Ինֆոքոմ

Սևանա լճի մակարդակը և լճից ջրառները 2002-2021 թվականներին․ ամփոփ տվյալներ

Սևանա լճի մակարդակը և լճից ջրառները 2002-2021 թվականներին․ ամփոփ տվյալներ

Օրեր առաջ նորընտիր Ազգային ժողովում քննարկվում էր Սևանա լճից ոռոգման նպատակներով ջրառ իրականացնելու վերաբերյալ օրենքի փոփոխության նախագիծը, համաձայն որի՝ կառավարության որոշմամբ արդեն իսկ հաստատված 170 մլն խորանարդ մետր ջրառի թույլատրելի սահմանը փոփոխվեց՝ դառնալով 245 մլն խորանարդ մետր։  Կառավարությունը հավելյալ ջրառի անհրաժեշտությունը հիմնավորում է սակավ տեղումներից և շոգ եղանակից առաջացած ջրի դեֆիցիտը լրացնելու անհրաժեշտությամբ։ Օրենքում փոփոխություն կատարելու սույն նախագիծը թեև թեժ քննարկումներով, սակայն ընդունվեց երկրորդ ընթերցմամբ և ամբողջությամբ՝ ձայների 57 կողմ, 19 դեմ և 0 ձեռնպահ հարաբերակցությամբ։ Քանի որ նոր ձևավորված Ազգային ժողովի 3 խմբակցություններում ՀՀ նախկին և ներկա իշխանության ներկայացուցիչներն են և այս հարցի քննարկման ժամանակ համեմատականներ անցկացվեցին նախկին և ներկա կառավարող ուժերի միջև, թե ով ինչպես է կարողացել վերահսկել Սևանա լճից ջրառի իրականացումը և լճի մակարդակի բարձրության պահպանումը, որոշեցինք ուսումնասիրել 20 տարվա կտրվածքով Սևանա լճի բարձրության մակարդակը, ինչպես նաև լճից ջրառի չափերը։ Սևանա լճի մակարդակի փոփոխությունը պայմանավորված է տվյալ տարվա հիդրոլոգիական և եղանակակլիմայական պայմաններով, այսինքն՝ գետերով ներհոսքներից, տեղումներից և գոլորշիացումներից։ Սևանա լճից ջրառի չափաքանակը 2002-2021 թվականներին 2002 թվականին (նախագահ՝ Ռոբերտ Քոչարյան) Սևանից իրականացվել է 99,6 մլն խորանարդ մետր ջրառ, 2003 թվականին՝ 118,31 մլն խորանարդ մետր, 2003-ին՝ 118,31 մլն խորանարդ մետր, իսկ 2004-ին՝ 149,91 մլն խորանարդ մետր։ 2005 թվականին կառավարության որոշմամբ նախատեսվել էր իրականացնել 150 մլն խորանարդ մետր ջրառ․ իրականացվել է 149,55 մլն խորանարդ մետր, այսինքն՝ հավելյալ ջրառի կարիք չի եղել։ 2006 թվականին կառավարության որոշմամբ նախատեսվել էր 120 մլն խորանարդ մետր ջրառ, սակայն իրականացվել է նախատեսվածից ավելի՝ 152,37 մլն խորանարդ մետր։ 2007 թվականին Սևանից ջրառի համար կառավարության որոշմամբ նախատեսված էր 120 մլն խորանարդ մետր, սակայն այդ տարի իրականացվեց նախատեսվածից ավելի՝ 154,56 մլն խորանարդ մետր։ 2008 թվականին (նախագահ՝ Սերժ Սարգսյան) կառավարության որոշմամբ նախատեսված էր նախորդ տարիների համեմատությամբ բավականին շատ՝ 315 մլն խորանարդ մետր ջրառ․ իրականացվել է 303,69 մլն խորանարդ մետր, այսինքն՝ հավելյալ ջրառ չի կատարվել, թեև ի սկզբանե կառավարության որոշմամբ սահմանվածը նախորդ տարիների համեմատությամբ բավականին շատ էր։ 2009 թվականի կառավարության որոշման համաձայն՝ նախատեսված էր 142 մլն խորանարդ մետր ջրառ․ իրականացվել է 126,29 մլն խորանարդ մետր։ 2010 թվականին կառավարության որոշմամբ նախատեսված 168,9 մլն խորանարդ մետր ջրառից իրականացվել է 157,74 մլն խորանարդ մետրը։ 2011 թվականի որոշմամբ նախատեսված 170 մլն խորանարդ մետր ջրառից իրականացվել է 168,33 մլն խորանարդ մետրը։ 2012 թվականին կառավարության որոշմամբ դարձյալ սահմանվել էր մյուս տարիների համեմատությամբ բավականին բարձր ցուցանիշ, ինչպես 2008 թվականի դեպքում էր։ Նախատեսված 319,2 մլն խորանարդ մետր ջրառից իրականացվել է 317,65 մլն խորանարդ մետրը։ 2013 թվականի որոշմամբ նախատեսված 170 մլն խորանարդ մետր ջրառից իրականացվել է 169,95 մլն խորանարդ մետրը։ 2014 թվականի որոշմամբ նախատեսված էր 270 մլն խորանարդ մետրի ջրառ, որից իրականացվել է 269,62 մլն խորանարդ մետրը։ Համաձայն Արտակարգ իրավիճակների նախարարության զեկույցի՝ 2008, 2012, 2013 և 2014 թվականները համարվել են սակավաջուր տարիներ։ 2015 և 2016 թվականներին նախատեսվել և իրականացվել է 170 մլն խորանարդ մետրի ջրառ։ 2017 թվականի որոշմամբ նախատեսված 270 մլն խորանարդ մետր ջրառից իրականացվել է 266,75 մլն խորանարդ մետրը։ 2018 թվականին (վարչապետ՝ Նիկոլ Փաշինյան) կառավարության որոշմամբ ի սկզբանե նախատեսվել էր 170 մլն խորանարդ մետր ջրառ, սակայն հետո Ազգային ժողովին ներկայացվեց և ընդունվեց 40 մլն խորանարդ մետր հավելյալ ջրառ իրականացնելու նախագիծ։ Ընդհանուր առմամբ այդ տարի Սևանից իրականացվել է 200,62 մլն խորանարդ մետր ջրառ։ 2019 և 2020 թվականներին նախատեսվել և իրականացվել է 170 մլն խորանարդ մետրի ջրառ, այսինքն՝ հավելյալ ջրառի անհրաժեշտություն չի առաջացել։ Արդեն այս տարի՝ 2021 թվականին, կառավարության որոշմամբ նախատեսված էր իրականացնել 170 մլն խորանարդ մետրի ջրառ, սակայն ինչպես վերևում նշեցինք, օրեր առաջ ընդունվեց փոփոխությունների նախագիծ, որի համաձայն՝ ջրառի թույլատրելի սահմանը դարձավ 245 մլն խորանարդ մետր։ Այսպիսով՝ վերջին 20 տարիներին ամենաշատ ջրառ իրականացվել է 2012 թվականին, ընդ որում, այդ տարում գետերով, Արփա-Սևանով ներհոսքերը և տեղումները ավելի քիչ են եղել, քան գոլորշիացումն ու իրականացված ջրառը, այսինքն՝ գրանցվել է բացասական հաշվեմնացորդ, ինչի հետևանքով էլ լճի մակարդակը 2013 թվականի հունվարի 1-ի դրությամբ նախորդ տարվա նույն ժամանակահտվածի նկատմամբ ցածր է եղել 3 սանտիմետրով։ Սևանա լճի մակարդակը 2002-2021 թվականներին Արտակարգ իրավիճակների նախարարության զեկույցի համաձայն՝ Սևանա լճի մակարդակի փոփոխությունների մոնիթորինգ իրականացվում է 4 դիտակետերում։ Ըստ զեկույցի տվյալների՝ լճի մակարդակի իջեցումն սկսել է 1933 թվականից, երբ ջրառի տարեկան քանակը գերազանցել է նրա բնական հոսքին։ 1981-2001 թվականները համարվել են լճի մակարդակի պայմանական հավասարակշռության տարիներ։ 2002-ից սկսած լճի մակարդակն սկսել է բարձրանալ։ Լճի մակարդակը տարվա ընթացքում տատանվում է և ամենաբարձրը դիտվում է յուրաքանչյուր տարվա հուլիսին։ Դիտարկենք Սևանա լճի մակարդակի տատանումները յուրաքանչյուր տարվա հունվարի 1-ի դրությամբ։ Այսպես՝ 2002 թվականի հունվարի 1-ին Սևանա լճի մակարդակը եղել է 1896 մետր 32 սանտիմետր, 2008-ի հունվարի 1-ին՝ 1898 մետր 79 սանտիմետր, այսինքն՝ այդ տարիներին մակարդակը բարձրացել է 2 մետր 47 սանտիմետրով։  2018 թվականի հունվարի 1-ին լճի մակարդակը եղել է 1900 մետր 39 սանտիմետր, որը 2008 թվականի համեմատությամբ բարձր է 1 մետր 60 սանտիմետրով։ 2019 թվականի հունվարի մեկին լճի մակարդակը 2018 թվականի համեմատությամբ ցածր է եղել 3 սանտիմետրով, սակայն 2020-ին դարձյալ բարձրացել է, և 2021-ին լճի մակարդակը եղել է 1900 մետր 52 սանտիմետր, որը 2018-ի համեմատությամբ բարձր է 10 սանտիմետրով։ Ընդհանուր առմամբ՝ վերջին 20 տարիներին Սևանա լճի մակարդակը բարձրացել է 4 մետր և 20 սանտիմետրով։ Այսպիսով՝ ինչպես տեսնում ենք ներկայացված տվյալներից՝ Սևանա լճի մակարդակը վերջին 20 տարիներին շարունակաբար բարձրացել է և այս տարվա հունվարի 1-ին նախորդ տարիների համեմատությամբ եղել է ամենաբարձրը, սակայն նախատեսված հավելյալ ջրառի պարագայում հնարավոր է՝ նվազի։ Նարեկ Մարտիրոսյան
18:10 - 24 օգոստոսի, 2021
ԱԺ Նիստի ժամանակ տեղի ունեցավ հանցագործություն, որը սադրեցին ելույթ ունեցողը եւ նիստը վարողը․ սա պետք է ընդունել որպես հանցագործության մասին պաշտոնական հաղորդում․ Արծվիկ Մինասյան

ԱԺ Նիստի ժամանակ տեղի ունեցավ հանցագործություն, որը սադրեցին ելույթ ունեցողը եւ նիստը վարողը․ սա պետք է ընդունել որպես հանցագործության մասին պաշտոնական հաղորդում․ Արծվիկ Մինասյան

Նախորդ նիստի ժամանակ տեղի ունեցավ հանցագործություն, որը սադրեցին ելույթ ունեցողը (ԱԺ ամբիոնից ելույթ էր ունենում Նիկոլ Փաշինյանը,-խմբ․) եւ նիստը վարողը (ԱԺ խոսնակ Ալեն Սիմոնյանը,-խմբ․)․ սա պետք է ընդունել որպես հանցագործության մասին պաշտոնական հաղորդում։ Ընդ որում՝ բռնի ուժի գործադրումը՝ ՊՊԾ հրամանատարի կողմից, նաեւ առավոտյան լրագրողների նկատմամբ է կիրառվել։  Այս մասին այսօր Ազգային ժողովում հարցուպատասխանի ընթացքում ասաց «Հայաստան» խմբակցության պատգամվոր Արծվիկ Մինասյանը։   Վերջինս հարց ուղղեց վարչապետ Նիկոլ Փաշինյանին, նշելով, թե նոյեմբերի 9-ից հետո հանրային լայն շրջանակներում Փաշինյանի գործունեությանը տրվում են գնահատականներ, որոնք քաղաքական բաղադիչ ունենալով հանդերձ պարունակում են կոնկրետ քրեաիրավական որակումներ։ Մինասյանը մասնավորապես ասաց․ « Տեղի ունեցած իրադարձություններն արձանագրում են, որ Դուք օժանդակություն եք ցուցաբերում մեր թշնամիներին՝ ադրբեջանական և թուրքական պետություններին, կազմալուծել եք ներքին և արտաքին անվտանգությունը, ինչպես նաև պետական կառավարման համակարգը։ Վարել եք գաղտնի բանակցություններ, երկիրը ներքաշել եք պատերազմի մեջ, չարաշահելով Ձեր լիազորությունները, Ձեզ եք վերագրել գերագույն հրամանատարի գործառույթներ, ունեցել եք բանավոր և գրավոր պայմանավորվածություններ, որի արդյունքում ունենք հազարավոր կիլոմետր տարածքների կորուստներ, հարյուրավոր կրթական հաստատություններ, մշակութային արժեքներ և այլն։ Այս ամենը քրեական օրենսգրքում ներկայացվում է որպես վնասարարություն, պետական գաղտնիքի հրապարակում, պաշտոնական լիազորությունների անցում կամ չարաշահում, և ի երջո պետական դավաճանություն։ Եթե Դուք հետևողականորեն խորշում եք այս բառերից՝ դավաճան, հողատու, որը հասկանալի է, արդյոք ի՞նչ անվանում կտաք այլ գործողություններին։ Երկրորդ՝ հաշվի առնելով, որ Գլխավոր դատախազությունը հետևողականորեն հրաժարվում է առերեևույթ այս հանցագործությունների վերաբերյալ հարուցված քրեական գործերից, արդյոք Դուք պատրա՞ստ եք հետևողական լինել և դավաճանության հոդվածով քրեական գործի շրջանակներում ներգրավվել գործի քննությանը»։ Փաշինյանը դիտարկման ի պատասխան նշեց, որ ինքը հետևել է ՊՊԾ գործողություններին և քաջալերեց նրանց՝ շարունակել պահպանել ԱԺ բնականոն գործունեությունը՝ Աժ նախագի հրահանգներին համապատասխան։ Փաշինյանը շնորհակալություն հայտնեց ՊՊԾ-ին օրենքով սահմանաված ծառայողական պարտականությունները հստակ կատարելու համար։ Վարչապետը տեղեկացրեց, թե ինքը ՊՊԾ աշխատակիցներին շատ խիստ հրահանգել է, որ նրանք որևէ մեկին, առավել ևս զուգարաններում անզգույշ չքաշքշեն։ Վերջինս ընդգծեց, թե նրանք չեն կարող անցնել իր հրամանի վրայով։  «Եթե հիշողությունս չի դավաճանում հիմա դատական գործընթաց է գնում Ձեր կուսակից Պողոս Պողոսյանին զուգարանում անզգույշ քաշքշելու հետևանքով սպանելու գործով և ինչքան հիշում եմ, Դուք տասն և ավելի տարիներ այդ հանցագործության մասն չեք էլ բարձրաձայնել, որ Ձեր կուսակից ընկերոջը ծեծելով սպանել են զուգարանում»,- պատասխանեց Փաշինյանը։ Ինչ վերաբերում է գաղտնի բանակցություններին, վարչապետն ասաց, թե ինքը որևէ մեկի հետ գաղտնի բանակցություններ չի վարել։ Բանակցությունները կոնֆիդենցիալ են եղել միշտ և բոլորի ժամանակ, բայց գաղտնի բանակցություններ որևէ մեկի հետ ինքը վարել։ «Դուք ասում եք՝ «խորշում եք հողատու, դավաճան, կապիտուլյանտ բառերից», կներեք, երբ  այդ մեղադրանքները հնչել են, ես բազմաթիվ անգամներ եկել եմ այս ամիբոնի մոտ և ասել եմ՝ դավաճանը դուք եք, կապիտուլյանտը դուք եք, հողատուն դուք եք, խնդրում եմ ոչ մեկը սա անձնավորված չընդունի։ Հետո ասել եմ՝ ժողովուրդ ջան, հիմա մենք գալիս ենք ձեր դատի առաջ կանգնելու և ժողովուրդը իր քվեարկությամբ որոշել է, թե դավաճանը, հողատուն և կոպիտուլյանը ով է և յուրաքանչյուրին դրել ա իր տեղը։ Եկեք հանգիստ նստենք մեր տեղը, այդ թեմաները առանձնակի մի խառնեք, ես ոչ մի բանից չեմ խորշում, ես խնդիր չունեմ, ուզում եք քննարկենք՝ եկեք քննարկենք։ Հանդարտվեք ի վերջո, մի ստիպեք ինձ ցույց տալ, թե ով պետք է խորշի, ով  է դավաճանը, պետությունը թալանողը, հողատուն, կապիտուլյանտը։ Ես խոսում եմ ՀՀ քաղաքացիներից ստացած մանդատին համապատասխան և ամենայն հարգանքով կոչ եմ անում հանդարտվել»,- հավելեց Փաշինյանը։ Մինասյանն իր խոսքի սկզբում ասաց, թե ինքն արձանագրում է, որ ՊՊԾ աշխատակիցների կողմից իրականացված հանցագործությունը տեղի է ունեցել Փաշինյանի ցուցումով։  «Քանի որ իշխանությունը հավերժ չէ, պատասխանատվությունը վրա է հասնելու միանշանակ։ Նաև արձանագրեմ, որ Ձեր հիշողությունը դավաճանում է Ձեզ։ Երկրորդ մասով կա կոնկրետ լուծման տարբերակ՝ դավաճանության հոդվածով քրեական գործի հարուցում և դրա շրջանակներում գործի մանրամանսն քննություն, որը որևէ ձև չի կարող փոխարինվել քննիչ հանձնաժողովով կամ այլ բանով։ Սրա շրջանակներում ակնկալում եմ, որ Դուք պատասխանեք՝ պատրաստ ե՞ք ներգրավվել, կամ ներկայացնել հաղորդում կա՛մ սուտ մատնության համար, կա՛մ հենց դավաճանության հոդվածով, որպեսզի հարուցվի քրեկան գործը»,- արձագանքեց Մինասյանը հարցնելով, թե դատավարական ի՞նչ կարգավիճակ է Փաշինյանն իր համար պատերացնում այդ գործի շրջանակներում։ «Ես այստեղ չեմ՝ քրեական գործեր հարուցելու, կարճելու, որպես մեղադրյալ ներգրավվելու, գործը դատարան ուղարկելու, մեղադրական եզրակացությունը հաստատելու, որոշումներ կայացնելու համար։ ՀՀ-ում կան ինստիտուտներ, որոնց իրավական և օրենսդրական պարտականությունն է դա իրականացնելը։ Իմ պատկերացմամբ կան քննվող քրեական գործեր և դրանց շրջանակում ամեն ինչ կպարզվի և կպարզաբանվի։ Որևէ մեկին հարցնո՞ւմ են՝ «Դուք ուզո՞ւմ եք ներգրավվել որպես մեղադրյալ»։ Հարցը չեմ հասկանում»,- եզրափակեց Փաշինյանը։
17:51 - 24 օգոստոսի, 2021
«Միլիարդների մասին վստահորդիդ հետ խոսա»․ Փաշինյանի՝ Վարդեւանյանին տված պատասխանից հետո ԱԺ-ում իրարանցում սկսվեց

«Միլիարդների մասին վստահորդիդ հետ խոսա»․ Փաշինյանի՝ Վարդեւանյանին տված պատասխանից հետո ԱԺ-ում իրարանցում սկսվեց

ԱԺ-ում կառավարության ծրագրի քննարկման ժամանակ «Հայաստան» խմբակցության պատգամավոր Արամ Վարդեւանյանը, դիմելով Նիկոլ Փաշինյանին, ընթերցեց 2020 թվականի դեկտեմբերի 12-ին հրապարկված մի ձայնագրության տեքստ․ ձայնագրությունը վերաբերում է Արցախի նախագահ Արայիկ Հարությունյանի եւ Արցախի ԱԺ նախկին պատգամավոր Ռուսլան Իսրայելյանի խոսակցությանը։ Վարդեւանյանը մեջբերեց ձայնագրության այն մասը, ըստ որի՝ Արայիկ Հարությունյանն ասում է, թե Ստեփանակերտը պահելու համար տասը օր է՝ մարդ են ուզում, բայց տասը օր է՝ Ստեփանակերտը երկու կաղ մարդու հույսին է։ Վարդեւանյանը հարցրեց՝ Փաշինյանը տեղյա՞կ է ձայնագրությունից, եւ արդյոք Փաշինյանը երբեւէ այս հարցով գտնվե՞լ է նախաքննական մարմնում, քանի որ արդեն հարուցված քրեական գործ կա։ Փաշինյանը պատասխանեց, որ ձայնագրությունից տեղյակ չէ․ «Ձեր ասած հանգամանքներից տեղյակ եմ, եւ նոյեմբերի 9-ի հայտարարությունը ստորագրվել է նաեւ ձեր նկարագրած հանգամանքները հաշվի առնելով։ Ձեր հարցերի մեջ էնքան հակասություն կա։ Ես չեմ հասկացել, մեկ ասում եք՝ հայրենիք կորցնել, մեկ ասում եք՝ պատերազմ կանգեցնել։ Պատերազմը կանգնեցնելը գին է ունենում, չէ՞։ Հիմա ձեր ասած հայրենիքը պահելու համար պետք էր պայքարել, թե՞ պետք չէր պայքարել։ Ժամանակին ասել եմ, որ մեր ընդդիմադիր գործընկերները չեն նկատում, որ իրենք իրենց իսկ բարձրացրած մեղադրանքներով չեզոքացնում են իրենց իսկ բարձրացրած մեղադրանքները»,- ասաց Փաշինյանը։ Նա հայտնեց, որ այս հարցով նախաքննության մարմնում չի եղել․ «Ես եղել եմ ամենամեծ նախաքննության մարմնում, ես կանգնել եմ ՀՀ ժողովրդի առաջ․ դուք ուրիշ ձայնագրություններ, ձեր բոլոր մեղադրանքները ձեր բոլոր հեռուստաընկերություններով, թաքուն, բացահայտ տվել եք, եւ ժողովուրդը գնացել, իր դատն արել է։ Դուք ստիպված եք ժողովրդի դատավճռի հետ հաշվի նստել եւ համակերպվել դրա հետ»,- ասաց Փաշինյանը՝ նշելով, որ ընդդիմադիրները ԱԺ-ում նստած են այդ դատավճռի համաձայն։ Արձագանքելով Փաշինյանի պատասխանին՝ Վարդեւանյանն ասաց, թե ժողովուրդը չի կարող դատավճիռ կայացնել, դատավաճիռ կայացնում է դատական իշխանությունը․ «Դատական իշխանությունը նույնիսկ ժողովրդի՝ ձեր ասած դատավճռի պայմաններում կարող է լրիվ այլ վճիռ կայացնել։ Հիմա ճի՞շտ եմ ըմբռնում, որ միջազգային հանցագործություններ գործած Հիտլերը, եթե վերընտրվեր, ոչ մի բանի համար չպիտի դատվեր։ Սենց տրամաբանություն իրավաբանությունում չկա»,,- ասաց Վարդեւանյանը։ Նա նշեց, որ քրեական գործ կա հարուցված՝ Փաշինյանի եւ Ալիեւի միջեւ ուղիղ կապի, 5 միլիարդի մասին։ Փաշինյանը քմծիծաղով պատասխանեց․ «Էդ միլիարդների մասին, կարծում եմ, ճիշտ կանեք՝ ձեր վստահորդի հետ խոսեք (նկատի ունի Ռոբերտ Քոչարյանին, որի պաշտպանն էր Վարդեւանյանը,- խմբ․)։ Էնտեղ մարդ կա (ձեռքով ցույց է տալիս ընդդիմադիրների կողմը,-խմբ․), թող գա 5 միլիարդի հետ կապված ասի, բացատրի, վկայություն տա։ Բա որ ժողովուրդը չի կարա որոշում կայացնի, ինչի՞ եք 300 հոգով գնդակահարության որոշումներ կայացնում, բեմադրում (հիշեցնում է ընդդիմադիրների ակցիան, որի ժամանակ բեմադրվում էր Չաուշեսկույի եւ նրա կնոջ սպանությունը,-խմբ․)։ Բա դուք կարաք 3 հոգով որոշում կայացնեք, ժողովուրդը չի կարա 800․000 հոգով որոշում կայացնի՞։ Ժողովուրդը կարող ա դատավճիռ կայացնի եւ իրագործի դատավճիռը, ուրեմն գնդակահարության տեսարանները, որ բեմադրում էիք, հիշեիք՝ ժողովուրդը կարա՞ որոշում կայացնի, թե՞ չի կարա»,,- ասաց Փաշինյանն, ու դահլիճում անմիջապես իրարանցում սկսվեց, պատգամավորները տեղից սկսեցին բղավել ու ռեպլիկներ անել։ Փաշինյանը, դիմելով Վարդեւանյանին, այդ աղմուկի մեջ բղավեց․ «Ու ասում եմ՝ վստահորդիդ հետ խոսա՛, կանդրադառնամ վստահորդիդ միլիարդներին»։ ԱԺ խոսնակ Ալեն Սիմոնյանը «Հայաստան» խմբակցության պատգամավոր Արմենուհի Կյուրեղյանին նախազգուշացրեց ու ԱԺ կանոնակարգի հիման վրա նրան նախազգուշացում հայատարարեց։ ԱԺ-ում պատգամավորները բղավոցները չէին դադարում, Սիմոնյանը ստիպված եղավ դարձյալ բարձր գոչել, որպեսզի խմբակցությունների պատգամավորները տեղից չբղավեն։
17:45 - 24 օգոստոսի, 2021
Բանակի բարեփոխումները մեր էքսկլուզիվ օրակարգը չենք համարում և շատ ուշադիր լսելու ենք բոլոր քննադատությունները․ Նիկոլ Փաշինյան

Բանակի բարեփոխումները մեր էքսկլուզիվ օրակարգը չենք համարում և շատ ուշադիր լսելու ենք բոլոր քննադատությունները․ Նիկոլ Փաշինյան

Այսօր Ազգային ժողովում «Հայաստան» խմբակցության ղեկավար Սեյրան Օհանյանը անդրադառնալով ԱԺ «Պատիվ ունեմ» խմբակցության պատգամավոր Աննա Մկրտչյանի ելույթից հետո տեղի ունեցած միջավադեպին՝ նշեց, որ ինքը նույնպես դատապարտում է  որը տեղի ունեցածը։  «Մյուս դատապարտման խնդիրը կայանում է նրանում, որ մեր գործընկերները այստեղ չեն և հնարավորություն չունեն հենց ծրագրի քննարկմանը մասնակցություն ունենալ։ Այս ամենը արդյունք է նաև նրան, որ ռազմաքաղաքական իրավիճակին ո՛չ Ազգային ժողովի քննարկումներում, ո՛չ այսօր ծրագրի մեջ լիարժեք գնահատական չի եղել, իսկ լիարժեք գնահատականը անհաջողությունների և  պարտությունների այն շարանն է , որն արտահայտվել է նաև մեր սահմաններում։ Հիմա հարցս հետևյալն է՝ Զինված ուժերում բարեփոխումներ են իրականացվում և դրանց շրջանակներում Դուք չե՞ք կարծում, որ թուլացնում ենք, մեր ռազմական ներուժը, ասենք ժամկետային ծառայության ժամկետը փոխելով։ Երկրորդը ի՞նչ գործընթացի արդյունքում է, կամ ի՞նչ փաստաթղթի, ի՞նչ խորը վերլուծության արյդունքում է, որ մենք կազմել ենք բարեփոխումների կամ չգիտեմ այլ պլան, որովհետև հանրությանը չի ներկայացվում»,- ասաց Օհանյանը։ Անդրադառնալով հարցին Փաշինյանը պատասխանեց, որ բանակի  բարեփոխումների գործընթացի ռազմավարությունը և ճանապարհային քարտեզը վերջնականապես ձևավորված չէ։ «Մենք քաղաքական որոշակի նպատակադրումներ ենք ձևակերպում, որը արդյունքում պետք է դառնա փաստաթուղթ, որը պետք է ընդունվի Անվտանգության խորհուրդում  և չեմ տեսնում որևէ խոչընդոտ, որ Դուք կամ ընդդիմադիր խմբակցությունները ներկայացնող որևէ գործընկեր այս կապակցությամբ արտահայտի դիրքորոշումներ։ Երբ ես այս ամբիոնից որոշակի շեշտադրումներ եմ անում, դրա նպատակներից մեկը գուցե արձագանքներ լսելն է։ Մեր բանակը, Զինված ուժերը , անվտանգության օրակարգը մեր սեփականությունը չենք համարում, մենք երբեք չենք ասել՝ «վայ, մենք ամենալավն ենք դրանից հասկանում և չենք լսում այլ կարծիքներ, տեսակետներ», չենք ասել և չենք ասի»,- պատասխանեց Փաշինյանը։  Վերջինս հավելեց, որ կառավարողն ուժն ունի որոշակի պատկերացումներ, այդ պատկերացումները հիմնված են որոշակի վերլուծությունների, փորձագիտական որոշակի առաջարկությունների վրա, բայց իրենք այս  թեման երբեք փակված չեն համարել։ Վարչապետը շարունակելով իր խոսքն ասաց․ «Մենք ասում ենք այսպիսի նպատակադրում ունենք, և ենթադրվում է, որ դա որոշակի օրենսդրական փոփոխություններով պետք է ուղեկցվի և զուգակցվիա։ Դա գալու է Ազգային ժողով, անցնելու է Ձեր քննակման խողովակով։ Այդ բարեփոխումը չի ավարտվել և սկսվել է միայն նախապատրաստական շրջանը։ Պատգամավորի կարգավիճակը հնարավորություն է տալիս այդ բոլոր աշխատանքներին մասնակցել, ընդ որում առանց գաղտնիության սահմանափակման, որովհետև պատգամավորներին այդ բովանդակությունը լիարժեք հասու է։ Այո՛, մենք կարծում ենք, որ այս կառուցվածքը արդյունավետ չէ, որովհետև մենք մարդուն ասում ենք՝ 15 օր եղիր օրինակ՝ տաքսու վարորդ, փականագործ, կամ 15 օր եղիր զինվոր, դա էֆեկտիվ կառույց  չէ։  Դուք էլ եք դա տեսել, Դուք էլ եք խոսել այդ մասին։ Ես անձամբ առիթ եմ ունեցել խոսել Ձեզ հետ այդ մասին, երբ Դուք Պաշտպանության նախարար էինք, ես պատգամավոր։ Բանակի բարեփոխումները մեր էքսկլուզիվ օրակարգը չենք համարում և շատ ուշադիր լսելու ենք բոլոր քննադատությունները»։ Օհանյանը շեշտեց, որ մինչև պատերազմը ինքը վարչապետին առաջարկել է հանդիպելու և անվտանգային համակարգի վերաբերյալ առաջարկություններ քննարկելու, սակայն Օհանյանի խոսքով Փաշինյանի կողմից հանդիպելու առաջարկը չի ընդունվել։ Օհանյանը նշեց, որ իր կարծիքով մենք բանակի բարեփոխումների հիմնական ծրագիր չունենք։  «Ես նկատի ունեի, որ մինչև բարեփոխումները սկսելը պետք է պաշտպանական ռազմավարական վերանայում արվի, անվտանգության միջավայրի գնահատական տրվի, ներքին և արտաքին սպառնալիքները հաշվի առնվեն և դրանից ելնելով պլան կազմվի։ Այսօրվա մեր բարեփոխումները երբ ուզում են ներկայացնել, մենք այսպես ենք հասկանում, կամ տեսնում ենք արտաքին տեսք, կամ ասում են, որ ՌԴ-ն կամ ՀԱՊԿ-ը պետք է գան և մեր փոխարեն ինչ-որ խնդիրներ կատարեն։ Ես կարծում եմ, որ պետք է պաշտպանական ռազմավարական վերանայում  իրականացվի և լուրջ ծրագիր պետք է կազմվի։ Ես գտնում եմ, որ անչափ կարևոր ծրագիր պետք է կազմվի բանակի բարեփոխման համար»,- եզրափակեց Օհանյանը։ Փաշինյանն ի պատասխան ընդգծեց, որ ընդհանուր ծրագիրը դեռ կազմվում է և առնվազն երկու անգամ ԱԽ-ում եղել է քննարկում, այս առումով մի քանի փաստաթղթերի նախագծեր են շրջանառվում։ «Աշխատանքն արվում է և կարծում եմ, որ նաև ցանկության դեպքում կարող եք հաղորդակից լինել այդ գործընթացին»,- եզրափակեց Փաշինյանը։
16:55 - 24 օգոստոսի, 2021
Ձեզնից առաջ հայ ժողովուրդը հստակ արձանագրել է, թե ինչպես է պատրաստվում լուծել Ղարաբաղի հարցը, ձեր ժամանակ շփոթ է առաջացել․ Արմեն Ռուստամյանը՝ Փաշինյանին

Ձեզնից առաջ հայ ժողովուրդը հստակ արձանագրել է, թե ինչպես է պատրաստվում լուծել Ղարաբաղի հարցը, ձեր ժամանակ շփոթ է առաջացել․ Արմեն Ռուստամյանը՝ Փաշինյանին

ԱԺ-ում կառավարության ծրագրի քննարկման ժամանակ «Հայաստան» խմբակցության պատգամավոր Արմեն Ռուստամյանը, դիմելով Նիկոլ Փաշինյանին, նկատեց, որ վարչապետը պատերազմի սանձազերծումը համարում է Արցախի վերաբերյալ մինչեւ հիմա ունեցած ոչ հստակ դիրքորոշումների, շփոթի հետեւանք։ Ռուստամյանը համաձայն է, որ դա այդպես է, բայց ինքը համարում է, որ այդ շփոթն առաջացել է Փաշինյանի ղեկավարման օրոք․ «Ձեզնից առաջ հայ ժողովուրդը հստակ արձանագրել է, թե ինչպես է պատրաստվում լուծել Ղարաբաղի հարցը, եւ դա եղել է թե Ղարաբաղի երկու հանրաքվեներով ամրագրված, թե նաեւ հռչակագրերով, որոնք բացառիկ փաստաթղեր են, որ ընդունվել են միաձայնությամբ՝ ՀՀ-ի եւ ԼՂ-ի անկախության հռչակագրերը։ Ըստ այդ մոտեցումների՝ հանրաքվեն փաստել է մի շատ կարեւոր լուծման ուղղություն՝ տարածքներ՝ կարգավիճակի դիմաց, բայց էնտեղ շատ հստակ հերթականություն է նշված՝ կարգավիճակ, հետո՝ տարածքներ։ Եթե դա լավ չի ընկալվել, դա այլ հարց է, բայց սեւով սպիտակի վրա գրված է, հստակ է։ Ինչ վերաբերում է միացման եւ անկախության հակադրմանը․ միացումը մեզ համար միշտ եղել է ռազմավարական նպատակ, իսկ անկախությունը՝ այդ նպատակին հասնելու մարտավարական հանգրվան»,- ասաց Ռուստամյանն ու շեշտեց՝ Փաշինյանի կառավարության ժամանակ շփոթ է առաջացել․ «Դուք սկզբից եկաք եւ խոսեցիք անկախության տեսակետից, որ չեք կարող ներկայացնել Ղարաբաղը, որովհետեւ Ղարաբաղի կողմից չեք ընտրվել, եւ պետք է Ղարաբաղը բանակցություններին մասնակցի, հետո ասացիք՝ Ղարաբաղը Հայաստան է, եւ վերջ։ Այսինքն՝ անկախությունը եւ մաիցումն իրար հակադրվում են, հաջորդաբար՝ իրար լրացնում, վերջում ավելի անհասկանալի բան ասացիք՝ էնպիսի լուծում պետք է լինի, որ բավարարի Հայաստանին, Ղարաբաղին, Ադրբեջանին։ Պարզվեց՝ ունեցանք մի լուծում, որը բավարարեց միայն Ադրբեջանին։ Էս հարցն ինչպե՞ս եք դուք ներկայացնում որպես պատմական էնպիսի մի ձախողում, որի արդյունքում ունեցանք պատերազմ։ Շփոթն առաջացել է ձե՛ր ժամանակ»։ Ի պատասխան՝ Փաշինյանը դիտարկում արեց՝ Ռուստամյանը համարում է, որ Ղարաբաղի հարցը լուծված է․ «Էստեղ խնդիր եմ տեսնում, որովհետեւ ձեր այդ արձանագրումն ուղղակի համահունչ է Ադրբեջաննի արձանագրմանը, ես չեմ կարծում, որ ճիշտ է՝ ՀՀ ԱԺ-ում այդպիսի դիրքորոշում հնչի։ Դուք ասում եք, որ Արցախի ժողովուրդը հանրաքվեով լուծել է կարգավիճակի հարցը։ Եթե էդպես է, ապա ինչու է ՀՀ-ն, սկսած 2000-ականներից, բանակցել Ղարաբաղի կարգավիճակը ճշգրտելու հարցով հանրաքվե անցկացնելու հարցով․ քանի՞ անգամ հանրաքվե պետք է տեղի ունենա։ Դուք հակասությունների մասին եք ասում․ էդ ո՞նց է՝ մի կողմից Արցախի ընդունված Սահմանադրությամբ էդ նույն տարածքները համարվում են Արցախի մաս, ՀՀ օրենսդրությամբ՝ Ադրբեջանի մաս։ Էդ հակասությունները ի վերջո հասել են կուլմինացիայի»։ Փաշինյանն ասաց՝ այո՛, պատերազմը իրենց ժամանակ է եղել, բայց պատերազմի մասին ԱԺ ամբիոնից հայտարարել է Սերժ Սարգսյանը․ «Այս ամբիոնից 2018 թվականի ապրիլի 17-ին, հայտարարելով երկու բան՝ բանակցային գործընթացը կանգնած է եւ լավատեսություն չի ներշնչում, որովհետեւ Ադրբեջանի ակնկալիքները բանակցային գործընթացից անիրատեսական են եւ անընդունելի են մեզ համար, եւ երկրորդը՝ մենք այլեւս երկար ժամանակ չպիտի հույս ունենանք, որ Ադրբեջանը թողնելու է ռազմական ճանապարհով հարցը լուծելու իր մոտեցումը»։ Էդ պատերազմի գալն էս ամբիոնից ուրիշ մարդ է հայտարարել»,- ասաց Փաշինյանը՝ հավելելով, որ այդ հակասություններն, այո, եղել են, եւ իր օրոք հասել են կուլմինացիայի։ Արձագանքելով Փաշինյանի պատասխանին՝ Ռուստամյանը կրկնեց, որ Ղարաբաղը Հայաստանի մաս է՝ որպես ռազմավարական նպատակ․ «Այ դուք է՛դ չեք կարողացել ընկալել, դրանք զուգահեռ չի կարելի տանել, ե՛ւ ասել՝ անկախ է, ե՛ւ ասել՝ միացում։ Դրանք զուգահեռ չեն կարող լինել, իրար կհակասեն, բայց հետեւողականորեն գնալ հերթականության ճանապարհով, դա եղել է ռազմավարական նպատակ՝ միշտ, բայց որպես մարտավարական հանգրվան, եղել է անկախությունը։ Դուք որեւէ կասկած ունե՞ք, որ եթե հասնեինք նրան, որ Ադրբեջանը ճանաչեր Ղարաբաղի անկախությունը, միանգամից կհամաձայներ, որ միանան իրար, որովհետեւ չէր ուզի, որ հայկական երկու անկախ պետություններ լինեն, երկու ձայն ունենան ՄԱԿ-ում։ Սրանք հաշվարկված են եղել, դուք եկել եք, էդ ժառանգությունը չեք յուրացրել, ձեր իշխանության պռոբլեմը սա է»։
16:30 - 24 օգոստոսի, 2021
Ասում են՝ Արցախի տարածքների 70%-ը կորսվել է․ ձեր հիշատակած 70%-ի 80%-ը դուք ընդունել եք որպես Ադրբեջանի անբաժանելի մաս․ Փաշինյանի պատասխանը՝ Տ․ Աբրահամյանի հարցին

Ասում են՝ Արցախի տարածքների 70%-ը կորսվել է․ ձեր հիշատակած 70%-ի 80%-ը դուք ընդունել եք որպես Ադրբեջանի անբաժանելի մաս․ Փաշինյանի պատասխանը՝ Տ․ Աբրահամյանի հարցին

«Իմ կարծիքով՝ պարոն Աբրահամյանը շատ կարևոր հարց է բարձրացնում, թե արդյոք կարո՞ղ է պատերազմից խուսափելու համար տարածքներ զիջվեն։ Ես ուզում եմ բոլորս շատ լավ հասկականք ու արձանագրենք, որ բանակցային գործընթացի ողջ ընթացքում հայկական պատվիարկությունը երբեք չի վիճարկել պարոն Աբրահամյանի կողմից հիշատակվող տարածքների՝ Ադրբեջանին վերադարձնելու անխուսափելիությունը»։ Այս մասին ԱԺ հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով «Պատիվ ունեմ» խմբակցության պատգամավոր Տիգրան Աբրահամյանի հարցին։ «Եթե մենք առաջնորդվելիս լինեինք պարոն Աբրահամյանի տրամաբանությամբ, և հիմա նաև այդ քննադատությունը կա, որ պատերազմից առաջ այդ տարածքները պետք էր զիջել, որ ընդհակառակը, ՀՀ կառավարությունը սխալ է վարվել, որ այդ հանգրվանում ստանձնելով բանակցային գործընթացը՝ չի զիջել այդ տարածքները․․․ Այդ քննադատությունը կա, և ես իմ ելույթում ասացի, որ մեր հայեցակարգային ընկալումներում կան շատ լուրջ ներքին հակասություններ, և հենց պարոն Աբրահամյանի բարձրացրած հարցում այդ հակասությունները արտահայտվում են։ Խոսվում է ուրիշ տարածքների զիջման մասին, նոյեմբերի 9-ից հետո։ Նոյեմբերի 9-ից հետո Զինված ուժերը հետ են քաշվել այն տարածքներից, որը պարոն Աբրահամյանի ներկայացրած կուսակցությունը, լինելով խորհրդարանական մեծամասնություն, 2010 թվականին այս դահլիճում ընդունել է «Վարչատարածքային բաժանման մասին» ՀՀ օրենք, որով այդ տարածքները ճանաչել է Ադրբեջանի անբաժանելի մաս, և այն մարդիկ, որոնք կողմ են քվեարկել այդ օրենքին, կամ որոնց ծնողները հենարան են դարձել այդ օրենքի քննարկման համար, այսօր ասում են, որ Արցախի տարածքների 70 տոկոսը կորսվել է։ Ո՛չ, այդ ձեր հիշատակած 70 տոկոսի 80 տոկոսը դուք ընդունել եք որպես Ադրբեջանի անբաժանելի մաս։ Դուք եք ընդունել, ուրիշ որևէ մեկը չի ընդունել։ Ես այստեղից ասում եմ անհերքելի փաստեր և ասելու եմ անհերքելի փաստեր, չկա այնպիսի հարց, որին պատասխանելուց ես կխուսափեմ։ Կարող է լինել իրավիճակ, երբ ես կասեմ՝ եկեք այդ հարցի պատասխանը ես բարձրաձայնեմ դռնփակ ռեժիմով, որովհետև դա ՀՀ ազգային անվտանգության հարց կարող է լինել»,- ասաց Փաշինյանը։
15:53 - 24 օգոստոսի, 2021
Ես՝ որպես վարչապետ, թույլ չեմ տալու ժողովրդավարությունն օգտագործել որպես ամենաթողության համար պատշաճ հարթակ․ Նիկոլ Փաշինյան

Ես՝ որպես վարչապետ, թույլ չեմ տալու ժողովրդավարությունն օգտագործել որպես ամենաթողության համար պատշաճ հարթակ․ Նիկոլ Փաշինյան

Ազգային ժողովում այսօր քննարկվում է կառավարության ծրագիրը։ Աժ նիստում վարչապետ Նիկոլ Փաշինյանը ներկայացրեց ծրագիրը, ինչից հետո սկսվեց հարցուպատասխանը։ ԱԺ «Պատիվ ունեմ» խմբակցության պատգամավոր Թագուհի Թովմասյանը իր խոսքում անդրադարձավ մայիսի 12-ից Գեղարքունիքի մարզում գտնվող ադրբեջանական զինուժի ներկայացուցիչների գործողություններին և դրանց հետևանքներին։ «Մասնավորապես մի շարք բնակավայրերում՝ Վերին Շորժայի Այրք, Ջաղացաձոր, Գեղամաբագ համայնքների ջրամատակարարումը սնուցող ջրամբարում, որտեղ ջուրը դատարկվել է , հիմա գտնվում է ադրբեջանցիների վերահսկողության տակ։ Ուզում էի իմանալ՝ արդյո՞ք այլընտրանքային տարբերակ մշակվել է, թե՞ ոչ,- մանրամասնեց Թովմասյանը։ Իր երկրորդ հարցով պատգամավորն անդրադարձավ Կութ համայնքից՝ ադրբեջանցի զինծառայողներ կողմից հափշտակված 80 գլուխ անասուններին և այն խնդրին, որ մինչև հիմա դրանք չեն վերադարձվել։ Թովմասյանը շեշտեց, որ Ազգային ժողովն այսօր քննարկում է կառավարության ծրագիրը, խոստումները, տեսականները, բայց ստացվում է, որ տարրական, անվտանգային հարցերը և մարդկանց կյանքի իրավունքը չեն պահպանվում։ «Չենք կարողանում պահպանել նաև նրանց սեփականության իրավունքը։ Ես կուզեի հետաքրքրվել՝ ինչ է սպասում այն գյուղացիներին, որոնք այսօր զրկված են 80 գլուխ անասունից»,- հավելեց Թովմասյանը։ Փաշինյանն ի պատասխան նշեց, որ ընդունում է պատգամավորի բարձրացրած հարցադրումների տրամաբանությունը, ներկաների ուշադրությունը հրավիրեց այն հանգամանքին, որ հակամարտության ողջ ընթացքում հազարավոր գլուխ անասուններ են հափշտակվել, հարյուրավոր քրեական գործեր են հարուցվել, որոնց մի մասը չի բացահայտվել, հազարավոր տներ են վնասվել, ենթակառուցվածքներ են վնասվել։ «Երբ խոսում ենք տարածաշրջանում խաղաղ զարգացման դարաշրջան բացելու մասին, խոսում ենք Ձեր առաջ քաշած օրակարգը սպասարկելու մասին, և ուզում եմ հիշեցնել, եթե ուզում եք իմանալ, թե ինչպես ենք վերաբերվում մարդկանց գույքային վնասները վերականգնելու այդ թվում պարտավորությանը, խնդրում եմ այցելեք Տավուշի մարզի Այգեպար գյուղ, որը 30 տարի եղել է անընդհատ գնդակոծությունների ներքո և Դուք այսօր գյուղը կգտնեք այլ վիճակում։ Կտեսնեք, որ այդ գյուղի ճանապարհները բոլորը ասֆալտապատված են, համենայն դեպս վատ վիճակում գտնվող տանիք չկա և այդպես շարունակ։ Մենք նույն գործընթացը պետք է իրականացնենք մեր բոլոր բնակավայրերում, իհարկե սահմանապահ գյուղերի դեպքում առանձնահատուկ քաղաքականություն և վերաբերմունք կա։ Իսկ ընդհանուր առմամբ տարածքային համաչափ զարգացման խնդրին ես անդրադարձա, իսկ ընդհանուր առմամբ անվտանգային խնդիրների կառավարման և կարգավորման մասին իմ պատկերացումները նույնպես բարձրաձայնեցի»։ Արձագանքի հնարավորությունից օգտվելով պատգամավոր Թովմասյանն անդրադարձավ այսօր ԱԺ օթյակում լրագրողների կողմից իրականացված ակցիային։ Նա փոխանցեց լրագրողների դժգոհությունը։«Լրագրողները փորձում էին Ձեր ուշադրությունը հրավիրել, որպես նախկին լրագրողի, որովետև և՛ ես, և՛ Դուք , և՛ Ազգային ժողովի այլ պատգամավորներ եղել են լրագրող, և մենք աշխատել ենք խորհուրդարանոմ, լուսաբանել ենք ԱԺ աշխատանքները և երբեք այսպիսի սահմանափակումների չենք ենթարկվել, այսպիսի տարբերակված մոտեցում չի եղել, որ օրինակ արգելվի իշխանական խմբակցության մոտով անցնել։ Ես կուզեի Ձեր վերաբերմունքը իմանալ և ի՞նչ պատասխան ունեք լրագրողներին»։ Հարցին ի պատասխան Փաշինյանն ասաց․ «Կառավարության ծրագրում լրագրողական էթիկայի կարգավորման հետ կապված մենք կոնկրետ առաջարկ ունենք, մենք կարծում ենք, որ պետք է օրենսդրական փոփոխություն առաջարկենք, որով սահմանենք ինստիտուտ, որ լրագրողները իրենք իրենց գործունեության էթիկայի որոշակի կանոններ կմշակեն, և իրենք կհետևեն այդ կանոնների ներկայացմանը, բայց մենք նաև աննախադեպ, շատ իրավիճակներ ունենք, և կառավարությունը ստիպված է աննախադեպ իրավիճակներին անդրադառնալ աննախադեպ քայլերով։ Կարծում եմ, որ ՀՀ քաղաքացիները իրավունք ունեն նաև իմանալ լրատվամիջոցների իրական շահառուների մասին, որպեսզի հստակ բաժանարար գծեր լինեն, և հստակ լինի՝ որևէ լրագրող, լրագրողական գործունեությամբ է զբաղվում, թե քաղաքական որոշակի շրջանակի, կամ ֆրակցիայի ներկայացուցիչ է։ Եթե ուշադրություն եք դարձրել, ես կառավարության ծրագիրը ներկայացնելիս ասել եմ, որ ես որպես վարչապետ թույլ չեմ տալու՝ ժողովրդավարությունը, որպես ամենաթողության համար պատշաճ հարթակ և բոլոր միջոցները ձեռնարկելու եմ, ընդ որում ոչ միայն ձեռնարկելու եմ սեփական ճաշակներին համապատասխան, այլ ՀՀ քաղաքացիներից ստացած մանդատի շրջանում»։ Փաշինյանը խոսքը եզրափակեց՝ անդրարդառնալով պատգամավորի հնչեցրած սահմանամերձ համայնքների վերաբերյալ հարցին․ «Սահմանամերձ համայնքների վերաբերյալ Ձեր ասածը ընդունում եմ, որպես ի գիտություն և ամեն ինչ կանենք, որ այդպես էլ լինի»։
15:37 - 24 օգոստոսի, 2021
Աննա Մկրտչյանին ԱԺ դահլիճից դուրս հանելու համար անվտանգության աշխատակիցներ հրավիրվեցին

Աննա Մկրտչյանին ԱԺ դահլիճից դուրս հանելու համար անվտանգության աշխատակիցներ հրավիրվեցին

ՀՀ խորհրդարանում Կառավարության ծրագրի քննարկման ժամանակ ՀՀ վարչապետ Նիկոլ Փաշինյանին հարց ուղղելու համար ի թիվս այլոց հերթագրվել էր նաեւ «Պատիվ ունեմ» խմբակցության պատգամավոր Աննա Մկրտչյանը, որն իր խոսքի սկզբում հայտարարեց՝ կառավարության ծրագիրը համարում է ձեւական փաստաթուղթ, ուստի ցանկանում է հիշեցումներ անել։ Նա Փաշինյանին դիմեց ոչ թե ազգանունով կամ պաշտոնով, այլ որպես «Ազգային ժողովի ամբիոնի մոտ կանգնած անձնավորություն» եւ ասաց․ «ԱԺ ամբիոնի մոտ կանգնած այս անձնավորությունը ոչ վաղ անցյալում հայտարարել էր, որ ինքը Ադրբեջանի ղեկավարության եւ ներքաղաքական իրականության մասին էնպիսի տվյալներ ունի, որ երբ ցանկանա, կարող է պայթեցնել Ադրբեջանի ներքաղաքական իրականությունը եւ, ընդհանրապես, ներքաղաքական իրավիճակը։ Ուզում եմ փաստել, որ էդ ահաբեկիչ Ալիեւը, զավթելով Արցախի 75 տոկոսը, խաթարելով ՀՀ անվտանգային ամբողջ համակարգը, հայտարարելով, որ Սեւանն էլ, Երեւանն էլ, ամեն ինչ իրենցն է, եւ ՀՀ իշխանությունները խելոք ու սուսուփուս կստորագրեն Ադրբեջանի տարածքային ամբողջականությունը հավաստող փաստաթուղթ, մեր կողմից որեւէ արձագանք չկա, եւ էս անձնավորությունը շարունակում է սպասել չգիտես ինչին, որպեսզի պայթեցնի ալիեւյան կլանի ղեկավարած իշխանությունը»,- ասաց Մկրտչյանը, ապա, դիմելով քաղաքացիներին, ասաց․ «Հարգելի՛ հայրենակիցներ, ձեզ որեւէ կերպ հնարավորություն ընձեռնված չէ տեսնելու իրականությունը, որը հիմա կա էս դահլիճում․ ուզում եմ ձեզ դրա մասին պատմել․ հիմա էս անձնավորությունը (դարձյալ նկատի ունի Փաշինյանին,- խմբ․), իր հետ դահլիճ ա բերել «ախռանիկներ», որոնք երբեւէ ԱԺ չեն մտել․․․»։ Ելույթի այս հատվածում ԱԺ խոսնակ Ալեն Սիմոնյանը Մկրտչյանին նախազգուշացում հայտարարեց, որին զուգահեռ ԱԺ նիստերի դահլիճում աղմուկ սկսվեց, ենթադրաբար, ՔՊ խմբակցության պատգամավորների շրջանից, քանի որ Սիմոնյանը նախազգուշացրեց նաեւ այդ խմբակցության պատգամավոր Հրաչյա Հակոբյանին։ Աննա Մկրտչյանի խոսափողը Սիմոնյանի պահանջով անջատեցին։ Փաշինյանը հարկ չհամարեց արձագանքել Մկրտչյանի ելույթին՝ նշելով, որ իրեն ուղղված հարց չի հնչել։ Նախազգուշացում ստացավ նաեւ «ՔՊ» խմբակցության պատգամավոր Արման Եղոյանը։ Պատգամավորները շարունակում էին արձագանքներ անել Մկրտչյանի ելույթի առնչությամբ, Մկրտչյանն էլ մի քանի անգամ հնչեցրեց «կապիտուլյանտ» բառը, եւ քանի որ խոսակցությունները չէին դադարում, Ալեն Սիմոնյանը ստիպված եղավ բղավել «լռությո՛ւն դահլիճում»։ Նա, դիմելով Մկրտչյանին, ասաց, որ մեկ նիստի ընթացքում խոսելու իրավունքից զրկում է պատգամավորին։ Հաջորդիվ հարց էր հնչեցնում «Պատիվ ունեմ» խմբակցության պատգամավոր Տիգրան Աբրահամյանը։ Նա, դիմելով Փաշինյանին, ասաց, որ ուզում է լսել նրա վերաբերմունքը ՔՊ-ականների հնչեցրած ռեպլիկների վերաբերյալ, ապա մեկնաբանել Փաշինյանի հայտարարություններն առ այն, որ նոյեմբերի 9-ի փաստաթղթից հետո այդ փաստաթղթով չնախատեսված տարածքները հանձնվել են Ադրբեջանին, թե «ռազմական գործողությունների ընթացքում կորցրած տարածքներն այլ կարգավիճակ ունեին, փաստաթղթով հանձնվող տարածքները՝ այլ կարգավիճակ»։ Աբրահամյանը հիշեցրեց, որ հետո ունեցանք նաեւ Հին Թաղերի, Խծաբերդի հանձնումը, որոնք նախատեսված չէին փաստաթղթով, ապա նաեւ Կովսականի, Սանասարի մի մասի հանձնում, որը նույնպես նախատեսված չէր նոյեմբերի 9-ի փաստաթղթով․ «Հետագայում դուք եւ ձեր տարբեր գործընկերներ նշեցին, որ եղել է պատերազմի վտանգ, եւ այն կանխելու եւ նոր պատերազմ թույլ չտալու համար ստիպված եք եղել գնալ զիջումների․ արդյոք Հայաստանում կամ Արցախում ապրող մեր հայրենակիցները կարող են ենթադրել, որ հաջորդ իսկ պատերազմի վտանգի պայմաններում պատերազմը կանխելու կամ վերսկսումը թույլ չտալու համար Հայաստանի կամ Արցախի տարածքներից կարող են նոր շրջաններ հանձնվել»։ Թիմակիցների արձագանքի վերաբերյալ Փաշինյանն ասաց, որ, իր կարծիքով, նրանք բավականին զուսպ, ինքը կասեր՝ նույնիսկ մեղմ են արձագանքում։ Այս խոսքից հետո դահլիճում դարձյալ աղմուկ սկսվեց, որը փորձեց սաստել Ալեն Սիմոնյանը։ Նա Աննա Մկրտչյանին հեռացրեց նիստերի դահլիճից՝ մինչեւ տվյալ օրվա ավարտը։ Նա խնդրեց լքել դահլիճը, այլապես անվտանգության աշխատակիցները կհեռացնեն։ Քանի որ նա չէր հեռանում դահլիճից, անվտանգության աշխատակիցներին ներս հրավիրեցին։ «Պատիվ ունեմ» եւ «Հայաստան» խմբակցությունների պատգամավորներն անմիջապես մոտեցան Աննա Մկրտչյանի աթոռին, որպեսզի անվտանգության աշխատակիցները նրան դուրս չհանեն։ Նիստն ընդմիջվեց։
15:11 - 24 օգոստոսի, 2021
Կառավարության հնգամյա ծրագրում չկա Արցախի Հանրապետություն ձևակերպումը

Կառավարության հնգամյա ծրագրում չկա Արցախի Հանրապետություն ձևակերպումը

Կառավարության՝ օգոստոսի 18-ի նիստի ընթացքում քննարկվեց նոր ձևավորված կառավարության հնգամյա ծրագիրը։ Հայաստանի հանրապետական կուսակցության փոխխոսնակ Արմեն Աշոտյանը օգոստոսի 20-ին իր ֆեյսբուքյան էջում անդրադարձավ կառավարության ծրագրի մի քանի դրույթների՝ նշելով, որ այնտեղից բացակայում է «Արցախի Հանրապետություն» եզրույթը։  Արմեն Աշոտյանը ճիշտ է․ կառավարության ներկայացրած ծրագրում չկան ո՛չ Արցախի Հանրապետություն, ո՛չ էլ Լեռնային Ղարաբաղի Հանրապետություն ձևակերպումները։ Կառավարության ծրագրում Արցախին վերաբերող հատվածներում հադիպում են միայն Արցախ, Լեռնային Ղարաբաղ, ԼՂ ձևակերպումները։ Ծրագրի «Արտաքին քաղաքականություն» բաժնում, օրինակ, նշվում է․ «Կառավարության արտաքին քաղաքականության ուղենիշներն են Հայաստանի Հանրապետության պետական շահերի պաշտպանությունը, Արցախի ժողովրդի իրավունքների և անվտանգության ապահովումը, տարածաշրջանային խաղաղության հաստատումը, տարածաշրջանի ապաշրջափակումը և կայունությունը: Արտաքին և  անվտանգային քաղաքականության առաջնահերթություններից է Ղարաբաղյան հիմնախնդրի խաղաղ և  համապարփակ կարգավորումը ԵԱՀԿ ՄԽ համանախագահության ներքո՝ հայտնի սկզբունքների և տարրերի հիման վրա, Արցախի ժողովրդի անվտանգության ապահովումը, ինչպես նաև  մշակութային ու կրոնական ժառանգության պահպանումը և  հումանիտար խնդիրների լուծումը»։ Ծրագրում կա նաև «Ղարաբաղյան հիմնախնդիր» բաժինը, որտեղ տրված է գրեթե նույն ձևակերպումը, ինչ վերը նշված հատվածում․  «Կառավարության գլխավոր խնդիրը պետք է լինի ԼՂ ժողովրդի անվտանգության ապահովումն ու Ղարաբաղյան հիմնախնդրի խաղաղ և  համապարփակ կարգավորումը։ Ղարաբաղյան հիմնախնդրի վերջնական կարգավորումը Կառավարությունը տեսնում է ԵԱՀԿ ՄԽ համանախագահության ներքո Լեռնային Ղարաբաղի վերջնական կարգավիճակի հստակեցմամբ՝ հայտնի սկզբունքների և տարրերի, այդ թվում՝ ինքնորոշման իրավունքի հիման վրա»:  «Ղարաբաղյան հիմնախնդիր» բաժնում Արցախի հետ հարաբերությունների մասին խոսելիս ևս չի տրվում Արցախի Հանրապետություն ձևակերպումը․ «Արցախի հետպատերազմյան վերականգնումը, տնտեսական կյանքի աշխուժացումը, տեղահանված բնակչության սոցիալական խնդիրների լուծումը, մշակութային ու կրոնական ժառանգության պահպանումը լինելու են Կառավարության ուշադրության կենտրոնում: Ջանք չի խնայվելու Արցախում արժանապատիվ և  բարեկեցիկ կյանքի պայմաններ ստեղծելու համար: Այս նպատակներին Կառավարությունը հասնելու է Արցախի իշխանությունների հետ համագործակցության խորացման, ինչպես նաև  Արցախի հետ գործակցության նոր ձևաչափերի ստեղծման միջոցով»: Ի տարբերություն կառավարության ծրագրի՝ «Քաղաքացիական պայմանագիր» կուսակցության նախընտրական ծրագրում մեկ անգամ հանդիպում է Արցախի Հանրապետություն ձևակերպումը։ Այս ձևակերպումը, սակայն, հանդիպում է ոչ թե կուսակցության նախընտրական ծրագրի արտաքին քաղաքականությանը կամ պաշտպանությանը վերաբերող հատվածներում, այլ «Սփյուռք» բաժնում։  Անդրադառնալով իրականացված ծրագրերին՝ ՔՊ նախընտրական ծրագրում նշվում է․ «Մեկնարկել ենք ենք «իԳործ» ծրագիրը: Աշխարհի լավագույն համալսարաններում մագիստրոսի աստիճան ունեցող 48 մասնագետներ մեկ տարի ժամկետով աշխատանքի են անցել Հայաստանի Հանրապետության 19 պետական կառավարման համակարգի մարմիններում: Կառավարության որոշման համաձայն՝ ծրագրի մասնակիցները կարող են նաև ներգրավվել Արցախի Հանրապետության պետական կառավարման համակարգում»: Նաև ներկայացնենք, թե ՀՀ որ կառավարությունների ծրագրերում են հանդիպում Արցախի Հանրապետություն կամ Լեռնային Ղարաբաղի Հանրապետություն ձևակերպումները։ Երկրորդ գումարման Ազգային ժողովը ձևավորվել է 1999 թ․, մեծամասնություն է կազմել «Միասնություն» դաշինքը (Հայաստանի հանրապետական կուսակցություն, Հայաստանի ժողովրդական կուսակցություն)։ Կառավարության կայքում ներակայացված է 2000-2003 թվականների ծրագիրը, որտեղ Արցախի Հանրապետությանը վերաբերող հատված չկա, հետևաբար՝ չկա նաև Արցախի Հանրապետություն ձևակերպումը։ Երրորդ գումարման խորհրդարանը ձևավորվել  է 2003-ին։ 2003-2007 թվականների ծրագրում ևս Արցախի Հանրապետությանը վերաբերող հատվածներ, հետևաբար՝ նաև Արցախի Հանրապետություն ձևակերպումը չկան։ Չորրորդ գումարման ԱԺ-ն ձևավորվել է 2007-ին, մեծամասնություն է կազմել ՀՀԿ-ն։ Կառավարության կայքում ներկայացված են 2007 և 2008-2012 ծրագրերը։ Այս ծրագրերում էլ, ինչպես նախորդներում, չկան Արցախի Հանրապետությանը վերաբերող հատվածներ, և տրված չէ Արցախի Հանրապետություն կամ Լեռնային Ղարաբաղի Հանրապետություն ձևակերպումը։ Հինգերորդ գումարման խորհրդարանը ձևավորվել է 2012-ին։ ԱԺ-ում կրկին մեծամասնություն է կազմել ՀՀԿ-ն։ Այս անգամ կառավարության ներկայացրած ծրագրում կան Արցախի Հանրապետությանը վերաբերող հատվածներ, ինչպես նաև տրված է Լեռնային Ղարաբաղի Հանրապետություն ձևակրպումը․ «Կառավարությունը բազմապատկելու է Հայաստանի Հանրապետության և Լեռնային Ղարաբաղի Հանրապետության նկատմամբ ցանկացած տեսակի ագրեսիայի դրսևորման վտանգի կանխարգելմանն ուղղված դիվանագիտական ջանքերը: Շարունակվելու են աշխատանքները կարգավորման շուրջ ընթացող բանակցություններում Լեռնային Ղարաբաղի Հանրապետությունը` որպես լիիրավ կողմ ներգրավելու ուղղությամբ: Լեռնային Ղարաբաղի հակամարտության կարգավորման հիմք է հանդիսանալու Արցախի ժողովրդի ինքնորոշման իրավունքի միջազգային ճանաչումը»: Վեցերորդ գումարման խորհրդարանը ձևվորվել է 2017-ին, կրկին մեծամասնություն է կազմել ՀՀԿ-ն։ Կառավարության 2017-2022 թթ․ ծրագրում ևս տրված է Արցախի Հանրապետություն ձևակերպումը․ «Մեր երկիրը բախվում է տարածաշրջանային մարտահրավերներին, որոնք սպառնում են մեր անվտանգությանը: Այս համատեքստում առանցքային է Հայաստանի Հանրապետության և Արցախի Հանրապետության անվտանգ զարգացման իրավաքաղաքական և ռազմական կայուն երաշխիքների ձևավորման խնդիրը»։ 2018-ի ապրիլ-մայիսյան իրադարձություններից հետո ձևավորված նոր կառավարությունը 2018-ին ներկայացրեց նոր ծրագիր, որտեղ չկար Արցախի Հանրապետություն ձևակերպումը․ ծրագրի տարբեր հատվածներում կային Արցախի անվտանգություն,  Ղարաբաղյան հիմնախնդիր ձևակերպումները։ 2018-ի խորհրդարանական արտահերթ ընտրություններից առաջ «Իմ քայլը» դաշինքի ներկայացրած նախընտրական ծրագրում Արցախի Հանրապետություն ձևակերպումը կար․ «Առանցքային նշանակություն ունեն Հայաստանի Հանրապետության եւ Արցախի Հանրապետության անվտանգության մակարդակի շարունակական բարձրացումը, Արցախի ինքնորոշման իրավունքի միջազգային ճանաչումը»։ Արտահերթ ընտրություններից հետո ձևավորված կառավարության 2019-ի ծրագրում, սակայն, այս ձևակերպումը բացակայում է․ «Առանցքային նշանակություն ունեն Հայաստանի արտաքին և ներքին անվտանգության ապահովումը, Արցախի անվտանգության երաշխավորումը և շարունակական ամրապնդումը»։  Այսպիսով, ներկայումս կառավարություն ձևավորած քաղաքական ուժը՝ «Քաղաքացիական պայմանագիրը», կառավարության՝  ո՛չ 2018-ի, ո՛չ 2019-ի, ո՛չ էլ վերջին՝ 2021-2026 թթ․ ծրագրերում չի տվել Արցախի Հանրապետություն ձևակերպումը, այս ձևակերպումը եղել է միայն «Իմ քայլը» դաշինքի և «Քաղաքացիական պայմանագիր» կուսակցության նախընտրական ծրագրերում։ Ինչ վերաբերում է նախորդ կառավարությունների ծրագրերին, ապա կառավարության կայքում ներկայացված են 2000-ից մինչև օրս բոլոր ծրագրերը, և միայն 2012-2017, 2017-2020 թթ․ ծրագրերում են եղել Լեռնային Ղարաբաղի Հանրապետություն ու Արցախի Հանրապետություն ձևակերպումները։ Աննա Սահակյան
14:23 - 24 օգոստոսի, 2021
Նիկոլ Փաշինյանի ելույթի ժամանակ լրագրողները ակցիա իրականացրին․ նրանք վարչապետի հետ հանդիպում են պահանջում

Նիկոլ Փաշինյանի ելույթի ժամանակ լրագրողները ակցիա իրականացրին․ նրանք վարչապետի հետ հանդիպում են պահանջում

Այսօր Ազգային ժողովում Նիկոլ Փաշինյանի ելույթի ընթացքում լրագրողները օթյակում բողոքի ակցիա իրականացրին։ Բողոքի ակցիայի առիթը օրերս Աժ խորհրդի ընդունած փոփոխություններն են։ Ըստ այդ փոփոխությունների լրագրողներն իրենց մասնագիտական գործունեությունը կիրականացնեն ԱԺ նստավայրում առանձնացված հատուկ տեղերում՝ նիստերի դահլիճի դիմաց գտնվող սրահում, օթյակում և Աժ այգում: Վերջիններս կարող են ԱԺ պատգամավորների աշխատասենյակներում մասնագիտական գործունեություն իրականացնել միայն պատգամավորների համաձայնությամբ: Լրագրողները այս փոփոխությունները համարում են իրենց տեղաշարժի սահմանափակում;  Լրագրողները գրառումներ էին արել պաստառների վրա, և պահել ապակիների մոտ։ Դրանցից մեկի վրա գրված էր՝ «Մամուլն այսքան անազատ չի եղել, որքան Նիկոլի օրոք»։ Անվտանգության աշխատակիցները ժամանեցին օթյակ, և հորդորեցին լրագրողներին ակցիան իրականացնել այլ վայրում։ Լրագրողները շեշտեցին, թե տարիներ առաջ, երբ ձերբակալել էին Նիկոլ Փաշինյանին խմբագիրները ակցիա էին իրականացնում Փաշինյանի համար։ Լրագրող Անի Գևորգյանը անվտանգության աշխատակիցների հետ զրույցում նշեց, որ իրենք պահանջում են Նիկոլ Փաշինյանի հետ հանդիպում։  Լրագրողներից մեկը շեշտեց, որ Ալեն Սիմոնյանի հետ հանդիպումը որևէ արդյունք չի տվել, և այս ակցիայով լրագրողները փորձում են գրավել Նիկոլ Փաշինյանի ուշադրությունը և պահանջում են նրա հետ հանդիպում, որպեսզի Փաշինյանը պատասխանի իրենց հարցերին։  Լրագրող Վահե Մակարյանն էլ շեշտեց, որ Ալեն Սիմոնյանի հետ հանդիպումը արդյունք չի տվել, քանի որ բոլոր սլաքները ուղղվում են կոնկրետ մեկ մարդու, և լրագրողները հասկանում են, որ Նիկոլ Փաշինյանի հրահանգով, հանձնարարությամբ կամ հորդորով են այս սահմանափակումները մտցվել։  Լրագրողներն ընդգծեցին, որ Նիկոլ Փաշինյանն իրենց գործընկերն է և հասկանում է, թե ինչպես պետք է կառուցվի լրագրողի աշխատանքը։ Լրագրողների խոսքով իրենք օգտագործել են բոլոր միջոցները հարցի կարգավորման համար, սակայն դրանք արդյունք չեն տվել։  Վահե Մակարյանը, խոսելով լրագրողների անունից, շեշտեց, որ իրենց ակցիան քաղաքական չէ, այլ բացառապես լրագրողական, և այն արվում է լրագրողների իրավունքների պահպանման համար։  Լրագրողներին մոտեցավ ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը։ Նա ասաց, որ լրագրողների տեղաշարժի սահմանափակման հարցով նախատեսում են մեծ քննարկում կազմակերպել։ «Այդ քննարկումից պետք է դուրս գալ լուծումներով և ոչ թե միայն բողոքել, այլ գտնել երկու կողմի համար ընդունելի լուծումներ։ Ես իմ ելույթով կբարձրաձայնեմ լրագրողների բողոքի ձայնը և կհայտնեմ, որ լրագրողները ցանկանում են հանդիպել Նիկոլ Փաշինյանի հետ»,- եզրափակեց Թագուհի Թովմասյանը։  Հիշեցնենք, որ օրեր առաջ օրենսդիր մարմնի ղեկավար Ալեն Սիմոնյանի նախագահությամբ տեղի էր ունեցել ՀՀ ԱԺ խորհրդի արտահերթ նիստ, որի ընթացքում քննարկվել էր ՀՀ Ազգային ժողովի խորհրդի 2017 թվականի դեկտեմբերի 27-ի՝ «Հայաստանի Հանրապետության Ազգային ժողովում լրագրողների հավատարմագրման կարգը հաստատելու մասին» թիվ 044-Լ որոշմամբ հաստատված հավելվածում փոփոխություններ և լրացումներ կատարելու մասին» ԱԺ որոշման նախագիծը:
12:15 - 24 օգոստոսի, 2021
«SkyUP» ավիաընկերությունը հետաքննություն է սկսել՝ պարզելու՝ ինչու է  Օդեսա-Երևան չվերթն իրականացրել ադրբեջանական ավիաընկերություն

«SkyUP» ավիաընկերությունը հետաքննություն է սկսել՝ պարզելու՝ ինչու է Օդեսա-Երևան չվերթն իրականացրել ադրբեջանական ավիաընկերություն

Օդեսա-Երեւան չվերթն ադրբեջանական ավիաընկերության կողմից իրականացնելու վերաբերյալ ՀՀ քաղավիացիայի կոմիտեն կապ է հաստատել «SkyUP» ավիաընկերության հետ, ինչին ի պատասխան՝ ավիաընկերությունն իր խոր մտահոգությունն է հայտնել։ Այս մասին Infocom-ի հարցմանն ի պատասխան՝ տեղեկացրին Քաղավիացիայի կոմիտեից։ Այս տարվա օգոստոսի 6-ին ֆեյսբուքյան օգտատեր Լուսինե Սարգսյանը գրել էր, որ նույն օրը Օդեսայից Երեւան թռիչքն իրականացրել է ադրբեջանական Buta Airways ավիաըներությունը։ Գրառման մեկնաբանությունների դաշտում Քաղավիացիայի կոմիտեի ղեկավար Տաթեւիկ Ռեւազյանը նշել էր, որ 06.08.2021 թվականի Օդեսա-Երեւան (չվերթի համարը PQ 407) չվերթն իրականացրել է ուկրաինական «SkyUp» ավիաընկերությունը, որին Քաղաքացիական ավիացիայի կոմիտեին տվել է համապատասխան թույլտվություն, իսկ Buta Airways ավիաընկերությանը Քաղավիացիայի կոմիտեն որեւէ չվերթի թույլտվություն չի տրամադրել: Քաղավիացիայի կոմիտեից հայտնել են, որ Օդեսա-Երեւան երթուղով չվերթի թույլտվություն տրամադրվել է բացառապես ուկրակինական «SkyUP» ավիաընկերությանը։ «SkyUP»-ից նշել են, որ նստեցման կտրոնի տրամադրման պատասխանատուները հանդիսանում են միջնորդ ընկերությունները (handling companies): Քաղավիացիայի կոմիտեից ստացած պատասխանի համաձայն՝ ուկրաինական ավիաընկերությունը հայտնել է նաեւ, որ հետաքննությունն է սկսել՝ պարզելու սխալ նստեցման կտրոնների տրամադրման պատճառները։  Կոմիտեից հայտնում են, որ Օդեսա-Երեւան չվերթի հաշվառումն իրականացվել է Օդեսա քաղաքի օդանավակայանում եւ նստեցման կտրոնները տրամադրել են Օդեսա քաղաքի օդանավակայանի ծառայությունները։ Ասպրամ Փարսադանյան
18:05 - 23 օգոստոսի, 2021
«Ֆիզգոռոդոկում» շինաշխատանքներ են սկսվել․ բնակիչները պնդում են՝ բարձրահարկի կառուցման գործընթացն ապօրինի է

«Ֆիզգոռոդոկում» շինաշխատանքներ են սկսվել․ բնակիչները պնդում են՝ բարձրահարկի կառուցման գործընթացն ապօրինի է

Երեւանի Ալիխանյան եղբայրներ փողոցի 6/1 հասցեում, որ առավել հայտնի է որպես «Ֆիզգոռոդոկ»՝ կառուցված 1950-60-ականներին, այսօր սկսվել են մի բարձրահարկի կառուցման շինաշխատանքներ՝ բնակիչների համոզմամբ՝ ապօրինի։ Սա Երեւանի այն քիչ թաղամասերից է, որի շրջակա պուրակի ծառերն ամբողջությամբ հատված չեն։ Սակայն շենքը, որ պետք է կառուցվի, լինելու է հենց այդ տարածքում․ ծառահատումներն արդեն սկսվել են։  Այստեղ նախատեսվում է կառուցել 12 հարկանի բնակելի շինություն, որն ունենալու է ստորգետնյա կայանատեղի։ Սեփականատերն ու կառուցապատողը «ՌԱՏԿՈ» ՍՊԸ-ն է։ Այս ընկերությունը հիշյալ հասցեում գտնվող 1976 քմ մակերեսով տարածքի երրորդ սեփականատերն է․ «ՌԱՏԿՈ»-ն այն ձեռք է բերել 2006 թվականի աշնանը: Հետքի հրապարակման համաձայն՝ «Ռատկո» ՍՊԸ-ն հիմնադրվել է 2005 թվականին: Մինչեւ 2012 թվականը ընկերության 100% բաժնեմասի սեփականատերը եղել է Բահամյան կղզիներում գրանցված «Պրո-Շուգառ Միլլենիում ինկ.» օֆշորային ընկերությունը, որի սեփականատերերը եղել են ռուսաստանաբնակ գործարարներ Վլադիմիր Մկրտումյանն ու Ստեփան Մալխասյանը: 2020 թվականի հունիսի 12-ին Երեւանի քաղաքապետարանի Քաղաքաշինական խորհուրդը հավանության է արժանացել բազմաբնակարան բնակելի այդ շենքի ճարտարապետահատակագծային առաջադրանքը, իսկ հուլիսի 20-ին Երեւանի քաղաքապետարանը նախագծման թույլտվություն է տվել։  Ներդրող կազմակերպության տնօրեն Արթուր Մնացականյանը, որն այսօր շինհրապարակ դարձող տարածքում էր, Infocom-ի հետ զրույցում ասաց, որ Ընկերությունը նախորդ ամիս՝ հուլիսի 29-ին, ստացել է շինթույլտվություն, որի համաձայն էլ նախաձեռնել են կառուցապատումը եւ սկսել շինհրապարակի կազմակերպումը։  Արթուր Մնացականյանը Մնացականյանը, ի հակառակ տեղի բնակիչների, պնդում է, որ շինարարությունն ապօրինի չի իրականացվում։ Նրա հայտնած մանրամասների համաձայն՝ Ընկերությունը պատրաաստվում է 200-ից ավելի ծառեր տնկել եւ բարեկարգել դիմացի այգին, նորաձեւ այգի կառուցել։ Կառուցապատման տոկոսը, նրա վստահեցմամբ, 40% է կազմելու։  Բնակիչների պնդմամբ, սակայն, նման շինություն այդտեղ կառուցելու պարագայում խաթարվելու են թաղամասի պատմական դիմագիծն ու կենսամիջավայրը, ճարտարապետությունը, քանի որ տեղանքում շենքերը ցածրահարկ են։ Բացի դրանից՝ նրանք վստահություն չունեն, որ ծառահատումներից հետո նոր ծառեր կտնկվեն, եղածն էլ կպահպանվի։ Ընկերության ներկայացուցչի խոսքով՝ հանդիպումներ ունեցել են բնակիչների հետ, սակայն նրանցից ոմանք կատեգորիկ դեմ են կառուցապատմանը, իսկ իրենք անդրդվելի են՝ շենքը պետք է կառուցվի։ Արթուր Մնացականյանի խոսքով՝ շենքի գտնվելու վայրը չի փոխում այս թաղամասի ճարտարապետությունը․ «Երեւանում բազմաթիվ տեղեր կան, որտեղ ցածրահարկ շենքերի կողքին բարձրահարկեր կան, դա ընդունված պրակտիկա է, երբ պահում ես շինարարության եւ ճարտարապետության կանոնները։ Իսկ մարդիկ իրավունք ունենք դիմել համապատասխան մարմիններին՝ իրենց իրավունքների ենթադրյալ ոտնահարման համար»,- ասաց մեր զրուցակիցը։ Իսկ թաղամասի բնակիչները երկու անգամ ստորագրահավաք են նախաձեռնել՝ դեմ լինելով քաղաքապետարանի որոշմանը։ Վերջին անգամ 500-ից ավելի ստորագրություն է հավաքվել։ Եւ թեեւ նրանք այս ընթացքում հանդիպում են պահանջել քաղաքապետի կամ նրա տեղակալի հետ, սակայն, ինչպես պնդում են քաղաքացիները, իրենց խոսքին չեն անսացել։ «Ֆիզգոռոդոկի» պուրակը, որի որոշ ծառեր արդեն հատվել են Ֆիզգոռոդոկ թաղամասի բնակիչներից Հայկ Հարությունյանը, որը մասնագիտությամբ իրավաբան է, մեր զրույցում նկատեց՝ հողատարածքը, որի վրա ուզում են կատարել շինարարությունը, ծառապատ է, հանրային տարածք։ Նրա խոսքով՝ 2004 թվականին այստեղի նախկին մի բնակիչ դիմել է դատարան եւ ասել, որ ուզում է այստեղ մեքենաների կայանատեղի կառուցել․ «Հետո հայցը փոխել է՝ նշելով, թե իբրեւ ուզում է սեփական տուն կառուցել, ասել է, որ տեղանքում 50 քառ․ մետր նկուղ կա։ Իրականում, սակայն, ոչ մի նկուղ երբեւէ կառուցված չի եղել այդտեղ։ Դատարանը պարտավորեցրել է, որպեսզի Կադաստրը չափագրի եւ չափագրությունը ուղարկի Քաղաքապետարան։ Այդ վճիռը մտել է օրինական ուժի մեջ, Կադաստրը ինչ-որ չափագրում է ուղարկել Քաղաքապետարան, հետագայում դիմել է հայցով եւ ասել՝ ճանաչեք իմ վարձակալության իրավունքը դրա նկատմամբ եւ ինքնակամ շինությունն օրինականացրեք, տվեք վկայական։ Վճիռ է կայացվել, որով դատարանը պարտավորեցվել է Կադաստրին գրանցել նրա վարձակալության իրավունքը։ Կադաստրը վճիռը կատարել է, բայց մինչեւ կատարումը ներկայացրած է եղել վերաքննիչ բողոք, որը դատարանը վարույթ է ընդունել։ Բայց հայցվորը չի ներկայացել դատարան եւ հարցը մնացել է առանց քննության»,- պատմեց տեղի բնակիչը։ Այսինքն՝ առաջին ատյանի դատարանի վճիռը կատարվել է, սակայն հատագայում այդ հարցը մնացել է առանց քննության։ Իսկ հետագայում, ինչպես նշեցինք վերը, սեփականության իրավունքը փոխանցվել է «Ռատկո» ընկերությանը։  Հարությունյանը ուշադրություն է հրավիրում այն հանգամանքին, որ, ըստ էության, այդ հողամասի նկատմամբ սեփականության իրավունքը չունի իրավական հիմքեր․ «Այդ վճիռը, որի հիման վրա տարածքը տրամադրվել է սեփականտերերին, ուժի մեջ չէ։ Դրա վերաբերյալ հաղորդում է տրված եղել եւ պահանջվել է հարուցել քրեական գործ, որովհետեւ այդտեղ երբեւէ ոչ մի նկուղ չի եղել եւ այդ վճիռը, վճռի կատարումը եղել են ապօրինի։ Քրեական գործի հարուցումը մերժվել է, ընդ որում՝ կադաստրային նյութերում բացակայում են տեղեկություններն այն մասին, որ Կադաստրը ներկայացրել է վերաքննիչ բողոք, բացակայում է այն տեղեկությունը, որ վերաքննիչ բողոքը ընդունվել է վարույթ, եւ հարցը մնացել է առանց քննության»։  Սա, ըստ Հարությունյանի, պատահականություն չէ։ Այդ առնչությամբ բնակիչները ե՛ւ Քաղաքապետարանի, ե՛ւ Կադաստրի ուշադրությունն են հրավիրել բայց դրանցից որեւէ մեկը քայլեր չի ձեռնարկել, որպեսզի վճռի շրջադարձ։ Մեր զրուցակցի խոսքով՝ Քաղաքապետարանը շահագրգիռ կողմ է, քանի որ, իր տեղեկություններով, Ընկերության հետ ունի պայմանագիր, որ կառուցվող շենքից Քաղաքապետարանին պետք է տրամադրվեն բնակարաններ։ Բնակիչը տեղեկացրեց, որ այս պահին վճռի շրջադարձ չկատարելու վերաբերյալ նյութեր են ուսումնասիրվում՝ հասկանալու՝ արդյոք կա քրեական գործի հարուցման հիմք, թե ոչ․ «Ամեն դեպքում պետք է կատարվի վճռի շրջադարձ։ Սեփականության իրավունքը պետք է վերադարձվի պետությանը, եւ կարեւոր չէ, թե ձեռքբերողը բարեխիղճ է, թե ոչ»,- եզրափակեց Հայկ Հարությունյանը։ Լիլիթ Բադեյանը, որը նույնպես ապրում է այս թաղամասում, մեր զրույցում համոզմունք հայտնեց, որ շենքի կառուցումն ուղղակի հակասում է բնակիչների շահերին․ եթե բարձրահարկը կառուցվի, ամբողջ միջավայրը կփչանա, հատկապես, որ, նրա խոսքով, կա կասկած, որ հնարավոր է՝ սողանքային իրավիճակ լինի։ Մեր զրույցին իր մտահոգություններով միացավ Կարեն Ամիրխանյանը՝ հավելելով, որ եթե նախկինում իրավունք ունեին բողոքել, որպեսզի արգելեն շինթույլտվությունը, հիմա այդ իրավունքը չունեն։ Նա ասաց, որ տեղի բնակիչների 500-ից ավելի ստորագրություններն ուղղակի անտեսվել են։ Կարեն Ամիրխանյանը Ի դեպ՝ Ֆիզիկայի գիտավանը ԿԳՄՍ նախարարությունը ժամանակին հաստատել էր որպես հուշարձան-թաղամաս, սակայն ավելի ուշ կառուցապատման համար տրամադրված տարածքը հանվեց այդ որոշումից` բնակիչների համոզմամբ՝ հող նախապատրաստելով շինաշխատանքների համար։  Սա, թաղամասի բնակիչ Ֆրունզ Հարությունյանի համոզմամբ, վատ նախադեպ է, որովհետեւ մենք գործ ունենք Երեւանի ամենահին եւ կայացած համայնքներից մեկի հետ, որը, մեր զրուցակցի խոսքով, հավաքական կամք ունի․ «Եւ հաշվի չնստել բնակիչների կարծիքների հետ, նշանակում է, որ որպես այս քաղաքի բնակիչների ներկայացուցիչներն իրականությունից կտրված են, նստում են ինչ-որ բարձր աթոռի, եւ նույնիսկ չեն գալիս հանդիպելու քաղաքացիների հետ, որոնք միաձայն պահանջ ունեն։ Ոչ մի քայլ չարեցին, ոչինչ չլսեցին, դա, ես կասեի, «ղասաբություն» է»,- կարծիք հայտնեց մեր զրուցակիցը։ Եւ մեկ այլ խնդիր, որի մասին բարձրաձայնեցին բնակիչները, շենքի կառուցման դեպքում թաղամասի հիմնական փողոցը գերծանրաբեռնված է լինելու, քանի որ թաղամասի բնակիչների թիվն, ըստ ամենայնի, կրկնապատկվելու է։ Բնակիչները միահամուռ փորձելու են խնդրի լուծման եզրեր գտնել եւ պատկան մարմինները ուշադրությունը հրավիրել։ Հայարփի Բաղդասարյան
22:05 - 19 օգոստոսի, 2021
ՀՀ սահմանին մոտեցող ադրբեջանական զորքերի լուսանկարները հին են

ՀՀ սահմանին մոտեցող ադրբեջանական զորքերի լուսանկարները հին են

Գուրգեն Ավետյան անունով օգտատերը «Ֆեյսբուք» սոցիալական ցանցում երեկ 9 լուսանկար է հրապարակել՝ հայտնելով, որ Ադրբեջանը հարձակողական զորքեր է ձգում Հայաստանի սահմաններին։ «Ալիևը, հավանաբար, որոշել է առավելագույնս ճնշել Հայաստանին։ Այդ նպատակի համար նա զորքեր է տեղափոխում Քարվաճառի շրջան։ Այս տարվա ընթացքում հայկական կողմից ոչ մի սահմանապահ պաշտպանական կառույց չի ստեղծվել։ Դրա համար էլ Ալիևը որոշել է այնտեղ մտցնել իր հարձակողական զորքերը և ուժով գրավել 27 կմ հողեր, որոնք կիսում են Քարվաճառի շրջանը թուրք-ազերիների կողմից օկուպացված Նախիջևանի Հանրապետությունից և թուրքերի կողմից գրավված Արևմտյան Հայաստանից՝ Թուրքիա-Ադրբեջան ցամաքային սահման ունենալու համար»,- ասված է օգտատիրոջ գրառման մեջ։ Գրառումն ու լուսանկարները հրապարակվել են pastinfo.am-ում՝ «Ադրբեջանը հարձակողական զորքեր է ձգում Հայաստանի սահմաններին. ահազանգ» վերնագրով։ Հստակ ոչինչ չենք կարող ասել օգտատիրոջ այն պնդման վերաբերյալ, թե Ադրբեջանը հարձակողական զորքեր է ձգում Հայաստանի սահմաններին։ Սակայն մեզ հաջողվել է համացանցում գտնել հրապարակված 9 լուսանկարներից 7-ը․ 7-ն էլ հին լուսանկարներ են։ Այսպիսով, առաջին, երկրորդ և հինգերորդ լուսանկարները համացանցում հայտնվել են դեռևս 2021-ի մայիսի 17-ին Ադրբեջանի պաշտպանության նախարարության կայքում։ Ադրբեջանի ՊՆ-ն մամուլի հաղորդագրություն է տարածել այն մասին, որ Նախիջևանի կայազորում սկսվել են հրամանատարաշտաբային զորավարժություններ՝ կից տարածելով այս լուսանկարները։ Հրապարակված լուսանկարներից երրորդը ադրբեջանական տարբեր լրատվամիջոցներում հրապարակվել է 2021-ի օգոստոսի 13-ին։ Լուրն այն մասին է, որ Ադրբեջանի տանկային ստորաբաժանումները ինտենսիվ մարտական ​​պատրաստություն են անցկացնում։ Չորրորդ լուսանկարը հրապարակվել է 2021-ի հուլիսի 2-ին։ Ադրբեջանական ՊՆ-ն այդ ժամանակ հաղորդել է, որ Բաքվում շարունակվում են ադրբեջանա-թուրքական զորավարժությունները։ Վեցերորդ և յոթերորդ լուսանկարները համացանցում գտնել չհաջողվեց։ Ութերորդ լուսանկարը ադրբեջանական լրատվամիջոցներում 2021-ի հուլիսի 16-ին հրապարակված տեսանյութից է։ Տեսանյութում խոսվում է հայ-ադրբեջանական սահմանին լարվածության մասին։ Վերջին լուսանկարը համացանցում հայտնվել է դեռևս 2018-ին։ Հրապարակված լուրը կրկին ադրբեջանական բանակի զորավարժություններին է վերաբերում։  Քանի որ օգտատերն այս լուսանկարները հրապարակել է մի գրառման հետ, որտեղ խոսվում է ՀՀ սահմանի մոտ ադրբեջանական հարձակողական զորքեր բերելու մասին, տպավորություն է ստեղծվում, թե լուսանկարները նոր են և ապացուցում են այդ զորքերի՝ ՀՀ սահմանին մոտենալը։ Սակայն, ինչպես համոզվեցինք, հրապարակված 9 լուսանկարներից առնվազն 7-ը հին են։ Ինչ վերաբերում է հակառակորդի՝ ՀՀ սահմանին հարձակողական զորքեր մոտեցնելուն, այդ պնդման մասին հստակ ոչինչ նշել չենք կարող։ Աննա Սահակյան  
18:13 - 18 օգոստոսի, 2021
Ավելի շատ ծախսելու հնարավորություն՝ հաշվետվողականություն չապահովող պատգամավորներին

Ավելի շատ ծախսելու հնարավորություն՝ հաշվետվողականություն չապահովող պատգամավորներին

Այս տարվա հուլիսին ՀՀ 7-րդ գումարման խորհրդարանն իր աշխատանքային շրջանի վերջում հասցրեց ընդունել մի նախագիծ, որը բազմաթիվ քննադատությունների առիթ դարձավ․ խոսքը «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում մի փոփոխության մասին է, որով ԱԺ յուրաքանչյուր պատգամավորի պատգամավորական գործունեության հետ կապված ծախսերի համար նախատեսված գումարը 50․000 դրամից դարձավ 250.000 դրամ։  Նախագծի հիմնավորման մեջ ասված է, որ պատգամավորական գործունեության հետ կապված ծախսերի համար հատկացվող գումարի ավելացումը կապահովի պատգամավորների գործունեության լիարժեք իրականացումը եւ ըստ այդմ՝ կնպաստի Ազգային ժողովի եւ նրա մարմինների գործառույթների ու լիազորությունների պատշաճ իրականացմանը:  Նախագծի հեղինակները ԱԺ 7-րդ գումարման «Իմ քայլը» խմբակցության պատգամավորներ Վիկտոր Ենգիբարյանն ու Նիկոլայ Բաղդասարյանն են․ Ենգիբարյանի կարծիքով՝ սա հատկապես մեծ աջակցություն է այն պատգամավորներին, որոնք մարզերից են, եւ իրենց առօրյա գործունեության ընթացքում հաճախ պետք է ճամփորդեն, հանդիպեն ընտրողներին: Նա նշել էր, որ 2.5 տարիների փորձը ցույց է տվել, որ պատգամավորի նյութատեխնիկական ապահովման, տարբեր ծառայություններից օգտվելու, հիմնականում վառելիքի ծախսի համար 50 հազար դրամը բավարար չէ: Օրենքն ուժի մեջ է մտնելու 8-րդ գումարման Ազգային ժողովի երկրորդ նստաշրջանի բացման օրվանից: Իսկ այս գումարման ԱԺ-ն, ինչպես հայտնի է, օգոստոսի 2-ին արդեն սկսել է առաջին նստաշրջանի աշխատանքները։ Դեռ նախորդ տարվա մարտին եւ հուլիսին Infocom-ը հարցումներ էր ուղարկել 7-րդ գումարման խորհրդարանի պատգամավորներին՝ նրանց գործունեության մանրամասներին ծանոթանալու համար։ Ի թիվս մի շարք հարցերի՝ պատգամավորներին խնդրել էինք ներկայացնել, թե մարզային քանի այցեր են ունեցել, քաղաքացիների քանի ընդունելություն են անցկացրել, եւ այլն։ Ի դեպ՝ նախագծի համահեղինակներից միայն Վիկտոր Ենգիբարյանն է պատասխանել հարցմանը, իսկ Նիկոլայ Բաղդասարյանն առհասարկ չի արձագանքել։ Ստորեւ ներկայացնում ենք, թե 7-րդ գումարման խորհրդարանի՝ հարցմանը մասնակի կամ ամբողջությամբ պատասխանած որ պատգամավորներն ինչ այցեր են կատարել մանդատը ստանալուց մինչեւ 2020թ․ մարտ, ոմանք՝ հուլիս ամիսը, եւ թե ովքեր ընդհանրապես չեն պատասխանել հարցումներին։ 7-րդ գումարման խորհրդարանի «Իմ քայլը» խմբակցություն Infocom-ը հարցումներ էր ուղարկել «Իմ քայլը» խմբակցության 84 պատգամավորների, որոնցից 52-ը մեր հարցումներն ուղղակի անպատասխան էին թողել, իսկ 10-ը՝ հարցերին ըստ էության չէին պատասխանել՝ նշելով, որ մեր հայցած տեղեկությունները հրապարակված են բաց աղբյուրներում՝ ԱԺ պաշտոնական կայքում, Հայտարարագրերի ռեեստրում, parliamentmonitoring.am հարթակում, եւ որ աշխատավարձերի վերաբերյալ հարցերի պատասխանները կարող ենք ստանալ ԱԺ աշխատակազմից։ Բաց աղբյուրներից իրենց գործունեության վերաբերյալ տեղեկություններ հավաքելու առաջարկով արձագանքել են Նարեկ Զեյնալյանը, Բաբկեն Թունյանը, Վաղարշակ Հակոբյանը, Վլադիմիր Վարդանյանը, Անդրանիկ Քոչարյանը,  որոնք պատգամավոր են նաեւ հիմա, Մխիթար Հայրապետյանը, Համազասպ Դանիելյանը, Արսեն Ջուլֆալակյանը, Վահագն Թեւոսյանը, Հովհաննես Իգիթյանը։ Այսպիսով, հարցում ենք ուղարկել «Իմ քայլը» խմբակցության 84 պատգամավորների, որոնցից 62-ը՝ մոտ 73%-ը նամակն անպատասխան են թողել, հարցերին չեն պատասխանել կամ առաջարկել են տեղեկություն հավաքել բաց աղբյուրներից։ Հարցմանը պատասխանել են 22-ը՝ մոտ 26%-ը։  7-րդ գումարման խորհրդարանի «Բարգավաճ Հայաստան» խմբակցություն Infocom-ը նույնաբովանդակ հարցումներ էր ուղարկել նաեւ ԲՀԿ խմբակցության բոլոր 26 պատգամավորներին։ Նրանցից 18-ը հարցմանը չէր պատասխանել, այդ թվում՝ Գագիկ Ծառուկյանը, Վահե Էնֆիաջյանը, Իվետա Տոնոյանը եւ այլք։ Այս խմբակցությունից հարցմանը չպատասխանած Սերգեյ Բագրատյանը այսօր դարձյալ պատգամավոր է, սակայն «Քաղաքացիական պայմանագիր» խմբակցությունից։   Այսպես, ԲՀԿ խմբակցության 26 պատգամավորներից 69,2%-ը չեն պատասխանել հարցերին։  7-րդ գումարման խորհրդարանի «Լուսավոր Հայաստան» խմբակցություն Հարցումներ, իհարկե, ուղարկել էինք նաեւ խորհրդարանական երրորդ ուժին՝ ԼՀ խմբակցությանը, որում ընդգրկված էր 18 պարտգամավոր։ Նրանցից ոչ մեկը՝ այդ թվում Էդմոն Մարուքյանը, որ խմբակցության ղեկավարն էր, չեն պատասխանել հարցերին։ Այս քաղաքական ուժը, ինչպես ԲՀԿ-ն, ներկայացված չեն 8-րդ գումարման խորհրդարանում։  Հարցումներին չպատասխանածներից 34-ը այսօր եւս պատգամավոր են՝ Լենա Նազարյանը, Ալեն Սիմոնյանը, Մաթեւոս Ասատրյանը, Լուսինե Բադալյանը, Նազելի Բաղդասարյանը, Սիսակ Գաբրիելյանը, Մերի Գալստյանը, Տաթեւիկ Գասպարյանը, Հռիփսիմե Գրիգորյանը, Արթուր Դավթյանը, Արփինե Դավոյանը, Արման Եղոյանը (վրիպակի հետեւանքով պատգամավոր Ա․ Եղոյանի անունը հայտնվել է չպատասխանածների ցանկում, պատասխանի մանրամասները ներկայացված են ստորեւ,- խմբ․), Սեդրակ Թեւոնյանը, Սարգիս Խանդանյանը, Արմեն Խաչատրյանը, Մարիա Կարապետյանը, Հրաչյա Հակոբյանը, Կարեն Համբարձումյանը, Կնյազ Հասանովը, Վահագն Հովակիմյանը, Արթուր Հովհաննիսյանը, Սոնա Ղազարյանը, Վահե Ղալումյանը, Արսեն Միխայլովը, Արեն Մկրտչյանը, Սերգեյ Մովսիսյանը, Քրիստինե Պողոսյանը, Ալեքսեյ Սանդիկովը, Հայկ Սարգսյանը, Լիլիթ Ստեփանյանը։ Նրանցից հինգը, ինչպես նշեցինք վերեւում, առաջարկել էին տեղեկություն հավաքել բաց աղբյուրներց։   Այսպիսով, հարցում էինք ուղարկել 128 պատգամավորի։ Նրանցից ոչ բոլոր պատգամավորներն էին պատասխանել, իսկ ավելի կոնկրետ՝ 30 պատգամավոր պատասխանել էր, մնացյալ 98-ը կամ մոտ 76%-ը՝ ոչ։  Իսկ հարցումներին պատասխանած պատգամավորների պատասխանները ներկայացնում ենք ստորեւ։ «Իմ քայլը» խմբակցության պատգամավոր, հիշյալ նախագծի համահեղինակ Վիկտոր Ենգիբարյանը մեր հարցման պատասխանում նշել էր, որ կազմակերպել է ընդհանուր թվով 20 մարզային այց եւ քաղաքացիների ընդունելություն, վերջինը՝ պարբերանար նաեւ ԱԺ-ում։ «Իմ քայլը» խմբակցության պատգամավոր, այժմ ՔՊ խմբակցության պատգամավոր Արման Եղոյանից ստացած պատասխանի համաձայն՝ վերջինս ունեցել է մարզային մեկ այց՝ Վայոց Ձոր։ Քաղաքացիների ընդունելություն պատգամավորը կազմակերպել է քաղաքացիների դիմումների հիման վրա՝ անհատական սկզբունքով, իսկ ոլորտային խնդրի դեպքում՝ խմբով։ Ըստ պատասխանի՝ Եղոյանն ընդհանուր առմամբ ընդունել է մոտ 70 քաղաքացու, մասնակցել է մի շարք ոլորտային խնդիրներով մտահոգ քաղաքացիների խմբերի հետ հանդիպումներին։ «Իմ քայլը» խմբակցության պատգամավոր Ռուստամ Բաքոյանը, որը հիմա եւս ներկայացված է ԱԺ-ում, պատասխանել էր, որ կազմակերպել է քաղաքացիների 20 ընդունելություն՝ ԱԺ-ում նման քննարկումների համար նախատեսված սրահում։ Նա հայտնել էր, որ քաղաքացիների հետ անհատական կամ խմբային հանդիպումներ է ունեցել նաեւ Արարատում, Արմավիրում, Արագածոտնում եւ Կոտայքում։  «Իմ քայլը» խմբակցության պատգամավոր, նաեւ 8-րդ գումարման խորհրդարանում ներկայացված Հայկ Կոնջորյանը պատասխանել էր, որ կազմակերպել է քաղաքացիների վեց ընդունելություն՝ ԱԺ սրահում, Երեւանի Նոր Նորք վարչական շրջանի թաղապետարանում, որոնց ընթացքում հանդիպել է ավելի քան 300 քաղաքացու հետ, բացի դրանից՝ անհատական կամ խմբային հանդիպումներ է ունեցել նաեւ քաղաքացիների հետ Երեւանում եւ ՀՀ մարզերում։ «Իմ քայլը» խմբակցության պատգամավոր, 8-րդ գումարման խորհրդարանում ՔՊ ներկայացուցիչ Թագուհի Ղազարյանը, ի պատասխան մեր հարցման, հայտնել էր, որ կազմակերպել է բազմաթիվ ընդունելություններ՝ ե՛ւ անհատական, ե՛ւ խմբով, այցելություններ է ունեցել Արմավիրի, Գեղարքունիքի, Արագածոտնի, Տավուշի, Լոռու, Շիրակի, Արարատի մարզեր՝ ընդհանուր ամռմամբ 52 համայնք։ «Իմ քայլը» խմբակցության, այժմ՝ ՔՊ խմբակցության Ռուբեն Ռուբինյանի պատասխանի համաձայն՝ վերջինս մարզային այցեր չի ունեցել՝ հարցման պատասխանն ստանալու դրությամբ։ «Իմ քայլը» խմբակցության եւ այժմ «Քաղաքացիական պայմանագիր» խմբակցության պատգամավոր Ծովինար Վարդանյանից ստացած պատասխանի համաձայն՝ վերջինս հանդիպումներ է ունեցել բազմաթիվ քաղաքացիների, իրավաբանական անձանց ներկայացուցիչների հետ՝ հիմնականում տնտեսական ոլորտին վերաբերող հարցերով։ Վարդանյանը հայտնել էր օտարերկրյա պաշտոնական այցերի մասին, չէր նշել մարզային այցերի մասին։  7-րդ գումարման խորհրդարանի «Իմ քայլը» խմբակցության, 8-րդ գումարման խորհրդարանի ՔՊ խմբակցության պատգամավոր Արուսյակ Ջուլհակյանը, որը մանրամասնորեն պատասխանել էր մեր հարցերին, նշել է, որ 2019-ի հուլիսի 17-ին քաղաքացիների ընդունելություն է իրականացրել Նոր Նորքի վարչական շրջանի շենքում, աշխատանքային ծանրաբեռնվածության պատճառով չի կարողացել կազմակերպել մեծ թվով քաղաքացիների համաժամանակյա այլ ընդունելություն եւ հնարավորություն է ունեցել միայն անհատական հանդիպումներ կազմակերպել առանձին քաղաքացիների հետ՝ կոնկրետ խնդիրների առնչությամբ։ Վարդանյանը նշել է, որ այցեր է ունեցել Լոռու, Շիրակի, Վայոց ձորի մի շարք համայնքներում։ «Իմ քայլը» խմբակցության, այժմ ՔՊ խմբակցության պատգամավոր Անուշ Բեղլոյանը, որը նույնպես ամբողջական էր պատասխանել մեր հարցերին, տեղեկացրել էր, որ քաղաքացիների ընդունելություն կազմակերպում է ամեն օր՝ իր գլխավորած «Ջավախք» հայրենակցական-բարեգործական ՀԿ-ի գրասենյակում։ Նա նշել է, որ ամենօրյա ռեժիմով զբաղվել է Ջավախքի եւ ջավախահայության հիմնախնդիրներով, Ջավախքում մարզամշակութային միջոցառումների կազմակերպմամբ, ծագումով ջավախքցի մշակութային գործիչների գործունեության աջակցությամբ։  7-րդ գումարման ԱԺ-ի «Իմ քայլը» խմբակցության եւ 8-րդ գումարման խորհրդարանի ՔՊ խմբակցության պատգամավոր Շիրակ Թորոսյանը հարցման պատասխանում հայտնել էր, որ քաղաքացիների ընդունելություն կազմակերպում է ամեն օր՝ իր գլխավորած «Ջավախք» հայրենակցական-բարեգործական ՀԿ-ի գրասենյակում, ընդունել է հազարավոր քաղաքացիների, իսկ մարզային այցեր կազմակերպում է գրեթե ամեն շաբաթ, բայց ոչ պակաս, քան ամիսը երկու անգամ:  Նախկինում՝ «Իմ քայլը» խմբակցությունից, այժմ՝ ՔՊ խմբակցությունից Գեւորգ Պապոյանից ստացած պատասխանի համաձայն՝ հինգ անգամ է կազմակերպել քաղաքացիների ընդունելություն, ունեցել է մարզային երկու այց՝ Արմավիր եւ Արագածոտն՝ քաղաքացիների խնդիրներին ծանոթանալու համար, ապա նաեւ Երեւանի Շենգավիթ եւ Մալաթիա-Սեբաստիա վարչական շրջանների բակերում հանդիպումներ է ունեցել բնակիչների հետ։  «Իմ քայլը» խմբակցությունից Հերիքնազ Տիգրանյանը, որը հիմա դարձյալ ԱԺ պատգամավոր է, պատասխանել էր, որ անցկացրել է քաղաքացիների բազմաթիվ ընդունելություններ, ունեցել է մի շարք մարզային այցեր։  ԱԺ «Իմ քայլը» խմբակցության արդեն նախկին ղեկավար Լիլիթ Մակունցը, պատգամավորներ Վահե Հովհաննիսյանը, Սոֆյա Հովսեփյանը, Արգիշտի Մեխակյանը, Սոս Ավետիսյանը, Կարեն Սարուխանյանը, Արմեն Փամբուխչյանը, Գայանե Աբրահամյանը, որը եւս այն քչերից էր, որ հարցերին պատասխանել էր ամենայն մանրամասնությամբ, Միքայել Զոլյանը եւ Գոռ Գեւորգյանը եւս ներկայացրել էին իրենց կատարած մարզային այցերի եւ քաղաքացիների ընդունելությունների մասին տեղեկություններ։ Ի դեպ՝ Սոֆյա Հովսեփյանը, Գոռ Գեւորգյանը եւ Գայանե Աբրահամյանը հետագայում դուրս եկան ֆրակցիայից։ Իսկ 7-րդ գումարման խորհրդարանի «Բարգավաճ Հայաստան» խմբակցությունից հարցմանը պատասխանել եւ իրենց այցերի, ընդունելությունների մասին տեղեկություններ էին ներկայացրել պատգամավորներ Էդուարդ Բաբայանը, Քաջիկ Գեւորգյանը, Վարդեւան Գրիգորյանը, Վարդան Վարդանյանը, Տիգրան Ուրիխանյանը, Գեւորգ Պետրոսյանը, որը եւս այն քիչ պատգամավորներից էր, որ ամբողջությամբ պատասխանել էր մեր բոլոր հարցերին, Նորա Առուստամյան, Շաքե Իսայանը։ Տիգրան Ուրիխանյանը հետագայում դուրս եկավ խմբակցությունից։ Հարցմանն արձագանքած մյուս պատգամավորներից ոմանք պատասխանել էին ոչ բոլոր հարցերին՝ նշելով, որ կան տեղեկություններ, որոնք բաց աղբյուրներում կան․ դրանք վերաբերում են նախագծերին, որոնք ներկայացրել են օրենսդիրները, նրանց այցերին, հանձնաժողովներին, որտեղ ներգրավված են եւ այլն։ Այս տեղեկությունները, այո, հնարավոր է հավաքագրել բաց աղբյուրներից, իսկ, օրինակ, մարզային այցերի կամ քաղաքացիների ընդունելությունների վերաբերյալ տեղեկություններն, ըստ էության, կարող են հայտնել պատգամավորները։ Որպես օրինակ՝ պատգամավոր Անդրանիկ Քոչարյանի ֆեյսբուքյան էջից եւ այլ աղբյուրներից դժվար է կռահել՝ վերջինս մարզային քանի այց է ունեցել։ Ամփոփելով՝ նշենք, որ ներկայացված տվյալները վերաբերում են պատգամավորների՝ մանդատը ստանձնելու պահից մինչեւ 2020-ի մարտ եւ հուլիս ամիսներն ընկած ժամանակահատվածին, ուստի այս պահին չենք կարող ասել՝ հարցերին պատասխանած պատգամավորները հետագայում՝ մինչեւ 7-րդ գումարման խորհրդարանի արձակումը այլ այցեր ունեցե՞լ են, թե՞ ոչ։ Եւ քանի որ մյուս պատգամավորներն իրենց ընդունելությունների ու մարզային այցերի մասին տեղեկություններ չեն տրամադրել, չենք կարող գնահատել նրանց՝ այդ մասով գործունեությունը։ Հարկ է նշել, որ հանրային հաշվետվողականության մասին օրենսդրական պահանջ, համենայն դեպս, չկար նախկինում եւ չկա հիմա։ Այսպիսով, պատգամավորական գործունեության հետ կապված ծախսերի համար հատկացվող գումարի ավելացմանը կողմ է քվեարկել մի խմբակցություն, որի անդմաներից 62-ը՝ մոտ 73%-ը, հարցումն անպատասխան են թողել, հարցերին չեն պատասխանել կամ առաջարկել են տեղեկություն հավաքել բաց աղբյուրներից։ Բաց աղբյուրներից տեղեկություն հավաքել առաջարկել էր «Իմ քայլը» խմբակցության 10 պատգամավոր՝ հարցում ստացած 84 պատգամավորների մոտ 11%-ը, սա այն դեպքում, երբ հայցված տեղեկությունների որոշ մասը հնարավոր չէ ստանալ բաց աղբյուրներից եւ հնարավոր է ստանալ բացառապես հենց պատգամավորից։ Իսկ հարցմանը պատասխանած պատգամավորներից 3-ը նշել են, որ պատգամավորական ծախսերի հիմնական մասը ներկայացնող մարզային այցեր չեն ունեցել։  Հայարփի Բաղդասարյան
16:46 - 18 օգոստոսի, 2021
ՊՆ-ն գաղտնիք է համարում ՀՀ ինքնիշխան տարածք ներթափանցած ադրբեջանցիների թիվն ու նրանց գտնվելու կոնկրետ վայրերի մասին տեղեկությունները

ՊՆ-ն գաղտնիք է համարում ՀՀ ինքնիշխան տարածք ներթափանցած ադրբեջանցիների թիվն ու նրանց գտնվելու կոնկրետ վայրերի մասին տեղեկությունները

Տեւական ժամանակ է, ինչ պաշտոնական որեւէ աղբյուր տեղեկություն չի հայտնում մայիսին ՀՀ տարածք ներթափանցած ադրբեջանցի զինծառայողների թվի ու նրանց գտնվելու վայրի մասին։ Կցկտուր տեղեկություններ են հաղորդում Գեղարքունիքի ու Սյունիքի սահմանամերձ բնակավայրերի որոշ ղեկավարներ միայն, իսկ Պաշտպանության նախարարությունը շարունակում է լռել։ Ուստի հուլիսի 22-ից օգոստոսի 12-ը ամեն օր գրավոր հարցումներ ենք ուղարկել ՀՀ պաշտպանության նախարարություն՝ խնդրելով տեղեկություն տրամադրել այն մասին, թե կոնկրետ օրվա դրությամբ (հուլիսի 22 - օգոստոսի 12) ՀՀ ինքնիշխան տարածքում ադրբեջանցի քանի՞ զինծառայող կա, ապա թե մասնավորապես որ տարածքներում է տեղակայված ադրբեջանական զորքը, ամեն հատվածում մոտ քանի՞ զինծառայող կա, մինչեւ ո՞ր հատվածներ են խորացել ադրբեջանցի զինծառայողները, կոնկրետ օրվա դրությամբ որքա՞ն է կազմում ՀՀ ինքնիշխան տարածք ներթափանցման առավելագույն խորությունը՝ կիլոմետրով եւ ըստ տարածքների։  Պաշտպանության նախարարությունից, սակայն, մինչ օրս տեղեկություն չենք ստացել որեւէ օրվա դրությամբ ՀՀ տարածք ներխուժած ադրբեջանցի զինծառայողների թվի, նրանց գտնվելու վայրերի եւ այլնի մասին։ Հարցումներին պատասխանելու համար օրենքով սահմանված ժամկետից հետո մի քանի գրության համար ՊՆ-ն 30-օրյա ժամկետ է խնդրել՝ նշելով, որ հայցված տեղեկությունները տրամադրելու համար հավելյալ աշխատանքի անհրաժեշտություն կա։  Իսկ հուլիսի 22-ին, 23-ին եւ 30-ին ՀՀ պաշտպանության նախարարին հասցեագրված մեր հարցումներն ուսումնասիրելուց հետո նախարարությունը որոշել է մերժել տեղեկության տրամադրումը՝ դարձյալ օրենքով սահմանված ժամկետների խախտումով, քանի որ եթե տեղեկության տրամադրումը պետք է մերժվի, ապա դրա մասին պետք է ծանուցվի հնգօրյա ժամկետում, իսկ 30-օրյա լրացուցիչ ժամկետը կիրառելի է միայն այն դեպքերում, երբ տեղեկությունը տրամադրվելու է, սակայն դրա համար հավելյալ աշխատանք է պետք կատարել։ Պաշտպանական գերատեսչությունը մերժել է տեղեկություն տրամադրել՝ հիմք ընդունելով մի շարք իրավական ակտերի դրույթներ, մասնավորապես՝ «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 1-ին կետի (տեղեկության տրամադրումը մերժվում է, եթե դա պարունակում է պետական, ծառայողական, [․․․] գաղտնիք), «Պետական եւ ծառայողական գաղտնիքի մասին» ՀՀ օրենքի 9-րդ եւ 12-րդ հոդվածների (պետական եւ ծառայողական գաղտնիքի շարքին դասվող տեղեկություններ), ՀՀ Կառավարության 13.03.1998թ. N173 որոշմամբ հաստատված ցանկի 1-ին կետի 1-ին, 2-րդ եւ 9-րդ ենթակետերի (զորքերի կիրառման ծրագրերը, օպերատիվ ծրագրերը, մարտական կառավարման փաստաթղթերը, զորքերը տարբեր աստիճանի մարտական պատրաստականության բերելու վերաբերյալ փաստաթղթերը բացահայտող տեղեկությունները, ԶՈՒ ռազմավարական ծավալման մասին տեղեկությունները, ՀՀ պաշտպանությունը եւ անվտանգությունն ապահովելու նպատակով նրա ենթակառուցվածքն օգտագործելու վերաբերյալ տեղեկությունները), ՀՀ պաշտպանության նախարարի 09.07.2015թ. N 9-Ն հրամանով հաստատված գերատեսչական ցանկի 3-րդ գլխի պահանջները։ Պաշտպանության նախարարության պնդմամբ՝ այդ տեղեկությունների բացահայտումն ուղղակիորեն կարող է հանգեցնել պետական գաղտնիք հանդիսացող՝ ԶՈՒ կիրառման եւ օպերատիվ ծրագրերի, ռազմավարական ծավալման, պաշտպանության եւ անվտանգության ապահովման նպատակով ենթակառուցվածքն օգտագործելու հետ կապված, ինչպես նաեւ հետախուզական բնույթի տեղեկությունների բացահայտման: Սակայն, եթե առաջնորդվենք պարզ տրամաբանությամբ, ապա հակառակորդը վստահաբար տիրապետում է իր այն զինծառայողների թվին, որոնք այս պահին ՀՀ տարածքում են, ըստ ամենայնի՝ տիրապետում է նաեւ նրանց տեղակայման վայրերի մասին տեղեկություններին, ուստի խնդրահարույց է, որ ՊՆ-ն այդ տեղեկությունները հանրության համար չի բացահայտում՝ հղվելով իրավական ակտերի այնպիսի հոդվածների, որոնք վերաբերում են մեր զորքերի կիրառման ծրագրերին, մարտական կառավարման փաստաթղթերին, ԶՈՒ ռազմավարական ծավալման մասին տեղեկություններին, եւ այլն։ Ընդ որում՝ սա այն պարագայում, երբ մայիսին՝ ՀՀ վարչապետ Նիկոլ Փաշինյանը, հունիսին՝ ՀՀ ՊՆ ԳՇ պետ Արտակ Դավթյանը հայտնել են ՀՀ տարածքում գտնվող ադրբեջանցի զինծառայողների որոշակի թիվ՝ նախ 250, ապա մոտ 600, ապա՝ 1000-ից ավելի։ Հայարփի Բաղդասարյան
13:04 - 18 օգոստոսի, 2021