Մեր ամբողջ դիվանագիտական ծառայությունը աշխատում է արտակարգ ռեժիմով։ Այս մասին այսօր տեղի ունեցած ասուլիսի ժամանակ հայտնեց ՀՀ ԱԳՆ խոսնակ Աննա Նաղդալյանը։

«Մեր դեսպանների կողմից Ադրբեջանի ագրեսիայի արդյունքում ստեղծված իրադրության վերաբերյալ տեղեկություն է փոխանցվել համապատասխան երկրների գերատեսչություններին, ինչպես նաև միջազգային կազմակերպություններին, բոլորը տեղեկացվել են տեղի ունեցող զարգացումների, ինչպես նաև հայկական կողմերի գնահատականների մասին»,- ասաց նա։

ԱԳՆ խոսնակը հայտնեց նաև, որ ՀՀ ԱԳ նախարարը մշտական կապի մեջ է համանախագահների հետ։

«Նախարարը կապի մեջ է ՌԴ ԱԳ նախարարի, Վրաստանի իր գործընկերոջ և մի շարք այլ գործընկերների հետ։ Այս պահին կարող եմ ասել, որ նրանց արձագանքն է անհապաղ դադարեցնել բոլոր գործողությունները։ Մեր առաջնային խնդիրը լարվածության թուլացումն է ու նաև մեր գործընկերներին ճիշտ տեղեկության տրամադրումը, ու այս պահի դրությամբ ունենք լիակատար փոխըմբռնում»-, հավելեց խոսնակը։

Մեկնաբանելով այն, թե արդյո՞ք ՀՀ-ն քննարկում է Արցախի անկախությունը ճանաչելու հարցը, Աննա Նղդալյանն ասաց, որ ներկայումս ընթանում է ԱԽ նիստը, որի օրակարգում ներառված են բազմաթիվ հարցեր, և քանի դեռ չի ավարտվել այն, իրավունք չունի օրակարգի որևէ հարց բարձրաձայնելու։ Ճշտող հարցին՝ նա չի՞ բացառում, որ նման հարց օրակարգում կա, խոսնակն ասաց, որ չի էլ հաստատում։