azatutyun.am: Առողջապահության համաշխարհային կազմակերպությունը (ԱՀԿ) մտահոգված է Կենտրոնական Եվրոպայում, Բալկաններում և Բալթյան երկրներում սանիտարական իրավիճակով:

Հունգարիայում կորոնավիրուսի երրորդալիքը հանգեցրել է մահացության օրական ռեկորդային աճի․ մեկ օրվա ընթացքում 207 մարդ է մահացել կորոնավիրուսից:

Չեխիայում հիվանդանոցները խիստ ծանրաբեռնված են: Համաճարակային բարդ իրավիճակից ելնելով՝ իշխանությունները երկարաձգել են երկրի շրջանների միջև բնակիչների տեղաշարժի արգելքը:

Իրավիճակը բարդ է նաև Սերբիայում, որտեղ մեկ օրում կորոնավիրուսային վարակի ավելի քան 5 հազար դեպք է արձանագրվել՝ 30 մարդ մահացել է: Վերակենդանացման բաժանմունքները գերբեռնված են։

«Կենտրոնական Եվրոպայում, Բալկաններում և Բալթյան երկրներում հիվանդացությունը, հոսպիտալացումը և մահացությունը այժմ աշխարհում ամենաբարձրներից են», - ասել է ԱՀԿ Եվրոպայի տարածաշրջանային գրասենյակի ղեկավարը:

Բուլղարիայում վարակի կտրուկ աճի հետ կապված, ընդհանուր կարանտին է սահմանվում: Մարտի 22-ից հասարակական սննդի հաստատությունները, թատրոններն ու կինոթատրոնները 10 օրով կփակվեն: Դպրոցականներն ու նախադպրոցականները կմնան տանը:

Ֆրանսիայի 16 շրջաններում վաղվանից կարանտին է սահմանվում: Չորս շաբաթ բոլոր մանրածախ կետերը փակ կլինեն, բացառությամբ մթերային խանութների: Բնակիչներին թույլ կտրվի տանից հեռանալ միայն10 կիլոմետրով: Գործատուներին խորհուրդ է տրվում աշխատակիցներին տեղափոխել հեռավար ռեժիմի։