Վիրուսային հեպատիտները շարունակում են մնալ աշխարհում մահացության հիմնական պատճառներից մեկը՝ տարեկան խլելով ավելի քան 1 միլիոն մարդու կյանք: Գերակշռում են քրոնիկ վիրուսային հեպատիտ Բ-ի և հեպատիտ Ց-ի բարդություններից մահերը:
Այս մասին տեղեկացնում են ՀՀ առողջապահության նախարարությունից։
2022-2030 թվականների ռազմավարությամբ՝ Հայաստանը որդեգրել է հիվանդության վերացմանն ուղղված քաղաքականություն: Նպատակն է՝ բուժառուի խնամքի և բուժման ծառայությունների ինտեգրմամբ մինչև 2030 թվականը կտրուկ նվազեցնել հիվանդացությունը:
2020 թվականից քրոնիկ վիրուսային հեպատիտ Ց-ով պացիենտներին անվճար տրամադրվում են ուղղակի ազդող հակավիրուսային դեղեր: Ծրագրի շարունակականությունն ապահովելու նպատակով օրերս հաստատվել է վիրուսային հեպատիտ Ց-ով բուժառուներին նոր դեղերով բուժման կարգը:
2022 թվականին Հայաստանում հեպատիտ Ց-ի դեմ բուժում է ստացել 517 բուժառու:
1999 թվականից ՀՀ-ում իրականացվում են հեպատիտ Բ-ի դեմ պատվաստումներ, որոնց շնորհիվ մինչև 14 տարեկան երեխաների շրջանում չեն գրանցվում սուր հեպատիտ Բ-ի դեպքեր: Հեպատիտ Ց-ի դեմ դեռևս պատվաստումներ չեն իրականացվում աշխարհում:
Նախարարությունից ևս մեկ անգամ հիշեցնում են՝ հեպատիտները փոխանցվում են սեռական ճանապարհով, արյան միջոցով՝ թմրամիջոցների գործածում, ինվազիվ միջամտություն (բժշկական և ոչ բժշկական՝ դաջվածք, մատնահարդարում, ոտնահարդարում, փիրսինգ և այլն), դրական դեպք՝ մորից երեխային, երբեմն նաև՝ կենցաղ-կոնտակտային ճանապարհով:
Վիրուսային հեպատիտների վաղ հայտնաբերումը բուժման առաջին նախապայմանն է, ուստի խորհուրդ է տրվում բնակչությանը պարբերաբար հետազոտվել, քանի որ հիվանդությունը հիմնականում կարող է ընթանալ անախտանիշ:
Երևանում և մարզերում պարբերաբար կազմակերպվում են հանրային միջոցառումներ, անվճար, անանուն հետազոտություններ՝ հիվանդության վաղ հայտնաբերման նպատակով:
comment.count (0)