armenpress.am: ՀՀ 2021 թվականի  հարկաբյուջետային քաղաքականությունն ուղղված է եղել տնտեսական հնարավորությունների ընդլայնմանը: Այս մասին կառավարության նիստին ասաց ֆինանսների նախարարի տեղակալ Արմեն Հայրապետյանը:

Ներկայացնելով 2021 թվականի պետական բյուջեի կատարման տարեկան հաշվետվությունը, նա նշեց, որ հարկաբյուջետային, դրամավարկային տնտեսական քաղաքականությունների համադրության արդյունքում 2021 թվականին ՀՆԱ-ն  կազմել է 5.7 տոկոս՝ տարեսկզբի կանխատեսվող 3.2 տոկոսի դիմաց:

«Հարկային եկամուտների  մակարդակի  բարելավման արդյունքում գերակատարվել է հարկային եկամուտների և տուրքերի պլանը՝  147 միլիարդ դրամով՝ նախորդ տարվա համեմատ աճելով 14.5 տոկոսով, ինչի արդյունքում հարկեր-ՀՆԱ  ցուցանիշը նախորդ տարվա նկատմամբ  բարելավվել է 0.3 տոկոսային կետով, և 2021 թվականին արձանագրել ենք  պատմական ամենաբարձր 22.7 տոկոս հարկեր-ՀՆԱ մակարդակ»,- ասաց նա:

Հայրապետյանը նշեց, որ 2021 թվականին պլանավորված պակասուրդի ֆինանսավորման համար իրականացվել են քայլեր՝ լավ պայմաններով պարտք ներգրավելու համար: «Կառավարությունը 2021 թվականի սկզբին կարողացավ հաջողությամբ հասնել եվրոբոնդերի թողարկման և տեղաբաշխման հարցում սուվերեն թողարկումների ամենացածր եկամտաբերությունը արձանագրելով:  Տեղաբաշխման եկամտաբերությունը կազմեց 3.875 տոկոս, իսկ արժեկտրոնի եկամտաբերությունը՝ 3.6»,- հավելեց նա :

Ֆինանսների նախարարի տեղակալի խոսքով՝ պարտքի բեռի նվազմանը զուգահեռ բարելավվեց նաև պարտքի կառուցվածքը, դրամային պարտքի կշիռը կանխատեսված 27.5 տոկոսի փոխարեն հասավ 28.8 տոկոս մակարդակի:

«2021 թվականին նախատեսվածից ավել է ծախսվել 153 միլիարդ  դրամ:  2021 թվականի կառավարության կապիտալ ծախսերի կատարողականը գրանցել է վերջին տարիների ամենաբարձր ցուցանիշը՝ տարեկան պլանի նկատմամբ կատարվելով 100 տոկոսով՝ կազմելով 216 միլիարդ դրամ»,-ասաց նա, հավելելով, որ արցախյան 44-օրյա պատերազմի հետևանքով հակազդման ուղղությամբ հատկացված միջոցները կազմել են 132.9 միլիարդ դրամ, կամ  ՀՆԱ-ի 1.9 տոկոսը:

Վարչապետ Նիկոլ Փաշինյանն էլ հավելեց, որ առայժմ  շարունակում ենք ընթանալ բյուջեի եկամտային հատվածի գերակատարման պլանով: