդակմանը կամ այլ համապետական ծրագրերի իրականացմանը: Նախագծի հիմնավորման մեջ նշվում է՝ ընդունման անհրաժեշտությունն առաջացել այն պատճառով, որ պայմանավորված ռազմական դրությամբ՝ մի շարք պետական ծառայության պաշտոններ զբաղեցնող անձինք ցանկանում են մասնակցել ռազմական դրության արդյունքում պետության կարիքների ֆինանսավորման համար իրականացվող դրամահավաքներին: Սակայն գործող օրենքի համաձայն` սոցիալական փաթեթի ուղղությունները սահմանված են օրենքով և դրանից բացի՝ այլ ուղղություններով նշված գումարները չեն կարող օգտագործվել: Շարունակությունը՝ hetq.am-ում

15:14 - 06 հոկտեմբերի, 2020

Հայաստան-Արցախ անխափան հաղորդակցությունն ապահովելու և ճանապարհները բեռնաթափելու նպատակով սահմանափակվում ելքը ՀՀ-ից դեպի Արցախ

ՀՀ Կառավարությունը հայտարարություն է տարածել, որում ասվում է․ «Հարգելի՛ հայրենակիցներ,ի հավելումն Հայաստանի Հանրապետության Ազգային անվտանգության ծառայության՝ հսկիչ անցակետերի վերաբերյալ հայտարարության` տեղեկացնում ենք, որ Հայաստանի Հանրապետությունում և Արցախում ռազմական դրության պայմաններում անվտանգության նկատառումներից ելնելով՝ հոկտեմբերի 2-ից գործելու են մի շարք սահմանափակումներ և կարգավորումներ։ Մասնավորապես՝ 1․ Հայաստան-Արցախ անխափան հաղորդակցությունն ապահովելու և ճանապարհները բեռնաթափելու նպատակով սահմանափակվում է անձանց և փոխադրամիջոցների ելքը Հայաստանի Հանրապետությունից դեպի Արցախ՝ բացառությամբ Պաշտպանության բանակի և Արցախի կառավարության կարիքների համար իրականացվող փոխադրումների, ինչպես նաև բացառիկ անհրաժեշտության դեպքում ՀՀ կառավարության կողմից տրված թույլատվության հիման վրա առանձին դեպքերի։ ՀՀ-ից ելքից գործելու այդ թույլտվությունները ստանալու համար անհրաժեշտ է դիմել՝ ա․ Ֆիզիկական անձանց դեպքում՝ [email protected] էլ փոստի հասցեով` հիմնավորելով այցի նպատակը, կազմակերպության՝ Արցախ մեկնող քաղաքացիների անձնական տվյալները և անձը հաստատող փաստաթղի լուսապատճենը և նշելով կազմակերպության ՀՎՀՀ-ն: բ. Իրավաբանական անձանց դեպքում՝ [email protected] էլ փոստի հասցեով` հիմնավորելով այցի նպատակը և կցելով անձը հաստատող փաստաթղթի լուսապատճենը: Հիշեցնում ենք, որ քաղաքացիներին Հայաստանից ելքի թույլտվություն տրվելու է բացառիկ անհրաժեշտության դեպքում: գ․ Տեղական լրատվամիջոցների դեպքում՝ [email protected] էլ փոստի հասցեով դ․ ՀՀ-ում հավատարմագրված դիվանագիտական ներկայացուցչությունների և հյուպատոսական հիմնարկների, դրանց հավասարեցված միջազգային կազմակերպություններ դեպքում՝ [email protected] էլ․ փոստի հասցեով ե․ Միջազգային լրատվամիջոցների դեպքում՝ [email protected] էլ․ փոստի հասցեով 2․ Հորդորում ենք նաև զերծ մնալ անհատական նախաձեռնությունների միջոցով Արցախին աջակցության նպատակով ապրանքների հավաքագրումից և դրանք Արցախ փոխադրումից: Պետք է հաշվի առնել, որ ցանկացած պարենային և ոչ պարենային ապրանք և դեղորայք ունեն տեսակավորման, պիտանելիության, անվտանգության ու պահպանման կանոններ, որոնք կարող ենք ապահովվել միայն համապատասխան մասնագետների կողմից: Հետևաբար, ցանկացած աջակցություն պետք է փոխանցվի մարզպետարանների, համայնքապետարանների ու թաղապետարանների միջոցով, ովքեր կներկայացնեն նաև անհրաժեշտ պարագաների ցանկը: 3. Արցախին սոցիալական և նյութական աջակցության տրամադրման գործընթացը համակարգելու նպատակով Վարչապետի աշխատակազմի ղեկավար Էդուարդ Աղաջանյանի գլխավորությամբ ստեղծվել է միասնական շտաբ։ Հոկտեմբերի 2-ից՝ ժամը 10։00-ից շտաբի ներքո 117 հեռախոսահամարով գործելու է Ռազմական դրության տեղեկատվական թեժ գիծը, որին կարող եք զանգահարել ռազմական դրության հետ կապված բոլոր հարցերով՝ բացառությամբ Պաշտպանության նախարարությանն առնչվող հարցերի։ Արտերկրից կարող եք միանալ (+374)10527000 հեռախոսահամարով»։

10:23 - 02 հոկտեմբերի, 2020

Կառավարությունը նիստ չի անցկացնի. բոլոր նախագծերը քննարկվում ու քվեարկվում են հեռավար

ՀՀ կառավարությունը հոկտեմբերի 1-ին նիստ չի հրավիրի, ինչպես դա արվում է յուրաքանչյուր հինգշաբթի։ ՀՀ կառավարության կառուցվածքի և գործունեության մասին օրենքը սահմանում է, որ նիստերը, որպես կանոն, հրավիրվում են շաբաթը մեկ անգամ։ Ինչպես տեղեկացրեց ՀՀ վարչապետի աշխատակազմի տեղեկատվության և հասարակայնության հետ կապերի վարչության պետ Արմեն Խաչատրյանը, գործադիր իշխանության ներկայացուցիչները հեռավար կարգով քննարկում և գրավոր քվեարկությամբ ընդունում են նախագծերը։ «Արդեն իսկ կառավարության կայքում հրապարակվել են սեպտեմբերի 28-ին քննարկված և ընդունված որոշումները։ Պարբերաբար կլինեն թարմացումներ, և հեռավար կարգով քննարկված և գրավոր քվեարկությամբ ընդունված բոլոր նախագծերը կտեղադրվեն կառավարության կայքում»,-նշեց Խաչատրյանը։

09:49 - 01 հոկտեմբերի, 2020

Հրապարակվել է Հայաստանում ռազմական դրություն հայտարարելու մասին կառավարության որոշումը

16:25 - 27 սեպտեմբերի, 2020

Ժողովրդավարություն. նպատա՞կ, թե` միջոց |acnis.am|

acnis.am: Հայաստանի բոլոր ղեկավարները եւ իշխող քաղաքական ուժերը, հատկապես իրենց իշխանավարման երկրորդ ժամկետից սկսած, ժողովրդի կողմից ընկալվում էին որպես ոչ ժողովրդավարական, եւ համարյա բոլոր ընտրություններից հետո բողոքի զանգվածային գործողություններ էին ծավալվում, որոնք ճնշվում էին ուժային միջոցներով։ Հանրությունը չէր ընդունում ընտրությունների արդյունքները։ 2018-ի զանգվածային խանդավառության պայմաններում իշխանության եկած «թավշյա» կառավարությունն ուներ հանրային աննախադեպ վստահություն, եւ կարծես թե ճնշող մեծամասնությունն ընդունեց ընտրությունների արդյունքները: Սակայն որոշ ժամանակ անց դժգոհություններ ի հայտ եկան։ Հանրության մի զգալի հատված բոլոր վարչակարգերին միշտ հակաժողովրդավարական էր համարում, հիմա եւս նույն ուղղությամբ ենք գնում։ Ո՞րն է պատճառը, ինչո՞ւ «բազմաչարչար» հայ ժողովուրդն այդքան անհանդուրժող ու անգոհ է իր իշխանություններից։ Միգուցե հիմնական պատճառը Լեւոնը, Ռոբերտը, Սերժը կամ Նիկոլը չե՞ն, միգուցե խնդիրն ավելի խորքային է, իսկ «վատ» իշխանություններն ընդամենը հանրային պատկերացումների, սպասումների եւ իրականության միջեւ աններդաշնակության արդյունք են: Չի բացառվում նաեւ, որ իշխանություններն այն չեն անում, ինչ նրանցից ակնկալում է հանրությունը կամ այդ սպասումներն են գուցե անիրական։ Վերջինիս դեպքում նշանակում է, որ խնդիրն աշխարհի ու մեզ շրջապատող միջավայրի մասին հասարակության պարզունակ պատկերացումներն են։ Քաղաքականապես ակտիվ զանգվածը մի տեսլական է ձեւավորել, թե մեր նպատակը ժողովրդավարություն կառուցելն է, եւ ցանկացած իշխանություն հեղինակազրկվում է, երբ մարդիկ տեսնում են նրանց հակաժողովրդավարական քայլերը։ Մինչդեռ հանրության գլխավոր իղձն ամենեւին էլ ժողովրդավարությունը չէ։ Վերջինս կառավարման մեխանիզմ է, բայց ոչ նպատակ։ Պարզ ասած` դա միջոց կամ գործիք է կոնկրետ խնդիրներ լուծելու համար։ Գործիքը չի կարող նպատակ լինել, սակայն հանրային խոսույթին հետեւելիս` նկատելի է, որ ամենաշատ արտաբերվող բառը «ժողովրդավարություն»-ն է, որը, թերեւս, զիջում է միայն «կոռուպցիա»-ին։ Երբ ժողովրդավարությունը, այսինքն` գործիքը, ներկայացվում է որպես նպատակ, այդժամ էլ սկսվում է այն, ինչ տեսնում ենք արդեն երեսուն տարի։ Բանն այն է, որ եթե ժողովրդավարությունը դառնում է նպատակ, նշանակում է` չկա ոչ մի այլ իրական նպատակ կամ եղածները վատն են, որոնց մասին բարձրաձայն չեն խոսում: Արդյունքում հանուն ժողովրդավարության հաղթանակի, հնարավոր է` հաստատվի դիկտատուրա, խախտվեն մարդու իրավունքները, որքան էլ սա արտառոց հնչի։ Շարունակությունը՝ acnis.am-ում։

21:00 - 26 սեպտեմբերի, 2020

«Մեր ժամանակների հերոսը» մրցանակաբաշխության միջոցառումը կազմակերպած Ա/Ձ-ն գտնելն անհնար չէ․ Politik.am-ը սխալվում է

19:12 - 24 սեպտեմբերի, 2020

Դեբեդ գետի վրա կամրջի կառուցապատման գործընթացի կանոնակարգման նոր որոշում ընդունվեց |armenpress.am|

armenpress.am: Կառավարությունն ընդունեց Հայաստանի Հանրապետության և Վրաստանի պետական սահմանի Սադախլո-Բագրատաշեն անցման կետի տարածքում Դեբեդ գետի վրա նոր կամրջի կառուցապատման գործընթացը կանոնակարգելու և կամրջի նախագծանախահաշվային փաստաթղթերի հատուկ համալիր փորձաքննություն իրականացնող միջգերատեսչական ժամանակավոր փորձաքննական հանձնաժողով ստեղծելու ու դրա անհատական կազմը հաստատելու մասին որոշում: Ըստ հիմնավորման, արդյունքում՝ համապարփակ կկարգավորվի Դեբեդ գետի վրա նոր կամրջի կառուցապատման գործընթացը: Մեկ այլ որոշմամբ էլ կամրջի կառուցման համար անհրաժեշտ տարածքները ճանաչվել են հանրության գերակա շահ: Արդեն իսկ պատրաստ են նախագծային փաստաթղթերը, որոնց համաձայն՝ կամրջի կառուցման արդյունքում ազդեցության են ենթարկվում ՀՀ Տավուշի մարզի Բագրատաշեն համայնքում գտնվող 3 միավոր համայնքային սեփականություն հանդիսացող հողամասերի որոշ հատվածներ: Ազդակիր հողամասերի օտարման գործընթացը սկսելու վերջնաժամկետը առաջարկվում է սահմանել 2020 թվականի դեկտեմբերի 25-ը:

16:29 - 24 սեպտեմբերի, 2020

Ռուսաստանի դաշնակիցների շարքում ՀՀ-ն արժանացել է շատ բարձր գնահատականի |armenpress.am|

armenpress.am: Ռուսական վերլուծական կենտրոններից մեկը հրապարակել է «Ռուսաստանի դաշնակիցներ» թեմայով գնահատական, որտեղ գնահատում է ՀԱՊԿ-ի շրջանակներում գործընկերների դաշնակցային հարաբերությունները Ռուսաստանի հետ: Կառավարության նիստում Անվտանգության խորհրդի քարտուղար Արմեն Գրիգորյանը նշեց, որ դաշնակցային հարաբերությունների կոնտեքստում այդտեղ Հայաստանին տրված է շատ բարձր մակարդակ: Իր հերթին Վարչապետ Նիկոլ Փաշինյանն անդրադարձավ Հայաստանի արտաքին քաղաքական օրակարգին: «Առաջիկայում ԱՄՆ-ի հետ ունենալու ենք ռազմավարական երկխոսության երկրորդ փուլը: «Հույս ունենք, որ այն կորոնավիրուսի պատճառով որևէ սահմանափակում չի ունենա: Կարևոր է ընդգծել, որ մենք մեր գործընկերների հետ գուցե ոչ սովորական, բայց շատ արդյունավետ հարաբերություններ ենք զարգացնում և դա շարունակելու ենք: ԱՄՆ-ը, Եվրամիությունը, Ռուսաստանը մեզ համար շատ կարևոր գործընկերներ են: Առաջիկայում սպասվում է ԵԱՏՄ միջկառավարական խորհրդի նիստ Երեւանում: Նաև Իրանի հետ շատ ինտենսիվ հարաբերություններ ունենք: Վրաստանի հետ մեր հարաբերություններն ավանդաբար ջերմ են: Մենք հետևողականորեն արտաքին քաղաքականության մասին մեր պատկերացումները, որտեղ, իհարկե, կան որոշակի նյուանսներ, որոնք գուցե թե սովորական չեն, շարունակելու ենք մեր քաղաքական ուղեգիծը»,- ասաց Վարչապետը:

13:56 - 24 սեպտեմբերի, 2020

Վարորդական իրավունք ստանալու խստացված կարգը կգործի 2021 թվականից |hetq.am|

hetq.am: Կառավարության այսօրվա՝ սեպտեմբերի 24-ի հերթական նիստում չզեկուցվող հարցերի փաթեթով ընդունվեց որոշում, որով նախատեսվում է վարորդական իրավունք ստանալու խստացված կարգը հետաձգել մինչև 2021 թվականի հունվարի 1-ը։ Սույն թվականի սեպտեմբերի 27-ից ուժի մեջ պետք է մտնեին կառավարության 2020 թվականի մարտի 26-ին ընդունված որոշումները, որոնցով ներկայում գործող՝ Կառավարության 2008 թվականի սեպտեմբերի 18-ին և 2012 թվականին ընդունված որոշումներում վարորդական իրավունքի վկայական ստանալու համար անհրաժեշտ փաստաթղթերը ներկայացնելու, վարորդի թեկնածուի առողջական վիճակի ստուգման և որակավորման քննությունների հետ կապված հարցերով գործող կարգում նախատեսվում էին մի շարք փոփոխություններ։ Կառավարությունը որոշեց որոշումների ուժի մեջ մտնելու ժամկետները հետաձգել առնվազն մինչև տարեվերջ։ Ընդունված որոշման նախագծում ճանապարհային ոստիկանությունը հայտնում է, որ կորոնավիրուսային համավարակով պայմանավորված՝ 13 հաշվառման-քննական ստորաբաժանումների աշխատանքը 2020թ. մարտի 25-ից մինչև մայիսի 17-ը և հունիսի 3-ից մինչև հունիսի 14-ը գրեթե ամբողջությամբ դադարեցված է եղել, վարորդական վկայականներին վերաբերող գործողությունների մասով բացառություն է եղել միայն կորած վարորդական վկայականի կրկնօրինակի հատկացում տալու գործողությունը։ Դադարեցված գործառույթների վերսկսումից հետո Ճանապարհային ոստիկանության հաշվառման-քննական բոլոր ստորաբաժանումների կողմից ծառայությունների ամբողջ ծավալով մատուցումն իրականացվում է միայն նախապես անհրաժեշտ գործողություն կատարելու մասին էլեկտրոնային եղանակով ներկայացվող դիմումների հիման վրա հրավերի միջոցով, ինչը նպատակ ունի բացառել քաղաքացիների մեծ թվով կուտակումները՝ կանխելով համավարակի տարածումը։ Նշվածի հանգամանքով պայմանավորված՝ 2020թ. օգոստոսի 10-ի դրությամբ վարորդական իրավունքի վկայական ստանալու համար որակավորման քննություններին մասնակցելու նպատակով Ճանապարհային ոստիկանությոուն է ներկայացվել ավելի քան 26 000 դիմում, որից մոտ 12 500-ը՝ Երևանում: Վարորդական իրավունքի վկայական ստանալու գործընթացում՝ օրական ընդունվում է առավելագույնը 400 որակավորման քննություն, որոնց թիվը մինչև սահմանափակումները 600-ից ավել է եղել:

13:39 - 24 սեպտեմբերի, 2020

Պետական գույքը կվաճառվի գրավադրմամբ կամ առանց դրա. ինչպես նոր փոփոխությունները կազդեն ներդրումների վրա |hetq.am|

13:36 - 24 սեպտեմբերի, 2020

Համայնքային ճանապարհների կառուցման և բարեկարգման աշխատանքների ընթացակարգը կհեշտանա |hetq.am|

hetq.am: Կառավարության սեպտեմբերի 24-ի հերթական նիստում ընդունվեց որոշում, որով կարգավորվում է համայնքային ճանապարհների, փողոցների կառուցման և բարեկարգման աշխատանքների ընթացակարգը: Կառավարության որոշման նախագծի ընդունումը պայմանավորված է համայնքային նշանակության (այդ թվում՝ գյուղական բնակավայրերի) ճանապարհների բարեկարգման ծրագրի արդյունավետ ապահովման և վարչապետի մոտ 2020 թվականի օգոստոսի 19-ին կայացած խորհրդակցության հանձնարարականների կատարման անհրաժեշտությամբ: Կառավարության 2015 թվականի մարտի 19-ի «Հայաստանի Հանրապետությունում կառուցապատման նպատակով թույլտվությունների և այլ փաստաթղթերի տրամադրման կարգը հաստատելու և Հայաստանի Հանրապետության կառավարության մի շարք որոշումներ ուժը կորցրած ճանաչելու մասին» N 596-Ն որոշմամբ սահմանված է Հայաստանում կառուցապատման նպատակով թույլտվությունների և այլ փաստաթղթերի տրամադրման կարգը, որը չի սահմանում առավել դյուրին ընթացակարգ մարզերի համայնքների բնակավայրերում նախատեսվող՝ ոչ տարանցիկ, տեղական նշանակության ճանապարհների ընթացիկ վերանորոգման և բարելավման համար: Ներկայումս համայնքային ճանապարհների (փոքրածավալ) բարեկարգման աշխատանքների մի մասն արդեն իսկ իրականացվում է համայնքների սուբվենցիոն ծրագրերի շրջանակներում, որոնց համար կառավարության 2015 թվականի մարտի 19-ի որոշմամբ ամրագրված ընթացակարգերը բարդ են, ժամանակատար և համայնքների սահմանափակ բյուջեների մասով՝ կատարման համար ոչ ծախսարդյունավետ: Համայնքային ոչ առևտրային ու մասնավոր կազմակերպությունների միջոցով նմանատիպ աշխատանքների կատարումը դյուրին դարձնելու նպատակով առաջարկվում է. - ոչ տարանցիկ, մարզերի համայնքներում (այդ թվում՝ գյուղական բնակավայրերում) տեղական նշանակության ճանապարհների սալարկման, խճապատման, երթևեկելի մասի և մայթերի բարեկարգման աշխատանքները ընդգրկել կառավարության 2015 թվականի մարտի 19-ի N 596-Ն որոշմամբ հաստատված N4 հավելվածի ցածր ռիսկայնության աստիճանի (I կատեգորիայի) դասակարգում ունեցող օբյեկտների ցանկում, որոնց համար չի պահանջվի շինարարության թույլտվություն: Միաժամանակ, նմանատիպ ծրագրերի իրագործման արդյունավետությունն ապահովելու համար Քաղաքաշինության կոմիտեի կողմից մարզերի համայնքների ոչ տարանցիկ, տեղական նշանակության ճանապարհների սալարկման, խճապատման, երթևեկելի մասի և մայթերի բարեկարգման աշխատանքների կատարման ուղեցույցը առաջիկայում կներկայացվի տարածքային և ենթակառուցվածքների զարգացման նախարարություն՝ համայնքապետարաններին տրամադրելու և իղեկավարումն ընդունելու համար:

13:31 - 24 սեպտեմբերի, 2020

Կառավարությունը հաստատեց. ԱԶԲ-ն COVID-19-ի դեմ պայքարում ՀՀ-ին հատկացնում է 2 մլն դոլար |armenpress.am|

armenpress.am: Հայաստանի Հանրապետության և Ասիական զարգացման բանկի միջև նախատեսվող «COVID-19-ին արձագանքման ծրագիր» դրամաշնորհային համաձայնագրի շրջանակներում Հայաստանի Հանրապետության կառավարությունը կստանա 2 միլիոն ԱՄՆ դոլարի դրամաշնորհ։ Կառավարությունը հավանություն տվեց դրամաշնորհային համաձայնագրի հաստատմանը: Ըստ հիմնավորման, դրամաշնորհի միջոցները կօգտագործվեն կորոնավիրուսային հիվանդության (COVID-19) համաճարակի հետևանքով տուժած առաջնային գծի բուժաշխատողների և բնակչության համար, մասնավորապես պաշտպանիչ անձնական սարքավորումների, թեստավորման կոմպլեկտների, ընդհանուր բժշկական պարագաների և այլ անհրաժեշտ միջոցների ձեռքբերման համար։ «Հաշվի առնելով Հայաստանի Հանրապետությունում COVID-19 համաճարակի տարածման վիճակագրությունը՝ դրամաշնորհային համաձայնագրի ստորագրումը կենսական նշանակություն ունի պանդեմիայի կանխարգելմանն ուղղված ծրագրերի ֆինանսավորման համար»,- ասված է հիմնավորման մեջ։

13:17 - 24 սեպտեմբերի, 2020

Հայաստանի դատական ոլորտում բարեփոխումների համար Եվրոպական հանձնաժողովը 30 մլն եվրո կտրամադրի |aysor.am|

aysor.am: Կառավարությունն այսօր հավանություն տվեց «Հայաստանի Հանրապետության և Եվրոպական հանձնաժողովի միջև «Աջակցություն Հայաստանում դատական ոլորտի բարեփոխումների իրականացմանը. փուլ I» ֆինանսավորման համաձայնագրի ստորագրման առաջարկությանը: Դրանով սահմանվում է Եվրոպական միության կողմից ֆինանսավորումը՝ 30 մլն եվրո գումարի չափով, որից 3 մլն եվրոն միտված է տեխնիկական աջակցությանը (հիմնականում խորհրդատվական ծառայություններին), իսկ մնացած 27 մլն՝ երեք հավասար մասնաբաժիններով հատկացվելու է պետական բյուջեին՝ ըստ համաձայնագրի ընդհանուր և հատուկ պայմանների իրականացման։ Ծրագիրն ուղղված է արդարադատության ոլորտում Հայաստանի Հանրապետության բարեփոխումների իրականացման գործընթացին աջակցելուն՝ Համապարփակ և ընդլայնված համագործակցության համաձայնագրի (ՀԸԳՄ) շրջանակներում ՀՀ ստանձնած պարտավորություններին և ԵՄ լավագույն գործելակերպերին համապատասխան։ Ծրագրի ընդհանուր նպատակն է հնարավոր դարձնել արդարադատության ոլորտում օրենքի գերակայության և կոռուպցիայի դեմ արդյունավետ պայքարի ապահովումը։ Հատուկ նպատակներն են արդարադատության համակարգում անկախության, բարեվարքության և հաշվետվողականության ամրապնդումը, ծառայությունների մատուցման և դրա կատարողականի բարելավումը, ինչպես նաև կոռուպցիայի նկատմամբ դատական համակարգի հակազդեցության ուժեղացումը։ Ծրագրի հիմքում ընկած են Դատական և իրավական բարեփոխումների ռազմավարությամբ և վերջինիս 2019-2023թթ. գործողությունների ծրագրով ամրագրված առաջնահերթությունները, ինչպիսիք են՝ կոռուպցիայի դեմ պայքարը, դատավորների անկախության, անկողմնակալության ու հաշվետվողականության, ինչպես նաև դատական իշխանության գործունեության արդյունավետության բարելավումը։ Ծրագրում արտացոլված են նաև ՀՀ հակակոռուպցիոն ռազմավարությունում տեղ գտած առաջնահերթությունները, որոնցից է մասնագիտացված հակակոռուպցիոն դատարանի և համապատասխան կանխարգելիչ, դատախազական և քննչական մարմինների ստեղծումը։

12:43 - 24 սեպտեմբերի, 2020