Նման հայտարարությունները դատական համակարգում սեփական ինքնաոչնչացման տպավորություն են ստեղծում․ Ռուստամ Բադասյանը՝ ԲԴԽ հայտարարության մասին

Եթե ինչ-որ մեկին թվում է, որ սա ուղղված է գործող իշխանության դեմ, ապա չարաչար սխալվում է․ սա գործողություն է ուղղված Հայաստանի յուրաքանչյուր քաղաքացու դեմ։ Նման հայտարարությունները դատական համակարգում սեփական ինքնաոչնչացման տպավորություն են ստեղծում։ Գրել է Արդարադատության նախարար Ռուստամ Բադասյանը արձագանքելով Բարձրագույն դատական խորհրդի աշխատակազմի մամուլի և հասարակայնության հետ կապերի ծառայության պետ Արման Խաչատրյանի գրառմանը, որը հետևել էր Գլխավոր դատախազի խորհրդական Գոռ Աբրահամյանի հրապարակմանը: Նախարարի գրառումը ներկայացնում ենք ստորև․

«Բարձրագույն դատական խորհրդի ֆեյսբուքյան էջի վարողը սրամտում է։ Երևի շատ զվարճալի է թվում ստեղծված իրավիճակը, երբ դատարանի կողմից չեն պաշտպանվում քաղաքացու հիմնարար իրավունքները և ազատությունները։ Եթե ինչ-որ մեկին թվում է, որ սա ուղղված է գործող իշխանության դեմ, ապա չարաչար սխալվում է․ սա գործողություն է ուղղված Հայաստանի յուրաքանչյուր քաղաքացու դեմ։

Իրականում նման հայտարարությունները դատական համակարգում սեփական ինքնաոչնչացման տպավորություն են ստեղծում, ինչը բացի քաղաքացիներից, հենց դատավորներին պետք է մտահոգի»,- գրել է Բադասյանը։