24news.am։ «NTV» թուրքական հեռուստաընկերության կայքը գրում է, որ Թուրքիայի խորհրդարանն արձագանքել է ԱՄՆ Կոնգրեսի Ներկայացուցիչների պալատի ընդունած որոշումներին՝ հայերի ցեղասպանությունը ճանաչող բանաձևի ընդունմանն ու Սիրիայի հյուսիսում ռազմական գործողության համար Թուրքիայի նկատմամբ պատժամիջոցների կիրառմանը:
Մեջլիսի 4 կուսակցությունները, Քրդամետ Ժողովրդադեմոկրատական կուսակցությունից բացի, որից ընտրված պատգամավոր է նաև Կարո Փայլանը, հայտարարություն են տարածել։
«Դատապարտում ենք որոշ շրջանակների կողմից առաջ բերված և Ներկայացուցիչների պալատի կողմից ընդունված թեզիսը Հայոց ցեղասպանության վերաբերյալ»,-նշված է Մեջլիսի տարածած հաղորդագրությունում:
Խորհրդարանի խոսնակ Մուստաֆա Շենթոփը անդրադարձել է նաև Թուրքիայի նկատմամբ պատժամիջոցների կիրառման որոշմանը՝ այն որակելով որպես «շանտաժի փորձ»:
«էժանագին հաշիվներ մաքրելու փորձերը թշնամական տրամադրություններ կարող են ստեղծել»,- ասել է Շենթոփը:
Ավելի վաղ հայտնել էինք, որ ԱՄՆ Կոնգրեսի Ներկայացուցիչների պալատն ընդունվել էր Հայոց ցեղասպանությունը ճանաչող բանաձև։ Նույն օրը Ներկայացուցիչների պալատը հավանություն էր տվել նաև Թուրքիայի և նրա ֆինանսական հատվածի նկատմամբ պատժամիջոցների կիրառմանը, որոնք առնչվում են Անկարայի կողմից Սիրիայի հյուսիս-արևելքում իրականացված ռազմական գործողության, ինչպես նաև Ռուսաստանից С-400 զենիթահրթիռային համակարգերի գնմանը:
comment.count (0)