lragir.am: Մեր զրուցակիցն է ԱԺ «Իմ քայլը» խմբակցության պատգամավոր Տաթևիկ Հայրապետյանը։
- Ինչպե՞ս եք գնահատում Ալիևի հայտարարությունը Հայաստանի մասին, որտեղ նա նշում է, որ Հայաստանի անկախության շրջանի այս ամբողջ պատմությունն ամոթի պատմություն է:
- Ալիևի այս ելույթն ամբողջությամբ արտահայտում է այն վախերը և սարսափները, որ նա ունի ժողովրդավարական պրոցեսների նկատմամբ: Գաղտնիք չէ, և ես բազմիցս դրան անդրադարձել եմ, որ Ադրբեջանի ժողովուրդը և հստակ որոշակի շրջանակներ թեկուզ իրենց ֆեյսբուքյան գրառումներում նշում են, որ Հայաստանում տեղի ունեցած հեղափոխությունը և դրան հաջորդած պրոցեսները ցույց են տալիս, որ Հայաստանը գնում է ժողովրդավարական ճանապարհով, և իրենք տեսնում են ժողովրդավարության և անվտանգության հետ ուղղակի կապ: Նաև ՀՀ վարչապետի պատրաստակամությունն՝ ուղղակի երկխոսելու կամ կոչով դիմելու Ադրբեջանի ժողովրդին, վստահ եմ՝ հարուցել է Ալիևի վախերը, և նա փորձում է տարբեր մանիպուլյացիոն ձևերով հարցականի տակ դնել ժողովրդավարական արժեքները և իրավական պետություն կառուցելու կարևորությունը: Դա, իմ համոզմամբ, իր՝ որպես բռնապետի խորքային վախերի արտացոլման ապացույցն է:
Հայաստանում ընթացող ներքին իրավական պրոցեսներին պիտակներ կպցնելու կամ տարբեր որակումներ տալու փորձերն ամբողջությամբ ձախողված են, որովհետև Ալիևը թող երբեք չմոռանա, որ ինքը գործ ունի հաղթանակած պետության և հաղթանակած ժողովրդի հետ: Մենք կարող ենք ունենալ տարբեր, անգամ հակասող մոտեցումներ երկրի զարգացման վերաբերյալ տեսլականների վերաբերյալ, բայց անվտանգության և մեր ազատ ապրելու իրավունքը պաշտպանելու հարցում մենք ավելի քան միասնական ենք:
-Սերժ Սարգսյանը, անդրադառնալով Ալիևի հայտարարությանը, նշել է, որԱլիևի լեզուն երկարել է՝ ներսում մեր ապաշնորհ ու ապազգային վայ–կառավարիչների պատճառով, բայց նա պետք է լավ հիշի, որ սրանք, ինչպես և իր ռեժիմը, անցողիկ են: Ինչպե՞ս եք գնահատում նման որակումները:
- Ցավում եմ, որ Սերժ Սարգսյանը, հավանաբար էմոցիաների ազդեցության և սխալ ուղղորդման արդյունքում, հանդես եկավ ոչ թե որպես պետական գործիչ, այլ որպես ուղղակի նեղ կուսակցական ղեկավար և փորձում է Ալիևի ելույթն օգտագործել ի շահ իրեն, փորձելով ինչ-որ համեմատություններ անել: Եթե Սերժ Սարգսյանը փոքր ինչ երկար ընթերցեր Ալիևի ելույթը, ապա կտեսներ, թե ինչպես է խոհանոցում ծպտված իր փեսայի տարածած ապատեղեկատվությունը տեղ գտնում Ալիևի ելույթում: Ես կարծում եմ, որ դա պատիվ չի բերում առաջին հերթին Սերժ Սարգսյանին:
Շարունակությունը՝ lragir.am-ում։
comment.count (0)