ՏԿԵՆ - infocom.am

Գնել Սանոսյանը բեռնափոխադրողների հետ քննարկել է ճանապարհային վճարի և մաքսային տուրքերի փոփոխությունների փաթեթը

ՀՀ տարածքային կառավարման և ենթակառուցվածքների նախարար Գնել Սանոսյանը հանդիպել է Հայաստանում բեռնափոխադրումներ իրականացնող ընկերությունների ներկայացուցիչների հետ, հայտնում են ՏԿԵ նախարարությունից: Հանդիպման նպատակն էր քննարկել իրանական կողմի հետ ճանապարհային վճարի և մաքսային տուրքերի փոփոխությունների փաթեթը։ Նախարարը հետաքրքրվել է բեռնափոխադրող ընկերությունների ունեցած խնդիրներով, լսել առաջարկություններ։ Գնել Սանոսյանը կարևոր է համարել նմանատիպ հանդիպումները, որպեսզի նախարարությունը համալիր պատկերացում կազմի կոնկրետ ոլորտում եղած դժվարությունների, խոչընդոտների մասին, գույքագրի այդ խնդիրները և իրանական, վրացական գործընկերների հետ դարձնի քննարկման առարկա։ Բեռնափոխադրող ընկերության ներկայացուցիչները շնորհակալություն են հայտնել ընձեռած հնարավորության համար և հանգամանալից ներկայացրել են իրենց առջև ծառացած խնդիրները և խոչընդոտները։ Հանդիպման ավարտին պայմանավորվածություն է ձեռք բերվել հաճախակի ունենալ հանդիպումներ՝ բարձրաձայնված խնդիրները և դրանց լուծման եղանակները քննարկելու համար։

15:43 - 20 մայիսի, 2022

Գնել Սանոսյանը և Իրանի նավթի նախարարը քննարկել են գազ՝ էլեկտրաէներգիայի դիմաց ծրագրով նոր պայմանագիրը

ՀՀ տարածքային կառավարման և ենթակառուցվածքների նախարար Գնել Սանոսյանը Իրանի Իսլամական Հանրապետություն կատարած աշխատանքային այցի շրջանակներում հանդիպել է ԻԻՀ նավթի նախարար Ջավադ Օջիի հետ։ Ինչպես հայտնում են ՀՀ տարածքային կառավարման և ենթակառուցվածքների նախարարությունից, հանդիպման ժամանակ քննարկվել է գազ՝ էլեկտրաէներգիայի դիմաց ծրագրով նոր պայմանագիրը։ Նախարար Սանոսյանը առաջարկներ է ներկայացրել պայմանագրի վերակնքման հետ կապված։ Առաջիկայում, երբ պայմանագիրը կվերջնականացվի, պատրաստ լինեն ներկայացված առաջարկությունների վերաբերյալ իրանական կողմի պատասխանները, պայմանագիրը կկնքվի։ Քննարկվել է նաև նավթի վերամշակման, բիտումի, բիտումի գնի հետ կապված հարցեր։ Նախարարը նշել է, որ Հայաստանում ակտիվ ճանապարհաշինական աշխատանքներ են ընթանում, սակայն բիտումի գնի հետ կապված փոփոխությունները որոշակի դժվարություններ են առաջ բերել։ Նախարարը նկատել է՝ ցանկալի կլիներ, որ բիտումը Հայաստան հասցվեր ավելի մատչելի։ Հանդիպման ընթացքում քննարկվել են երկկողմ հետաքրրքություն ներկայացնող այլ հարցեր։ Կողմերը հանդիպումը գնահատել են որպես դրական և կառուցողական։

12:10 - 17 մայիսի, 2022

Գնել Սանոսյանը Թեհրանում մասնակցել է Նավթաքիմիական 26-րդ միջազգային ցուցահանդեսին

ՀՀ տարածքային կառավարման և ենթակառուցվածքների նախարար Գնել Սանոսյանը, որը եռօրյա աշխատանքային այցով գտնվում է Իրանի Իսլամական Հանրապետությունում, Թեհրանում մասնակցել է Նավթի, գազի, վերամշակման և նավթաքիմիական 26-րդ միջազգային ցուցահանդեսին։ Տեղեկությունը հայտնում է ՀՀ ՏԿԵՆ մամուլի ծառայությունը։ Նշվում է, որ ԻԻՀ-ում նախարարին դիմավորել է ճանապարհների և քաղաքաշինության նախարարի տեղակալ Խեյրոլլահ Խադեմին։ «Նախարարը շրջայց է կատարել ցուցահանդեսի տաղավարներով, որտեղ ներկայացված են նավթի և գազի ոլորտում տարբեր պետական և մասնավոր ընկերություններ, որոնք հաջողությոնների են հասել ոչ միայն Իրանում, այլև նավթ և գազ արդյունահանող աշխարհի տարբեր երկրներում»,–նշված է հաղորդագրության մեջ։ Շրջայցից հետո նախարարը պատասխանել է լրագրողների հարցերին։ Սանոսյանը նշել է, որ տպավորված է նավթի և գազի արդյունահանման, սպասարկման, սարքավորումների և այլ հարցերում իրանական ընկերությունների հաջողություններով։ Վաղը`մայիսի 16–ին, նախատեսված են մի շարք հանդիպումներ ԻԻՀ էներգետիկայի նախարար Ալի Աքբար Մեհրաբիանի, ճանապարհների և քաղաքաշինության նախարար Ռոստամ Ղասեմիի, ինչպես նաև նավթի նախարար Ջավադ Օջիի հետ։

09:40 - 16 մայիսի, 2022

ՀՀ ՏԿԵ նախարար Սանոսյանը ներկայացրել է Վանաձոր համայնքի ղեկավարի պաշտոնակատարին

ՀՀ տարածքային կառավարման և ենթակառուցվածքների նախարար Գնել Սանոսյանը Վանաձոր համայնքի ավագանու անդամներին և համայնքապետարանի աշխատակազմին է ներկայացրել համայնքի ղեկավարի պաշտոնակատար Արկադի Փելեշյանին։ Այս մասին տեղեկացնում է «Ֆեյսբուք»-ում Վանաձորի համայնքապետարանի էջը։ «ՀՀ վարչապետ Նիկոլ Փաշինյանի 2022 թվականի մայիսի 13-ի թիվ 514-Ա որոշմամբ Արկադի Փելեշյանը նշանակվեց Վանաձոր համայնքի ղեկավարի պաշտոնակատար: Համայնքի ղեկավարի նորանշանակ պաշտոնակատարին Վանաձոր համայնքի ավագանու անդամներին և համայնքապետարանի աշխատակազմին ներկայացրեց ՀՀ տարածքային կառավարման և ենթակառուցվածքների նախարար Գնել Սանոսյանը։ Նիստին ներկա էր նաև Լոռու մարզպետ Արամ Խաչատրյանը։ Նախարարն իր խոսքում շնորհակալություն հայտնեց համայնքապետարանի աշխատակազմին՝ ստեղծված բարդ իրավիճակում աշխատանքները կազմակերպելու համար, ինչը հնարավորինս զերծ է պահել համայնքը կոլապսի ենթարկվելուց։ Գնել Սանոսյանն խոսեց նաև անելիքների մասին․ «Օգտվելով տրված իրավական կարգավորումներից՝ արդեն ունենք ժամանակավոր պաշտոնակատար, ով քաղաքը կղեկավարի այնքան ժամանակ, մինչև բուն իրավական գործընթացները կկարգավորվեն ինչպես հարկն է և ինչպես օրենքն է։ Հասկանում եմ, որ չափազանց բարդ ժամանակահատված է, շատ պարտավորություններ և անելիքներ կան, որոնք նշված խնդիրների պատճառով չեն իրականացվել, բայց մյուս կողմից գիտեմ, որ ավագանու անդամ լինելը, հետագայում նաև համայնքի ղեկավարի առաջին տեղակալ լինելը բավական համոզիչ են այն առումով, որ քաջածանոթ եք քաղաքի խնդիրներին։ Պարոն Փելեշյան, հույս ունեմ, որ առաջ եկած խնդիրները իրավական հնարավորությունների պարագայում արագ կկարգավորեք Ձեր լիազորությունների շրջանակում։ Մեկ անգամ ևս շնորհավորում եմ։ Համոզված եմ, որ ջանք ու եռանդ չեք խնայի քաղաքի առջև ծառացած խնդիրները կարգավորելու համար»,- հայտնում են Վանաձորի համայնքապետարանից։ Արկադի Փելեշյանը շնորհակալություն է հայտնել ՀՀ վարչապետին՝ վստահության համար՝ հավաստիացնելով, որ քաջատեղյակ լինելով համայնքի խնդիրներին՝ իր լիազորությունների սահմաններում ջանք չի խնայի դրանց արդյունավետ լուծման համար։

15:54 - 15 մայիսի, 2022

Կառավարությունը 4 միլիարդ 750 միլիոն դրամ հատկացրեց ճանապարհների հիմնանորոգման համար

12:26 - 13 մայիսի, 2022

Աբովյան և Արզնի համայնքներում նախատեսվում է HYEPROSPECT նորարարական և ներառական արդյունաբերական համայնքի կառուցումը

Աբովյանի համայնքապետարանում, համայնքի ղեկավար Էդուարդ Բաբայանի գլխավորությամբ, տեղի է ունեցել հանդիպում ՀՀ Էկոնոմիկայի, Տարածքային կառավարման և ենթակառուցվածքների նախարարությունների, «Էնթերփրայզ Արմենիայի» և համայնքապետարանի աշխատակազմի ներկայացուցիչների հետ, որի ընթացքում «Էնթերփրայզ Արմենիայի» կողմից ներկայացվել է «Հայփրոսփեքթ» ՓԲ ընկերության ներդրումային ծրագիրը: Ներդրումային ծրագրով նախատեսվում է Կոտայքի մարզի Աբովյան և Արզնի համայնքներում կառուցել HYEPROSPECT նորարարական և ներառական արդյունաբերական համայնք, որն ունենալու է համապատասխան ենթակառուցվածքներ չորս հիմնական ուղղություններով՝ ինովացիա, ուսուցում, ծառայություններ, կառույցներ։ Համայնքը ներառելու է բնակելի, կրթական, առողջապահական, գյուղատնտեսական և կանաչ գոտիներ, ինչպես նաև արտադրական թաղամաս (ազատ տնտեսական գոտի, ազատ արդյունաբերական գոտի՝ լավ հարմարեցված ԵԱՏՄ շուկաները թիրախավորող արտադրանքի համար և ծախսարդյունավետ ռեսուրսներ: Հանդիպման մասնակիցներն անդրադարձել են ներդրումային նախաձեռնությանն առնչվող մի շարք հարցերի, ներկայացրել ծրագրի վերաբերյալ առաջարկներ և դիտողություններ, քննարկվել են նաև ընթացիկ մի շարք հարցեր: HYEPROSPECT կայուն սմարթ համայնքի ծրագրի կառավարման աշխատանքները էկոնոմիկայի նախարարության առաջնորդությամբ իրականացնում է «իԳործ» ծրագրի փորձագետ և խորհրդական Արևիկ Մարգարյանը։

13:59 - 11 մայիսի, 2022

Ըստ ՏԿԵՆ-ի՝ Արաքս գետի հունից ավազի արդյունահանումը սահմանային փոփոխությունների ռիսկ է առաջացնում |hetq.am|

hetq.am: Տարածքային կառավարման և ենթակառուցվածքների նախարարությունը (ՏԿԵՆ) մտադիր է արգելել սահմանամերձ գետերի հուներից ավազի արդյունահանումը, քանի որ այն սահմանային փոփոխությունների ռիսկեր է պարունակում։ Վարչական իրավախախտումների վերաբերյալ և Ընդերքի մասին օրենսգրքերում լրացումներ կատարելու նախագծերի փաթեթը շրջանառության մեջ է դրվել իրավական ակտերի նախագծերի հրապարակման կայքում։ Ինչպես նշված է նախագծի հիմնավորման մեջ, Արաքս գետի հունից իրականացված արդյունահանումների հետևանքով առաջանում են բազմաթիվ խնդիրներ, այդ թվում սահմանային փոփոխությունների հիմնավոր ռիսկեր, և առաջացել է այդ խնդիրների հրատապ կարգավորման անհրաժեշտություն: Առաջարկվում է սահմանամերձ գետերի հուներից արդյունահանում իրականացնելու դեպքում ընդերքօգտագործողին տուգանել նվազագույն աշխատավարձի հինգհազարապատիկի չափով, այսինքն՝ 5 միլիոն դրամով, իսկ նույն տարվա ընթացքում ավազի արդյունահանման դեպքի կրկնվելու դեպքում դադարեցնել ընդերքօգտագործման իրավունքիը։ ՏԿԵՆ-ը վարչական պատասխանատվության այս սահմանաչափերը որոշել է՝ հիմք ընդունելով Ազգային անվտանգության ծառայության առաջարկությունները։ Արաքսը Հայկական լեռնաշխարհի ամենախոշոր գետերից մեկն է, որի երկարությունը 1072 կիլոմետր է։ Այն անդրսահմանային գետ է Հայաստանի և Թուրքիայի, Հայաստանի և Իրանի միջև։ Հավելենք, որ այս նախագիծն օրինական ուժ ստանալու համար նախ պետք է արժանանա կառավարության հավանությանը, ապա ընդունվի նաև Ազգային ժողովի կողմից։

16:44 - 09 մայիսի, 2022

Քննարկվել են Հայաստանում բիտումի արտադրություն հիմնելու հեռանկարները. ՏԿԵ նախարարությունում հյուրընկալել են իրանցի գործընկերներին

ՀՀ տարածքային կառավարման և ենթակառուցվածքների նախարարությունում տեղի է ունեցել հանդիպում ճանապարհային ոլորտի քաղաքականության վարչության, «Ճանապարհային դեպարտամենտ» հիմնադրամնի մասնագետների և «Ներդրումների աջակցման կենտրոն» հիմնադրամի ու իրանական Aras Jes Petro Co ընկերության ներկայացուցիչների միջև: Հանդիպմանը իրանական կողմը ներկայացրել է իրենց ընկերության կողմից արտադրվող բիտումի տեսակները, համագործակցության հնարավորությունները և Հայաստանում բիտումի արտարդրություն հիմնելու համար ընկերության հեռանկարները: Նախարարության ներկայացուցիչները նշել են, որ հաշվի առնելով Հայաստանում առկա ակտիվ ճանապարհաշինական աշխատանքների ծավալները, շատ կարևոր է երկրում ունենալ բարձր որակի բիտում։ Կարևոր է նաև, որ բիտումի արտադրությունը կազմակերպվի հենց Հայաստանում: Իրանական ընկերության խորհրդի նախագահ Մոհամադ Նարիմսազադը պատրաստակամություն է հայտնել տրամադրել ընկերության կողմից արտադրվող բիտումի տեսակների և ծավալների վերաբերյալ տեղեկատվություն՝ հայաստանյան կապալառու կազմակերպություններին փոխանցելու նպատակով։

16:53 - 06 մայիսի, 2022

ՏԿԵՆ-ում քննարկվել են ՀՀ ճանապարհները որպես տարանցիկ ուղի օգտագործելու և Ուզբեկստանը Եվրոպային կապելու հնարավորությունները

ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանն ընդունել է Ուզբեկստանի Հանրապետության տրանսպորտի նախարարի տեղակալ Ժասուրբեկ Չորիևի գլխավորած պատվիրակությանը, որի կազմում էին նաև Միջազգային հարաբերութունների, լոգիստիկայի և արտահանման զարգացման վարչության պետ Մամանբի Օմարովը և օդային տրանսպորտի զարգացման վարչության գլխավոր մասնագետ Սատոր Սատորովը։ ՀՀ տարածքային կառավարման և ենթակառուցվածքների նախարարությունը տեղեկացնում է, որ Սիմոնյանը, ողջունելով հյուրերին, շեշտել է Հայաստանի և Ուզբեկստանի միջև ուղիղ չվերթեր իրականացնելու կարևորությունը, ինչպես նաև ներկայացրել է օդային, երկաթուղային և ավտոմոբիլային տրանսպորտի ոլորտում Հայաստանի Հանրապետության ռազմավարական ուղղություններն ու հեռանկարները։ Հյուրերը շնորհակալություն են հայտնել ընդունելության համար և հետաքրքրություն հայտնել հայկական ավիաընկերությունների շուկայում ներգրավված լինելու մասին՝ միաժամանակ ընդգծելով, որ ուզբեկական ավիաընկերությունները ունեն ցանկություն դեպի Հայաստանի Հանրապետություն ուղիղ չվերթեր իրականացնել, սակայն ներկայում աշխատանքային ծանրաբեռնվածության պատճառով չունեն բավարար ռեսուրսներ։ Ի պատասխան՝ հայկական կողմը ներկայացրել է տեղեկատվություն ՀՀ գործող և ստեղծվող ավիաընկերությունների մասին, պատրաստակամություն հայտնել խթանել ընկերությունների և ուզբեկական կողմի միջև կապի հաստատումը և գործընկերության ստեղծումը։ Հանդիպման ընթացքում քննարկվել են նաև Հայաստանի Հանրապետության ճանապարհները որպես տարանցիկ ուղի օգտագործելու և Ուզբեկստանը Եվրոպային կապելու հնարավորությունները։ Արմեն Սիմոնյանը, դրական գնահատելով հանդիպման արդյունքները, նշել է, որ կողմերը կշարունակեն ակտիվ համագործակցությունը և, հնարավոր է, միջկառավարական համաձայնությամբ ամրապնդեն դինամիկ զարգացող հարաբերությունները։

17:07 - 03 մայիսի, 2022

Փոխվարչապետ Մաթևոսյանը Կոտայքի մարզ կատարած այցի ընթացքում հանդիպել է խոշորացված համայնքների ղեկավարներին և ֆերմերներին

Հայաստանի Հանրապետության փոխվարչապետ Համբարձում Մաթևոսյանն ապրիլի 30-ին աշխատանքային այցով Կոտայքի մարզում էր. տեղեկացնում են փոխվարչապետի աշխատակազմից: Փոխվարչապետին ուղեկցել են ՀՀ տարածքային կառավարման և ենթակառուցվածքների նախարար Գնել Սանոսյանը, Կոտայքի մարզպետ Ահարոն Սահակյանը, Էկոնոմիկայի նախարարի տեղակալ Արման Խոջոյանը, Ջրային կոմիտեի նախագահ Վահագն Գևորգյանը, Հայաստանի տարածքային զարգացման հիմնադրամի գործադիր տնօրեն Արթուր Սողոմոնյանը, Գառնի համայնքի ղեկավար Տիգրան Պողոսյանը, այլք։ Առաջին կանգառի ընթացքում փոխվարչապետը մասնակցել է համապետական շաբաթօրյակին, այնուհետև այցելել «Գառնի Գարդեն» ՍՊ ընկերության նորատունկ այգի, ծանոթացել իրականացված և իրականացվելիք ներդրումային ծրագրերին՝ ուղղված նուշի (70հա), պիստակի (10 հա) և ընկույզի (38 հա) այգիների հիմնմանն ու զարգացմանը։ Նշենք, որ Ընկերությունը տարբեր տարիների օգտվել է նաև պետական աջակցության ծրագրերից։ Այցի ընթացքում փոխվարչապետն այցելել է Արցախյան պատերազմի զոհերին նվիրված հուշահամալիր, ծաղիկներ խոնարհել զոհված հերոսների հիշատակին։ Համբարձում Մաթևոսյանը Արցախյան 44-օրյա պատերազմում զոհված Արթուր Հակոբյանի հոր՝ Դավիթ Հակոբյանի հետ, հուշահամալիրում ծառ է տնկել՝ այն նվիրելով հայրենիքի պաշտպանության համար մղված մարտերում ընկած հերոսների հիշատակին։ Փոխվարչապետը պատասխանատու պաշտոնատար անձանց հետ շրջել է նաև Գառնու տաճար տանող ճանապարհի շինհրապարակում, հետևել վերանորոգման աշխատանքներին, այնուհետև խորհրդակցություն անցկացրել Կոտայքի մարզի խոշորացված համայնքների ղեկավարների և ֆերմերների հետ։ Վերջիններիս հետ զրույցում անդրադարձ է կատարվել հողօգտագործողներին մատչելի գներով ազոտական, ֆոսֆորական և կալիումական պարարտանյութերի ձեռքբերման պետական աջակցության ծրագրի իրականացման ընթացքին, որոշ համայնքներում ոռոգման ջրի հետ կապված խնդիրներին և այլ հարցերին։ Փոխվարչապետ Մաթևոսյանն այցելել է նաև «Քարերի սիմֆոնիա» բնական հուշարձան, որտեղ Տարածքային զարգացման հիմնադրամի ղեկավարը ներկայացրել է ենթակառուցվածքների կառուցման, ճանապարհների կահավորման ավարտված աշխատանքների արդյունքը։ Փոխվարչապետի աշխատանքային այցի վերջին կանգառը Գողթ համայնքի «Արմյանսկիյ Ուրաժայ» ընկերության «Rose Art» ապրանքանիշի ներքո գործող ջերմոցային տնտեսությունն էր, որտեղ զբաղվում են հոլանդական պրեմիում կարգի վարդերի աճեցմամբ։ Ջերմատների ընդհանուր մակերեսը շուրջ 35 հա է, իսկ աշխատատեղերի քանակը՝ 330։ Համբարձում Մաթևոսյանը շրջել է ջերմատներով, ծանոթացել նորագույն սարքավորումներով «զինված» ընկերության արտադրանքին և իրացման հետ կապված մանրամասներին։

10:26 - 02 մայիսի, 2022

Շաբաթօրյակին ներգրավվել է 1830 միավոր տեխնիկա և 42100 գործիք. ՏԿԵՆ-ն ամփոփել է շաբաթօրյակի արդյունքները

ՀՀ տարածքային կառավարման և ենթակառուցվածքների նախարարությունն ամփոփել է այսօր՝ ապրիլի 30-ին, կայացած համապետական շաբաթօրյակի արդյունքները: Ըստ ՀՀ մարզերից և Երևան համայնքից ստացված տեղեկատվության՝ ընդհանուր առմամբ ՀՀ մարզերում շաբաթօրյակին մասնակցել են հանրապետական գործադիր մարմինների տարածքային ծառայությունների, մարզային ու համայնքային ենթակայության հիմնարկների, մասնավոր ընկերությունների աշխատակիցներ, քաղաքացիական հասարակության կազմակերպություններ, դպրոցականներ, ուսանողներ և բազմաթիվ կամավորներ։ Շաբաթօրյակին ներգրավվել է 1830 միավոր տեխնիկա և կիրառվել է մաքրման տարբեր տեսակի շուրջ 42100 գործիք։ Աղբից մաքրվել են փողոցներ ու բակեր, միջպետական, հանրապետական, մարզային ու համայնքային նշանակության ճանապարհներ ու ճանապարհամերձ տարածքներ, անտառամերձ տարածքներ, այգիներ, պուրակներ, պատմամշակութային հուշարձանների տարածքներ։ Լվացվել են բազմաթիվ հուշարձաններ։ Միաժամանակ վերացվել են շուրջ 50 մեծ աղբակույտեր ու աղբանոցներ։

21:44 - 30 ապրիլի, 2022

Սեղմված գազով և հեղուկ գազով մեքենաների սարքավորումները պետք է ստուգվեն առնվազն 2 տարին մեկ. Սանոսյան |1lurer.am|

1lurer.am: Կառավարությունն ընդունեց նախագիծ, որով նախատեսվում է ավտոտրանսպորտային միջոցների վրա գազաբալոնային սարքավորումների տեղադրման և պարբերական վկայագրման գործընթացի ծրագրային ապահովման նպատակով ավտոմատացված համակարգի ստեղծման համար անհրաժեշտ ֆինանսական միջոցների ապահովումը: «Դեռևս 2021 թվականի դեկտեմբերին ընդունվել են 2 որոշումներ և կարգեր, որոնք էլ այս գործընթացի սկիզբն են դրել: Այս գործընթացի մաս է կազմում էլեկտրոնային շտեմարանի առկայությունը, հայտարարվել է մրցույթ, շահող ընկերությունը 23 միլիոն 400 հազար դրամով հաղթող է ճանաչվել: Որոշման նախագծով առաջարկում ենք, որ այս ամբողջ գործընթացի այդ փուլն էլ ավարտենք, օգոստոսի 1-ից սկսի համակարգը գործել»,- ասաց տարածքային կառավարման և ենթակառուցվածքների նախարար Գնել Սանոսյանը: Սանոսյանը նշեց, որ ոլորտում անվտանգային լուրջ խնդիրներ կան, երբեմն տեղի են ունենում գազաբալոնային համակարգի խափանումներ, պայթյուններ: «Դրվել է հետևյալ համակարգը՝ Հայաստանում շահագործվող սեղմված գազով և հեղուկ գազով մեքենաների սարքավորումները պետք է ստուգվեն առնվազն 2 տարին մեկ: Կան որոշ տեսակի բալոններ, որոնց դեպքում թույլատրվում է 3 տարին մեկ անգամ ստուգել: Կան լիցենզավորված կազմակերպություններ, որոնք պետք է տեղադրեն, հետո նաև՝ ստուգեն, և կա էլեկտրոնային համակարգ, որտեղ այս ստուգման արդյունքները մուտք են արվում: Շտեմարանը ղեկավարելու է մեր նախարարությունը, բայց մի շարք գործընկերների տրվելու է թույլտվություն այդ համակարգից օգտվելու, մասնավորապես, գազալցակայաններին, տեսչական մարմիններին: Երբ մեքենան գնաց կայան, ստուգվեց, տվյալները ոչ միայն թղթային, այլև էլեկտրոնային տարբերակով լրացվում են, հետո գազալցակայանի աշխատակիցը, մեքենայի համարը հավաքելով համակարգի մեջ, տեսնում է՝ մեքենան անցե՞լ է ստուգում, թե՞ ոչ: Եթե չի անցել, չի լիցքավորում»,- ասաց Սանոսյանը: Սանոսյանը տեղեկացրեց, որ այս պահին 12 կազմակերպություն կա, որոնք լիցենզավորվել են ու կարող են նման ծառայություն մատուցել: «Ցավոք սրտի, բոլոր մարզերը չեն, որ ներգրավված են: Առիթից օգտվելով՝ մեր գործարարներին պետք է հորդորեմ, որ իրենք նույնպես հետաքրքրություն ցուցաբերեն այս ոլորտի նկատմամբ և կարողանան նման ծառայություն մատուցել: Մյուս կողմից՝ մեր քաղաքացիներին հորդորում եմ չսպասել մինչև օգոստոսի 1-ը: Այս ընթացքում արդեն կարող են այդ փուլն անցնել: Գործընթացը բավականին արագ է տևում»,- նշեց նախարարը:

12:33 - 28 ապրիլի, 2022

Կկառուցվեն մայթեր, կհիմնանորոգվեն ճանապարհներ և կամուրջներ. կառավարության նոր որոշումը

Կառավարությունը ընդունեց նախագիծ, որով նախատեսվում է հիմնանորոգել 2.1 կմ մարզային նշանակության ավտոճանապարհ, կառուցել 200 գծ.մ մայթեր, հիմնանորոգել մեկ կամուրջ (18,3 մ երկարությամբ) և 25 գծ.մ հենապատ։ Նախագծի իրականացման համար նախատեսվում է հատկացնել 486 միլիոն 556.7 հազար դրամ։ Հիմնավորման համաձայն՝ նախագծի ընդունումը պայմանավորված է մինչ այդ կնքված պայմանագրերով․ մասնավորապես՝ կհիմնանորոգվի Զարթոնք-Արտաշար ավտոճանապարհի մի հատված (Զարթոնք և Արտաշար բնակավայր), Գեղարքունիքի մարզի Մարտունի համայնքի Մյասնիկյան փողոցու մայթերի կկառուցվեն, Դպրաբակ բնակավայրի կամուրջը կհիմնանորոգվի, Սեմյոնովկա - /Մ-4/ հանրապետական նշանակության ավտոճանապարհի մի հատվածում հենապատ կկառուցվի։

12:05 - 28 ապրիլի, 2022

Փոխվարչապետ Մաթևոսյանը մարզպետների հետ քննարկել է սուբվենցիոն ծրագրերի հետ կապված հարցեր

Փոխվարչապետ Համբարձում Մաթևոսյանի ղեկավարությամբ և Տարածքային կառավարման և ենթակառուցվածքների նախարար Գնել Սանոսյանի, Հայաստանի մարզպետների ու շահագրգիռ պետական մարմինների ղեկավար կազմի մասնակցությամբ այսօր տեղի է ունեցել խորհրդակցություն։ Վերջինիս ընթացքում քննարկվել են 2021 թ. ավարտված սուբվենցիոն ծրագրերը մշտադիտարկելու հարցերը, ինչպես նաև անդրադարձ է կատարվել համայնքների երթևեկության կազմակերպման սխեմայի կազմման անհրաժեշտությանը, միասնական երթուղային ցանցի ներդրման, մարզերի համայնքների բյուջեների եկամուտների հավաքագրման և գյուղատնտեսական սեզոնի մեկնարկի հետ կապված աշխատանքներին։ Միասնական երթուղային ցանցի ներդրման հետ կապված հարցին անդրադառնալիս՝ Տարածքային կառավարման և ենթակառուցվածքների նախարար Գնել Սանոսյանը տեղեկացրել է, որ համայնքների խոշորացման գործընթացն ավարտված մարզերում (Շիրակ, Արագածոտն, Տավուշ և Գեղարքունիք) աշխատանքներ են իրականացվում ցանցը սպասարկող կազմակերպությունների ընտրության մրցույթների կազմակերպման ուղղությամբ։ Մասնավորապես՝ վերանայվում են մարզերի օպտիմալ երթուղիների ուղեգծերն ու չվացուցակները։ Օրակարգային մեկ այլ հարցով, անդրադառնալով պարարտանյութերի ձեռքբերման պետական աջակցության ծրագրի իրականացման ընթացքին, Էկոնոմիկայի նախարարի տեղակալ Արման Խոջոյանը տեղեկացրել է, որ 2022 թվականին, ընդհանուր առմամբ, Հայաստան է ներմուծվել 11 հազար տոննա պարարտանյութ՝ 50 տոկոսը գյուղատնտեսական նշանակության։ Օպերատիվ տվյալների համաձայն՝ այսօրվա դրությամբ 4750 տոննա պարարտանյութն արդեն իսկ մատակարարվել է ՀՀ մարզեր․ գործընթացը շարունակվում է։ Փոխվարչապետ Մաթևոսյանը մարզպետներին հանձնարարել է մշտական ուշադրության կենտրոնում պահել պետության կողմից համայնքներում իրականացվող ծրագրերը, մասնավորապես՝ Կառավարության ծրագրով մեկնարկած «300 դպրոց-500 մանկապարտեզ» կապիտալ բնույթի մեծածավալ նախաձեռնությունը, ինչպես նաև ստուգայցերի միջոցով մինչև երաշխիքային ժամկետների լրանալը վեր հանել ավարտված սուբվենցիոն ծրագրերի խնդիրներ/թերությունները և քայլեր ձեռնարկել դրանք շտկելու ուղղությամբ։ Նիստի ընթացքում քննարկվել են նաև օրակարգային այլ հարցեր։

17:12 - 20 ապրիլի, 2022

Ապրիլի 30-ը հայտարարվել է համապետական շաբաթօրյակի օր

Երկարատև ձմեռային եղանակային պայմաններից հետո, հաշվի առնելով ձնհալից հետո հանրապետության ողջ տարածքում հնարավոր աղտոտվածությունը, 2022 թվականի ապրիլի 30-ը հայտարարվել է համապետական շաբաթօրյակի օր։ Այս մասին հայտնում են ՀՀ տարածքային կառավարման և ենթակառուցվածքների նախարարության լրատվական ծառայությունից՝ նշելով, որ այդ կապակցությամբ համակարգված ու արդյունավետ աշխատանքները կազմակերպելու նպատակով ՀՀ տարածքային կառավարման և ենթակառուցվածքների նախարարությունում կայացել է համապետական շաբաթօրյակի նախապատրաստական և կազմակերպչական հարցերի քննարկում՝ ՀՀ գործադիր մարմինների ղեկավարների տեղակալների և տարածքային կառավարման մարմինների ղեկավարների տեղակալների մասնակցությամբ։ Շաբաթօրյակի օրը ակնկալվում է ապահովել հանրապետության տարածքում սանիտարական մաքրության բարձր մակարդակ` աղբից մաքրելով ՀՀ բոլոր համայնքները, միջպետական և միջհամայնքային ճանապարհների եզրերը ու հարակից տարածքները։ Մաքրման աշխատանքներ կիրականացվեն սննդի և այլ ծառայություններ մատուցող ճանապարհամերձ օբյեկտներին հարող տարածքներում, զբոսաշրջային գրավչություն ներկայացնող պատմամշակութային հուշարձանների հարակից տարածքներում, հատուկ պահպանվող տարածքներում, ջրային համակարգերի տարածքներում, կանաչ գոտիներում, պուրակներում, զբոսայգիներում և այլն: Հանդիպման ընթացքում պլանավորվել են գերատեսչությունների կողմից նախատեսվող աշխատանքները, անհրաժեշտ տեխնիկայի և մարդկային ռեսուրսների ներգրավման և մաքրման ենթակա տարածքների հստակեցման հարցերը։

18:59 - 14 ապրիլի, 2022

Հանրապետությունում կանցկացվի հերթական մարդահամարը

Գործադիրն ընդունել է որոշում՝ «Պաշտոնական վիճակագրության մասին» օրենքի պահանջներին համապատասխան հերթական մարդահամար նախապատրաստման և անցկացման գործառույթները, ինչպես նաև մարդահամարի ծրագրին համապատասխան վիճակագրական տվյալների հավաքումը, մշակումն ու ամփոփումն ըստ սահմանված ժամկետների ապահովելու նպատակով: Արդյունքում հանրապետությունում կանցկացվի հերթական մարդահամարը՝ օրենսդրությամբ սահմանված կարգով և միջազգային հանձնարարականներով սահմանված ընթացակարգերին համապատասխան: Այս մասին հայտնում են ՀՀ կառավարությունից։ Մարդահամարները և գյուղատնտեսական համատարած հաշվառումներն անցկացվում են առնվազն 10 տարին մեկ: Հաշվի առնելով կորոնավիրուսի համաճարակային իրավիճակով պայմանավորված երկրում կարանտինի իրավական ռեժիմը, ինչը սահմանափակում է մարդահամարի դաշտային աշխատանքների նախապատարաստման և կազմակերպման իրագործումը Հայաստանի Հանրապետությունում հերթական մարդահամարն անցկացնելու ժամկետը 2020 թ.-ից տեղափոխվել էր 2022 թ.:Կառավարության որոշմամբ ՀՀ տարածքային կառավարման և ենթակառուցվածքների նախարարության պետական գույքի կառավարման կոմիտեին ամրացված, պետական սեփականություն հանդիսացող, քաղաք Երևան, Ավան, Աճառյան փողոց 2-րդ նրբանցք 2/3 հասցեում գտնվող, 5552.1 քմ մակերեսով շենք-շինությունները, ինչպես նաև դրանց զբաղեցրած, օգտագործման և սպասարկման համար հատկացված հողամասը օտարել մրցույթով: Գույքի վաճառքի գինը սահմանվել է անշարժ գույքի գնահատված շուկայական արժեքի 100 տոկոսի չափով՝ 318.135.000 դրամ։ Նախատեսվում է նաև առաջին մրցույթի ժամանակ գույքը չվաճառվելու դեպքում, դրա վաճառքի նպատակով կազմակերպել ևս երկու մրցույթ` նույն պայմաններով՝ առանց գույքի վաճառքի գնի նվազեցման։ Գործադիրը հաստատել է 2022 թ. պետական ստանդարտացման ծրագիրը, ստանդարտացման աշխատանքների ցանկը: Ազգային ստանդարտների մշակման ծառայությունների ծրագրի հիմնական նպատակն է ՀՀ-ում տնտեսության ճյուղերի ինովացիոն զարգացման համար ստեղծել միջազգային և եվրոպական ստանդարտներին ներդաշնակ ազգային ստանդարտների արդիականացված ֆոնդ, ինչպես նաև ապահովել ԵԱՏՄ-ի տեխնիկական կանոնակարգերի պահանջների կատարումը: Ծրագրի նպատակն է նաև ռազմարդյունաբերության, էներգախնայողության և էներգաարդյունավետության, սննդամթերքի, բարձր տեխնոլոգիաների, առողջապահության, բնապահպանության, հողի որակի, ռազմարդյունաբերության, ոլորտներում աջակցել աշխատանքների կարգավորմանը և արդյունավետության բարձրացմանը:

19:01 - 07 ապրիլի, 2022