Իրան

Իրանի Իսլամական Հանրապետությունն ինքնիշխան պետություն է Արևմտյան Ասիայում: Ավելի քան 83 միլիոն բնակչությամբ։ Իրանը աշխարհում բնակչության թվով 18-րդն է: 1.648.195 կմ քառակուսի տարածքով այն երկրորդ ամենախոշոր երկիրն է Մերձավոր Արևելքում և 17-րդը` աշխարհում: Իրանը հյուսիս արևմուտքում սահմանակից է Հայաստանին, Արցախին, Ադրբեջանին և Ադրբեջանի մաս կազմող Նախիջևանին, հյուսիսում Կասպից ծովին, հյուսիս արևելքում Թուրքմենստանին, արևելքում Աֆղանստանին և Պակիստանին, հարավում Պարսից ծոցին և Օմանի ծոցին, արևմուտքում Թուրքիային և Իրաքին :

Երկրի մայրաքաղաքը և խոշորագույն քաղաքը Թեհրանն է, որը համարվում է նաև երկրի մշակութային և տնտեսական կենտրոնը: Երկրի նախագահը Հասան Ռոհանին է, հոգևոր առաջնորդը Այաթոլլա Ալի Խամենեին է։

Իրանի համար անընդունելի կլինի Հայաստանի տարածքային ամբողջականության ցանկացած խախտում․ Սոբհանի |armenpress.am|

armenpress.am: Իրանը միշտ աջակցել է Հայաստանի տարածքային ամբողջականությանը։ Ազգային ժողովում լրագրողների հետ ճեպազրույցում այս մասին ասաց Հայաստանում Իրանի դեսպան Մեհդի Սոբհանին։ «Մենք միշտ աջակցել ենք Հայաստանի Հանրապետության ինքնիշխանությանը և տարածքային ամբողջականությանը։ Այն, ինչը Հայաստանի ինքնիշխանության և տարածքային ամբողջականության խախտում կլինի, մեզ համար ընդունելի չի լինի»,- ասաց Սոբհանին։

16:25 - 11 հունվարի, 2024

Իրանի և ՌԴ ԱԳ նախարարները հեռախոսազրույց են ունեցել․ քննարկվել է տարածաշրջանում ստեղծված իրավիճակը |tert.am|

tert.am: Իրանական կողմի նախաձեռնությամբ հունվարի 9-ին հեռախոսազրույց է տեղի ունեցել Ռուսաստանի Դաշնության արտաքին գործերի նախարար Ս.Վ.Լավրովի և Իրանի Իսլամական Հանրապետության արտաքին գործերի նախարար Հոսեյն Ամիրաբդոլլահյանի միջև։ Այս մասին հայտնում է ՌԴ ԱԳՆ-ն։ «Ս.Վ. Լավրովն անկեղծ ցավակցություն է հայտնել իրանական Քերմանում ահաբեկիչների ձեռքով մարդկանց ողբերգական մահվան կապակցությամբ, ովքեր հավաքվել էին հարգելու գեներալ Ղասեմ Սոլեյմանիի հիշատակը»,- ասվում է ՌԴ ԱԳՆ կայքում։ Նշվում է, որ կողմերը հաստատել են իրենց մտադրությունը «համակարգելու ջանքերը միջազգային ահաբեկչության դեմ պայքարում»։ Լավրովը և Իրանի արտգործնախարարը մտքեր են փոխանակել նաև «փոխադարձ հետաքրքրություն ներկայացնող մերձավորարևելյան և միջազգային հարցերի շուրջ, ներառյալ իրավիճակը Գազայի հատվածում և շրջակայքում, ինչպես նաև Կարմիր ծովում»:

21:44 - 09 հունվարի, 2024

ՊԵԿ-ը կանխել է մետաղյա ջարդոնների արտահանման փորձը Իրանի Իսլամական Հանրապետություն

Հայաստանի Հանրապետության պետական եկամուտների կոմիտեի Հարավային մաքսատուն-վարչության Մեղրիի մաքսային կետ-բաժնում մաքսային հսկողության են ենթարկվել «արտահանում» մաքսային ընթացակարգով հայտարարագրված (հատուկ տեխնիկայի տարբեր օգտագործված մասեր) ապրանքները և կից փաստաթղթերը։ ՊԵԿ-ից հայտնում են, որ ներքին անվտանգության վարչության աշխատակիցների մոտ՝ արտահանվող ապրանքների տեսազննման արդյունքում, հիմնավոր կասկած է առաջացել, որ երեք բեռնատարով արտահանվող ապրանքը հանդիսանում է մետաղյա ջարդոն, որի արտահանումը, ՀՀ Կառավարության 22 հունիսի 2023 թվականի թիվ 994-Ն «Հայաստանի Հանրապետությունից մի շարք ապրանքների՝ դեպի Եվրասիական Տնտեսական Միության երկրներ տեղափոխման և երրորդ երկրներ արտահանման ժամանակավոր արգելք կիրառելու մասին» որոշմամբ, արգելված է։ Շուրջ 66 տոննա մետաղյա ջարդոնի արտահանման փորձը կանխվել է: Արտահանվող ապրանքների նկատմամբ նշանակվել է կրկնակի փորձաքննություն։ Պարզվել է, որ արտահանվող ապրանքները պիտանի չեն հետագա նպատակային նշանակության օգտագործման համար։ Դեպքի առթիվ կազմվել է մաքսային կանոնների խախտման վերաբերյալ արձանագրություն և նյութերն ուղարկվել են ՀՀ Գլխավոր դատախազություն՝ քրեաիրավական գնահատական տալու և հետագա ընթացքն օրենքով սահմանված կարգով ապահովվելու համար։ Նախաձեռնվել է քրեական վարույթ:

17:43 - 09 հունվարի, 2024

Իրանը հստակ դիրքորոշում ունի հարավկովկասյան տարածաշրջանում տիրող իրավիճակի վերաբերյալ․ Քանանի |news.am|

news.am: Իրանը հստակ դիրքորոշում ունի Հարավային Կովկասի տարածաշրջանում տիրող իրավիճակի եւ տարանցիկ միջանցքներում: Այս մասին հայտարարել է Իրանի արտգործնախարարության պաշտոնական ներկայացուցիչ Նասեր Քանանին, հայտնում է IRNA- ն: «Մենք մեծ ջանքեր ենք գործադրում տարածաշրջանի երկրներում խաղաղություն, կայունություն եւ անվտանգություն հաստատելու համար: Մենք ընդգծում ենք, որ տարանցիկ համագործակցության զարգացումը չի կարող հիմք հանդիսանալ աշխարհաքաղաքական փոփոխությունների և երկրների տարածքային ամբողջականության և ազգային ինքնիշխանության խախտման համար»,- ասել է Քանանին։

16:08 - 08 հունվարի, 2024

Իրանում մի քանի մարդ է ձերբակալվել Քերմանում իրականացված պայթյունների առնչությամբ |armenpress.am|

armenpress.am: Իրանի Քերման քաղաքում իրականացված հարձակման առնչությամբ կան ձերբակալվածներ։ Այս մասին հայտնում է Tasnim գործակալությունը՝ վկայակոչելով երկրի Ներքին գործերի նախարար Ահմադ Վահիդիին։ Քերմանում լրագրողների հետ զրույցում Վահիդին հայտնել է, որ Իրանի անվտանգության ուժերն «օգտակար հետքեր» են գտել ահաբեկչական հարձակումն իրագործողների հետ կապված, ձերբակալվել են մի քանի կասկածյալներ։ Նախարարը հավելել է, որ «ահաբեկչական հանցագործության մեջ ներգրավված բոլոր տարրերը կհայտնաբերվեն և կձերբակալվեն»։ Քերմանում հունվարի 3-ին երկու պայթյուն էր տեղի ունեցել գեներալ Ղասեմ Սոլեյմանիի գերեզմանի մոտ, որը սպանվել էր ԱՄՆ նախագահ Դոնալդ Թրամփի հրամանով իրականացված ավիահարվածի հետևանքով։ Պայթուցիկները գործի էին դրվել գեներալի մահվան 4-րդ տարելիցի կապակցությամբ անցկացվող արարողության ժամանակ, մարդկանց բազմության մեջ։ Հարձակման հետևանքով զոհերի թիվը հասել է 89-ի, նրանց թվում կա 9 երեխա։ Գրեթե 300 մարդ վիրավորվել է։ Պայթյունների պատասխանատվությունը ստանձնել է «Իսլամական պետություն» ահաբեկչական խմբավորումը։

17:15 - 05 հունվարի, 2024

Իրանում պայթյունների պատասխանատվությունը ստանձնել է «Իսլամական պետությունը» |1lurer.am|

1lurer.am: «Իսլամական պետություն» ահաբեկչական խմբավորումը ստանձնել է Իրանի Քերման քաղաքում տեղի ունեցած պայթյունների պատասխանատվությունը: Հիշեցնենք, որ Իրանն Իսրայելին է մեղադրում խմբավորման ստեղծման և ղեկավարման համար: Երեկ Իրանի Քերման քաղաքում Ղասեմ Սոլեյմանիի նահատակության տարելիցին նվիրված արարողության ժամանակ Գոլզար Շահեդի գերեզմանատուն տանող ճանապարհին ուժգին պայթյուններ են որոտացել։ Իրանում հայտարարված է եռօրյա սուգ:

21:07 - 04 հունվարի, 2024

Իրանի ՆԳՆ-ն հայտնել է, որ Քերմանում պայթյունների զոհերի թիվը 84 է |armenpress.am|

armenpress.am: Իրանի ներքին գործերի նախարար Ահմադ Վահիդին հայտարարել է, որ հունվարի 3-ին Քերմանում տեղի ունեցած հարձակման զոհերի թիվը 84 է։ Այս մասին տեղեկանում ենք IRNA գործակալությունից։ «Դատաբժշկական եզրակացության համաձայն՝ այս միջադեպի հետևանքով զոհերի թիվն այսօրվա դրությամբ կազմում է 84», - ասել է Իրանի ՆԳՆ ղեկավարը պայթյուններից տուժածներին այցելելուց հետո։ Վահիդին հայտնել է, որ միջադեպից հետո կատարվել է 119 վիրահատություն։ Հոսպիտալացվածներից մի քանիսի վիճակը ծանր է։ Նախարարը նաև հայտնել է, որ միջադեպի հետևանքով 284 մարդ է վիրավորվել։ Ահմադ Վահիդիի խոսքով՝ «ահաբեկիչները և նրանց կողմնակիցները ծանր ապտակ կստանան» և պետք է վախենան Իրանի ժողովրդի ցասումից։ Իրանի Քերման քաղաքում 2 պայթյունները տեղի են ունեցել հունվարի 3-ին՝ 2020 թվականին Բաղդադում ԱՄՆ ավիահարվածի հետևանքով իրանցի գեներալ Ղասեմ Սոլեյմանիի մահվան 4-րդ տարելիցի օրը, նրա հիշատակին նվիրված արարողության ժամանակ։

17:07 - 04 հունվարի, 2024

ՀՀ նախագահը ցավակցություն է հայտնել Իրանի Քերման քաղաքում տեղի ունեցած պայթյունների կապակցությամբ |news.am|

news.am: Խորապես վշտացած եմ Իրանի Քերման քաղաքում տեղի ունեցած պայթյունների լուրից, որոնք անմեղ մարդկանց կյանքեր խլեցին և բազմաթիվ մարդկանց վիրավորեցին: Այդ մասին X-ի իր միկրոբլոգում գրել է նախագահ Վահագն Խաչատուրյանը: «Իմ ամենաանկեղծ ցավակցությունն եմ հայտնում Իրանի ժողովրդին և ղեկավարությանը։ Զոհվածների ընտանիքներին և հարազատներին մաղթում եմ ոգու կորով և համառություն և շուտափույթ ապաքինում բոլոր տուժածներին»,- նշել է նախագահը:

11:52 - 04 հունվարի, 2024

ԱՄՆ-ն կապ չունի Իրանում տեղի ունեցած ահաբեկչության հետ. Պետքարտուղարություն |tert.am|

tert.am: ԱՄՆ-ը կապ չունի Իրանում տեղի ունեցած պայթյունների հետ և որևէ պատճառ չի տեսնում ասելու, որ Իսրայելը ներգրավված է դրանցում: Ասել է ԱՄՆ Պետդեպարտամենտի խոսնակ Մեթյու Միլլերը։ «Մենք ուշադիր հետևում ենք Իրանից եկող հաղորդագրություններին, մենք չունենք որևէ անկախ տեղեկատվություն։ Ցավակցում ենք այս սարսափելի պայթյունների զոհերի ընտանիքներին և հարազատներին»,- ասել է նա ճեպազրույցում։ «Դեռ վաղ է, համենայնդեպս, մեզ համար ասել, թե ինչն է եղել տեղի ունեցածի պատճառը, բայց ես կուզենայի պատասխանել որոշ անպատասխանատու մեղադրանքներին, որոնք ես տեսել եմ, որոնք շրջանառվում են և ասել, որ ԱՄՆ-ը որևէ կերպ առնչություն չունի դրա հետ։ Հակառակ հայտարարությունները ծիծաղելի են: Մենք հիմք չունենք ենթադրելու նաև, որ Իսրայելը ներգրավված է այս ամենի մեջ»,-հավելել է նա։

10:15 - 04 հունվարի, 2024

Իրանի նախագահի այցը Թուրքիա հետաձգվել է |shantnews.am|

shantnews.am:Իրանի նախագահ Էբրահիմ Ռայիսին հետաձգել է հունվարի 4-ին նախատեսված այցը Թուրքիա ՝ կապված Իրանի Քերման քաղաքում տեղի ունեցած ահաբեկչության հետ։ Այս մասին հայտնում է IRNA գործակալությունը՝ հղում անելով Իրանի նախագահի աշխատակազմի քաղաքական հարցերով ղեկավարի տեղակալ Մոհամմադ Ջամշիդիին: Ռայիսին այցը հետաձգելու վերաբերյալ հեռախոսազրույց է ունեցել Թուրքիայի նախագահ Էրդողանի հետ։

09:18 - 04 հունվարի, 2024

ՄԱԿ–ի գլխավոր քարտուղարը դատապարտել է Քերմանում տեղի ունեցած հարձակումը |shantnews.am|

shantnews.am: ՄԱԿ–ի գլխավոր քարտուղար Անտոնիո Գուտերեշը դատապարտել է Քերմանում տեղի ունեցած հարձակումն ու կոչ արել պատասխանատվության ենթարկել մեղավորներին։ Այս մասին ճեպազրույցի ժամանակ հայտարարել է ՄԱԿ-ի մամուլի ծառայության աշխատակից Ֆլորենսիա Սոտո Նինյոն. «Գլխավոր քարտուղարը դատապարտում է Իրանի Իսլամական Հանրապետության Քերման քաղաքում հիշատակի արարողության ժամանակ տեղի ունեցած այսօրվա հարձակումը, որի հետևանքով, ինչպես հայտնում են, ավելի քան 100 մարդ է զոհվել, շատերը վիրավորում են ստացել։ Գլխավոր քարտուղարը կոչ է անում պատասխանատվության ենթարկել մեղավորներին»,-ասել է նա։

09:16 - 04 հունվարի, 2024

Փաշինյանը ցավակցական հեռագիր է հղել Էբրահիմ Ռայիսիին

Վարչապետ Նիկոլ Փաշինյանը ցավակցական հեռագիր է հղել Իրանի Իսլամական Հանրապետության նախագահ Էբրահիմ Ռայիսիին՝ Քերմանում տեղի ունեցած ողբերգության կապակցությամբ: «Սրտի խորը կսկիծով տեղեկացա այսօր Քերմանում տեղի ունեցած ողբերգության վերաբերյալ, որի հետևանքով զոհվել և վիրավորվել են անմեղ մարդիկ։ Այս ծանր պահին Հայաստանի Հանրապետության ժողովրդի և անձամբ իմ անունից, Ձե՛րդ գերազանցություն, թույլ տվեք վշտակցության խոսքեր հղել զոհերի բոլոր հարազատներին և շուտափույթ ապաքինում մաղթել բոլոր վիրավորներին»,- ասված է հեռագրում: Ինչպես ավելի վաղ հայտնել ենք, Իրանի Քերման քաղաքում Ղասեմ Սոլեյմանիի նահատակության տարելիցին նվիրված արարողության ժամանակ Գոլզար Շահեդի գերեզմանատուն տանող ճանապարհին երկու ուժգին պայթյուն է լսվել։ IRNA գործակալության տվյալով՝ Քերմանում պայթյունի հետևանքով զոհվել է 103 մարդ, մոտ 200 մարդ վիրավորվել է։

22:02 - 03 հունվարի, 2024

Ցնցված ենք Իրանում տեղի ունեցած պայթյունի լուրից, որի հետևանքով զոհվել են խաղաղ բնակիչներ․ ՀՀ ԱԳՆ

Ցնցված ենք Իրանում տեղի ունեցած պայթյունի լուրից, որի հետևանքով զոհվել են խաղաղ բնակիչներ: Այս մասին տեղեկանում ենք ԱԳ նախարարության մամուլի ծառայության x-ից: «Ցնցված ենք Իրանի Քերման քաղաքում տեղի ունեցած պայթյունների լուրից, որոնց հետևանքով զոհվել է ավելի քան 100 անմեղ խաղաղ բնակիչ: Մեր մտքերն ու աղոթքները տուժածների և նրանց ընտանիքների հետ են»,- ասված է հայտարարության մեջ: Ավելի վաղ տեղեկացրել էինք, որ Իրանի Քերման քաղաքում` գեներալ Ղասեմ Սոլեյմանիի գերեզման տանող ճանապարհին, պայթյուններ են որոտացել։ Պայթյունները գրանցվել են Սոլեյմանիի մահվան տարելիցին նվիրված մեծ հավաքի ժամանակ։ Իշխանությունները Քերմանում տեղի ունեցած պայթյուններն ահաբեկչական հարձակում են որակել։

21:33 - 03 հունվարի, 2024

Իրանում պայթյունների հետևանքով ավելի քան 100 մարդ է մահացել |armeniasputnik.am|

armeniasputnik.am: Իրանում գրանցված պայթյունների հետևանքով մահացածների թիվը հասել է 103-ի։ Տեղեկությունը հայտնում է Irna իրանական լրատվամիջոցները։ Ըստ տեղեկությունների` պայթյուններից տուժել է 140 մարդ։ Ավելի վաղ տեղեկացրել էինք, որ Իրանի Քերման քաղաքում` գեներալ Ղասեմ Սոլեյմանիի գերեզման տանող ճանապարհին, պայթյուններ են որոտացել։ Պայթյունները գրանցվել են Սոլեյմանիի մահվան տարելիցին նվիրված մեծ հավաքի ժամանակ։ Իշխանությունները Քերմանում տեղի ունեցած պայթյուններն ահաբեկչական հարձակում են որակել։ Իրանական լրատվամիջոցները հայտնում են, որ գերեզմանատան մոտ երկու պայթուցիկ սարք է դրված եղել պայուսակների մեջ։ Սարքերը գործարկվել են հեռակառավարմամբ։

18:26 - 03 հունվարի, 2024

Պայթյուններ՝ Իրանում․ կան զոհեր և վիրավորներ

Իրանի Քերման քաղաքում` գեներալ Ղասեմ Սոլեյմանիի գերեզման տանող ճանապարհին, պայթյուններ են որոտացել։ Տեղեկությունը հայտնում են իրանական լրատվամիջոցները։ Նշվում է, որ պայթյունները գրանցվել են Սոլեյմանիի մահվան տարելիցին նվիրված մեծ հավաքի ժամանակ։ Ըստ «Մեհր» գործակալության` առնվազն 20 մարդ է զոհվել, 60-ը՝ վիրավորվել։ Աղբյուրի հաղորդմամբ՝նահանգային որոշ պաշտոնյաներ միջադեպը որակել են որպես ահաբեկչություն: Ըստ տեղեկությունների՝ պայթել են ռումբեր պարունակող երկու պայուսակներ։

17:00 - 03 հունվարի, 2024

Հայաստանում արտատարածքային միջանցք ստեղծելու մասին խոսող երկրները պատրա՞ստ են նույնն անել իրենց տարածքում․ Իրանի դեսպան |news.am|

news.am: Մեր դիրքորոշումը չի փոխվել՝ դեմ ենք տարածաշրջանում սահմանների և աշխարհաքաղաքական փոփոխություններին․ սահմանների փոփոխությունը մեր համար կարմիր գիծ է, դա Իրանի բարձրագույն իշխանությունների մակարդակով է հայտարարվել, և ոչ ոք չի կարող հետ կանգնել դրանից։ Այս մասին Հանրային հեռուստաընկերությանը տված հարցազրույցում հայտարարել է ՀՀ-ում Իրանի Իսլամական Հանրապետության արտակարգ և լիազոր դեսպան Մեհդի Սոբհանին։ Դեսպանն ընդգծել է, որ այլ երկրի տարածքում արտատարածքային միջանցք ստեղծելու որևէ իմաստ չկա, և որ ամեն երկրի հաղորդակցման ուղիները գտնվում են իր ինքնիշխանությունն այդ տարածքում իրացնող պետության ձեռքում։

14:17 - 03 հունվարի, 2024