Արմավիրի մարզ

Արմավիրի մարզը վարչատարածքային միավոր է Հայաստանում։ Արմավիրի մարզկենտրոնն Արմավիր քաղաքն է։ Տարածքը 1242 կմ² է, բնակչությունը 284 հազար մարդ։ Գտնվում է 800-1000 մ բարձրություններում։

Արմավիրի մարզը բնակչության թվով եւ խտությամբ Հայաստանում գրավում է առաջին տեղը։ Մարզին բնորոշ է այն, որ չնայած ռելիեֆային պայմանների միատարրությանը՝ բնակչության տեղաբաշխումը հավասարաչափ չէ։ Նրա ամենամեծ կուտակումը մարզի արեւելյան հատվածում է։ Դեպի արեւմուտք շարժվելիս այն կտրուկ նվազում է։ Արմավիրի մարզն ունի երեք քաղաք՝ Արմավիրը (29,319 բնակիչ), Վաղարշապատը (46,540 բնակիչ) եւ Մեծամորը (9,191 բնակիչ)։ Գործող մարզպետը Համբարձում Մաթեւոսյանն է։

ՋՕԸ-երն օրեր շարունակ մաքրել ու բեռնատարներով տեղափոխել են ջրանցքների աղբը |hetq.am|

hetq.am: Արարատյան դաշտում ոռոգման սեզոնի մեկնարկը կհայտարարվի հաջորդ շաբաթվանից: «Ջրօգտագործողների ընկերությունների» (ՋՕԸ) տնօրեններն ասում են, որ տարին անձրեւային է եւ դեռեւս ջրի մեծ պահանջարկ չկա: Արարատի մարզում տարվա առաջին հայտերը ներկայացրել են կաղամբ եւ կարտոֆիլ մշակողները՝ վերջին երկու օրերի ցրտահարությունը մեղմելու համար: ՋՕԸ-երի ղեկավարները վստահեցնում են, որ առաջնային ջրանցքներն արդեն մաքրել են եւ այս պահին կարող են ջուր մատակարարել գյուղացուն: «Ջրօգտագործողների ընկերությունների» գործելաոճն այս տարի նկատելիորեն փոխվել է, ընկերություններն էջեր ունեն facebook սոցիալական ցանցում, որտեղ ամեն օր թարմացվող լրատվությամբ տեղեկացնում են կատարվող աշխատանքների մասին: Նրանցից մեկը՝ «Արմավիր» ՋՕԸ-ն, նաեւ կայքէջ ունի, եւ դա հուսադրում է, որ այս չարչրկված եւ խորհրդավոր ոլորտում ի վերջո պարզություն կմտնի՝ բնակչության հետ բաց եւ հրապարակային երկխոսություն ծավալելու միջոցով: ՋՕԸ-երն իրենց սպասարկման տարածքներում այս օրերին գարնան նախապատրաստական աշխատանքներ են կատարում՝ մաքրվում են միջտնտեսային եւ ներտնտեսային ջրանցքները, վերանորոգվում եւ տեղադրվում են պոմպակայանները, խորքային հորերի ենթակայանները եւ այլն: «Ի սկզբանե աշխատանքները տարանջատել էինք երկու մասի. սկզբում առուներն ու ջրանցքներն ենք մաքրել, եւ հիմա արդեն ջուրը հոսում է ջրանցքներում: Դա չի խանգարում մյուս աշխատանքներն ավարտին հասցնելուն: Համայնքների մեծ մասում ցեմենտբետոնյա աշխատանքներն ավարտել ենք: Երեք օրից կավարտենք մեքենատրակտորային աշխատանքները, իսկ մինչեւ շաբաթվա վերջն ամբողջությամբ կավարտենք ձեռքով մաքրման աշխատանքները»,- հայտնեց «Արմավիր» ՋՕԸ գործադիր տնօրենի ժ/պ Վահագն Արշակյանը: Արմավիրի մարզն սպասարկող մյուս՝ «Էջմիածին» ՋՕԸ-ի գործադիր տնօրենի ժ/պ Արման Ղալեչյանն ասում է, որ ջրամատակարարումն սկսել են այն համայնքներից, որտեղ ոռոգումն ավելի վաղ է սկսվում: Մի քանի անգամ հավաքված անձրեւաջրերն են տվել ոռոգման համար: Ընկերությունը դեռեւս չի ավարտել համակարգը բարեկարգելու աշխատանքները: Մարտ ամսից ձեռքի եւ հատուկ տեխնիկայի միջոցով իրականացնում են առվահանման, ներտնտեսային եւ միջտնտեսային ջրանցքների մաքրման ու նորոգման, խորքային հորերի, ապամոնտաժված տրանսֆորմատորների մոնտաժման, պոմպերի ու շարժիչների նորոգման, խողովակների զոդման եւ այլ աշխատանքներ: «Համալիր միջոցառումների արդյունքում ՋՕԸ-ի սպասարկման տարածքում ակնկալվում է արդյունավետ ոռոգման սեզոն»,- համոզված է Արման Ղալեչյանը: Ջրային կոմիտեի նախագահի տեղակալ Կարեն Դաղբաշյանը հաստատում է, որ այս տարի ՋՕԸ-երն ավելի մեծ ծավալի մաքրման եւ բարեկարգման աշխատանքներ են կատարել: Գարնան նախապատրաստական աշխատանքներն իրականացնելու համար պետբյուջեից սուբվենցիա է տրամադրվել նրանց: «Աշխատանքի 70%-ն արդեն իրականացրել են: Գումարը հատկացրել է Ջրային կոմիտեն, ինքն էլ վերահսկում է աշխատանքները»,- հայտնեց պրն Դաղբաշյանը: Արտակարգ դրության պայմաններից ելնելով ՋՕԸ-երը հետաձգել են բնակիչների հետ պայմանագրեր կնքելու եւ ջրապահանջարկի տարվա հայտերը լրացնելու աշխատանքները: ՋՕԸ-երի ղեկավարներն ասում են, որ ջրբաշխներին թույլ չեն տալիս տներն այցելել, բայց ջրի պահանջ ներկայացնող գյուղացիների հետ հանդիպում են դաշտերում եւ հայտերը լրացնում են: Հետեւաբար, Արարատի եւ Արմավիրի մազերի ՋՕԸ-երը հետաձգել են նաեւ «Ջրառ» ՓԲԸ-ին ներկայացվող ջրապահանջարկի տարեկան հայտը: Նրանք ասում են, որ նախորդ տարիների մոտավոր հաշվարկով նախնական հայտեր են ներկայացրել «Ջրառ»-ին: Երբ մշակաբույսերի քանակը հայտերով կճշտեն, ավելի որոշակի կլինի ջրապահանջարկը «Ջրառ» ՓԲԸ-ից: ««Արմավիրում մեծ տարածք են զբաղեցնում այգիները, մեզ հայտնի է նաեւ բազմամյա մշակաբույսերի համար չփոփոխվող ջրառի քանակը, այդ հաշվարկով նախնական հայտ ենք ներկայացրել, իսկ հուլիսի 1-ին, երբ հայտերն ընդունված կլինեն, ուղղում կտանք «Ջրառ»-ին»,- ասում է «Արմավիր» ՋՕԸ-ի գործադիր տնօրենը: Վերջինս նշեց նաեւ, որ դեռեւս «Ջրառ»-ից վերցվող ջրով ոռոգում չեն կատարում, հիմա մեխանիկական եղանակով է ոռոգումն իրականացվում, իսկ կանալի ջուրն ամբարվում է Սեւջուր գետի ավազանում, որպեսզի հետո օգտագործվի ոռոգման համար: Արարատի մարզի հողերի մի մասի սպասարկումն իրականացնող «Արտաշատ» ՋՕԸ-ի գործադիր տնօրենի ժ/պ Կառլեն Մկրտչյանն ասում է, որ ջրօգտագործողների մի մասի հետ հասցրել են պայմանագիր կնքել, ջրամատակարումն սկսելու հետ մեկտեղ կշարունակեն աշխատանքները: Այս ՋՕԸ-ի սպասարկման տարածքում հայտավորված է 11,500 հա հողատարածք, որը ոռոգելու համար 120 մլն խմ ջուր են վերցնում «Ջրառ»-ից: Ջրապահանջարկը դեռեւս չեն ներկայացրել, բայցեւ չեն անհանգստանում, քանի որ ոռոգման սեզոնը դեռեւս չի սկսվել: Եթե ջրի պահանջարկ լինում է՝ տալիս են խորքային հորերից: Կորոնավիրուսը բավականին տարածված է Արարատի մարզում: «Արարատ» ՋՕԸ-ի տնօրեն Նշան Հակոբյանը խնդրահարույց է համարում աշխատանքը այն գյուղերում, որտեղ վարակակիրներ կան, ուստի պայմանագրեր կնքելը հետաձգել են: ՋՕԸ-երը ջրօգտագործողներին տեղեկացրել են նաեւ, որ կորոնավիրուսի (COVID-19) պատճառով անժամկետ հետաձգում են ներկայացուցչական ժողովներ հրավիրելը: «Պայմանավորվենք, որ այլեւս աղբը թափելու ենք աղբավայրում, այլ ոչ թե ջրատարերում» Ջրանցքներում աղբահանություն իրականացնելն աշխատատար եւ լրացուցիչ ծախսեր պահանջող գործ է դարձել ՋՕԸ-երի համար: Բանն այն է, որ ոռոգման սեզոնից հետո, հատկապես բնակավայերի միջով անցնող ջրանցքները, մինչեւ գարուն վերածվում են աղբավայրերի: Բնակիչներն անարգել դրանց մեջ են նետում ոչ միայն կենցաղային աղբը, պլաստիկե տարաները, այլեւ կոշտ մետաղական աղբը: ՋՕԸ-երն իրենց հրապարակած տեսանյութերում ցուցադրում են օրեր շարունակ մաքրվող ու բեռնատարներով տեղափոխվող աղբը: «Էջմիածին» ՋՕԸ-ի ժ/պ Արման Ղալեչյանն ընկերության facebook-ի էջում անդրադարձել է Փարաքարի եւ Թաիրովի ներհամայնքային ոռոգման համար նախատեսված ջրատարի անմխիթար եւ հակասանիտարական վիճակին: Փարաքարիցների շրջանում առավել հայտնի «Շադրլու» ջրանցքն անմխիթար վիճակում է եղել, ջրանցքն արդեն մաքրվել է եւ աղբատար չդարձնելու համար կծածկվի: «Էջմիածին» ՋՕԸ-ի տնօրենը խնդրանքով դիմել է փարաքարցիներին ու թաիրովցիներին. «Պայմանավորվենք, որ այլեւս աղբը թափելու ենք աղբավայրում, այլ ոչ թե ջրատարերում»: Համայնքներում ոռոգման ներտնտեսային համակարգը մաքրելու գործը համայնքապետարանների պարտավորությունն է, իսկ որոշ հատվածներում՝ ՋՕԸ-ինը: «Արմավիր» ՋՕԸ գործադիր տնօրենի ժ/պ Վահագն Արշակյանն ասում է, որ այս տարի տեղափոխել են նաեւ վերջին տարիներին առուներից մաքրված աղբը, որը կուտակել էին համայնքի տարածքում: Շարունակությունը՝ hetq.am-ում

09:44 - 10 ապրիլի, 2020

Արշալույս համայնքի ղեկավարին մեղադրանք է առաջադրվել՝ պաշտոնեական լիազորությունները չարաշահելու համար

ՀՀ քննչական կոմիտեի զինվորական քննչական գլխավոր վարչության հատկապես կարևոր գործերի քննության վարչությունում քննվող քրեական գործի նախաքննությամբ պարզվել է, որ Արմավիրի մարզի Արշալույս գյուղի բնակիչ Զարզանդ Գրիգորյանը, հանդիսանալով Արմավիրի մարզի Արշալույս համայնքի ղեկավար, հակառակ ծառայության շահերի օգտագործելով իր պաշտոնեական դիրքը, պաշտոնի անձնագրին չբավարարող անձանց արվեստի դպրոցի և մանկապարտեզի տնօրենի պաշտոններին նշանակելու մասին ստորագրել է կարգադրություններ: ՔԿ լրատվական ծառայությունից հայտնում են, որ քրեական գործի նախաքննությամբ փաստական տվյալներ են ձեռք բերվել այն մասին, որ Զ. Գրիգորյանը, հանդիսանալով տեղական ինքնակառավարման մարմնում մշտապես կազմակերպական-տնօրինչական գործառույթներ իրականացնող պաշտոնատար անձ, անձնական այլ շահագրգռվածությունից ելնելով, այն է՝ նույն համայնքի ավագանու անդամ Ա. Ս.-ի համար ցանկալի վիճակ ստեղծելու նպատակով վերջինիս կնոջ՝ Կ. Ֆ.-ին, պաշտոնի նշանակելու համար, հակառակ ծառայության շահերի օգտագործելով իր պաշտոնեական դիրքը, խախտել է «Վարչարարության հիմունքների և վարչական վարույթի մասին» ՀՀ օրենքի 32-րդ հոդվածի պահանջները, համաձայն որի՝ հանդիսանալով վարչական մարմին, հայտնաբերելով համագյուղացի Կ. Ֆ.-ի՝ համայնքում գործող «Արվեստի դպրոց» ՀՈԱԿ-ի պաշտոնում նշանակվելու կապակցությամբ իրեն 2014թ. դեկտեմբերի 04-ին հասցեագրված դիմումին կից փաստաթղթերի թերի լինելու հանգամանքը, Կ. Ֆ.-ին սահմանված ժամկետում կից փաստաթղթերի ցանկը ու առաջարկ անելու փոխարեն, որում բացակայել է բարձրագույն կրթություն ունենալու հանգամանքը հիմնավորող փաստաթղթի՝ դիպլոմի պատճեն, անտեսել է հիշյալ օրենքի պահանջը և վերոնշյալ դիմումի վրա կատարած մակագրությամբ համայնքապետարանի աշխատակազմի քարտուղարին հանձնարարել է կազմել կարգադրություն՝ Կ.Ֆ.-ին հիշյալ պաշտոնին նշանակելու մասին: Այնուհետև, անտեսելով «ՊՈԱԿ-ների մասին» ՀՀ օրենքի 16-րդ հոդվածի 1-ին մասի պահանջները, համաձայն որի՝ գործադիր մարմնի պաշտոնում կարող են նշանակվել միայն ՀՀ այն գործունակ չափահաս քաղաքացիները, ովքեր ունեն բարձրագույն կրթություն, իսկ «Արվեստի դպրոց» ՀՈԱԿ-ը, նույն օրենքի 9-րդ հոդվածի 5-րդ մասի համաձայն, հանդիսացել է գործադիր մարմին, հիշյալ պայմաններում իրավիճակից բխող ճիշտ որոշում ընդունելու և Կ.Ֆ.-ի դիմումը հասցեատիրոջը վերադարձնելու փոխարեն, հակառակ վերոգրյալի, անտեսել է հիշյալ օրենքների պահանջը և վերոնշյալ դիմումի վրա իր մակագրությամբ համայնքապետարանի աշխատակազմի քարտուղարին հանձնարարել է կազմել կարգադրություն՝ Կ.Ֆ.-ին հիշյալ պաշտոնին նշանակելու մասին, նպաստավոր պայմաններ ստեղծել՝ դիմումը համայնքի ավագանու քննարկմանը և հավանությանն արժանացնելու առումով, որպիսի պայմաններում համայնքի ավագանու՝ 04.12.2014թ. N 66 որոշումը հիմք ընդունելով, բարձրագույն կրթություն չունեցող Կ.Ֆ.-ին իր՝ 2014 թվականի դեկտեմբերի 27-ի N 29 կարգադրությամբ նշանակել է «Արվեստի դպրոց» համայնքային ոչ առևտրային կազմակերպության տնօրեն՝ 12.01.2015թ. վերջինիս հետ անորոշ ժամկետով կնքելով աշխատանքային պայմանագիր, համաձայն որի Կ.Ֆ.-ն հիշյալ պաշտոնում պաշտոնավարել է մինչև 2018 թվականի հուլիսի 11-ը: Արդյունքում խաթարվել է պետության և կոնկրետ պաշտոնում դրա անձնագրին համապատասխանող անձի օրինական շահը, էական վնաս պատճառվել դրան, այն է՝ խախտվել կոնկրետ պաշտոնում դրա անձնագրին համապատասխանող անձի աշխատանքի անցնելու պարտադիր պայմանը: Բացի այդ, Զ. Գրիգորյանը Կ.Ֆ.-ին պաշտոնի նշանակելու համար հակառակ ծառայության շահերի օգտագործելով իր պաշտոնեական դիրքը, կրկին անտեսել է ինչպես «ՊՈԱԿ-ների մասին» ՀՀ օրենքի 16-րդ հոդվածի 1-ին մասի պահանջը /գործադիր մարմնի պաշտոնում կարող են նշանակվել միայն ՀՀ այն գործունակ չափահաս քաղաքացիները, ովքեր ունեն բարձրագույն կրթություն /այնպես էլ՝ «Նախադպրոցական կրթության մասին» ՀՀ օրենքի և ՀՀ կրթության և գիտության նախարարի՝ 2011 թվականի ապրիլի 26-ի N 416-Ն հրամանով հաստատված կարգի 2-րդ գլխի 3-րդ կետի 1-ին ենթակետի պահանջը /նախադպրոցական ուսումնական հաստատության տնօրենի պաշտոնում կարող է աշխատել բարձրագույն կրթություն ունեցող անձը /բակալավր, դիպլոմավորված մասնագետ, մագիստրոս/, ով վերջին 10 տարվա ընթացքում պետք է ունենա առնվազն 2 տարվա ընդհանուր աշխատանքային ստաժ/, որպիսի պայմաններում միաժամանակ անտեսել է ՀՀ օրենքի 32-րդ հոդվածի պահանջը, համաձայն որի՝ հանդիսանալով վարչական մարմին և հայտնաբերելով Արշալույս համայնքի բնակիչ, տվյալ պահին համայնքում գործող «Արվեստի դպրոց» ՀՈԱԿ-ի տնօրենի պաշտոնը զբաղեցնող անձ Կ.Ֆ.-ի՝ նույն համայնքում գործող «Արշալույսի մանկապարտեզ» ՀՈԱԿ-ի տնօրեն նշանակվելու կապակցությամբ իրեն 2017թ. հուլիսի 20-ին հասցեագրված դիմումին կից փաստաթղթերի թերի լինելու հանգամանքը, միաժամանակ «ՊՈԱԿ-ների մասին» ՀՀ օրենքի 15-րդ հոդվածի 3-րդ մասի պահանջը /կազմակերպության գործադիր մարմնի պաշտոնում նշանակված կամ ընտրության արդյունքներով գործադիր մարմնի պաշտոնում նշանակված անձը չի կարող զբաղեցնել այլ պաշտոն կամ կատարել այլ վճարովի աշխատանք՝ բացի գիտական, մանկավարժական և ստեղծագործական աշխատանքից/ խախտելուն զուգահեռ միջոցներ ձեռնարկելու փոխարեն՝ Կ.Ֆ.-ին չի առաջարկել սահմանված ժամկետում համալրել կից փաստաթղթերի ցանկը, որում բացակայել է վերջինիս բարձրագույն կրթություն ունենալու հանգամանքը հիմնավորող փաստաթղթի՝ դիպլոմի պատճեն, անտեսել է հիշյալ օրենքների պահանջը և վերոնշյալ դիմումի վրա իր մակագրությամբ համայնքապետարանի աշխատակազմի քարտուղարին հանձնարարել է կազմել կարգադրություն՝ Կ.Ֆ.-ին հիշյալ պաշտոնին նշանակելու մասին, որպիսի պայմաններում համայնքի ավագանու՝ 24.07.2017թ. N 38 որոշումը հիմք ընդունելով, բարձրագույն կրթություն չունեցող Կ.Ֆ.-ին իր՝ 2017 թվականի հուլիսի 31-ի N 15 կարգադրությամբ նշանակել է «Արշալույսի մանկապարտեզ» ՀՈԱԿ-ի տնօրեն՝ վերջինիս հետ անորոշ ժամկետով կնքելով աշխատանքային պայմանագիր, համաձայն որի՝ Կ.Ֆ.-ն հիշյալ և «Արվեստի դպրոց» ՀՈԱԿ-ի տնօրենի պաշտոններում պաշտոնավարել է մինչև 2018 թվականի հուլիսի 11-ը: Արդյունքում խաթարվել է պետության և կոնկրետ պաշտոնում դրա անձնագրին համապատասխանող անձի օրինական շահը, էական վնաս պատճառվել դրան, այն է՝ խախտվել է կոնկրետ պաշտոնում դրա անձնագրին համապատասխանող անձի աշխատանքի անցնելու պարտադիր պայմանը: Ձեռք բերված բավարար ապացույցների համակցությամբ՝ Զ. Գրիգորյանին մեղադրանք է առաջադրվել՝ ՀՀ քրեական օրենսգրքի 308-րդ հոդվածի 1-ին մասով հանրորեն վտանգավոր արարքներ կատարելու համար: Քրեական գործը՝ մեղադրական եզրակացությամբ, ուղարկվել է նախաքննության նկատմամբ հսկողություն իրականացնող դատախազին:

11:40 - 17 մարտի, 2020