Շիրակի մարզի դպրոցների աշխատակիցների շրջանում կորոնավիրուսի դեպքեր են հայտնաբերվել |factor.am|
16:59 - 09 սեպտեմբերի, 2020

Շիրակի մարզի դպրոցների աշխատակիցների շրջանում կորոնավիրուսի դեպքեր են հայտնաբերվել |factor.am|

factor.am: ՀՀ բոլոր դպրոցներում, նոր ուսումնական տարվա մեկնարկին ընդառաջ, աշխատակիցները COVID-19-ի թեստավորում են անցնում։ Շիրակի մարզի դպրոցներում թեստավորման գործընթացը սկսվել է։ Ընդհանուր առմամբ, մարզի 160 դպրոցի 5․848 աշխատակից է թեստավորվելու։

Գյումրիի գրեթե 10 դպրոցի աշխատակիցների թեստավորումն ավարտվել է։ Շիրակի մարզպետարանի առողջապահության և սոցիալական ապահովության վարչության պետի ժամանակավոր պաշտոնակատար Լեյլի Ասլանյանը նշեց, որ դպրոցների աշխատակիցների շրջանում կորոնավիրուսի դեպքեր կան։

«Դեպքեր ունենք մի քանի դպրոցներում, մասնագետները դրանք գնահատում են ոչ անհանգստացնող։ Դպրոցներ կան՝ 1 դեպք, նաև 3 դեպք ենք ունեցել։ Նրանք, ովքեր դրական են, արդեն մեկուսացվել են մինչև դասապրոցեսը սկսվելը։ Չեմ կարծում, որ եթե 3 դրական դեպք է հայտնաբերվել, այդ դպրոցում դասապրոցեսը պիտի չսկսվի։  Չի կարող նման բան լինել, որովհետև երեք հոգին կմեկուսացվեն, դասապրոցեսը սկսվելուց մի շաբաթ հետո կարող են գնալ աշխատանքի։

Իհարկե, կհսկվեն նաև առողջության առաջնային պահպանման մասնագետների՝ իրենց ընտանեկան բժիշկների կողմից»,- ասաց Լեյլի Ասլանյանը։ Դպրոցների անձնակազմերի թեստավորումն իրականացվում է առաջնային օղակի մասնագետների կողմից, հենց դպրոցի տարածքում։ «Դպրոցներ կան, որոնք կցված են առողջության առաջնային օղակներին։ Կազմակերպում ենք հենց այն առաջնային օղակի մասնագետների միջոցով, որոնք կցված են տվյալ դպրոցին։ Առավոտյան խումբը գնում է դպրոց, որտեղ ցուցակը կա։

Թեստավորվում են ուսուցչական և վարչական անձնակազմերը։ Այդ ցուցակով մեր առաջնային օղակի աշխատակիցները դպրոցներում նմուշառում են իրականացնում»,- պարզաբանեց Լեյլի Ասլանյանը։

Մարզպետարանի պատասխանատուի խոսքով՝ մասնավոր դպրոցների, քոլեջների ու կրթական հաստատությունների պարագայում, որոնք կցված չեն որևէ առաջնային օղակի, տնօրենների կողմից տեղեկանք է տրամադրվում աշխատակիցներին, որով վերջինները ներկայանում են այն առողջության առաջնային օղակ, որտեղ գրանցված են։ Այնտեղ էլ նմուշառվում են։ Ընդհանուր առմամբ, Շիրակի մարզում նմուշառումների թիվն ավելացել է, ինչը պայմանավորված է դպրոցներում իրականացվող թեստավորման գործընթացով։ Մասնավորապես, երեկվա տվյալներով՝ 204 նմուշառում է իրականացվել, արձանագրվել է 15 դրական դեպք։

Շարունակությունը՝ factor.am-ում։


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել