Արտահերթ ընտրությունների մասին հուշագիր ստորագրելու որոշումը, քաղաքական որոշ հարցերում համաձայնություն ունենալու և մյուս հարցերում համաձայնություն չունենալու հանգամանքը որևէ կերպ չի կարող կաշկանդել իրավապահ մարմիններին ինչ-որ իրավական գործընթացներ իրականացնել, եթե իրավապահ մարմինները տեսնում են դրա անհրաժեշտությունը։ Ես կարծում եմ, որ մենք խնդիր ունենք քաղաքական և իրավական պրոցեսները զատելու։Այս մասին այսօր Ազգային ժողովում լրագրողների հետ ճեպազրույցում ասաց «Իմ քայլը» խմբակցության ղեկավար Լիլիթ Մակունցը։ Պատգամավորն իր խոսքում նշեց․
«Այսինքն, տեղի է ունեցել իրավական գործընթաց, որի առնչությամբ, հիմքեր ունենալու հանգամանքով պայմանավորված դատախազությունը իր գործառույթների, լիազորությունների շրջանակում միջնորդություն է ներկայացրել Ազգային ժողով ։ Ազգային ժողովը իր գործառույթների և լիզորությունների շրջանակում՝ առաջնորդվելով օրենքի հավասարության սկզբունքից և ՀՀ սահմանված օրենքներով, Սահմանադրությամբ, պետք է կայացի որոշում, թե արդյոք հնարավորություն տալիս է լիարժեք քննության, թե ոչ»։
Լրագրողների հարցին, թե ինչու ընտրակաշառք բաժանելու մեղադրանքով քրգործ չի հարուցվում Սամվել Ալեքսանյանի և Արտակ Սարգսյանի նկատմամբ, Մակունցը նշեց
«Ազգային ժողովը և պատգամավորները այն անձինք չեն, ովքեր վերհսկողություն են սահմանում,թելադրում են և ճնշում են գործադրում իրավապահ համակարգի վրա կամ պետք է որոշումներ կայացնեն այս կամ այն գործը ինչպես պետք է քննվի, պետք է քննվի, թե ոչ։ Մենք այս պահին իրականացնում ենք բացառապես մեկ գործառույթը, որը բխում է մեր լիազորություններից՝ տալ այդ հնարավորությունը, թե ոչ։ Երեկ ես և իմ գործընկերները, ինչպես նաև այսօր՝ գլխավոր դատախազը հանգամանալից տվել ենք բոլոր հարցերի պատասխանները։ Քաղաքական և իրավական գործընթացները բոլորովին միմյանց հետ չեն առնչվում։ Ինչ վերաբերում է քաղաքական հայտարարություններին, ապա ես վերահաստատում եմ իմ կողմից երեկ արված հայտարարությունները, որ ես չեմ բացառում այն համոզմունքը, որ ԲՀԿ առաջնորդի կողմից այդ հայտարարությունները հնչել են այն բանից հետո, երբ ինչ-ինչ հանգամանքներում, չգիտեմ ում կողմից տեղեկություն է հասել այն մասին, որ կան որոշակի իրավական խնդիրներ և , բնականաբար քաղաքական հայտարարություններ անելը ենթադրում էր վահան՝ պաշտպանվելու և այս ամենը որպես քաղաքական հետապնդում որակելու։ Ես կարծում եմ, որ մենք բոլորս պետք է ցուցաբերենք համբերություն և իրավապահներին թույլ տանք անկաշկանդ կերպով իրականացնեն գործողությունները, որևէ կերպ ճնշում չգործադրելով, զսպվածություն դրսևորեն նաև քաղաքական ուժերը։
comment.count (0)