armenpress.am: Արժեքային հարցերը հանդիսանում են այն շերտը, որն ամուր կապում է հայ և ռուս ժողովուրդներին՝ հաստատելով նրանց հոգևոր ու քաղաքակրթական մտերմությունը: Այս մասին ասաց ՀՀ-ում ՌԴ դեսպանության ժամանակավոր հավատարմատար Ալեքսեյ Սինեգուբովը՝ «Անկախություն և ինքնիշխանություն. սպառնալիքներ և մարտահրավերներ ժամանակակից Հայաստանի համար» կոնֆերանսի ընթացքում:
Խոսելով գլոբալիզացիայի մարտահրավերներից, Սինեգուբովը համոզմունք հայտնեց, որ Հայաստանն ու Ռուսաստանը ոչ միայն կարող են, այլ նաև պարտավոր են սերտորեն համագործակցել՝ ավանդական արժեքներին, ինքնությանն ու ինքնիշխանությանը սպառնացող աշխարհաքաղաքական վտանգների հարցերում:
«Այս տեսանկյունից Ռուսաստանի և Հայաստանի համագործակցության համար լայն դաշտ կա»,-ասաց ՌԴ դեսպանատան ներկայացուցիչը։
Նրա խոսքով՝ միջազգային հարաբերությունները ներկայում փորձությունների են ենթարկվում: «Ինքնիշխանության թեմայի տեսանկյունից, առանձին քննարկման առարկա է համացանցը: Կիբերտարածքում տեղի ունեցող գործընթացները նոր մարտահրավերներ ու ռիսկեր են ստեղծում պետությունների ինքնիշխանության համար, իսկ մյուս կողմից՝ գրագետ մոտեցման դեպքում, լայն հնարավորություններ են ընձեռվում: Տեղեկատվության, տեխնոլոգիաների, տրանսպորտային միջոցների ոլորտներում ձեռքբերումները էականորեն գլոբալիզացրել են ժամանակակից աշխարհը: Այդ պատճառով առաջացող խնդիրները, վաղ թե ուշ, դառնում են ընդհանուր կամ նվազագույնը միջազգային լայն արտացոլում են ստանում»,-,ասաց Սինեգուբովը։
comment.count (0)