ՀՀ կառավարություն

Կառավարությունը գործադիր իշխանության բարձրագույն մարմինն է: Կառավարությունն իր ծրագրի հիման վրա մշակում եւ իրականացնում է պետության ներքին եւ արտաքին քաղաքականությունը, իրականացնում է պետական կառավարման համակարգի մարմինների ընդհանուր ղեկավարումը: Կառավարության լիազորությունները սահմանվում են Սահմանադրությամբ եւ օրենքներով: Կառավարության իրավասությանն են ենթակա գործադիր իշխանությանը վերաբերող բոլոր այն հարցերը, որոնք վերապահված չեն պետական կառավարման կամ տեղական ինքնակառավարման այլ մարմինների: Կառավարությունը կազմված է վարչապետից, փոխվարչապետներից եւ նախարարներից:

Հանրապետության նախագահը վարչապետ է նշանակում խորհրդարանական մեծամասնության ընտրած թեկնածուին, իսկ փոխվարչապետները եւ նախարարները նշանակվում են Հանրապետության նախագահի կողմից՝ վարչապետի առաջարկությամբ: Այժմ գործում է Նիկոլ Փաշինյանի գլխավորած կառավարությունը։

ԵԱՏՄ երկրները պետք է օպերատիվ կերպով հարմարվեն արագ փոփոխվող արտաքին և ներքին պայմաններին. Նիկոլ Փաշինյան

ԵԱՏՄ երկրները պետք է օպերատիվ կերպով հարմարվեն արագ փոփոխվող արտաքին և ներքին պայմաններին. Նիկոլ Փաշինյան

Վարչապետ Նիկոլ Փաշինյանը մասնակցել է Եվրասիական Բարձրագույն տնտեսական խորհրդի հերթական նիստին, որն անցկացվել է տեսակապի միջոցով: Նիստին մասնակցել են նաև Ռուսաստանի Դաշնության նախագահ Վլադիմիր Պուտինը, Բելառուսի նախագահ Ալեքսանդր Լուկաշենկոն, Ղազախստանի նախագահ Կասիմ- Ժոմարտ Տոկաևը, Ղրղզստանի նախագահ Սադիր ժապարովը, Եվրասիական տնտեսական հանձնաժողովի կոլեգիայի նախագահ Միխայիլ Մյասնիկովիչը: ԵԱՏՄ-ում որպես դիտորդ պետություններ՝ ելույթներով հանդես են եկել Ուզբեկստանի Հանրապետության նախագահ Շավքաթ Միրզիյոևը, Կուբայի Հանրապետության նախագահ Միգել Մարիո Դիաս-Կանել Բերմուդեսը: Ինչպես հայտնում են ՀՀ կառավարությունից, Նիկոլ  Փաշինյանն իր ելույթում նախ շնորհակալություն է հայտնել ղրղզական կողմին՝ այսօրվա հանդիպումը կազմակերպելու և քննարկման թեմաների լայն շրջանակ մշակելու ուղղությամբ ջանքերի համար։ Ողջունելով ԵԱՏՄ անդամ և դիտորդ երկրների ղեկավարներին՝ ՀՀ կառավարության ղեկավարը նշել է. «Մենք անցկացնում ենք Եվրասիական Բարձրագույն տնտեսական խորհրդի այս տարվա առաջին նիստը, ինչի կապակցությամբ ցանկանում եմ բոլորիս հաջողություն մաղթել համատեղ արդյունավետ աշխատանքի շարունակման գործում։ Եվրասիական տնտեսական միության մասին պայմանագրի ստորագրումից հետո անցել է ընդամենը 8 տարի, սակայն ԵԱՏՄ-ն արդեն ամենադինամիկ զարգացող ինտեգրացիոն միավորումներից է, ինչի մասին են վկայում նաև «Ռազմավարություն-2025»-ի իրականացման արդյունքները։ Այնուամենայնիվ, մեր երկրները պետք է օպերատիվ կերպով հարմարվեն արագ փոփոխվող արտաքին և ներքին պայմաններին։ Կարծում եմ, որ մենք արդեն պետք է ուրվագծենք 2025 թվականից հետո ռազմավարական փուլում մեր Միության զարգացման հորիզոնները՝ հաշվի առնելով ձևավորվող աշխարհակարգը։ Անհրաժեշտ է ավելի լայն հայացք նետել ինտեգրացիոն նախագծին, դնել ու իրականացնել հավակնոտ նպատակներ, յուրացնել համագործակցության նոր ոլորտներ ու ոլորտներ։ Հարգելի գործընկերներ, որպես ժամանակի պահանջներին և մարտահրավերներին հարմարվելու գործիք՝ մենք կարևորում ենք ԵԱՏՄ անդամ-պետությունների մակրոտնտեսական քաղաքականության հիմնական ուղեցույցների հետևողական իրականացումը, որտեղ սահմանվում են մեր երկրների տնտեսությունների առջև ծառացած կարևորագույն խնդիրները։ Ցանկանում եմ նշել Հանձնաժողովի՝ ԵԱՏՄ անդամ երկրների հետ համատեղ կատարած մեծ աշխատանքը ներքին շուկայում խոչընդոտները վերացնելու ուղղությամբ։ Այս համատեքստում չի կարելի անտեսել դրանց առաջացման բուն պատճառները, քանի որ դրանք հիմնականում կրում են տնտեսական բնույթ։ Համոզված եմ, որ մեր տնտեսությունները զարգացնելուն և երրորդ երկրների շուկաներ մուտք գործելու նպատակով արդյունաբերական համագործակցության ուղղված համակարգված գործողությունները կդառնան ներքին շուկայում խոչընդոտների զգալի կրճատման բանալին։ Արդյունաբերական համագործակցության ակտիվացումը, համատեղ ձեռնարկությունների ու նորարարական նախագծերի զարգացումն ու իրականացումը, ինչպես նաև գիտատեխնիկական համագործակցությունը թույլ կտան կապել «գիտական հայտնագործություններ» - «արդյունաբերական ոլորտ» շղթան։ Հարկ է նաև արձանագրել, որ տեղեկատվական տեխնոլոգիաների առաջանցիկ զարգացումը, թվայնացումը մեր երկրների լիազոր մարմինների և տնտեսվարող սուբյեկտների միջև փոխգործակցության ժամանակակից ձևերի զարգացման կարևորագույն պայմաններն են։ Իսկ վստահությունը փոխգործակցության ընթացքում՝ այն հիմքն է, որի միջոցով մենք կարող ենք ապահովել ապրանքների, ծառայությունների, կապիտալի և աշխատուժի ազատ տեղաշարժը: Միևնույն ժամանակ, մենք պետք է հասկանանք, որ տեղեկատվական և հաղորդակցական տեխնոլոգիաների զարգացման և թվայնացման արդի պայմաններում ցանկացած քայլ կարող է իրականացվել միայն տեղեկատվական անվտանգության պատշաճ մակարդակի առկայությամբ։ Հարկ է նշել նաև համաշխարհային տնտեսության՝ վերջին ամիսներին աննախադեպ ծավալներ և խորություն ստացած մարտահրավերների ռիսկերը նվազագույնի հասցնելու մեխանիզմների մշակման կարևորությունը։ Մեր կարծիքով, նպատակահարմար է մտածել պիլոտային նախագծերի և համատեղ միջոցառումների մշակման մասին, որոնք ուղղված կլինեն առևտրատնտեսական հարաբերությունների ընդլայնմանն ու խորացմանը և կոոպերացիոն փոխգործակցության ամրապնդմանը։ Միևնույն ժամանակ, անդամ-պետությունների կայուն տնտեսական աճ ապահովելու համար անհրաժեշտ է ինտեգրացիոն գործընթացների զարգացման արդիական հարցերի շուրջ մշտապես համագործակցել գործարար համայնքի հետ։ Բիզնեսի շահերը հաշվի առնելու և առաջ մղելու, ծրագրերի իրականացմանը գործարար համայնքի մասնակցության ընդլայնման տեսակետից ցանկանում եմ առանձնացնել երեկ տեղի ունեցած Եվրասիական տնտեսական համաժողովի շրջանակներում իրականացված աշխատանքը։ Փորձագիտական քննարկումներն արդյունավետ գործիք են ներկա իրավիճակի համապարփակ գնահատման և դրա հիման վրա մեր միավորման կայուն զարգացմանն ուղղված գործնական միջոցառումներ մշակելու համար: Գործընկերներ, միջազգային համագործակցության համատեքստում արդիական է թվում երրորդ երկրների գործընկերների հետ շփումների ձևավորումը և փոխգործակցության կոնկրետ շղթաների կառուցումը: Կարող եմ վստահորեն նշել, որ տարիների ընթացքում Միությունը զգալիորեն ընդլայնել է միջազգային համագործակցության հորիզոնները։ Կարևոր եմ համարում հերթական անգամ ուշադրություն հրավիրել Իրանի և ԵԱՏՄ-ի միջև լիարժեք ազատ առևտրի համաձայնագրի շուտափույթ կնքման հարցում Հայաստանի շահագրգռվածության վրա։ Թեհրանի հետ ժամանակավոր համաձայնագրի գործունեության փորձը հստակ ցույց է տալիս իրանական շուկայի գրավչությունը և համագործակցության հետագա խորացման հեռանկարները։ Այսօր մենք նաև նախատեսում ենք Ինդոնեզիայի Հանրապետության հետ ազատ առևտրի համաձայնագրի շուրջ բանակցությունների մեկնարկը տալ։ Կարևոր է այսուհետ ևս շարունակել հագեցնել միջազգային օրակարգը, որպեսզի և՛ Միության երկրները, և՛ մեր գործընկերները տեսնեն փոխշահավետ համագործակցության շոշափելի արդյունքներ։ Հանդիպման հարգելի մասնակիցներ, Եզրափակելով՝ ցանկանում եմ շնորհակալություն հայտնել բոլորիդ համատեղ աշխատանքի համար և ևս մեկ անգամ հաստատել հայկական կողմի պատրաստակամությունը՝ շարունակելու յուրաքանչյուր անդամ-պետության և միավորման շահերին համապատասխանող համատեղ որոշումների մշակմանն ու ընդունմանն ուղղված ջանքեր գործադրել։ Շնորհակալություն ուշադրության համար»։ Խորհրդի նիստում անդրադարձ է կատարվել ԵԱՏՄ միջազգային գործունեությանը, Միության շրջանակում տարբեր ոլորտների շուկաներում փոխգործակցության դյուրացմանն ու հետևողական պարզեցմանը, ինչպես նաև նախորդ նիստում ձեռք բերված պայմանավորվածությունների կատարմանը վերաբերող հարցերի:
17:02 - 27 մայիսի, 2022
Հույս ունեմ՝ կկարողանանք պատշաճ ձևով միջպետական հարաբերությունները զարգացնել. Նիկոլ Փաշինյանն ընդունել է Չեռնոգորիայի նախագահին

Հույս ունեմ՝ կկարողանանք պատշաճ ձևով միջպետական հարաբերությունները զարգացնել. Նիկոլ Փաշինյանն ընդունել է Չեռնոգորիայի նախագահին

Վարչապետ Նիկոլ Փաշինյանը կառավարությունում հյուրընկալել է պաշտոնական այցով Հայաստան ժամանած Չեռնոգորիայի նախագահ Միլո Ջուկանովիչի գլխավորած պատվիրակությանը: Այս մասին հայտնում են ՀՀ վարչապետի աշխատակազմից։ Ողջունելով հյուրերին մայրաքաղաք Երևանում՝ վարչապետը նշել է. «Մենք մեծ կարևորություն ենք տալիս Չեռնոգորիայի հետ հարաբերություններին և համոզված եմ, որ Ձեր այցը նոր խթան կդառնա մեր հարաբերությունների հետագա զարգացման համար: Հաճույքով արձանագրեցի, որ իրականում մեր մայրաքաղաքների միջև բավականին վաղուց հաստատված հարաբերություններ կան և դեռևս 1978 թվականին մեր մայրաքաղաքների միջև հարաբերությունների հաստատման հուշագիր է ստորագրվել: Հույս ունեմ, որ ահա այս նոր միջավայրում, երբ մեր երկրներն այլևս ունեն անկախություն, մենք կկարողանանք պատշաճ ձևով միջպետական հարաբերությունները զարգացնել և տնտեսական հարաբերությունները խորացնել: Պետք է խոստովանել, որ այսօր այդ առումով շատ բան չունենք պարծենալու: Մեծարգո պարոն նախագահ, հարգելի գործընկերներ, ևս մեկ անգամ ողջունում եմ ձեզ մեր մայրաքաղաքում և համոզված եմ, որ լավ և տպավորիչ այց կունենաք»: Իր հերթին Միլո Ջուկանովիչը շնորհակալություն է հայտնել ջերմ ընդունելության համար և նշել. «Շատ ուրախ եմ, որ այստեղ եմ, քանի որ ինչպես բացատրում էի էկոնոմիկայի նախարարին և Երևանի  քաղաքապետին, Բելգրադից կարողացել եմ դպրոցական հասակում Թիտոգրադի և Երևանի միջև փոխանակման ծրագրով գալ այստեղ և որոշ ժամանակ անցկացնել Երևանում: Շատ լավ հուշեր ունեմ։ Դժբախտաբար, այս ընթացքում առիթ չեմ ունեցել գալ Ձեր գեղեցիկ երկիր, ուրախ եմ, որ այստեղ եմ։ Ինչպես ասացիք՝ առաջին համագործակցությունը եղել է այն ժամանակ, երբ մեր երկրներն ավելի մեծ պետությունների մաս էին՝ Խորհրդային Միության և Հարավսլավիայի։ Այժմ նոր քաղաքական իրականության մեջ ենք, անկախ պետություններ ենք և հավատացած եմ, որ երկուստեք շահագրգռված ենք ու ի զորու՝  ավելի խորացնելու այս համագործակցությունը։ Չեռնոգորիան փոքր երկիր է և կարծում եմ՝ փոքր երկրները կարող են, ավելի հրատապ կարիք ունեն կամ ավելի կարևոր է քաղաքականապես ակտիվ լինել։ Մեր հիմնական արտաքին քաղաքականության նպատակն է  եվրոպական, եվրոատլանտյան ինտեգրումը: Իհարկե, մենք հետևում ենք նաև, թե ինչ է կատարվում ձեր տարածաշրջանում և ցանկանում ենք Եվրասիական տարածաշրջանի հետ էլ ունենալ սերտ համագործակցություն, քանի որ արդեն կան ավանդական հարաբերություններ մեր երկրների միջև»։ Նշվում է, որ զրուցակիցները քննարկել են տնտեսության, մասնավորապես, տեղեկատվական տեխնոլոգիաների, զբոսաշրջության, գյուղատնտեսության ոլորտներում համագործակցության զարգացմանը վերաբերող հարցեր: Կողմերը շահագրգռվածություն են հայտնել ջանքեր գործադրել՝ ընդլայնելու գործարար կապերը, առևտրաշրջանառության ծավալներն ու նպաստել համատեղ ներդրումային ծրագրերի իրականացմանը:  Նիկոլ Փաշինյանը և Միլո Ջուկանովիչը մտքեր են փոխանակել Հարավային Կովկասում տեղի ունեցող գործընթացների շուրջ: Վարչապետը ներկայացրել է հայկական կողմի դիրքորոշումը՝ Լեռնային Ղարաբաղի հիմնախնդրի խաղաղ կարգավորման ուղղությամբ: Անդրադարձ է կատարվել նաև միջազգային ասպարեզում տեղի ունեցող գործընթացներին:
20:38 - 26 մայիսի, 2022
Վարչապետն առաջին եռամսյակի 8.6 տոկոս տնտեսական աճը շատ լավ ցուցանիշ է համարում |armenpress.am|

Վարչապետն առաջին եռամսյակի 8.6 տոկոս տնտեսական աճը շատ լավ ցուցանիշ է համարում |armenpress.am|

armenpress.am: 2022 թվականի ապրիլին Հայաստանում  գրանցված և աշխատավարձով վճարվող աշխատատեղերի նոր բացարձակ ռեկորդ է սահմանվել:  Ապրիլ ամսվա տվյալներով՝ Հանրապետությունում առկա է 664 հազար 736 աշխատատեղ, որը նախորդ ռեկորդի՝ 2021 թվականի դեկտեմբերի ցուցանիշի նկատմամբ ավել է 5265-ով, 2021 ապրիլի նկատմամբ 28 հազար 32-ով, իսկ 2018 թվականի ապրիլի նկատմամբ ՝ 123 հազար 310-ով: Կառավարության նիստում այս մասին ասաց ՀՀ վարչապետ Նիկոլ Փաշինյանը՝ անդրադառնալով վիճակագրության կոմիտեի հրապարակած տնտեսական ցուցանիշներին: Նա նշեց, որ  առաջին եռամսյակի  8.6 տոկոս տնտեսական աճը շատ լավ ցուցանիշ է: Աշխատավարձերի աճի ցուցանիշներին  անդրադառնալով՝ վարչապետը նշեց, որ նախորդ տարվա ապրիլի  նկատմամբ միջին աշխատավարձի աճը կազմել է 21 հազար դրամ, իսկ 2018 թվականի  ապրիլի նկատմամբ միջին աշխատավարձի աճը կազմել է 60 հազար դրամ: «Այս տարվա ապրիլին նախորդ տարվա ապրիլի համեմատ ունենք 8.8 տոկոս տնտեսական ակտիվության աճ, իսկ չորս ամսվա տվյալներով տնտեսական ակտիվության ցուցանիշի աճը 9.4 տոկոս է: Ապրիլին նախորդ տարվա ապրիլի նկատմամբ մենք ունենք շինարարության ծավալների 15.6 տոկոս աճ, առաջին չորս ամիսներին նախորդ տարվա նկատմամբ 9 տոկոս աճ»,-ասաց նա: Վարչապետ Նիկոլ Փաշինյանի խոսքով՝ մայիսի առաջին 22 օրերը ներառյալ նախորդ տարվա համեմատ  ունենք 574 միլիարդ 697 միլիոն դրամի  լրացուցիչ առևտրաշրջանառություն, ինչը կազմում է  ավելի քան 1 միլիարդ 200 միլիոն դոլար: «Մեր առևտրային շրջանառությունը այդքանով աճել է, իսկ ՀԴՄ-ներով և հաշվարկային փաստաթղթերով այս տարվա մինչև մայիսի 20-ը նախորդ տարվա նկատմամբ 15 միլիոն հատով ավել գործարք ենք ունեցել, ինչը շատ կարևոր է: Կարևոր է նաև արտահանման աճը՝ ապրիլին  նախորդ տարվա ապրիլի նկատմամբ 19.87 տոկոս, իսկ չորս ամիսը չորս ամսվա նկատմամբ ՝ 25.2 տոկոս արտահանման աճ ենք ունեցել»,-նշեց նա: Անդրադառնալով ծախսային մասին՝ Փաշինյանն ասաց, որ առաջին եռամսյակում 28 միլիարդ  դրամով պակաս ծախս են կատարել: «Պահանջում եմ բոլոր գերատեսչություններին ուշադիր հետևել բյուջեին՝ որպես իրենց ամենօրյա աշխատանքային փաստաթուղթ:  Հանրային նպատակի համար նախատեսված գումարը չծախսելը ևս վատնելու ձև է: Մեր ամեն չիրականացված ծրագիր ազդում է տնտեսական ցուցանիշների վրա»,-հավելեց Նիկոլ Փաշինյանը:
14:21 - 26 մայիսի, 2022
Խոշորացված համայնքները ևս կխոշորացվեն. Կառավարությունը նոր փոփոխություններ է առաջարկում |armenpress.am|

Խոշորացված համայնքները ևս կխոշորացվեն. Կառավարությունը նոր փոփոխություններ է առաջարկում |armenpress.am|

armenpress.am: ՀՀ կառավարության նիստում հավանության արժանացավ ՀՀ տարածքային կառավարման և ենթակառուցվածքների նախարարության ներկայացրած մի շարք օրենքներում փոփոխություններ, լրացումներ կատարելու մասին փաթեթը, որով առաջակվում է խոշորացնել մինչ այժմ խոշորացված համայնքները: ՀՀ կառավարության նիստում ՀՀ տարածքային կառավարման և ենթակառուցվածքների նախարար Գնել Սանոսյանը տեղեկացրեց, որ 2016 թվականին սկսված համայնքների միավորման, խոշորացման գործընթացի արդյունքում, մինչև այսօր Հայաստանի 908 բնակավայր միավորվել ու խոշորացվել է 72 համայնքի մեջ: Ներկայում կա 72 խոշորացված համայնք և ևս 7 համայնք, որոնք խոշորացված չեն: Դրանք են Երևանը, Գյումրին և ազգային փոքրամասնություններով բնակեցված առանձին բնակավայրերը: «Առաջարկում ենք այս պահին գործող 13 խոշորացված համայնքները միավորել 5 համայնքների մեջ: Վերջին տարիներին անընդհատ քննարկումների արդյունքում ավելի հիմնավորված է եղել շրջանային մոդելի նման տարբերակը: Այս որոշումներով վերադառնում ենք շրջանային մոդելին»,-ասաց նախարարը: Գնել Սանոսյանը նշեց, որ առաջարկվում է Արագածոտնի մարզում միավորել Թալին և Արագածավան խոշորացված համայնքները: Նրանք միասին կընդգրկեն 34 բնակավայր: Գեղարքունիքի մարզում կմիավորվեն ճամբարակն ու Շողակաթը՝ ընդգրկելով 19 բնակավայր: Լոռու մարզում նախատեսվում է ունենալ Ալավերդի խոշորացված համայնք, որը կընդգրկի Օձունը, Շնողը, Ախթալան և Ալավերդին՝ 28 բնակավայր միասին: Լոռու մարզում կմիավորվեն Տաշիրը, Մեծավանը, Սարչապետը՝ միասին 24 բնակավայր: Սյունիքի մարզում նախատեսվում է միավորել Սիսիան և Գորայք խոշորացված համայնքները՝ թվով 36 բնակավայր: «Այսպիսով, այս 13 համայնքները, որոնք միասին 141 բնակավայր են, առաջարկում ենք միավորել 5 համայնքների մեջ: Արդյունքում Հայաստանում կունենանք 64 խոշորացված համայնքներ»,-ասաց նախարարը: ՀՀ վարչապետ Նիկոլ Փաշինյանը նշեց, որ սա կառավարության ուղեգիծն է, որն ունի ոչ միայն տնտեսական նշանակություն: «Տնտեսական արդյունավետությունից բացի, մենք սրանով ՀՀ քաղաքացիներին ավելի մեծ իշխանություն ենք տալիս: Ժողովրդավարության ավելի մեծ հարթակ ենք բացում: Մենք համայնքների հզորացման գործընթաց ենք սկսել»,-ասաց Նիկոլ Փաշինյանը:
13:09 - 26 մայիսի, 2022
2022-ի ապրիլին նախորդ տարվա ապրիլի համեմատ ունենք տնտեսական ակտիվության ցուցանիշի 8,8 տոկոս աճ. Փաշինյան |1lurer.am|

2022-ի ապրիլին նախորդ տարվա ապրիլի համեմատ ունենք տնտեսական ակտիվության ցուցանիշի 8,8 տոկոս աճ. Փաշինյան |1lurer.am|

1lurer.am: ՀՀ վարչապետ Նիկոլ Փաշինյանը կառավարության նիստի ընթացքում անդրադարձավ տարվա տնտեսական ցուցանիշներին: Վիճակագրական կոմիտեի հրապարակած ապրիլ ամսվա տվյալները վարչապետը դրական է գնահատում: «Այս տարվա ապրիլին նախորդ տարվա ապրիլի համեմատ ունենք տնտեսական ակտիվության ցուցանիշի 8,8 տոկոս աճ, իսկ 4 ամսվա տվյալներով տնտեսական ակտիվության ցուցանիշի աճը կազմում է 9.4 տոկոս: Հիշեցնենք, որ խնդիր ենք դրել տարվա ընթացքում 7 տոկոս տնտեսական աճ ապահովել: Այս տարվա ապրիլին նախորդ տարվա ապրիլի նկատմամբ ունենք շինարարության ծավալների 15,6 տոկոս աճ, առաջին 4 ամիսներին նախորդ տարվա նկատմամբ՝ 9 տոկոս աճ, առևտրի շրջանառության 8,6 տոկոս աճ ունենք, իսկ 4 ամիսներին 7,8 տոկոսի աճ ունենք: Այս առումով ուզում եմ կոնկրետացնել, որ մայիսի առաջին 22 օրերը ներառյալ` նախորդ տարվա համեմատ մենք ունենք 574 միլիարդ 697 միլիոն դրամի լրացուցիչ առևտրաշրջանառություն, այսինքն՝ նախորդ տարվանը՝ գումարած այսքան, ինչը կազմում է ավելի քան 1 միլիարդ 200 միլիոն դոլար»,- ասաց Փաշինյանը: ՀԴՄ-ներով և հաշվարկային փաստաթղթերով, ՀՀ վարչապետի խոսքով, այս տարվա մինչև մայիսի 20-ը նախորդ տարվա նկատմամբ 15 միլիոնով ավելի գործարք է կատարվել: «Ծառայությունների աճն ապրիլն ապրիլի նկատմամբ կազմել է 27,1 տոկոս, 4 ամիսը 4 ամսվա նկատմամբ՝ 23,5 տոկոս: Էլեկտրաէներգիայի արտադրության աճը, որը շատ կարևոր ցուցանիշ է, նախորդ տարվա ապրիլի նկատմամբ կազմել է 5,8 տոկոս, իսկ 4 ամիսը 4 ամսվա նկատմամբ՝ 14,1 տոկոս: Շատ կարևոր եմ համարում արձանագրել արտահանման աճը: Այս տարվա ապրիլը նախորդ տարվա ապրիլի նկատմամբ 19,8 տոկոս, իսկ 4 ամիսը 4 ամսվա նկատմամբ 25,2 տոկոս արտահանման աճ ենք ունեցել»,- ասաց Փաշինյանը:
12:51 - 26 մայիսի, 2022
Հայաստանը 280 հազար դոլար կվճարի Steptoe and Johnson ընկերությանը՝ արբիտրաժում ՀՀ շահերը պաշտպնելու համար |news.am|

Հայաստանը 280 հազար դոլար կվճարի Steptoe and Johnson ընկերությանը՝ արբիտրաժում ՀՀ շահերը պաշտպնելու համար |news.am|

news.am: Կառավարությունն իր այսօրվա՝ մայիսի 26-ի նիստում որոշեց Էդմոնդ Խուդյանը և «Արին Կապիտալ» ներդրումային ՍՊԸ-ն ընդդեմ Հայաստանի Հանրապետության արբիտրաժային գործի շրջանակներում ՀՀ շահերի հետագա պաշտպանությունն ապահովելու նպատակով ներգրավել եւ պայմանագիր կնքել Steptoe and Johnson ընկերությանը: Որոշման հիմնավորման մեջ նշվում է, որ վերոնշյալ արբիտրաժային վեճի շրջանակներում հարուցված արբիտրաժային վճռի չեղարկման և զուգահեռ՝ հարկադիր կատարման վարույթների ընթացքում ՀՀ շահերի պաշտպանության նպատակով Steptoe & Johnson ընկերության ներգրավումը պայմանավորված է մի շարք հանգամանքներով։ Մասնավորապես,  Ընկերությունը հաջողությամբ իրականացրել է Հայաստանի Հանրապետության շահերի պաշտպանությունը  սույն արբիտրաժային գործի շրջանակներում, ըստ այդմ, լավագույնս տիրապետում է գործի փաստական հանգամանքներին, իրավական փաստարկներին, և առանձնանում է մատուցվող ծառայությունների համար հնարավորինս մատչելի գնառաջարկ ներկայացնելու իր ռազմավարությամբ, ինչպես նաև վճռի կայացումից ի վեր փաստացի աջակցում է ՀՀ կառավարությանը արբիտրաժային վճռի կատարման նպատակով քայլեր ձեռնարկելուն ուղղված աշխատանքների շրջանակներում։ Հարկ է նշել, որ Ընկերության կողմից չեղարկման վարույթի շրջանակներում ՀՀ շահերի պաշտպանությունն իրականացնելու համար ծառայությունների արժեք սահմանվել է 280,000 ԱՄՆ դոլար գումարը, ինչի վճարումը նախատեսվում է իրականացնել «Հայաստանի Հանրապետության 2022 թվականի պետական բյուջեի կատարումն ապահովող միջոցառումների մասին» ՀՀ կառավարության 2021թ դեկտեմբերի 23-ի թիվ 2121-Ն որոշմամբ հաստատված հավելվածներով սահմանված 1223 ծրագրի 11001 միջոցառման ներքո հատկացված միջոցներից։ Իսկ արբիտրաժային վճռի հարկադիր կատարման վարույթի շրջանակներում Ընկերությանը վճարվելիք գումարը նախատեսվում է իրականացնել հարկադիր կատարման արդյունքում հայցվորներից հավաքագրված գումարից՝ ընդհանուր արժեքի առավելագույնը 33%-ի չափով։ Հարկ է նշել, որ նշված գումարը չի ներառում հարկադիր կատարման վարույթի շրջանակներում հայցվորների ակտիվների բացահայտմանն ուղղված աշխատանքների առնչությամբ ծախսերը, ինչը կարող է կազմել 5,000-30,000 ԱՄՆ դոլար։
12:14 - 26 մայիսի, 2022
Պետք է չխանգարել՝ իրենց «մինչև քոք մաշեն»․ Փաշինյանը՝ ընդդիմության ակցիաները ոչ թե քաղաքական, այլ «լոգիստիկ» անվանեց |factor.am|

Պետք է չխանգարել՝ իրենց «մինչև քոք մաշեն»․ Փաշինյանը՝ ընդդիմության ակցիաները ոչ թե քաղաքական, այլ «լոգիստիկ» անվանեց |factor.am|

factor.am: «Իմ գնահատականով` ընդդիմության քայլերն այլևս քաղաքական չեն, այլ լոգիստիկ, քանի որ հիմա խոսում ենք խցանման մասին»,- Կառավարության հետ հարցուպատասխանի ժամանակ այս տեսակետը հայտնեց ՀՀ վարչապետ Նիկոլ Փաշինյանը` անդրադառնալով ընդդիմության բողոքի ակցիաներին։ «Պետք է անկեղծ ասեմ, որ տեղի ունեցողն իր նշանակությամբ մի փոքր զիջում է Ծիծեռնակաբերդի խճուղու փլուզմանը։ Այս պրոցեսը սկսել է քաղաքական շեշտադրումներով, և ընդդիմությունը մեկ ամիս հնարավորություն է ունեցել բոլոր քաղաքական միջոցներով, ակցիաներով իր ասելիքն ասել հանրությանը»,–ասաց Փաշինյանը՝ ընդգծելով՝ ընդդիմության ակցիաների քաղաքական նշանակությունը սպառված է, և տեղի ունեցողի իմաստը հանրության համար անհարմարություն ստեղծելն է` թերևս վրեժ լուծելով 2021-ի ընտրությունների արդյունքների համար։ Փաշինյանի խոսքով` սովորաբար նման ակցիաների նպատակն այն է, որ հանրությանը ներգրավեն պրոցեսի մեջ և քաղաքական պահանջ ձևավորեն։ Բայց, ըստ վարչապետի, քանի որ հիմա ակնհայտ է, որ դա տեղի չի ունեցել, ընդդիմության գործընթացները ոչ թե իշխանության դեմ են, այլ հանրության, քանի որ հետևյալ տրամաբանությամբ են` եթե մեզ չմիացաք, ուրեմն ավելի շատ մնացեք խցանման մեջ։ «Մենք նոր ռեկորդներ ունենք, երբ քաղաքական ուժի ներկայացուցիչները հայտարարում են, որ իրենց հագուստն ավելի թանկ է, քան ոստիկանը կամ քաղաքացին։ Կարծում եմ` պետք է նրանց առանձնապես չխանգարենք, որ «մինչև քոք մաշեն», ինչպես իրենք նախընտրական շրջանում ասում էին իշխանության մասին»,- նշեց վարչապետը։
17:22 - 25 մայիսի, 2022
Կառավարությունը առաջարկում է, որ 19 տարեկանից բարձր տարիքի դատապարտյալները նույնպես հանրակրթության իրավունք ունենան

Կառավարությունը առաջարկում է, որ 19 տարեկանից բարձր տարիքի դատապարտյալները նույնպես հանրակրթության իրավունք ունենան

Ազգային ժողովը այսօր քննարկեց կառավարության ներկայացրած նախագիծը, որով առաջարկվում է լրացում կատարել «Կրթության մասին» օրենքում։ Օրինագծով առաջարկվում է, որ 19 տարեկանից բարձր տարիք ունեցող դատապարտյալները նույնպես հանրակրթության իրավունք ունենան։  Արդարադատության նախարարի տեղակալ Արփինե Սարգսյանը նախագծի քննարկման ընթացքում ասաց՝ հանրակրթության իրավունք ունեն մինչև 19 տարեկան անձիք, եթե, իհարկե, նրանք այդ իրավունքը չեն իրականացրել ավելի վաղ․ «Այս պահի դրությամբ քրեակատարողական հիմնարկում կան շուրջ 300 դատապարտյալներ, որոնք, ըստ էության, չունեն հանրակրթության բավարար ցենզ, այսինքն ՝ չունեն 9-րդ դասարանի ատեստատ կամ 12-րդ դասարանի ատեստատ և հետևաբար այս առումով մենք ունենք մի շարք խնդիրներ, որոնք արձանագրել ենք մեր մոնիտորինգի արդյունքներով»։  Նախարարի տեղակալը ընդգծեց՝ 9-րդ, 12-րդ դասարանի ատեստատ չունեցող անձը ավելի բարձր ցենզի կրթության հավակնելու հնարավորություն չի ունենում․ «Հաջորդ կարևոր խնդիրը, որ մենք արձանագրել ենք, վերաբերում է նրան, որ, չունենալով համապատասխան կրթական ցենզ, անձը, ըստ էության, չի կարողանում հավակնել նաև ունենալու աշխատաշուկայում պահանջարկ վայելող համապատասխան աշխատանք։ Եվ, ըստ էության, այստեղ շատ ռիսկային իրավիճակի տակ է դրվում վերասոցիալականացման հիմնական կարևոր բաղադրիչներից մեկը, այն է ՝ աշխատանքը»։  Նա նշեց, որ օրենքի շահառու կհավակնեն դառնալ այն դատապարտյալները, ում պատժի ժամկետի լրանալուն կրթության իրավունքի իրացման վերաբերյալ գրավոր դիմում ներկայացնելու պահին մնացել է մեկ տարուց ավելի։  Փոխնախարարը պարզաբանեց, որ 19 տարեկանից բարձր անձանց համար խտացված ծրագիրն է գործելու, կրթությունն իրականացվելու է ինչպես առկա տարբերակով, այսինքն՝ դասախոսական մակարդակով, այնպես էլ հեռավար տարբերակով, հիբրիդային եղանակով։
12:54 - 24 մայիսի, 2022
Բողոքի ակցիայի մասնակիցները նախագահի նստավայրի մոտ են, որտեղ ժամանեց Լիտվայի նախագահը

Բողոքի ակցիայի մասնակիցները նախագահի նստավայրի մոտ են, որտեղ ժամանեց Լիտվայի նախագահը

Նիկոլ Փաշինյանի հրաժարականը պահանջող քաղաքացիները քայլերթով շարժվեցին դեպի Բաղրամյան 26՝ ՀՀ նախագահի նստավայր: Այնտեղ ժամանելու է Հայաստանում գտնվող Լիտվայի նախագահը:   Ցուցարարների նպատակը, ըստ Գեղամ Մանուկյանի, քաղաքական բողոք արտահայտելն է, իրենց պահանջը ներկայացնելն է, որ «Նիկոլը չունի որևէ մանդատ բանակցելու Արցախի հարցում, Հայաստանի հարցում, և եվրոպական երկրները աչքերը փակ են պահում այն բռնատիրկան գործողությունների դեմ, որ կան Հայաստանում»: Մանուկյանը նաև նշեց, որ իրենց բողոքը ներկայացնում են քաղաքակիրթ: Լիտվայի նախագահի՝ մեքենայից իջնելու պահին ցուցարարները սկսեցին վանկարկել «Նիկո՛լ, դավաճան», «Դավաճա՛ն», «Ամո՛թ»: Ոստիկանությունը թույլ չի տալիս ցուցարարներին մոտենալ շենքին, նրանք դիմացի մայթին են: Հիշեցնենք, որ երեկ աշխատանքային այցով Հայաստան է ժամանել Լիտվայի Հանրապետության նախագահ Գիտանաս Նաուսեդան։ Սաղաթելյանը հայտարարել էր, որ նամակով դիմել են Լիտվայի նախագահին՝ առաջարկելով հանդիպել նաև ընդդիմության ներկայացուցիչների հետ։ 
10:28 - 20 մայիսի, 2022
Կնախատեսվի քրեական պատասխանատվություն նաև թմրամիջոցների ու հոգեմետ նյութերի ածանցյալների ապօրինի շրջանառության դեպքում

Կնախատեսվի քրեական պատասխանատվություն նաև թմրամիջոցների ու հոգեմետ նյութերի ածանցյալների ապօրինի շրջանառության դեպքում

Ազգային ժողովն այսօր՝ արտահերթ նիստի ընթացքում առաջին ընթերցմամբ ընդունեց կառավարության ներկայացրած նախագիծը, որով առաջարկվում է լրացումներ կատարել Քրեական օրենսգրքում  և «Թմրամիջոցների, հոգեմետ (հոգեներգործուն) նյութերի մասին» օրենքում։ Նախագծի հիմնական զեկուցող, փոխոստիկանապետ Արա Ֆիդանյանը ասաց՝  ԱՊՀ կառավարությունների կողմից փոփոխություններ և լրացումներ են կատարվել Թմրամիջոցների, հոգեմետ նյութերի և պրեկուրսորների ապօրինի շրջանառության դեմ պայքարում, Անկախ պետությունների մասնակից պետությունների համագործակցության մասին 2000 թ․-ի նոյեմբերի 30-ի համաձայնագրում։ «Համաձայնագրում փոփոխություններ կատարելու մասին արձանագրությունը ՀՀ ԱԺ-ի կողմից վավերացվել է 2021 թ․-ի մայիսի 6-ին և ՀՀ-ի համար ուժի մեջ է մտել 2021 թ․-ի հունիսի 21-ից։ Նշված արձանագրության դրույթներին համապատասխանեցնելու համար անհրաժեշտություն է առաջացել «Թմրամիջոցների, հոգեմետ և հոգեներգործուն նյութերի մասին» օրենքը լրացնել նոր՝ Թմրանյութերի, հոգեմետ, հոգեներգործուն նյութերի «ածանցյալներ» հասկացությամբ, իսկ ՀՀ քրեական նոր օրենսգրքի մի քանի նոր հոդվածներում «ածանցյալ» բառը, թմրամիջոցների, հոգեմետ (հոգեներգործուն) նյութերի ածանցյալների ապօրինի շրջանառության իրացման, հափշտակության, շորթման, մաքսանենգության, դրանց գործածման հակելը, ներգրավելու, գործածմանը նպաստելու և դրանց ապօրինի կիրառության համար քրեական պատասխանատվություն նախատեսելու նպատակով»։ Նախագիծն ընդունվեց 59 կողմ, 0 դեմ ձայներով։
16:35 - 19 մայիսի, 2022
Շուռնուխ և Որոտան բնակավայրերում բնակելի անշարժ գույքը կորցրած քաղաքացիներին ևս 11 ամիս սոցիալական աջակցություն կտրամադրվի

 |factor.am|

Շուռնուխ և Որոտան բնակավայրերում բնակելի անշարժ գույքը կորցրած քաղաքացիներին ևս 11 ամիս սոցիալական աջակցություն կտրամադրվի |factor.am|

factor.am: Գործադիրը նախատեսում է ևս 11 ամիս (2022 թ. հունվար-նոյեմբեր) ֆինանսական միջոցեր տրամադրել Ադրբեջանի վերահսկողության տակ անցնելու պատճառով Սյունիքի մարզի Շուռնուխ և Որոտան բնակավայրերում հաշվառված կամ այդ հասցեում փաստացի բնակված, ՀՀ բնակության այլ վայրի հասցեում հաշվառված բնակելի անշարժ գույքը կորցրած քաղաքացիներին․ տեղեկացնում են ՀՀ կառավարությունից։ «Ընդ որում, դրամական աջակցություն, այդ թվում՝ միանվագ 300000 դրամ, կտրամադրվի նաև 2021 թ. դեկտեմբերի 5-ից հետո ծնված երեխաներին, ում ծնողը միջոցառման շրջանակում աջակցություն ստացած շահառու է։ Ըստ այդմ նախատեսվում է աջակցություն ստացած 37 անձանց 11 ամսվա համար՝ ամսական 68000 դրամ օգնություն և մեկ երեխայի համար միանվագ՝ 300,000 դրամ և ամսական՝ 68000 դրամ օգնություն տրամադրելու համար հատկացնել 28,724.0 հազ դրամ»,- ասված է հաղորդագրությունում։
15:41 - 19 մայիսի, 2022
Կհստակեցվի զոհված զինծառայողների ծնողների վերարտադրողական առողջությանն աջակցելու նպատակով միջոցառման շահառուների շրջանակը

Կհստակեցվի զոհված զինծառայողների ծնողների վերարտադրողական առողջությանն աջակցելու նպատակով միջոցառման շահառուների շրջանակը

Այսօր կառավարությունը չզեկուցվող հարցերի փաթեթով փոփոխություններ կատարեց նախկինում ընդունած որոշումներից մեկում՝ ՀՀ պաշտպանության մարտական գործողություններին մասնակցելու կամ հակառակորդի հետ շփման գծում մարտական հերթապահության կամ հատուկ առաջադրանք կամ ծառայողական պարտականություններ կատարելու ընթացքում կամ հակառակորդի նախահարձակ գործողության հետևանքով զոհված զինծառայողների ծնողների վերարտադրողական առողջությանն աջակցելու նպատակով վերարտադրողականության օժանդակ տեխնոլոգիաների կիրառմամբ բժշկական օգնության և սպասարկման որոշ ծախսերի մասնակի փոխհատուցման նշանակման և վճարման ընթացակարգերը սահմանելու նպատակով: Ըստ այդմ, մասնավորապես,  հստակեցվում է միջոցառման շահառուների շրջանակը, ըստ որի զոհված զինծառայողի ծնողը միջոցառման շահառու է համարվում նաև այն դեպքում, երբ չի բավարարում համապատասխան որոշմամբ սահմանված պայմանին (կնոջ տարիքը 42-ից ավելի), սակայն փոխնակ մոր ծառայություններից օգտվել է 2021 թ. հունվարի 1-ից հետո՝ մինչև սույն որոշումն ուժի մեջ մտնելը և երեխան արդեն ծնվել է: Հստակեցվում է նաև տրամադրվող փոխհատուցման չափը, մասնավորապես, այն դեպքերում, երբ շահառու ծնողը օգտվել է փոխնակ մոր ծառայությունից 2021թ. հունվարի 1-ից հետո՝ մինչև որոշումն ուժի մեջ մտնելը և երեխան արդեն ծնվել է։ Այս դեպքում, փոխհատուցման չափը կազմում է այդ ծառայության համար պայմանագրով նախատեսված վճարի 50 տոկոսի չափով, բայց ոչ ավելի, քան 2,750,000 դրամը։ Որոշմամբ  սահմանվում են խնդրո առարկա միջոցառման շրջանակներում փոխհատուցման նշանակման և վճարման հետ կապված ընթացակարգերը, մասնավորապես՝ դիմումը ծնողը կարող է ներկայացնել անձամբ, այդ թվում՝ էլեկտրոնային եղանակով կամ այլ անձի միջոցով: 
15:10 - 19 մայիսի, 2022
Կառավարությունը գումար հատկացրեց գյուղատնտեսության ոլորտում իրականացվող ծրագրերի մասին հանրությանը իրազեկելու համար

Կառավարությունը գումար հատկացրեց գյուղատնտեսության ոլորտում իրականացվող ծրագրերի մասին հանրությանը իրազեկելու համար

Կառավարությունն այսօրվա նիստի ընթացքում 79 միլիոն 800 հազար դրամ հատկացրեց գյուղատնտեսության ոլորտում իրականացվող պետական աջակցության  ծրագրերի մասին հանրությանը իրազեկելու համար։ Նախագծի հիմնավորման համաձայն՝ վերջին տարիներին պետության կողմից գյուղատնտեսության ոլորտում  իրականացվող պետական աջակցության ծրագրերը բավական լավ արդյունքներ են արձանագրել․ «Դրանք բավականին լուրջ խթան են հանդիսանում և լավ պայմաններ առաջարկում պոտենցիալ շահառուներին։ Պետության կողմից գյուղատնտեսության ոլորտում իրականացվող աջակցության ծրագրերի վերաբերյալ իրականացվել են  հանրային իրազեկման աշխատանքներ, այդ թվում՝ տեղեկատվություն է տրամադրվել ՀՀ էկոնոմիկայի նախարարության կայքէջում, տեղեկատվություն է տարածվել սոցիալական հարթակներում, զանգվածային լրատվության միջոցներով, կազմակերպվել են նախարարության պատասխանատու աշխատակիցների հետ հարցազրույցներ՝ առանձին ծրագրերի վերաբերյալ։ Իրականացված աշխատանքների շնորհիվ շահառուները տեղեկացվել են պետական աջակցության ծրագրերի մասին, ներգրավվել որպես շահառուներ և օգտվել ծրագրերից»։ Նշվում է, սակայն, որ կա իրազեկվածության պակաս, հատկապես մարզերում. տնտեսավարող սուբյեկտների մեծ մասը տեղյակ են իրականացվող ծրագրերից, սակայն իրազեկված չեն այդ ծրագրերի շահառու դառնալու համար անհրաժեշտ քայլերին և կամ ծրագրերի պայմաններին․ «Հաշվի առնելով վերոգրյալը՝ անհրաժեշտ է իրականացնել հանրային իրազեկման լայնածավալ և շարունակական աշխատանք, հասցեական տեղեկատվություն տրամադրել ծրագրերի կարևորության, նպատակների, խնդիրների և սպասվելիք արդյունքերի մասին, բացատրել ծրագրերից օգտվելու օգուտները՝ հետաքրքրություն, շահագրգռվածություն առաջացնելով  շահառուների շրջանում և ապահովելով բոլոր շահառուների ներգրավումը գործընթացում»։
13:49 - 19 մայիսի, 2022