Ինֆոքոմ

Սա ջրբաժան է, ով ուզում է`ունենանք պետություն, ինքն այս փաստաթղթին դեմ չի կարող լինել. Սաղաթելյանը՝  ԱԺ արտահերթ նիստին իրենց նախաձեռնության մասին

Սա ջրբաժան է, ով ուզում է`ունենանք պետություն, ինքն այս փաստաթղթին դեմ չի կարող լինել. Սաղաթելյանը՝ ԱԺ արտահերթ նիստին իրենց նախաձեռնության մասին

Այսօր Ֆրանսիայի հրապարակում տեղի ունեցած հանրահավաքի ընթացքում Իշխան Սաղաթելյանը հայտնեց, որ առաջիկա երկուշաբթի օրվանից մինչեւ ուրբաթ հասցեական գնալու են դռնեդուռ, որ բոլորը դիրքորոշում հայտնեն՝ կողմ են արդյոք այն հայտարարությանը, որ իրենք պատրաստվում են ուրբաթ օրն ընդունել ԱԺ արտահերթ նիստին։  «Սա ջրբաժան է, ով ուզում է` ունենանք պետություն, ինքն այս փաստաթղթին դեմ չի կարող լինել, սրանք նվազագույն պահանջներն են հայ մնալու, պետություն ունենալու: Երկուշաբթի օրվանից համախմբելու ենք  ուժերը եւ գնալու ենք դռնեդուռ, վիճակը օրհասական է․ ով փաստաթղթին դեմ է, դեմ է ժողովրդին, որովհետեւ այլ հնարավորություն, այլ ելք, այլ ճանապարհ չկա: Երկուշաբթի օրվանից ժամը 11:00-ից բոլորիդ հրավիրում ենք հրապարակ, մի քանի հասցեներով գնում ենք, հերթով բոլորը պետք է պատասխան տան, մենք պետք է հասկանանք` ով է ժողովրդին կողմ, ով է դեմ»,-ասաց նա: Սաղաթելյանի խոսքով՝ բոլորը՝ սկսած իշխող խմբակցության պատգամավորներից ու կառավարության անդամներից, պետք է պատասխանեն այդ հարցին։ Հիշեցնենք, որ «Հայաստան» և «Պատիվ ունեմ» խմբակցությունները ԱԺ արտահերթ նիստ են նախաձեռնել, որը տեղի կունենա հունիսի 3-ին՝ ժամը 16:00-ին։ 
23:13 - 28 մայիսի, 2022
Ստեփանակերտում երթ և հանրահավաք իրականացվեց

Ստեփանակերտում երթ և հանրահավաք իրականացվեց

Այսօր «Դիմադրություն» շարժումը հանրահավաք էր իրականացնում Արցախի մայրաքաղաք Ստեփանակերտի Վերածննդի հրապարակում։ ՍիվիլՆեթը շրջել է Ստեփանակերտում և զրուցել երթին եւ հանրահավաքին մասնակցող պատգամավորների, ինչպես նաև քաղաքացիների հետ։ Արցախի ԱԺ ՀՅԴ խմբակցության քարտուղար Վահրամ Բալայանը նշում է, որ Ստեփանակերտում ժողովուրդը դուրս է եկել իր մտահոգությունները հայտնելու․ «Արցախը չի կարող անտարբեր մնալ, եւ այսօր ինչպես Հանրապետության տարբեր բնակավայրերում, այնպես էլ քաղաքամայր Ստեփանակերտում ժողովուրդը դուրս է եկել իր մտահոգությունները ներկայացնելու, միաժամանակ նաեւ իր աջակցությունը հայտնելու Ֆրանսիայի հրապարակի մեր հայրենակիցներին։ Ընդհանուր առմամբ, մենք միշտ ձեռնպահ ենք մնացել ու փորձել ենք ՀՀ-ում տեղի ունեցող ներքաղաքական զարգացումներին ընդհանրապես չմասնակցել, բայց սա այլ հարց է․ խոսքը վերաբերում է Արցախի ճակատագրին, Արցախում ապրող հայ մարդկանց։ Սա, ըստ էության, ոչ թե ներքաղաքական հարցերի լուծման հարթակ է, այլ մեր ապագայի վերաբերյալ հարցերի պատասխանը տալու»։  ԱՀ ԱԺ «Արդարություն» խմբակցության ղեկավար Դավիթ Գալստյանն էլ ասում է․ «Ժողովուրդը ոտքի է կանգնել եւ փորձում է ցույց տալ, որ ինչ-որ անձ չի կարող մի ամբողջ ժողովրդի ճակատագիր վճռել։ Ժողովուրդը ոտքի է կանգնել՝ ասելու, որ մենք ենք տերը մեր երկրի, ու ոչ մեկն իրավունք չունի ո՜չ մեր թիկունքում, ո՜չ մեր անունից այլ հարթակներում հանդես գալու՝ բացառությամբ մեր ինքնորոշման իրավունքը առաջ տանելուց։ Երթին մասնակցող քաղաքացիներից մեկն էլ նշում է՝ իրենց կյանքը Ադրբեջանի կազմում չեն պատկերացնում։ «Այս 94 տարին բավական էր, որ աշխարհին ապացուցենք, որ Ադրբեջանի կազմում ապրել, գոյատեւել հնարավոր չէ։ Արցախը լոկ տարածք է Ադրբեջանի համար, իսկ արցախահայությունը նրա համար ոչինչ է։ Դրա համար մենք չպետք է երկնչենք, եւ պայքարի ենք դուրս եկել, մենք երբեք մեր կյանքը Ադրբեջանի կազմում չենք պատկերացնում»։ 
22:05 - 28 մայիսի, 2022
Ռուսաստանի ֆինանսների նախարարը հայտարարել է, որ «հատուկ գործողության» վրա «հսկայական ռեսուրսներ» են ծախսվում

Ռուսաստանի ֆինանսների նախարարը հայտարարել է, որ «հատուկ գործողության» վրա «հսկայական ռեսուրսներ» են ծախսվում

Ռուսաստանը տնտեսության աջակցությանն, ընդանուր առմամբ, 8 տրլն ռուբլի է ուղղել, ասել է երկրի ֆինանսների նախարար Անտոն Սիլուանովը։ «Հատուկ ռազմական գործողության» իրականացումը, նրա խոսքով, «հսկայական ֆինանսական ռեսուրսներ» է պահանջում։ Սակայն հստակ գումարի չափը չի նշել, հայտնում է «Կոմերսանտը»։ «Կենսաթոշակային ապահովման համար այս տարի հսկայական միջոցներ՝ 600 միլիարդ է անհրաժեշտ, հաջորդ տարի՝ 1 տրիլիոն, հետագայում՝ նույնպիսի ծավալներ։ Հատուկ գործողության իրականացման համար գումար, հսկայական ռեսուրսներ նույնպես պետք են։ Տնտեսության աջակցության համար քաղաքացիներին նույնպես փող է պետք, տնտեսությանն ուղղված, այսպես կոչված, բյուջետային խթանի ընդհանուր ծավալը 8 տրլն ռուբլի է։ Հսկայական գումարներ են։ Այս ռեսուրսները մեզ պետք են՝ տնտեսությանը, մեր քաղաքացիներին աջակցելու համար», - ասել է նախարարը։  Նա հավելել է, որ, քանի դեռ փակ է ներկրումը, ՌԴ կառավարությունն, առաջին հերթին, սատարելու է արտահանողներին։   Նորա Վանյան
18:17 - 27 մայիսի, 2022
Ռուսաստանը պերսոնա նոն գրատա է հայտարարել Խորվաթիայի դեսպանատան հինգ աշխատակիցների

Ռուսաստանը պերսոնա նոն գրատա է հայտարարել Խորվաթիայի դեսպանատան հինգ աշխատակիցների

Ռուսաստանը Խորվաթիայի դեսպանատան հինգ աշխատակիցների պերսոնա նոն գրատա է հայտարարել։ Այս մասին, ինչպես նշում է ՏԱՍՍ-ը, այսօր հայտնել է ՌԴ արտգործնախարարությունը։ «Ի պատասխան ավելի վաղ ռուսական դիվանագիտական ներկայացուցչության կազմի թվաքանակի կրճատմանն ուղղված Զագրեբի ոչ բարեկամական քայլերին՝ [ՌԴ-ում Խորաթիայի դեսպան] Տոմիսլավ Ցարին բողոքի նոտա է փոխանցվել՝ Մոսկվայում Խորվաթիայի դեսպանատան հինգ աշխատակիցներին պերսոնա նոն գրատա հայտարարելու մասին», - ասված է գերատեսչության հաղորդագրությունում։ Ապրիլի 11-ին Խորվաթիայի արտգործնախարարությունը հայտնել էր Զագրեբում Ռուսաստանի դեսպանատան աշխատակիցների ընդհանուր թվի կրճատման որոշման մասին։ Այս առնչությամբ ռուսական դիվանագիտական ներկայացուցչության 24 աշխատակիցները ստիպված էին եղել լքել Խորվաթիայի տարածքը։ Նորա Վանյան
16:06 - 27 մայիսի, 2022
Ովքեր են ռուսական գազի դիմաց ռուբլով վճարում, ովքեր՝ ոչ․ Politico

Ովքեր են ռուսական գազի դիմաց ռուբլով վճարում, ովքեր՝ ոչ․ Politico

Եվրամիության մի շարք ընկերություններ Մոսկվայի կողմից ճնշման են ենթարկվում ռուսական գազի դիմաց ռուսական ռուբլով վճարելու առնչությամբ այն դեպքում, երբ Եվրահանձնաժողովի ուղեցույցը շփոթմունք է առաջացնում, գրում է Politico-ն, որի հոդվածը ներկայացնում ենք կրճատումներով․ «Վերջին ամիսներին ԵՄ էներգետիկ ընկերությունները փորձում են հասկանալ Բրյուսելի մշուշոտ, երբեմն էլ հակասական հայտարարություններն այն մասին, թե արդյոք ռուսական գազի դիմաց ռուբլով վճարումը ԵՄ պատժամիջոցների խախտում է։ Այս պահի դրությամբ ռուսական գազի մատակարարումները դադարեցվել են ԵՄ երեք երկրների համար այն պատճառով, որ նրանց էներգետիկ ընկերությունները հրաժարվել են կատարել Ռուսաստանի՝ մարտի 31-ին ընդունած որոշումը․ ըստ այդ որոշման՝ «ոչ բարեկամ երկրները» գազի դիմաց վճարումները պետք է իրականացնեն ռուսական «Գազպրոմբանկում» բացված երկու հաշիվներով, որոնցից մեկը պետք է լինի եվրոյով կամ դոլարով, մյուսը՝ ռուբլով, որպեսզի արտարժույթի փոխանակում իրականացվի։ Սակայն ավելի ու ավելի շատ էներգետիկ ընկերություններ են կամավոր կերպով վճարումներն իրականացնում ռուսական բանկի հաշիվների միջոցով։ Նրանք պնդում են, որ վճարումները չեն խախտում ԵՄ պատժամիջոցները։ ԵՄ երկրներին ուղարկված նախնական ուղեցույցում Եվրահանձնաժողովը զգուշացրել է, որ գազի դիմաց ռուբլով վճարումը «կհանգեցնի ԵՄ պատժամիջոցների խախտման»։ Սակայն ապրիլին հրապարակված ուղեցույցում նշվել է, որ ԵՄ պատժամիջոցները «չեն արգելում հաշիվներ բացել «Գազպրոմբանկում»»։ Իսկ ապրիլի վերջին թարմացված ուղեցույցում ոչ մի պարզաբանում չկա, թե արդյոք ռուբլով հաշիվները խախտում են ԵՄ պատժամիջոցները։ Մայիսի կեսերին ԵՄ դիվանագետների հետ հանդիպմանը Եվրահանձնաժողովի տնօրենության էներգետիկ հարցերով գլխավոր տնօրեն Դիտե Յուլ-Յորգենսենը ներկաներին ասել է, որ Եվրահանձնաժողովն ընկերություններին խորհուրդ է տալիս ռուբլով հաշիվներ չբացել, սակայն նա չի ասել, թե դա պատժամիջոցների խախտում է: Այդ մասին հայտնել են քննարկմանը լավատեղյակ երեք անձինք։ Ռուսական կառավարությունը հայտարարել է, որ արդեն այս շաբաթ հրապարակելու է օտարերկրյա ընկերությունների լիարժեք ցանկը, որոնք ռուբլով հաշիվներ են բացել «Գազպրոմբանկում»։ Իսկ մինչ այդ ներկայացնենք այն, ինչ հայտնի է այս պահի դրությամբ։   Ընկերություններ, որոնք մերժել են կատարել ռուսական պահանջը Լեհաստան, PGNiG: Ընկերությունը հրաժարվել է ռուբլով վճարումներ կատարել ապրիլի 12-ին։ Գազի մատակարարումները դադարեցվել են ապրիլի 27-ին։ Բուլղարիա, «Բուլղարգազ»։  Հրաժարվել է ռուբլով վճարել. մատակարարումները դադարեցվել են ապրիլի 27-ին։ Ֆինլանդիա, «Gasum»։ Ֆինլանդիայի կառավարությունը նույնպես մերժել է Ռուսաստանի պահանջը. մատակարարումները դադարեցվել են մայիսի 21-ին։   Ընկերություն, որը դեռ չի կողմնորոշվել Նիդերլանդներ, «GasTerra»։ Մասամբ պետական ընկերությունը հրաժարվել է մանրամասներ ներկայացնել «Գազպրոմի» հետ իր պայմանագրից, սակայն նշել է, որ պատժամիջոցների հարցում անհստակությունը «շատ է նյարդայնացնում»։ Մայիսի 24-ին «GasTerra»-ն Politico-ին ասել է, որ իրավիճակը դեռ պարզ չէ։ «Նիդերլանդները դիմել է Եվրահանձնաժողովին՝ խնդրելով հստակեցնել ուղեցույցը ռուբլով հաշիվների մասով»,- ասել է Նիդերլանդների էկոնոմիկայի նախարարության ներկայացուցիչը։   Ընկերություններ, որոնք շարունակում են վճարումները ռուսական «Գազպրոմբանկի» միջոցով Այս ընկերությունները շարունակում են ռուսական գազի դիմաց վճարել և ստանալ այն, սակայն «Գազպրոմի» հետ իրենց համաձայնագրի մանրամասները, օրինակ, թե արդյոք ռուբլով հաշիվներ են բացել, կարող են չհրապարակել։ Հունգարիա, MVM: «Մենք վճարում ենք եվրոյով, «Գազպրոմբանկը» եվրոն փոխանակում է, և այդ գումարը վճարվում է «Գազպրոմ էքսպորտին»,- ապրիլին 11-ին ասուլիսի ժամանակ ասել է Հունգարիայի արտգործնախարար Պետեր Սիյարտոն։ Գերմանիա, VNG: «Մենք կվճարենք գումարը, որը նախկինի պես արտահայտված կլինի եվրոյով, այն կփոխանցվի «Գազպրոմբանկի» հաշվին, […] որպեսզի մեր կողմից ապահովվի ժամանակին վճարումը մեր մատակարարին... Մենք նաև կարծում ենք, որ գումարը ռուբլով փոխանակելը դժվարություն չի առաջացնի․․․ հաշվի բացումը հարթ է ընթացել»,- ասել է ընկերությունը մայիսի 9-ին։ Գերմանիա, RWE։ «Մենք պատրաստ ենք եվրոյով վճարել և համապատասխան հաշիվ ենք բացել»,- ասել է ընկերությունը մայիսի 16-ին։ Գերմանիա, «Uniper»: ««Uniper»-ը հաշիվ է բացել «Գազպրոմբանկում» և կարգավորումներ իրականացրել՝ պայմանագրով նախատեսված եվրոյով վճարումներն այդ հաշվին փոխանցելու համար՝ վճարային նոր մեխանիզմի համաձայն»,- ասել է ընկերությունը մայիսի 18-ին։ Ֆրանսիա, «Engie»: ««Engie»-ն «Գազպրոմի» հետ բանակցություններ է վարում՝ ռուսական գազի մատակարարման դիմաց վճարման սխեմայի փոփոխման վերաբերյալ Ռուսաստանի պահանջի մասով։ Ընկերությունն անհրաժեշտ քայլեր է ձեռնարկել՝ պատրաստ լինելու կատարել իր վճարային պարտավորությունները,- ասել է ընկերությունը մայիսի 17-ին։ Իտալիա, «Eni»: ««Eni»-ն «Գազպրոմբանկում» երկու հաշիվների բացման ընթացքի մեջ է (մեկը՝ եվրոյով, մյուսը՝ ռուբլով)»,- հայտնել է ընկերությունը մայիսի 17-ին։ Ավստրիա, OMV: «Ներկա պահին մենք սկսել ենք պատժամիջոցներին համապատասխանող վճարման գործընթաց, որն ապահովում է գազի մատակարարման դիմաց ժամանակին կատարվող վճարումները»,- նշել է ընկերությունը մայիսի 20-ին։ Չեխիա, ČEZ: «Մենք եվրոյով վճարում ենք կատարել՝ Եվրահանձնաժողովի հանձնարարականին համապատասխան։ Մանրամասներ չենք հաղորդելու»,- ասել է ընկերությունը մայիսի 20-ին։ Սլովակիա, SPP: «Սլովակիան ապրիլյան վճարումներն իրականացրել է եվրոյով՝ գործող պայմանագրի համաձայն․․․ ԵՄ այն մոտեցման հիման վրա, որ նման վճարումը պատժամիջոցների խախտում կամ շրջանցում չէ»,- հայտարարել է երկրի էկոնոմիկայի նախարարությունը մայիսի 20-ին։ Սլովենիա, Geoplin: ««Geoplin»-ն իր ռուս գործընկերոջ հետ պայմանավորվել է վճարման ընթացակարգի մասին, որը համապատասխանում է պայմանագրին, ինչպես նաև ԵՄ ինստիտուտների միջոցներին և հանձնարարականներին»,- ընդգծել է ընկերությունը մայիսի 20-ին»։   Նորա Վանյան
12:16 - 27 մայիսի, 2022
Թուրքիան բանակցում է Ռուսաստանի և Ուկրաինայի հետ՝ հացահատիկի արտահանման միջանցքի շուրջ․ Reuters

Թուրքիան բանակցում է Ռուսաստանի և Ուկրաինայի հետ՝ հացահատիկի արտահանման միջանցքի շուրջ․ Reuters

Թուրքիան բանակցում է Ռուսաստանի և Ուկրաինայի հետ՝ Բոսֆորի նեղուցով հացահատիկն Ուկրաինայից արտահանելու համար միջանցք բացելու շուրջ։ Այս մասին գրում է Reuters-ը՝ հղում անելով բարձրաստիճան թուրք պաշտոնյայի խոսքերին։ Ուկրաինայի սևծովյան նավահանգիստներն արգելափակվել են փետրվարին Ռուսաստանի ներխուժումից հետո, և ավելի քան 20 մլն տոննա հացահատիկը մնացել է պահեստներում։ Ռուսաստանին և Ուկրաինային բաժին է ընկնում ցորենի համաշխարհային մատակարարումների գրեթե մեկ երրորդը, իսկ Ուկրաինայից արտահանման անհնարինությունը նպաստում է համաշխարհային պարենային ճգնաժամի առաջացմանը։ «Թուրքիան բանակցում է և Ռուսաստանի, և Ուկրաինայի հետ՝ հացահատիկի արտահանման հարցով», - ասել է պաշտոնյան, որը ցանկացել է անանուն մնալ, քանի որ բանակցությունները գաղտնի են։ Նա նշել է նաև, որ բանակցությունները շարունակվում են։ Թուրքիայի նախագահ Ռեջեփ Թայիփ Էրդողանի աշխատակազմից չեն պատասխանել մեկնաբանություն տալու հարցմանը։ Ռուսաստանի փոխարտգործնախարար Անդրեյ Ռուդենկոն երեկ հայտարարել է, որ Մոսկվան պատրաստ է պարեն տեղափոխող նավերի համար միջանցք բացել՝ արևմտյան որոշ պատժամիջոցների չեղարկման պայմանով։ Թուրքիան Սև ծովով սահմանակից է Ուկրաինային և Ռուսաստանին և լավ հարաբերություններ ունի այս երկու երկրների հետ, թեև դատապարտել է ռուսական ներխուժումը։ Այս հարցին լավատեղյակ ևս երկու անձինք են հաստատել շրջանառվող լուրերը, որ Թուրքիան օգնում է, որ հացահատիկն արտահանվի Ուկրաինայից։ «Թուրքիան պատրաստ է իր նպաստն ունենալ Օդեսայից Սև ծովով այդ արտահանման մշտադիտարկման հարցում, քանի որ Թուրքիան ավանդաբար ուժեղ դիրքեր ունի Սև ծովում և պատրաստ է օգնել», - երեկ ասել է բարձրաստիճան եվրոպացի մի դիվանագետ, որը ցանկացել է անանուն մնալ։   Նորա Վանյան
18:06 - 26 մայիսի, 2022
Մոսկվան Կիևից սպասում է իր պահանջների ընդունում․ Պեսկով

Մոսկվան Կիևից սպասում է իր պահանջների ընդունում․ Պեսկով

Ուկրաինան պետք է գիտակցի դե ֆակտո իրավիճակը, հայտարարել է Ռուսաստանի նախագահի մամուլի քարտուղար Դմիտրի Պեսկովը։ Այդպես է նա պատասխանել լրագրողների այն հարցին, թե ինչպես է գնահատում ԱՄՆ նախկին պետքարտուղար Հենրի Քիսինջերի խոսքերն այն մասին, որ Ուկրաինան պետք է Ռուսաստանին զիջումներ անի, գրում է «Կոմերսանտը»։ «Մոսկվան Կիևից սպասում է Մոսկվայի պահանջների ընդունում և դե ֆակտո՝ առկա իրավիճակի գիտակցում», - ասել է Պեսկովը։ Նա, սակայն հավելել է․ «Դա տարածքային զիջումը չէ։ Կիևը պետք է ընդունի դե ֆակտո իրավիճակն ու պարզապես սթափ գնահատի այն»։ Ավելի վաղ ԱՄՆ նախկին պետքարտուղար Հենրի Քիսինջերը կոչ էր արել դադարեցնելու Ուկրաինայում ռուսական զորքերին «ջախջախիչ պարտության մատնելու» փորձերը։ Նրա խոսքով՝ Արևմուտքը պետք է Ուկրաինայի վրա ազդի՝ խաղաղ բանակցությունների վերսկսման համար։ Ուկրաինայի նախագահ Վլադիմիր Զելենսկին բացասաբար է արձագանքել Քիսինջերի հայտարարությանը՝ նշելով, որ նա կոչ է անում «Ուկրաինայից մի կտոր հանձնել Ռուսաստանին»։ Նա ասել է, որ այդ դիրքորոշումը հիշեցնում է Երկրորդ աշխարհամարտի նախաշեմին ստեղծված իրավիճակը։ Նորա Վանյան
15:45 - 26 մայիսի, 2022
Ղազախստանի խորհրդարանը վավերացրել է Հայաստանի հետ համաձայնագիրը՝ նավթամթերքի մատակարարման մասին

Ղազախստանի խորհրդարանը վավերացրել է Հայաստանի հետ համաձայնագիրը՝ նավթամթերքի մատակարարման մասին

Ղազախստանի խորհրդարանի Սենատը (վերին պալատ) վավերացրել է Հայաստանի հետ միջկառավարական համաձայնագիրը՝ ՀՀ-ին նավթամթերքի մատակարարման ոլորտում առևտրատնտեսական համագործակցության մասին, հայտնում է ՏԱՍՍ-ը։ Հայաստանի հետ համաձայնագիրը ստորագրվել է 2020 թ-ի հուլիսին Նուր-Սուլթանում։ Դրանով սահմանվում են երկու երկրների կառավարությունների միջև առևտրատնտեսական համագործակցության պայմանները՝ Հայաստանին այն ապրանքների մատակարարման անռչությամբ, որոնք դասակարգվում են Եվրասիական տնտեսական միության արտաքին տնտեսական գործունեության ապրանքների անվանացանկի 27-րդ խմբում՝ բացառությամբ նավթի, էլեկտրաէներգիայի, բնական գազի և ածխի։ «Համաձայնագրով նախատեսվում է․ արտահանման մաքսատուրքերի չգանձում այն ապրանքների համար, որոնք Ղազախստանից Հայաստան են արտահանվում ներքին սպառման համար այն ծավալներով, որոնք նախատեսված են ինդիկատիվ բալանսներով; սահմանված ապրանքների մատակարարման արգելք, որոնք ցանկով հաստատված չեն, ինչպես նաև նախատեսված չեն ինդիկատիվ բալանսներով», - ասված է Ղազախստանի Սենատի տնտեսական քաղաքականության, նորարարական զարգացման և ձեռնարկատիրության հարցերով կոմիտեի եզրակացությունում։ Ընդ որում, սահմանված ապրանքները, որոնք Ղազախստանից Հայաստան են արտահանվում, չեն կարող արտահանվել երրորդ երկրներ և ԵԱՏՄ երկրներ։ Այս պարտավորության խախտման փաստերի հայտնաբերման դեպքում ղազախական կողմն իրեն իրավունք է վերապահում արգելելու կամ կասեցնելու նշված ապրանքների՝ առանց մաքսատուրքի մատակարարումները։ Սենատում համաձայնագրի վավերացումից հետո այն կներկայացվի Ղազախստանի նախագահի ստորագրմանը։ Նորա Վանյան
15:17 - 26 մայիսի, 2022
Մոլդովայի նախկին նախագահին հայրենիքի դավաճանության մեղադրանք է առաջադրվել

Մոլդովայի նախկին նախագահին հայրենիքի դավաճանության մեղադրանք է առաջադրվել

Մոլդովայի Հակակոռուպցիոն դատախազությունը հայրենիքի դավաճանության և կոռուպցիայի մեղադրանք է առաջադրել երկրի նախկին նախագահ Իգոր Դոդոնին։ Այս մասին ՌԻԱ Նովոստիին հայտնել է նրա փաստաբան Մաքսիմ Լեբեդինսկին։ «Հակակոռուպցիոն դատախազությունն այսօր Դոդոնին պաշտոնապես մեղադրանք է առաջադրել չորս կետերով, դրանցում ներառված է կոռուպցիան, ինչպես նաև հայրենիքի դավաճանությունը», - ասել է Լեբեդինսկին։ Տեղի օրենսդրության համաձայն՝ դատախազությունը կարող է պահանջել 30-օրյա նախնական կալանք սահմանել մեղադրյալի նկատմամբ, եթե կասկածներ կան, որ նա կարող է ազդել հետաքննության ընթացքի վրա։ Հակակոռուպցիոն դատախազության աշխատակիցները երեկ 72 ժամով կալանավորել են Դոդոնին։ Նախկին նախագահի տանը խուզարկություն և քննչական միջոցառումներ են իրականացվել։   Նորա Վանյան  
20:14 - 25 մայիսի, 2022
Գերմանիան չեղարկում է COVID-19-ի սահմանափակումների մեծ մասը երկիր ժամանողների համար

Գերմանիան չեղարկում է COVID-19-ի սահմանափակումների մեծ մասը երկիր ժամանողների համար

Գերմանիայի իշխանությունը չեղարկում է կորոնավիրուսի առնչությամբ կիրառված սահմանափակումները գերմանացիների և օտարերկրացիների համար, որոնք ցանկանում են երկիր մուտք գործել։ Հունիսի 1-ից ժամանողներից այլևս չեն պահանջի պահպանել 3G կանոնը։ Այսպիսի որոշում է ընդունել երկրի կառավարությունն այսօր՝ մայիսի 25-ին, գրում է DW-ն։ 3G կանոնի համաձայն՝ 12 տարեկանից բարձր անձինք Գերմանիա ժամանելիս պետք է ունենան պատվաստման հավաստագիր, կորոնավիրուսով հիվանդանացած լինելու մասին վկայական կամ կորոնավիրուսի բացասական թեստ, որն արվել է վերջին 24 ժամում։ Սահմանափակումների չեղարկման որոշումը գործելու է հունիսի 1-ից մինչև օգոստոսի 31-ը։ Երկրի իշխանությունը չի բացառում, որ աշնանը կրկին կարող են սահմանափակումներ կիրառվել, եթե համավարակի նոր ալիք սկսվի։ Այս կանոնը չի տարածվում այն երկրների քաղաքացիների վրա, որոնք Գերմանիա են գալիս այսպես կոչված «կորոնավիրուսի տեսակների տարածման շրջաններից»։ Նրանք նախկինի պես պետք է 14 օր ինքնամեկուսանան՝ անկախ պատվաստումներից և վարակից բուժված լինելուց։ Սակայն, ինչպես նշում է dpa գործակալությունը, ներկա պահին աշխարհի ոչ մի երկիր այդպիսի շրջան չի համարվում։   Նորա Վանյան  
18:11 - 25 մայիսի, 2022
Ռուսաստանը պետպարտքի վճարումները ռուբլով կկատարի

Ռուսաստանը պետպարտքի վճարումները ռուբլով կկատարի

Ռուսաստանը շարունակելու է սպասարկել իր պետական պարտքը նույնիսկ այն բանից հետո, երբ ԱՄՆ ֆինանսների նախարարությունը չի երկարաձգել դրա սպասարկման արտոնագիրը, «Կոմերսանտի» փոխանցմամբ՝ ասել է ՌԴ ֆինանսների նախարարությունը։ Գերատեսչությունը ներդրողներին վճարելու է ռուբլով։ ՌԴ ֆինանսների նախարար Անտոն Սիլուանովը նշել է, որ ներկայիս իրավիճակը նման չէ նրան, ինչ եղել է 1998 թ-ի դեֆոլտից առաջ, քանի որ երկիրն այժմ փող ունի։ «Հիմա փող կա, և վճարելու պատրաստակամություն նույնպես կա։ Ռուսաստանցիների կյանքի որակի վրա ոչ բարեկամ երկրի կողմից արհեստականորեն ստեղծված իրավիճակը չի ազդի»,- ասել է նախարարը։ ԱՄՆ արտոնագրի բացակայությունը նշանակում է, որ Ռուսաստանը չի կարող դոլարով վճարել իր արժեթղթերի սեփականատերերին ողջ աշխարհում, այլ արժույթով՝ գոնե ԱՄՆ տարածքում։ Նորա Վանյան
18:06 - 25 մայիսի, 2022
Կառավարությունը գիտության ոլորտում մասնակի քայլեր է անում, որոնք խնդիրներին համակարգային լուծում չեն տալիս․ Տիգրան Շահվերդյան

Կառավարությունը գիտության ոլորտում մասնակի քայլեր է անում, որոնք խնդիրներին համակարգային լուծում չեն տալիս․ Տիգրան Շահվերդյան

Անցած ամիս «Գիտուժ» նախաձեռնությունը նոր հայտարարությամբ էր հանդես եկել, որտեղ, ի թիվս այլնի, հայտարարել էր, որ կառավարության կողմից գիտական հետազոտությունների հանդեպ ուշադրության դրական փոփոխություններն իրենց ողջ աննախադեպությամբ հանդերձ անիմաստ կդառնան, եթե չհստակեցվեն մեր երկրի նպատակները, չսահմանվեն դրանցից բխող Գիտահետազոտական և փորձակոնստրուկտորական աշխատանքների զարգացմանը նպաստող իրատեսական ու հավակնոտ ռազմավարական ծրագրերը՝ հիմնված խնդրիներին համակարգային և ամբողջական լուծումներ տալու և միջազգայնորեն մրցունակ մակարդակի հատկացումների հանձնառություն վերցնելու վրա։ Օրերս էլ «Գիտուժի» անդամները մամուլի ասուլիսի ընթացքում հայտարարեցին, որ գիտության հանդեպ կառավարության և Ազգային ժողովի վերաբերմունքը թուլացնում են Հայաստանի անվտանգությունը։  «Գիտուժ» նախաձեռնության անդամ, «Robomart» ընկերության համահիմնադիր Տիգրան Շահվերդյանի կարծիքով՝ Հայաստանում շատ պետական խնդիրներ կան, և դրանց լուծման համար կարևոր է նորարարական մեթոդների կիրառումը․ «Մենք տեսնում ենք, որ ամբողջ աշխարհում դրանք հիմնված են Գիտահետազոտական և փորձակոնստրուկտորական (ԳՀՓԿ) տարբեր տեսակի աշխատանքների, պատվերի վրա։ Այդ մասով մեզ մոտ շատ մեծ բաց կա։ Մենք պատվերը ֆորմալ  առումով ունենք՝ պաշտպանական ԳՀՓԿ-ն, բայց դա անընդատ կրճատվում է։ Մյուս հարցերում ընդհանրապես չկա որևէ ԳՀՓԿ բյուջե, որը միտված է հենց այդ տեսակ խնդիրները լուծելուն։ Ամենապարզ օրինակը․ անընդհատ խոսում են արտադրողականության բարձրացման մասին։ Մեր տնտեսության մեջ ամենամեծ տեղը հատկացվում է գյուղատնտեսությանը, բայց չկա նպատակային ԳՀՓԿ բյուջե, որը ծախսվում է, օրինակ, ագրոտեխնոլոգիաների մեջ, ագրոտեխնոլոգիաների զարգացմանը միտված ԳՀՓԿ-ի համար։ Բոլոր նախարարություններում կարելի է այդպիսի խնդիրներ առանձնացնել, որոնց լուծման գործիք է անհրաժեշտ դիտարկել ԳՀՓԿ աշխատանքների մեխանիզմը»։ Տիգրան Շահվերդյանն ընդգծում է՝  «Գիտուժ» համայնքի պահանջն ուղղված է եղել ԳՀՓԿ բոլոր շղթաների զարգացմանը։ Այս պահին Գիտության կոմիտեի շատ ծրագրեր ուղղված են հիմնարար հետազոտություններին, որոնք, սակայն, ԳՀՓԿ ընդանուր շղթայի մի մասն են․«Մենք միշտ խոսել ենք ոչ միայն գիտության, այլև ընդանուր ԳՀՓԿ շղթայի զարգացման մասին՝ այսինքն հիմնարար հետազոտություններից մինչև կիրառական հետազոտություններ, կիրառական հետազոտություններից մինչև փորձարարական մշակումներ։ Եթե խոսքը  հիմնարար հետազոտությունների մասին է, այո, հայտարարել են, տեսնում ենք բյուջեի ավելացումը, բայց չենք տեսնում, թե առաջնահերթությունները ինչպես կարող են ձևավորվել, չենք տեսնում, թե ինչ թվային նպատակներ են դրվում։ Այն, ինչ արվում է, չի կանգնեցնում գիտական համայնքի կործանումը։ Զուտ թվերով եթե նայում ենք, մեր գնաահատակններով ունենք տարեկան 200 մարդու կորուստ, բայց պետական պատվերի շրջանակում ունենք 200 ասպիրանտական տեղ։ Ակնհայտ է, որ դրանց շատ չնչին տոկոսն է գնում գիտություն, ներքին ռեսուրսներով մեր գիտական համայնքը չի վերականգնվում։ Չնայած ասում ենք, որ առաջնահերթություն է դրվել, բացարձակ բյուջեի տեսքով երևում է, բայց արդյունքից չի երևում, որ դա իսկապես առաջնահերթություն է»։ Նրա խոսքով՝ կառավարությունը մասնակի քայլեր է անում, որոնք խնդրին համակարգային լուծում չեն տալիս․ «Պետք է համակարգային մոտեցում, բոլոր մասերն էլ պետք է արվեն, չենք կարող ասել՝ այս մի կտորում մի փոքր առաջընթաց ապահովեցինք, ինչ լավ է, եկեք ուրախանանք։ Մենք գիտական պոտենցիալը չենք զարգացնում, որ աշխարհին միայն գիտելիք տանք։ Էլի տանք, դեմ չեմ, բայց պետք է նաև մեր նպատակներին ծառայի ու պետք է մեր նպատակներին ծառայեցնելով զարգացնենք։ Միջազգային ամսագրերում տպագրվելը, փորձաքննություն անցնելը շատ կարևոր է, որովհետև դրանով կարողանում ենք գնահատել, թե ինչ որակի աշխատանքներ են կատարվում, ինչ որակի գիտական կապիտալ ունենք, բայց մեր նպատակը դա չի: Պետք է ի վերջո հնարավորություն տալ այդ մարդկանց օգտագործել գիտելիքը մեր երկրի և հասարակության  կարիքները հոգալու համար. սա անելու համար նշածս ամբողջ շղթայով պետք է  համակարգային գործ անել»։ Նա ընդգծում է, որ պաշտպանական ԳՀՓԿ  աշխատանքների վրա նույնիսկ պլանավորվող գումարները չեն ծախսվում․ «Ինչպես ենք փորձում աշխարհում մեր հարևանների համեմատ ունենալ մրցունակ բանակ, անվտանգային  համակարգ, եթե նորարարական լուծումների վրա չենք ծախսում նույնիսկ այն չնչին գումարը, որը հատկացնում ենք։ Հիմնարար  հետազոտությունների վրա հատկացվում է 25 միլիարդ, պաշտպանականի համար՝ 5 միլիարդ դրամ։ Ստացվում է 5 անգամ ավելի քիչ, ու դա էլ չենք կարողանում արդյունավետ յուրացնել»։ Նշենք, որ 2021 թ․-ին Բարձր տեխնոլոգիական արդյունաբերության նախարարությանը «Պաշտպանության բնագավառում գիտական և գիտատեխնիկական նպատակային հետազոտություններ ծրագրի» համար հատկացվել էր 4 միլիարդ 574 միլիոն դրամ, իսկ 2022 թ․-ին՝ 5 միլիարդ 200 միլիոն դրամ։ Այս ծրագրի շրջանակում գիտահետազոտական և փորձակոնստրուկտորական աշխատանքներ են իրականացվում։ Կառավարությունը, սակայն, 2021 թ․-ին կատարված վերաբաշխումներով 2 միլիարդ 576 միլիոն դրամով կրճատել է նախապես պլանավորված բյուջեն, իսկ այս տարվա ապրիլի 7-ին կառավարության որոշմամբ ծրագրի բյուջեից 295 միլիոն դրամ է կրճատվել՝ գումարը այլ միջոցառման վրա ծախսելու հիմնավորմամբ։ «Գիտուժ» նախաձեռնության  անդամը հավելում  է՝ խնդիրն այն չէ, որ հիմնարար հետազոտությունների վրա շատ գումար է ծախսվում, այլ այն, որ պաշտպանականի համար է շատ քիչ նախատեսվում․ «Համեմատությունը, որ անում եմ, չի նշանակում, որ պետք է այնտեղ քչացնեն, այստեղ ավելացնեն։ Պարզապես պաշտպանականի վրա  ավելի շատ է պետք հատկացնել և երբ հարց է բարձրացվում, որ համակարգը չի կարող ընդունել, պետք է զբաղվել նրանով, որ համակարգը կարողանա դա ընդունել։ Իսկ համակարգը կկարողանա դա անել, միայն այն դեպքում, երբ դու սկսես այն համալրել մի կողմից տաղանդներով, մյուս կողմից նպատակներդ  հստակեցնես և ծրագրերդ ի վերջո հստակ մշակես՝ հրաժարվելով իներցիոն կամ տեղային լուծումներից։ Հակառակ դեպքում անհամապատասխանություն է․  մի կողմից 2050 թ․-ի նպատակների ցանկում ունես մեկ շնչի  հաշվով ամենամարտունակ բանակը, բայց մյուս կողմից դու այսօր քայլեր ես անում, որոնք հակասում են այդ նպատակին։ Դու պաշտպանականը կրճատում ես, ինչպե՞ս ես ունենալու մեկ շնչի հաշվով ամենամարտունակ բանակը, թե՞ դա կարելի է մտածել 2040-ին։ Հենց այսօրվանից է պետք մտածել, որ 2050 թ․-ին ունենանք դա»։ Նրա խոսքով՝ անհրաժեշտ է, որ պատասխանատու պաշտոնյաների համար կոնկրետ ժամկետներ սահմանվեն․ «Պետք է առաջինը դրվի նպատակը, պետք է հայտարարվեն այդ ժամկետները։ Ես վստահ եմ, որ շատ հարցերում  պետական համակարգում կա այդ ռազմավարությունները մշակելու ներուժը։ Օրինակ, ունենք Ռազմարդյունաբերության կոմիտե։ Ես գիտեմ, որ մասնավոր հատվածում կան կազմակերպություններ, որոնք ռազմավարությունների նախագծեր են իրականացնում։ Պետք է նստել, միասին այդ սևագրերը նայել, եթե պետք է լրացնել կամ եթե լրիվ հիմարություն է գրած, ապա նորից անել, բայց միասին աշխատելով դա բերել վերջնական արդյունքի»։ Տիգրան Շահվերդյանը մի օրինակ է բերում, պատմում է, որ  տիեզերական գործունեության ռազմավարության հետ կապված նույնպես աշխատանքներ են տարվել, բաց կոնկրետ վերջնաժամկետներ չեն սահմանվել․ «Ես անձամբ եմ մասնակցել այդ աշխատանքային խմբին, որ մշակում է ռազմավարությունը։ Արդեն կես տարի է այդ աշխատանքային խումբը չի հանդիպել, չնայած այդ ռազմավարության սևագիրը ունեինք։ Եթե մեխանիզմ է ստեղծվում այդպիսի գործեր անելու,  պետական մարմինները հետևողական չեն լինում, որ աշխատանքը ճիշտ տարվի»։ Նրա կարծիքով՝ Հայաստանում կա ռազմարդյունաբերության զարգացման պոտենցիալ, այլ հարց է, թե ինչ մեթոդներով է փորձ արվում այդ պոտենցիալը զարգացնել, ինչ խոչընդոտներ կան պետություն-մասնավոր համագործակցության համար և արդյոք լուծումներ տրվում են այդ խոչընդոտներին․ «Ամենամեծ խոչընդոտներից մեկը, որ լսել ենք, ընդհանուր ԳՀՓԿ աշխատանքների հանդեպ կարծրացած վերաբերմունքի հարց կա։ Հաճախ սպասումը այն է, որ պատրաստի նմուշ է ստացվելու։ Այո, ի սկզբանե նպատակը այդպիսին պետք է լինի, բայց պետք է հասկանալ, որ գործ ունես ամբողջությամբ ոչ միանշանակ գործընթացի հետ, որոնք իրենց մեջ ի սկզբանե ունեն ռիսկային էլեմենտներ։ Զարգացվածության տարբեր աստիճաններում այդ ռիսկերը տարբեր են։ Եթե նույնիսկ չի ստացվել այն, ինչ նախատեսվում էր, չի նշանակում, որ ամբողջ աշխատանքը ջուրն է ընկել ու պետք է գնաս, մարդուն դատի տաս։ Հնարավոր է, որ աշխատանքնը իսկապես բարեխղճորեն արվել է, բայց գործի բնույթի հետ կապված եղել են խնդիրներ։ Դա պետք է հաշվի առնել և վերջում ոչ թե ըստ արդյունքի առկայության կամ բացակայության փաստով որոշվի, այլ արդյոք աշխատանքը նորմալ կատարվել է, թե ոչ, և նույնիսկ բացասական արդյունքն էլ տվյալ դեպքում պետք է արդյունք համարվի»։   Նանե Ավետիսյան
20:32 - 24 մայիսի, 2022