ՀՀ ոստիկանություն

ՀՀ ոստիկանությունն իրավապահ համակարգի մարմին է, որի պարտականությունն է հանցավոր եւ հակաիրավական այլ ոտնձգություններից պաշտպանել մարդու կյանքն ու առողջությունը, ինչպես նաեւ այլ իրավունքներն ու ազատությունները, սեփականությունը, հասարակության ու պետության շահերը:

Ոստիկանությունն իրականացնում է հանրապետության տարածքում օպերատիվ-հետախուզական եւ փորձաքրեագիտական գործունեության կազմակերպումը։ Ոստիկանությունը գործում է ՀՀ Սահմանադրության, օրենդրության եւ «Ոստիկանության» մասին ՀՀ օրենքի հիման վրա։ Այն ենթակա է Հանրապետության վարչապետին։ 2020 թ. հունիսի 8-ից ոստիկանապետը Վահե Ղազարյանն է։

Իրավաչափ էին, մանրամասներին ծանոթ չեմ․ հասարակական խորհրդի անդամները՝ Աննա Շահնազարյանին բերման ենթարկելու մասին

Հուլիսի 6-ին, ժամը 21։00-ի սահմաններում «Հայկական բնապահպանական ճակատ» քաղաքացիական նախաձեռնության անդամ Աննա Շահնազարյանը Երեւանում Ամուլսարի պաշտպանության համար դրամահավաք իրականացնելիս բերման է ենթարկվել ոստիկանների կողմից։ Ավելի ուշ ոստիկանությունը պարզաբանում էր տարածել կատարվածի վերաբերյալ։ «Քաղաքացին ոստիկաններին չի ներկայացրել նման գործունեություն ծավալելու վերաբերյալ որևէ փաստաթուղթ կամ թույլտվություն, ուստի խարդախության կասկածանքով ներկայացվել է ոստիկանության Կենտրոնական բաժին։ Համապատասխան ստուգումներից և անհարժեշտ պարզաբանումներից հետո Աննա Շահնազարյանը բաց է թողնվել»,- մասնավորապես ասված է պարզաբանման մեջ։ ՀՀ ոստիկանության պետին կից հասարակական խորհրդի անդամ Սերգեյ Ղահրամանյանը, արձագանքելով մեր հարցին, թե որքանո՞վ էին օրինաչափ ոստիկանության գործողությունները, նշեց, որ դեպքի մանրամասներից տեղյակ չէ։ «Իմացա, որ երկար չեն պահել, բաց են թողել։ Նախկինում, երբ ավագանի էի, նման դեպքերով դիմում էին քաղաքացիները, և նման դրամահավաքությունը պետք է քաղաքապետարանից թույլտվություն ունենա։ Այդ դեպքի հետ կապված, չգիտեմ թույլտվություն եղել է, թե ոչ, դրա ստուգման վերահսկողական մեխանիզմենրով կարծես ոստիկանությունն ու թաղապետարանն են զբաղվում։ Այդքանը կարող եմ ասել, այլ մեկնաբանություն չեմ կարող տալ»,- ասաց նա։ ՀՀ ոստիկանապետին կից հասարակական խորհրդի մեկ այլ անդամ՝ Դավիթ Պեդանյանը մեզ հետ զրույցում նշեց, որ ոստիկանների գործողություններն իրավաչափ են եղել։ «Որքան գիտեմ, պետք է համապատասխան թույլտվություն լիներ դրամահավաքության։ Այս դեպքում, ճիշտ է մենք գործ ունենք ոչ խարդախ մարդու հետ, ով հայտնի է բնապահպանական գործունեությամբ, բայց նույն հավանականությամբ կարող է այլ խարդախ մարդու հանդիպեինք։ Վերջին շրջանում մի քանի դեպք եղել է՝ ապրիլյան պատերազմի մասնակիցների համար են դրամահավաք արել, հիվանդ երեխաների և այլն։ Պարզվել է, որ դա խարդախություն է։ Այս պարագայում ոստիկաններն ամենայն հավանականությամբ չեն ճանաչել։ Իսկ եթե խոսում ենք օրենքով, ապա առանց համապատասխան թույլտվության ցանկացած գործունեություն իրականացնող մարդուն բերման ենթարկեն և պարզեն միջադեպի հանգամանքները։ Կարծում եմ՝ իրավաչափ են գործել ոստիկանները։ Նույն հաջողությամբ իրենց գործունեությունը կարող էր նպաստել ինչ-որ խարդախության կանխմանը»,- մասնավորապես ասաց նա։ Հասարակական խորհրդի այլ անդամների հետ ևս փորձեցինք կապվել․ Արամ Մանուկյանը, Ժաննա Ալեքսանյանը մեզ հետ զրույցում ասացին, որ մանրամասներին ծանոթ չեն և չեն կարող դիրքորոշում հայտնել։ Իսկ Ռաֆայել Աֆրիկյանը, ով ևս ՀՀ ոստիկանապետին կից հանրային խորհրդի անդամ է, նշեց, որ, լինելով պետական աշխատող, չի կարող անհատապես մեկնաբանել կամ խորհրդի անունից դիրքորոշում հայտնել։ Նա նաև ավելացրեց, որ նմանատիպ թեմաները խորհրդի կազմում պարտադիր կերպով քննարկվում են։ Երևանի «Իմ Քայլը» ավագանու անդամ Վահե Գևորգյանը իր ֆեյսբուքյան էջում գրել է, որ քաղաքապետարանը չունի դրամահավաքի համար թույլտվություն տալու որևէ իրավասություն կամ գործառույթ։ «Ոստիկանությունը ակնհայտորեն դիտավորյալ ապօրինություն կամ ոչ կոմպետենտություն է դրսևորել: Աննա Շահնազարյանին անօրինական բերման ենթարկելուց բացի քաղաքապետարանին նաև ներքաշել է այդ աբսուրդ պրոցեսի մեջ»,- ասել է նա։ Թեմային անդրադարձել է նաև ԱԺ «Իմ Քայլը» խմբակցության պատգամավոր, ԱԺ փոխխոսնակ Լենա Նազարյանը։ Նա իր ֆեյսբուքյան էջում գրել է, որ, եթե նախաձեռնությունը ճանաչված է, քաղաքացիները վստահում են ու պատրաստ են իրենց դրամն ինքնակամ նվիրաբերել, ու դա արվում է հրապարակային միջոցառման ժամանակ, ապա որևէ խնդիր այդտեղ չի տեսնում։ «Ես չեմ պատկերացնում, թե ի՞նչ խարդախություն կարող է այդտեղ լինել ու ի՞նչ փաստաթղթեր ու թույլտվություններ են պետք ներկայացնել և ո՞ւմ: Քաղաքացիական պայմանագիր կուսակցությունը բազմիցս իրականացրել է հանրային դրամահավաքներ ու երբևէ դրա մասին իրազեկում չի արվել քաղաքապետարան կամ այլ տեղ: Ուղղակի տարակուսում եմ, թե ինչո՞ւ ոստիկանությունում այս հանրահայտ իրողությունը ընկալելի չէ և ինչո՞ւ են քաղաքացիները տարվում ու պահվում օրենքով չարգելված գործունեության համար: Հուսամ՝ նման անհիմն խոչընդոտներ այլևս չեն լինի»,- գրել է պատգամավորը։ Նշենք, որ Աննա Շահնազարյանը հայտնել էր, որ բերման ենթարկելիս Ոստիկանության ծառայողները չեն ներկայացրել իրեն արգելանքի վերցնելու, այն է՝ ազատությունից զրկելու հիմքերն ու պատճառները, իր դատավարական կարգավիճակը, դրանից բխող իրավունքները: Աննա Շահնազարյանի պնդմամբ՝ Ոստիկանությունն այս գործողություններով խոչընդոտել է իր հասարակական գործունեությանը: Այդ առիթով ՄԻՊ-ը հայտարարություն է տարածել, որում ասվում է, որ ձեռք բերված բոլոր տեղեկություններն, այդ թվում՝ Աննա Շահնազարյանի գրավոր բողոքի հանգամանքներն ամփոփվել են պաշտպանի աշխատակազմում: Բարձրացված հարցերի կապակցությամբ համապատասխան պարզաբանումների պահանջով ու կոնկրետ հարցադրումներով գրություն է հասցեագրվել ՀՀ ոստիկանություն: «Հայկական բնապահպանական ճակատ» նախաձեռնությունը, ըստ նախատեսվածի, շարունակում է դրամահավաք իրականացնել Ամուլսարի պահապանների համար։ Այս մասին մեզ հետ զրույցում նշեց Աննա Շահնազարյանը։ «Երեկ ևս դրամահավաք ենք իրականացրել Օպերայի տարածքում։ Ոստիկանների կողմից այս անգամ որևէ գործողություն չի եղել։ Երեկ դրամահավաքի ընթացքում հավաքվել է 39340 դրամ։ Դրամահավաքը շարունակվելու է մինչև հուլիսի 10-ը»,- ասաց նա։ Աստղիկ Գաուդյան

07:56 - 09 հուլիսի, 2019

Ոստիկանության ուժեղացված ծառայությունը մարզերում․ բաժիններ են բերվել «օրենքով գողեր»

ՀՀ ոստիկանության պետ Վալերիյ Օսիպյանի հանձնարարականի համաձայն՝ ոստիկանության մարզային ստորաբաժանումների ծառայողները հունիսի 15-ին և 16-ին իրականացրել են ուժեղացված ծառայություն՝ հասարակական կարգի պահպանության, երթևեկության անվտանգության բարձրացման, ինչպես և հանցագործություններն ու իրավախախտումները կանխելու և բացահայտելու նպատակով։ Ոստիկանության Արարատի մարզային վարչության և Արարատի մարզը սպասարկող ճանապարհային ոստիկանության ծառայողներն, ուժեղացված ծառայության շրջանակներում, օպերատիվ տվյալների հիման վրա ստուգումներ են իրականացրել մի քանի տասնյակ հանցավոր հեղինակությունների բնակության վայրերում։ Տարբեր հանցագործությունների կասկածանքով ոստիկանության Արտաշատի, Մասիսի և Արարատի բաժիններ բերման է ենթարկվել 33 անձ։ Բերման ենթարկվածներից մեկի մոտ հայտնաբերվել է թմրամիջոց։ Հայտնաբերվել են ճանապարհային երթևեկության կանոնների կոպիտ խախտումներ թույլ տված, առանց վարորդական իրավունքի վկայականի, տրանսպորտային միջոցը առանց համարանիշերի շահագործող 4 վարորդ, որոնց մեքենաները տեղափոխվել են պահպանվող հատուկ տարածքներ։ Բացի այդ, ճանապարհային երթևեկության կանոնների տարբեր խախտումների փաստերով կազմվել է շուրջ 139 արձանագրություն։ Ոստիկանության Արագածոտնի մարզային վարչության և մարզը սպասարկող ճանապարհային ոստիկանները Աշտարակում, Ապարանում, Թալինում և այլուր իրականացրած ուժեղացված ծառայության ընթացքում հայտնաբերել են ճանապարհային երթևեկության կանոնների 114 խախտում, որոնց փաստերով կազմվել են արձանագրություններ։ Պրոֆիլակտիկ միջոցառումներ իրականացնելու համար բաժիններ են բերվել մարզում բնակվող քրեական հեղինակություններ, այդ թվում, այսպես ասած՝ «օրենքով գող»։ Կոտայքի մարզում իրականացրած երկօրյա ուժեղացված ծառայության ընթացքում մարզային վարչության ու ենթակա ստորաբաժանումների, ինչպես և ճանապարհային ոստիկանության ծառայողները հայտնաբերել են երթևեկության կանոնները կոպտորեն խախտած 66 վարորդի, որոնց նկատմամբ կազմվել են վարչական իրավախախտման վերաբերյալ արձանագրություններ։ Տարածքային բաժինների պահպանվող հատուկ տարածքներ են տեղափոխվել 16 մեքենա, որոնցից 6-ի վարորդներն ալկոհոլ օգտագործած են եղել, 2-ինը վարորդական իրավունքիի վկայական չեն ունեցել, մյուսներինը այլ խախտումների համար։ Ոստիկանույան ծառայողները տարբեր կասկածանքներով բաժիններ բերման են ենթարկել 5 քրեական հեղինակության և 13 նախկինում դատապարտված անձանց։ Բերման են ենթարկվել նաև անձինք, որոնք չարամտորեն չեն ենթարկվել ոստիկանության ծառայողների օրինական պահանջներին։ Արմավիրի ոստիկաններն էլ ուժեղացված ծառայության արդյունքում հայտնաբերել են ոչ սթափ 14 վարորդի, որոնց մեքենաները տեղափոխել են պահպանվող հատուկ տարածքներ։ Ընդհանուր առմամբ՝ երկօրյա ուժեղացված ծառայության ընթացքում պահպանվող հատուկ տարածքներ են տեղափոխվել 63 մեքենա։ Տարբեր կասկածանքներով, ինչպես և ոստիկանի օրինական պահանջը չկատարելու համար ոստիկանության Արմավիրի մարզային վարչության տարածքային բաժիններ բերման են ենթարկվել ու բերվել 147 անձ։ Մի քանի դեպքով հարուցվել է վարչական վարույթ։ Ուժեղացված ծառայություն են իրականացրել նաև ոստիկանության Լոռու մարզային վարչության ու ենթակա բաժինների, ինչպես և Լոռին սպասարկող ճանապարհային ոստիկանության ծառայողները։ Արդյունքում հայտնաբերվել է ճանապրհային երթևեկության կանոնների 54 խախտում։ Հայտնաբերվել և պահպանվող հատուկ տարածք է տեղափոխվել ապօրինի փայտանյութով բեռնված մեկ բեռնատար։ Ոստիկանության Շիրակի մարզային վարչության ու ենթակա ստորաբաժանումների, ինչպես և ճանապարհային ոստիկանության ծառայողներն ուժեղացված ռեժիմով ծառայությունն իրականացրել են 84 կարգախմբերով, որոնք շրջել են ողջ մարզով և հայտնաբերել մի շարք իրավախախտումներ։ Կարգազանց 155 վարորդի նկատմամբ կազմվել են վարչական իրավախախտումների վերաբերյալ արձանագրություններ։ Տարածքային ստորաբաժանումներ տարբեր կասկածանքներով բերման են ենթարկվել բազմաթիվ անձինք, այդ թվում ՝ քրեական հեղինակություններ։ Հայտնաբերվել են սառը զենքեր ու մեկ հետախուզվող անձ։ Ստուգումներ են իրականացվել մարզում բնակվող, այսպես կոչված՝ «օրենքով գողերի» բնակության հասցեներում։ Վայոց ձորի ոստիկանները ևս իրականացրել են ուժեղացված ծառայություն՝ հայտնաբերելով ճանապարհային երթևեկության կանոնների 17 խախտում, 4 մեքենա էլ տեղափոխվել է պահպանվող հատուկ տարածք։ Հայտնաբերվել է նաև լռության կանոնների խախտման մեկ դեպք, որի փաստով կազմվել է արձանագրություն։ Տարածքայինն բաժիններ են հրավիրվել նախկինում դատապարտված մի խումբ անձինք, որոնց հետ տարվել են պրոֆիլակտիկ բնույթի աշխատանքներ։ Գեղարքունիքում մարզային ոստիկանության տարբեր ստորաբաժանումների ծառայողներ հայտնաբերել են ճանապարհային երթևեկության կանոնների 155 խախտում, որոնց փաստերով կազմվել են համապատասխան արձանագրություններ։ Պահպանվող հատուկ տարածքներ են տեղափոխվել 67 տրանսպորտային միջոց, որոնց վարորդներն իրենց գործողություններով սպառնալիք են ստեղծել երթևեկության անվտանգության նկատմամբ։ Տարբեր կասկածանքներով բաժիններ բերմանն են ենթարկվել ավելի քան 80 անձ, կատարվել են խուզարկություններ, հայտնաբերվել թմրամիջոց։ Ուժեղացված ծառայության ընթացքում ոստիկանության Վարդենիսի բաժնում արձանագրվել է ապօրինի պահվող զենք-զինամթերքի կամավոր հանձնման դեպք։ Ոստիկանության մարզային ստորաբաժանումների ուժեղացված ծառայության մասին պատմող տեսաշարը եզրափակենք՝ անդրադառնալով Տավուշի ոստիկանների աշխատանքը ներկայացնելով։ Ճանապարհային ոստիկանության և բաժինների ծառայողների կողմից պահպանվող հատուկ տարածքներ են տեղափոխվել 39 տրանսպորտային միջոց, որոնցից միայն 16-ի վարորդները չեն ունեցել համապատասխան փաստաթղթեր։ Իջևանի, Դիլիջանի, Տավուշի և Նոյեմբերյանի բաժիններ են բերվել մարզում ապրող քրեական հեղինակություններ ու նախկինում մի քանի անգամ դատապարտված անձինք, որոնց հետ տարվել են պրոֆիլակտիկ բնույթի աշխատանքներ։ Տարբեր կասկածանքներով հիշյալ բաժիններ բերման են ենթարկվել նաև մի խումբ անձինք։ ՀՀ ոստիկանության մայրաքաղաքը և մարզերը սպասարկող ստորաբաժանումները նույն հետևողականությամբ ու վճռականությամբ շարունակելու են ուժեղացված ծառայություննր իրականացնել ողջ երկրում՝ հանդուրժողականություն ու ներողամտություն չցուցաբերելով իրավախախտների և օրինախախտների նկատմամբ։ Հարգելի քաղաքացիներ հորդորում ենք պահպանել օրենքը։

15:50 - 18 հունիսի, 2019