azatutyun.am: Մոսկվայի իշխանությունները Ռուսաստանում Հայաստանի դեսպան Վարդան Տողանյանի հետ քննարկել են հայկական ապրանքների շուրջ Food city-ում ծագած խնդիրները:

«Ռիա Նովոստի» գործակալության հետ զրույցում Մոսկվայի քաղաքապետարանի առևտրի և ծառայությունների բաժնի ղեկավար Ալեքսեյ Նեմերյուկը հավաստիացրել է, որ խնդիրները կարգավորված են, ապրանքներով բեռնված մեքենաները մտել են շուկա:

«Ես հենց նոր դեսպանի հետ խոսել եմ, որևէ խնդիր չկա, ծիրանները տեղաբաշխված են, երեք բեռնատար մտել է «Ֆուդ Սիթի», որևէ խնդիր իրենք չունեն», - Մոսկվայի քաղաքային իշխանության ներկայացուցչի խոսքերն է մեջբերում ռուսաստանյան գործակալությունը:

Հայ-ադրբեջանական սահմանին տեղի ունեցած ռազմական բախումների ֆոնին Ռուսաստանում բնակվող ադրբեջանցի գործարարներ Գոդ Նիսանովին և Իլհամ Ռահիմովին պատկանող Մոսկվայի խոշորագույն առևտրային ցանցում՝ Food city շուկայում արգելվել էր հայկական ծիրանի մուտքը։ Հայկական գյուղմթերքով բեռնված մեքենաները ստիպված էին տեղափոխվել այլ առևտրային կենտրոններ։