Երևանի ավագանի

Երևանի ավագանին Երևանում տեղական ինքնակառավարման բարձրագույն ներկայացուցչական մարմին, որը վերահսկողություն է իրականացնում Երևանի քաղաքապետի գործունեության և իր կողմից ընդունված որոշումների կատարման նկատմամբ։ «Երևան քաղաքում տեղական ինքնակառավարման մասին» ՀՀ օրենքի համաձայն` ավագանին ընտրվում է ՀՀ ընտրական օրենսգրքով սահմանված կարգով և կազմված է 65 անդամից։ Ավագանին ընտրվում է հինգ տարի ժամկետով: Նորընտիր ավագանու լիազորությունների ժամկետն սկսվում է առաջին նիստի գումարման պահից:

Ավագանու մարմիններն են՝

  • Երևանի քաղաքապետը
  • Երևանի քաղաքապետի առաջին տեղակալը
  • Ավագանու անդամները
  • Ավագանու խմբակցությունները
  • Մշտական հանձնաժողովները
Մինչև 2023-ի ավարտը տրանսպորտային համակարգում խնդիրները 70-80 տոկոսով լուծված կլինեն. քաղաքապետ

 |armenpress.am|

Մինչև 2023-ի ավարտը տրանսպորտային համակարգում խնդիրները 70-80 տոկոսով լուծված կլինեն. քաղաքապետ |armenpress.am|

armenpress.am: Երևան համայնքի 2022 թվականի բյուջեով  6 միլիարդ 342 միլիոն 503  հազար դրամ կուղղվի թվով 15 միավոր տրոլեյբուսների և թվով 150 միավոր ավտոբուսների ձեռք բերման համար: Երևանի ավագանու նիստում քաղաքապետ Հրաչյա Սարգսյանն ասաց, որ  249 «Հայգեր» մակնիշի ավտոբուսների շահագործման տասը տարին լրանում է այս տարի, և տեխնիկական խնդիրները լուծելու համար  Չինաստանից պահեստամասեր կբերվեն Հայաստան: «Մինչև 2023 թվականի ավարտը տրանսպորտային համակարգում խնդիրները 70-80 տոկոսով լուծված կլինեն: Հիմա օրենսդրական փոփոխություններ ենք իրականացնում, որպեսզի մասնավոր կազմակերպություններին տրանսպորտի շահագործման գործընթացին ներգրավենք: Նախագիծը պատրաստ է, և  մինչ տարվա մեջ այդ փոփոխությունը կլինի: Այն մեզ հնարավորություն կտա հայտարարել մրցույթ՝ նոր, հավելյալ շարժակազմ ձեռք բերելու համար»,-ասաց քաղաքապետը՝ հավելելով, որ 2023 թվականի մարտ-ապրիլ ամիսներին  87 միավոր 12 մետրանոց ավտոբուս է լինելու Երևանում:  
17:32 - 21 հունիսի, 2022
Երևան համայնքի սեփականություն համարվող բնակարանը սեփականության իրավունքով կտրամադրվի Մալխաս Ամոյանին

 |armenpress.am|

Երևան համայնքի սեփականություն համարվող բնակարանը սեփականության իրավունքով կտրամադրվի Մալխաս Ամոյանին |armenpress.am|

armenpress.am: Երևան համայնքի սեփականություն համարվող Լենինգրադյան փողոցի հ.23/13 շենքի հ.4՝ 92.3 քմ ընդհանուր մակերեսով բնակարանը անհատույց սեփականության իրավունքով կտրամադրվի հունա-հռոմեական ոճի 2021թ. Աշխարհի և 2022թ. Եվրոպայի մեծահասակների առաջնության ոսկե մեդալակիր Մալխաս Ամոյանին: Որոշումը քվեարկության դրվեց Երևանի ավագանու նիստում: Որոշման նախագծի համաձայն` Մալխաս Ամոյանը իր ծնողների, եղբոր և քրոջ հետ բնակվում է Քրիստափորի փողոցի հ. 154/2 հասցեում գտնվող 67.7ք.մ. մակերեսով տանը: ՀՀ կառավարությանն առընթեր անշարժ գույքի կադաստրի պետական կոմիտեում Մալխաս Ամոյանի անվամբ Երևան քաղաքում որևէ անշարժ գույքի նկատմամբ սեփականության իրավունքի պետական գրանցում կատարված չէ: Հաշվի առնելով նրա մասնագիտական որակները, ինչպես նաև բնակարանային պայմանների բարելավման խիստ անհրաժեշտությունը՝ առաջարկվում է քննարկվող բնակարանը նվիրել նրան, որը լրացուցիչ խթան և ոգևորող հանգամանք կլինի անվանի մարզիկի համար մեր երկիրը հետագա առաջնություններում ներկայացնելու ընթացքում: Մալխաս Բիմբաշի Ամոյանը ծնվել է 1999 թվականի հունվարի 22-ին Երևան քաղաքում: 2015–2022թթ. ընթացքում դարձել է բազմաթիվ առաջնությունների հաղթող և մեդալակիր, 2022 թվականի մեծահասակների Եվրոպայի առաջնության չեմպիոն: Մալխաս Ամոյանի վերջին ամենակարևոր նվաճումներն են 2021թ. Աշխարհի և 2022թ. Եվրոպայի առաջնության ոսկե մեդալները: Որոշման նախագիծն ընդունվեց միաձայն:  
15:56 - 21 հունիսի, 2022
Երևանի 22 հիմնական դպրոցը կանվանակոչվի արցախյան 44-օրյա պատերազմի մասնակից Գևորգ Արշակյանի անվամբ

 |armenpress.am|

Երևանի 22 հիմնական դպրոցը կանվանակոչվի արցախյան 44-օրյա պատերազմի մասնակից Գևորգ Արշակյանի անվամբ |armenpress.am|

armenpress.am: «Երևանի հ.22 հիմնական դպրոց» պետական ոչ առևտրային կազմակերպությունը կանվանակոչվի արցախյան 44-օրյա պատերազմի մասնակից Գևորգ Արշավիրի Արշակյանի անվամբ՝ «Երևանի Գևորգ Արշակյանի անվան հ.22 հիմնական դպրոց» պետական ոչ առևտրային կազմակերպություն: Որոշումն ընդունվեց Երևանի ավագանու նիստում: «Երևանի հ.22 հիմնական դպրոց» ՊՈԱԿ-ն արցախյան 44-օրյա պատերազմի մասնակից Գևորգ Արշավիրի Արշակյանի անվամբ անվանակոչելու վերաբերյալ միջնորդությունը ներկայացվել է դպրոցի տնօրինության կողմից: Հարցը քննարկվել և հավանության է արժանացել դպրոցի մանկավարժական, աշակերտական, ծնողական և կառավարման խորհուրդների կողմից: Գևորգ Արշակյանը Մատաղիսում զինվորական ծառայությունն ավարտել է 2020թ. օգոստոսին, ստացել ավագ լեյտենանտի կոչում և զորացրվել: 44-օրյա պատերազմի լուրն ստանալուն պես՝ սեպտեմբերի 28-ին, ԵՊՀ-ում կազմել է կամավորական ջոկատ և մեկնել Մատաղիս, իսկ նահանջից հետո երկու շաբաթ գտնվել է Ալաշանում, հիվանդացել թոքաբորբով, տեղափոխվել Երևան, բուժվելուց հետո նորից վերադարձել է Ալաշան: Նոյեմբերի 5-ին, որպես վաշտի հրամանատարի տեղակալ, մասնակցել է Շուշիի պաշտպանական մարտերին, ստացել է երկու հրազենային վիրավորում, շարունակել է մարտը մինչև գիտակցության կորուստը, տեղափոխվել է հիվանդանոց, որտեղ և մահացել է: Գևորգ Արշակյանը հայրենիքի պաշտպանության և պետության անվտանգության ապահովման գործում նշանակալի ավանդ է ներդրել, ինչի համար Արցախի Հանրապետության նախագահի 2021թ. փետրվարի 17-ի հրամանագրով պարգևատրվել է «Մարտական խաչի» առաջին աստիճանի շքանշանով, ՀՀ նախագահի 2021թ. մայիսի 12-ի հրամանագրով՝ «Մարտական ծառայություն» մեդալով:
15:41 - 21 հունիսի, 2022
Երևանում նոր վերելակների ձեռքբերման այս տարվա ծրագրի ծավալը 10%-ով կավելանա

Երևանում նոր վերելակների ձեռքբերման այս տարվա ծրագրի ծավալը 10%-ով կավելանա

Երևանի քաղաքապետարանի աշխատակազմի լրատվության վարչությունը տեղեկացնում է, որ 2022թ․ համայնքի միջոցներով ու ծրագրերով ընդհանուր առմամբ Երևանում կփոխարինվի 426 վերելակ: Աշխատանքային հերթական խորհրդակցության ժամանակ քաղաքապետ Հրաչյա Սարգսյանը հանձնարարել է ծրագրի ծավալներն ավելացնել 10%-ով: Նոր վերելակների առաջին խմբաքանակն արդեն Երևանում է: «Ալբերտ Ազարյանի անվան մարմնամարզության օլիմպիական հերթափոխի մանկապատանեկան մարզադպրոցի համար նոր շենք կկառուցվի: «Հրազդան» մարզադաշտի մոտակայքում համայնքն ազատ տարածք ունի, որն էլ կօգտագործվի այդ նպատակով: Երևանի քաղաքապետարանը նախագծային մրցույթ կհայտարարի: *** ՄԱԿ-ի գործընկերների հետ համատեղ արդեն իսկ քայլեր են ձեռնարկվում Հանրապետության հրապարակի շենքերի գեղարվեստական լուսավորությունն արդիականացնելու ուղղությամբ: Սրան զուգահեռ՝ մայրաքաղաքի բակային տարածքներում շարունակվում է արտաքին լուսավորության ցանցի արդիականացման ծրագիրը: *** 2022թ. մայիսին սեփական եկամուտների փաստացի գանձումը նախորդ տարվա նույն ժամանակահատվածի համեմատ ընդհանուր առմամբ ավել է շուրջ 34%-ով, իսկ որոշ վարչական շրջաններում հավաքագրման նախանշված ծավալները գերակատարվել են: Քաղաքապետին զեկուցվել է, որ, այդուհանդերձ, կան վարչական շրջաններ, որոնց սեփական եկամուտների գանձումը չի գերազանցում 90%-ը: Կարևորելով գործընթացի պատշաճ կազմակերպումը՝ քաղաքապետը նշել է, որ մայրաքաղաքում նախանշված ծրագրերը լիարժեքորեն կյանքի կոչելու համար շատ կարևոր է ապահովել հավաքագրման կատարողականը: *** Մայրաքաղաքն առավել մաքուր դարձնելու Երևանի քաղաքապետարանի նախաձեռնությանն անցած շաբաթ միացել էր Նոր Նորք վարչական շրջանը: Զեկուցվել է, որ գործընթացն իրականացվել է խնդրահարույց տարածքներում, որոնք ներառում են 15 հասցե: Այս շաբաթ սանիտարական մաքրման աշխատանքներ կիրականացվեն Քանաքեռ-Զեյթուն վարչական շրջանում»,- ասված է քաղաքապետարանի հաղորդագրության մեջ:
13:53 - 06 հունիսի, 2022
Կայացել է «Դպրոցական ավագանու» նիստը

Կայացել է «Դպրոցական ավագանու» նիստը

Հունիսի 1-ին տեղական ինքնակառավարման բարձրագույն մարմնի դերում երևանյան դպրոցների աշակերտներն էին. տեղի է ունեցել «Դպրոցական ավագանու» նիստը: Այդ մասին հայտնում են Երևանի քաղաքապետարանից:   Երեխաների պաշտպանության միջազգային օրը գումարված ավագանու նիստին տեղական ինքնակառավարման բարձրագույն մարմնի դերում երևանյան դպրոցների աշակերտներն էին: Նիստը վարում էր քաղաքապետ Հրաչյա Սարգսյանը: Միջոցառմանը ներկա էին քաղաքապետի տեղակալները, ավագանու անդամներ և ոլորտի հրավիրված մասնագետներ։   «Քաղաքապետը` երեխաների համար» խորագրով միջոցառումը կազմակերպվել է Երեխաների և սոցիալական պաշտպանության վարչության նախաձեռնությամբ: Երևանի քաղաքապետարանի պաշտոնական էջում տեղադրված հայտարարության համաձայն՝ երեխաները նախապես ներկայացրել էին զեկույցներ, որոնք քաղաքապետարանում ձևավորված աշխատանքային խումբը գնահատել էր 10 բալանոց սանդղակով: Արդյունքում ընտրվել էր 64 զեկույց, որոնց հեղինակներն էլ հրավիրվել են մասնակցելու ավագանու նիստին: Էլեկտրոնային քարտեզ՝ զբոսաշրջիկների համար, էկո կրթություն, ջրահեռացման համակարգեր, քաղաքային տրանսպորտ, թափառող շների խնդիրներ. օրակարգում քաղաքին վերաբերող տարբեր հարցեր էին ընդգրկված: Քվեարկության դրվեց լավագույն 9 աշխատանք: Պատանի օրենսդիրների պատկերացումները տարբեր էին քաղաքային տնտեսության կառավարման հարցում: Բարձրացված խնդիրների ու առաջարկների վերաբերյալ քաղաքապետ Հրաչյա Սարգսյանը ներկայացրեց նախաձեռնված ծրագրերն ու քաղաքային իշխանության մոտեցումները:   «Հետաքրքիր է լսել բոլոր այն առաջարկները, որոնք ներկայացնում են տարիքային այս խմբի սաները: Մոտ ապագայում հենց նրանց է վստահվելու ինչպես քաղաքի կառավարման, այնպես էլ երկրի զարգացման կարևոր առաքելությունը: Շնորհակալ եմ հնչեցված հետաքրքիր մտքերի ու գաղափարների համար: Այսօր մենք օրվա ընթացքում մեծ քանակությամբ տեղեկատվություն ենք ստանում, և շատ կարևոր է ճիշտ տարբերակել ճշգրիտ տեղեկատվությունը կեղծից»,- նշել է քաղաքապետն ու մեկ անգամ ևս շնորհավորել դպրոցական ավագանու անդամներին՝ Երեխաների պաշտպանության միջազգային օրվա առթիվ:   Օրակարգում ընդգրկված 9 նախագծից հավանության արժանացավ 4-ը: Աշակերտների քվեարկության արդյունքում ծրագրերից առավել իրատեսականները հնարավորություն կունենան հետագայում ընդգրկվելու քաղաքային իշխանության որոշումների նախագծերում՝ իրականացման նպատակով: Նախորդ տարվա հաստատված ծրագրերից, ի դեպ, կյանքի կոչվեց շների համար հատուկ այգի կառուցելու նախագիծը:    
20:32 - 01 հունիսի, 2022
Երևանի ավագանին հավանություն է տվել քաղաքում սոցիալական աջակցության համար 50 մլն դրամ հատկացնելուն

Երևանի ավագանին հավանություն է տվել քաղաքում սոցիալական աջակցության համար 50 մլն դրամ հատկացնելուն

Երևանի ավագանին մայիսի 24-ի նիստում հավանություն է տվել քաղաքում սոցիալական աջակցության համար 50 մլն դրամ հատկացնելուն: Վերոնշյալ ծրագիրն իրականացվելու է Երևանի քաղաքապետի՝ օրենքով նախատեսված կամավոր լիազորությունների շրջանակում. համայնքն արդեն իրականացնում է նաև սոցիալական այլ ծրագրեր: Այս մասին հայտնում են Երևանի քաղաքապետարանի աշխատակազմից։ Ավագանու որոշմամբ՝ համայնքային մի շարք բաժնետիրական ընկերություններ կվերակազմակերպվեն: Որոշման նախագիծը ներկայացնող քաղաքապետի տեղակալ Գևորգ Սիմոնյանը նշել է, որ նպատակը ծրագրում ընդգրկված պոլիկլինիկաներում բնակիչներին մատուցվող ծառայությունների ու շենքային պայմանների բարելավումն է, ինչպես նաև արդյունավետ կառավարման ապահովումը: Մինչ նախաձեռնության գործնական փուլ տեխափոխումը ուսումնասիրվել և վեր են հանվել բոլոր խնդիրները: Ծրագրում հիմնականում ընդգրկվել են համեմատաբար փոքրաթիվ բնակչություն սպասարկող այն պոլիկլինիկաները, որոնք չունեն համապատասխան ֆինանսական և կադրային ներուժ՝ բնակչությանն անհրաժեշտ ծավալի և որակի բժշկական ծառայություններ մատուցելու, ինչպես նաև սեփական միջոցներով զարգանալու համար: «Երևանի ավագանու որոշմամբ մայրաքաղաքում կտեղադրվեն լրագրող, արձակագիր, թարգմանիչ Այդին Մորիկյանի, ՀԽՍՀ գիտության վաստակավոր գործիչ, ակադեմիկոս Հրանտ Ադոնցի, պատմաբան, հայագետ, մանկավարժ, պրոֆեսոր Տաճատ Սահակյանի, օրթոպեդ - վնասվածքաբան, բժշկական գիտությունների դոկտոր, պրոֆեսոր, ՀԽՍՀ գիտության վաստակավոր գործիչ Քրիստափոր Պետրոսյանի, պետական, քաղաքական գործիչ Միսակ Մկրտչյանի, ինչպես նաև պետական և հասարակական գործիչ Բերսաբե Գրիգորյանի հիշատակը հավերժացնող հուշատախտակներ»,- ասվում է հաղորդագրության մեջ: Ավագանու մեկ այլ որոշմամբ Երևանի Ճառագայթային փողոցից մինչև Շահումյանի 7-րդ փողոց ձգվող հատվածն այսուհետ կկրի արձակագիր, դրամատուրգ, թարգմանիչ, հրապարակախոս Արտաշես Քալանթարյանի անունը: Նշվում է, որ նիստին հաջորդել է հարց ու պատասխանը: Ավագանու անդամներն իրենց հետաքրքրող հարցերն են ուղղել քաղաքապետին, վարչական շրջանների և քաղաքապետարանի ստորաբաժանումների ղեկավարներին: Երևանի ավագանու հաջորդ նիստը կգումարվի հունիսի 21-ին:
21:17 - 24 մայիսի, 2022
Հունիսի 1-ին Երևանի քաղաքապետարանի ավագանու անդամների փոխարեն հանդես կգան Երևանի դպրոցների 9-րդ դասարանների աշակերտները

Հունիսի 1-ին Երևանի քաղաքապետարանի ավագանու անդամների փոխարեն հանդես կգան Երևանի դպրոցների 9-րդ դասարանների աշակերտները

2022թ. հունիսի 1-ին՝ երեխաների պաշտպանության միջազգային օրը, Երևանի քաղաքապետարանի աշխատակազմի երեխաների և սոցիալական պաշտպանության վարչության նախաձեռնությամբ կիրականացվի «Քաղաքապետը` երեխաների համար» խորագրով միջոցառում՝ Երևանի քաղաքապետարանի ավագանու նիստ, որը կանցկացվի Երևանի քաղաքապետի կողմից, և ավագանու անդամների փոխարեն հանդես կգան Երևանի դպրոցների 9-րդ դասարանների աշակերտները: Այս մասին տեղեկանում ենք Երևանի քաղաքապետարանի տարածած հաղորդագրությունից, միջոցառմանը մասնակցելու համար Երևանի 9-րդ դասարանի աշակերտը պետք է պատրաստի զեկույց, որում կներկայացնի Երևանի միջավայրի հարմարեցման կամ մատչելիության, կամ կրթության, կամ քաղաքի արտաքին ձևավորման, ինչպես նաև երեխաների իրավունքների պաշտպանության վերաբերյալ թեմաներ: Զեկույցին ներկայացվող պահանջներն են. զեկույցը պետք է ունենա հետևյալ կառուցվածքը. ներածական մաս (հիմնախնդրի նկարագրություն, նպատակ, խնդիրներ), հիմնախնդրին առնչվող առկա իրավիճակը, պատճառներն ու հետևանքները, խնդրի առաջարկվող լուծումը և ակնկալվող արդյունքը, զեկույցը պետք է լինի հայերեն և առավելագույնը 300 բառ ծավալով (չգերազանցի 1 էջը): Հավաքված բոլոր զեկույցներից Երևանի քաղաքապետարանի աշխատակազմում ձևավորված բազմամասնագիտական աշխատանքային խումբը կընտրի լավագույն 64 զեկույցները ներկայացրած աշակերտներին, որոնք կհրավիրվեն մասնակցելու ավագանու նիստին: Քաղաքապետարանի գործող ավագանու անդամներից, ինչպես նաև հրավիրված այլ փորձագետների կողմից կգնահատվեն ներկայացված զեկույցները, և առավելագույն միավորներ ստացած զեկույցների հեղինակները հնարավորություն կունենան իրենց զեկույցը ներկայացնել երեխաների մասնակցությամբ իրականացվող ավագանու նիստին: Մասնակցության համար զեկույցը պետք է ներկայացնել մինչև ս.թ. մայիսի 20-ի օրվա ավարտը՝ լրացնելով հայտի ձևաթղթի բոլոր դաշտերը` Կդիտարկվեն միայն այն զեկույցները, որոնք կհամապատասխանեն ներկայացված բոլոր չափանիշներին:
17:07 - 17 մայիսի, 2022
Պատիվ կհամարեմ ձեր բոլորի պատվիրակը դառնալ Երևանի քաղաքապետարանում. Էդգար Զաքարյանը ստանձնել է ավագանու անդամի մանդատը

Պատիվ կհամարեմ ձեր բոլորի պատվիրակը դառնալ Երևանի քաղաքապետարանում. Էդգար Զաքարյանը ստանձնել է ավագանու անդամի մանդատը

Էդգար Զաքարյանը ստանձնել է Երևանի ավագանու անդամի մանդատը: Այս մասին Զաքարյանը գրել է «Ֆեյսբուք»-ի իր էջում: Գրառման մեջ ասված է. «Հարգելի հայրենակիցնե՛ր, սիրելի երևանցինե՛ր, Մեծագույն պատասխանատվությամբ ուզում եմ հայտնել, որ ստանձնել եմ Երևանի ավագանու անդամի մանդատը: Այս՝ թեկուզ կարճ ժամանակահատվածում, փորձելու եմ ուժերիս ներածին չափով նպաստել իմ ծննդավայր քաղաքամայր Երևանի զարգացմանն ու երևանցու խնդիրների բարձրաձայնմանը։ Այս մանդատը առաջին հերթին ձերն է իմ շատ սիրելի երևանցիներ և այն պիտք է առավելագույնը ծառայացնեմ հենց ձեզ։ Պատիվ կհամարեմ ձեր բոլորի պատվիրակը դառնալ Երևանի քաղաքապետարանում և կփորձեմ բարձրացնել ձեր կողմից ներկայացված բոլոր հարցերն ու խնդիրները։ Եվ ուրեմն ի՛ գործ: Ես հավատում եմ մեզ։ Առողջ և ուժեղ լինենք»։
09:49 - 30 մարտի, 2022
«Իմ քայլը» խմբակցության անդամ Լուսինե Մխոյանի լիազորությունները դադարեցվեցին

«Իմ քայլը» խմբակցության անդամ Լուսինե Մխոյանի լիազորությունները դադարեցվեցին

Երեւանի ավագանու «Իմ քայլը» խմբակցության անդամ Լուսինե Մխոյանի լիազորությունները դադարեցվեցին․ որոշմանը կողմ քվեարկեց ավագանու 45 անդամ, դեմ՝ 8, ձեռնպահ՝ 1։ Հիշեցնենք, ավագանու այսօրվա նիստում քննարկվում էր Մխոյանի՝ Երեւան քաղաքի ավագանու անդամի լիազորությունները դադարեցնելու որոշման նախագիծը, որում նշված է, որ Լուսինե Մխոյանը չի մասնակցել ավագանու 7-րդ նստաշրջանի՝ 14.09.2021, 26.10.2021, 30.11.2021 թվականների հերթական նիստերին․ ««Երեւան քաղաքում տեղական ինքնակառավարման մասին» օրենքի 19-րդ հոդվածի 1-ին մասի 1-ին կետի համաձայն՝ ավագանու անդամը պարտավոր է մասնակցել ավագանու նիստերին, մինչդեռ Երեւան քաղաքի ավագանու անդամ Լուսինե Մխոյանը անհարգելի պատճառով բացակայել է ավագանու նիստերից, իսկ օրենքի 20-րդ հոդվածի 2-րդ մասի համաձայն՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից»,- ասված է նախագծում։ Նման որոշման իրական պատճառը, սակայն, ըստ Լուսինե Մխոյանի, իրականում այլ է․ նախ՝ նա կողմ չի եղել Հայկ Մարությանին անվստահություն հայտնելու գործընթացին, բացի դրանից՝ կարծում է՝ մեկ այլ պատճառ է նաեւ քաղաքաշինության, ճարտարապետության ոլորտում իր եւ մնացյալի պատկերացումների տարբերությունը։
12:37 - 08 փետրվարի, 2022
Տիկին Մխոյանի հետ ունեցել ենք քաղաքական զրույց՝ քաղաքակիրթ եւ օրենքի շրջանակներում, բայց մեր տեսակետները չեն հատվել․ Արմեն Գալջյան

Տիկին Մխոյանի հետ ունեցել ենք քաղաքական զրույց՝ քաղաքակիրթ եւ օրենքի շրջանակներում, բայց մեր տեսակետները չեն հատվել․ Արմեն Գալջյան

Լուսանկարը՝ «Ֆոտոլուր»-ի Եթե ավագանու «Իմ քայլը» խմբակցության անդամ Լուսինե Մխոյանը միանար Հայկ Մարությանին անվստահություն հայտնելու ստորագրահավաքին, այսօր բերելո՞ւ էիք նրա լիազորությունները դադարեցնելու հարցը։ Այսօր Երեւանի ավագանու նիստի ժամանակ այսպիսի հարց հնչեցրեց ավագանու անկախ անդամ Իզաբելլա Աբգարյանը՝ դիմելով «Իմ քայլը» խմբակցության ղեկավար Արմեն Գալջյանին։ Գալջյանը ներկայացնում էր Լուսինե Մխոյանի լիազորությունները վաղաժամկետ դադարեցնելու որոշման նախագիծը՝ հիմնավորմամբ, որ նա օրենքով թույլատրելիից ավելի բացակայություններ ունի։ Խմբակցության ղեկավարը պատասխանեց, որ տիկին Մխոյանի հետ ունեցել են քաղաքական զրույց՝ քաղաքակիրթ եւ օրենքի շրջանակներում, բայց իրենց տեսակետները չեն հատվել․ «Ինչ վերաբերում է սպառնալիքներին, շանտաժին, ամենեւին դա այդպես չէ։ Մենք տիկին Մխոյանին ասել ենք, որ կա բացակայությունների շեմ, որը հատվել է, եւ բացի քաղաքական հարցերից՝ կա նաեւ աշխատանքի մասով խնդիր»,- ասաց Գալջյանը՝ նշելով, որ խմբակցությունում կան անդամներ, որոնք չեն պաշտպանել իրենց որոշումը՝ Մարությանին հեռացնելու վերաբերյալ, բայց շարունակում ներկայացնել խմբակցությունը։ Աբգարյանն արձագանքեց, թե՝ շանտաժը «պոզով-պոչով» չի լինում, եթե մարդուն երկընտրանք են առաջարկում, դա հենց շանտաժն է։  Գալջյանի խոսքով՝ երկընտրանք չի առաջարկվել, ինքն այդ մեկնաբանությանը համաձայն չէ։  Երեւանի քաղաքապետ Հրաչյա Սարգսյանն ասաց, որ Մխոյանը մասնակցում էր ճարտարապետական այն խմբի աշխատանքներին, որը քաղաքապետի խորհրդական Դավիթ Ճգնավորյանն էր ստեղծել․ «Աշխատանքային տարբեր քննարկումներ էին տեղի ունենում, որտեղ ինքը ակտիվ մասնակցություն էր ունենում, այսինքն՝ անկախ երեխայի հանգամանքից, ինքը հնարավորություն ունեցել է մասնակցելու, կարծում եմ՝ նույն տրամաբանությամբ ավագանու նիստերին կարող էր մասնակցություն ունենալ»,- նկատեց քաղաքապետը։
12:14 - 08 փետրվարի, 2022
Մխոյանի պնդմամբ՝ իրեն ավագանուց հեռացնելը կապ ունի Մարությանին անվստահություն չհայտնելու եւ քաղաքաշինության ոլորտում իր պատկերացումների հետ

Մխոյանի պնդմամբ՝ իրեն ավագանուց հեռացնելը կապ ունի Մարությանին անվստահություն չհայտնելու եւ քաղաքաշինության ոլորտում իր պատկերացումների հետ

Երեւանի ավագանին մտադիր է «Իմ քայլը» խմբակցության անդամ Լուսինե Մխոյանին զրկել մանդատից՝ ավագանու նիստերին նրա բացակայությունների հիմնավորմամբ։  Մասնավորապես, ավագանու այսօրվա նիստում քննարկվում է Մխոյանի՝ Երեւան քաղաքի ավագանու անդամի լիազորությունները դադարեցնելու որոշման նախագիծը, որում նշված է, որ Լուսինե Մխոյանը չի մասնակցել ավագանու 7-րդ նստաշրջանի՝ 14.09.2021, 26.10.2021, 30.11.2021 թվականների հերթական նիստերին․ ««Երեւան քաղաքում տեղական ինքնակառավարման մասին» օրենքի 19-րդ հոդվածի 1-ին մասի 1-ին կետի համաձայն՝ ավագանու անդամը պարտավոր է մասնակցել ավագանու նիստերին, մինչդեռ Երեւան քաղաքի ավագանու անդամ Լուսինե Մխոյանը անհարգելի պատճառով բացակայել է ավագանու նիստերից, իսկ օրենքի 20-րդ հոդվածի 2-րդ մասի համաձայն՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից»,- ասված է նախագծում։ Նման որոշման իրական պատճառը, սակայն, ըստ Լուսինե Մխոյանի, իրականում այլ է․ նախ՝ նա կողմ չի եղել Հայկ Մարությանին անվստահություն հայտնելու գործընթացին, բացի դրանից՝ կարծում է՝ մեկ այլ պատճառ է նաեւ քաղաքաշինության, ճարտարապետության ոլորտում իր եւ մնացյալի պատկերացումների տարբերությունը։ Մխոյանը չի հերքում, որ ունի բացակայություններ, բայց ասում է՝ դրանք պայմանավորված են եղել իր երեխայի ծննդի, հետագայում իր վատառողջ լինելու հանգամանքով, այսինքն՝ դրանք, ըստ էության, հարգելի բացակայություններ են եղել․ «Հոկտեմբեր-նոյեմբեր ամիսներին բալիկս վատառողջ է եղել, ինչի մասին խմբակցութան ղեկավարին տեղյակ եմ պահել՝ նշելով, որ ոչ ոքի մոտ չեմ կարող թողնել եւ ստիպված եմ բացակայել»։ Մեր զրուցակցի հավաստմամբ՝ կան նաեւ տեղեկանքները, որոնք փաստում են, որ բացակայությունները հիվանդության պատճառով են եղել, սակայն իրենից այդ տեղեկանքները նույնիսկ չեն էլ ուզել։  Միեւնույն ժամանակ, Մխոյանը մեր զրույցում ընդգծում է, որ ինքը մասնակցել է հանձնաժողովի նիստերին, քանի որ հենց հանձնաժողովի նիստերի ընթացքում են նախագծերի վերաբերյալ քննարկումներն իրականացվում։ «Այո, բացակայություններ եղել են, քանի որ մանդատս վերցնելը համընկավ բալիկիս ծննդի հետ։ Այս ընթացքի բացակայությունների պատճառը նաեւ իմ ու երեխայի հիվանդություններն էին։ Սակայն բացակայությունները սկսեցին շահարկել, երբ քաղաքապետին անվստահություն հայտնելու համար ստորագրություն էին հավաքում»,- մեր զրույցում պատմեց ավագանու անդամը՝ նշելով, որ իրեն հորդորել են կամ ստորագրել անվստահություն հայտնելու նախագծի տակ, կամ վայր դնել մանդատը, այլապես բացակայությունների հիմքով կդադարեցնեն լիազորությունները։ «Ես ընթացքում ուզում էի դուրս գալ ավագանու կազմից, քանի որ բալիկիս հետ չէի հասցնում շատ ակտիվ լինել։ Ավագանու գործընկերներս համոզում էին, որ մնամ, քանի որ միակ ճարտարապետն եմ, Քաղաքաշինության եւ հողօգտագործման հարցերի մշտական հանձնաժողովում բացի ինձանից երեւի մեկն է մնացել ով գոնե մոտ մասնագիտություն ունի»,- ասաց մեր զրուցակիցը, որը մասնագիտությամբ ճարտարապետ է։ Infocom-ի հետ զրույցում Լուսինե Մխոյանն ասաց, որ անցած շաբաթ առաջարկի տեսքով հերթական սպառնալիքն է ստացել խմբակցության ղեկավար Արմեն Գալջյանից, թե՝ այլեւս անհնարին են համարում իր՝ ավագանու կազմում լինելը․ «Պարզաբանեցին, թե ես քաղաքական քայլեր եմ արել՝ բարձրաձայնելով ինձ ուղված սպառնալիքի մասին, եւ հիմա առաջարկում են մանդատը դնել կամ նախագիծ կբերեն եւ բացակաների հիմքով կհանեն, ինչն էլ անելու են այսօր»,- ասաց Մխոյանը։ Ինչ վերաբերում է քաղաքապետարանում եւ ավագանու կազմում իր գործունեությանը՝ Մխոյանը մեկնաբանեց, որ 2020թ․-ի դեկտեմբերին ինքը քաղաքապետի խորհրդական Դավիթ Ճգնավորյանից համագործակցելու հրավեր է ստացել՝ որպես ավագանու անդամ եւ ճարտարապետ, ով տասը տարուց ավել աշխատել է ՛՛Երեւանի 2005թ Գլխավոր Հատակագծի՛՛ համահեղինակ Գուրգեն Մուշեղյանի հետ, եւ անդամակցել է ճարտարապետներից եւ ուրբանիստներից կազմված խմբին, ակտիվ մասնակցել քննարկումներին եւ հնարավորինս աջակցել ռեֆորմների գործընթացին։ Ի հավելումն՝ մեր զրուցակիցը նշեց, որ կամավորական հիմքերով աշխատող խմբում էին այնպիսի մասնագետներ, ինչպիսիք են Տիգրան Պողոսյանը, Հայկ Մելիքյանը, Գառնիկ Ստեփանյանը, Մերուժան Մինասյանը, Արմեն Շատվորյանը, Հայկ Նիկոյանը, Զոհրաբ Զուրաբյանը, Մարիաննա Կարապետյան, Գեւորգ Եղիկյանը, Հեղինե Փիլոսյանը եւ այլք։  «Նաեւ արդեն նախկին փողքաղաքապետ Գայանե Մելքոմ Մելքոմյանի հրավերով ներգրավված եմ եղել մի քանի նախագծերում, որոնցից էր Էրեբունի թանգարանի հիմնանորոգման եւ արդիականացման նախագիծը»,- ասաց Մխոյանը։ Նա նշեց, որ իր գործունեության ընթացքում գլխավոր ճարտարապետի կողմից նախագծման թույլտվությունների եւ նախագծերի միանձնյա հաստատման գործառույթների փոխարեն կոլեգիալ որոշումների ձեւաչափի անցման նպատակով նախաձեռնվել էր ռոտացիոն ձեւաչափով գործող խորհրդի ստեղծման բազմափուլ գործընթացը։ Այն նախատեսվում էր իրականացնել ոլորտում հեղինակություն վայելող, փորձառու մասնագետների ներգրավմամբ, որոնք պետք է առաջադրվեին պրոֆեսիոնալ դաշտը ձեւավորող այնպիսի կառույցների կողմից, ինչպիսիք են Հայաստանի ճարտարապետաշինարարական համալսարանը, Հայաստանի ճարտարապետների պալատը, Միջազգային ճարտարապետների ակադեմիայի հայաստանյան մասնաճյուղը եւ այլն։ Նշենք նաեւ, որ այդ խորհրդի ստեղծման որոշումը հաստատվել էր ավագանու կողմից։ Մխոյանի փոխանցմամբ՝ ստեղծված աշխատանքային խմբի մասնակցությամբ «Քաղաքաշինություն» ՓԲԸ-ի հիման վրա ստեղծվել էր նոր բաժին, որը կոչված էր մշակել քաղաքի զարգացման ծրագիրն ու ռազմավարությունը, որն էլ իր հերթին պետք է ձեւավորեր գլխավոր հատակագծի համար տեխնիկական առաջադրանքը։  «Իրականացվեց նաեւ նախապատրաստական միջոցառումների եւ հանդիպումների մի մեծ գործընթաց՝ միտված քաղաքի կառավարման թվային համակարգի ներդրման ու ողջ ոլորտի գործառույթների, ինչպես նաեւ փաստաթղթաշրջանառության ամբողջական թվայնացմանը։ Մշակվեց, բայց չհասցրեց հաստատվել ճարտարապետահատակագծային առաջադրանքի տրամադրման նոր, պարզեցված ու ավելի տրամաբանական ձեւաչափ, որը կոչված էր կառուցապատող ընկերությունների եւ ճարտարապետների համար շատ ավելի հստակ եւ կանխատեսելի նախապայմաններ հաստատել՝ հիմնվելով գործող քաղաքաշինական նորմերի ու տարածական պլանավորման փաստաթղթերի վրա»,- ներկայացրեց մեր զրուցակիցը՝ հավելելով նաեւ, որ կամավորության սկզբունքների հիման վրա ստեղծվել էր խորհրդատվական մի հանձնաժողով, որի կազմում ընդգրկված էինք քաղաքաշինության ու ճարտարապետության ոլորտներում տարիների ընթացքում իրենց լավագույնս դրսեւորած մի քանի տասնյակ երիտասարդ մասնագետներ, վաստակաշատ ու փորձառու մասնագետներ (Հրաչիկ Պողոսյան, Սաշուր Քալաշյան, Ալեքսանդր Բադալյան, Ալբերտ Զուրաբյան, Մհեր Չերկեզյան, Միքայել Հասրաթյան, Միսաք Խոստիկյան, Զառա Մամյան եւ այլք)։ Խորհրդի մի քանի ամսվա աշխատանքի ընթացքում, մեր զրուցակցի վստահեցմամբ, քաղաքապետարանի աշխատակազմի մասնագետների հետ համատեղ նախաձեռնվել են բազում քննարկումներ ոլորտում ձեւավորված խնդիրների եւ դրանց իրատեսական կամ հեռանկարային լուծումների, նոր համագործակցության ձեւաչափերի վերաբերյալ»։ Ի հավելումն՝ Լուսինե Մխոյանը հայտնեց նաեւ, որ սկզբունքային վերաարժեվորման ենթարկվեց գլխավոր ճարտարապետի պաշտոնը՝ իբրեւ քաղաքի ուրբանիստական զարգացման համար պատասխանատուի, որը կոչված է ոչ թե ձեւավորել կամ թելադրել կառուցվող շենքերի ճարտարապետական ոճը, այլ համակարգել քաղաքաշինության ոլորտի կառավարման ու զարգացման մեջ ներգրավված բոլոր վարչական ու մասնագիտական միավորները։ «Ցավով պետք է նշեմ՝ ակնհայտ է, որ հիմա միտված են ղեկը լրիվ այլ ուղությամբ պտտել»,- եզրափակելով՝ ասաց ավագանու «Իմ քայլը» խմբակցության անդամ Լուսինե Մխոյանը։ Խխմբակցության ղեկավար Արմեն Գալջյանն ավագանու նիստի ժամանակ նշեց, որ տիկին Մխոյանի հետ ունեցել են քաղաքական զրույց՝ քաղաքակիրթ եւ օրենքի շրջանակներում, բայց իրենց տեսակետները չեն հատվել․ «Ինչ վերաբերում է սպառնալիքներին, շանտաժին, ամենեւին դա այդպես չէ։ Մենք տիկին Մխոյանին ասել ենք, որ կա բացակայությունների շեմ, որը հատվել է, եւ բացի քաղաքական հարցերից՝ կա նաեւ աշխատանքի մասով խնդիր»,- ասաց Գալջյանը՝ նշելով, որ խմբակցությունում կան անդամներ, որոնք չեն պաշտպանել իրենց որոշումը՝ Մարությանին հեռացնելու վերաբերյալ, բայց շարունակում ներկայացնել խմբակցությունը։ Հավելենք, որ Infocom-ը գրավոր հարցմամբ դիմել է Երեւանի քաղաքապետարանին՝ խնդրելով տեղեկություններ այն մասին, թե ավագանու բոլոր անդամները որքան բացակայություններ ունեն ավագանու նիստերից։ Հայարփի Բաղդասարյան
11:56 - 08 փետրվարի, 2022