Այսօր կառավարության նիստի օրակարգային հարցերից երկուսը վերաբերում են բնապահպանական և ընդերքօգտագործման ոլորտը կարգավորող իրավական ակտերին:  

Օրակարգի 24-րդ չզեկուցվող հարցը Բնապահպանության և ընդերքի տեսչական մարմնի կողմից իրականացվող` ռիսկի վրա հիմնված ստուգումների մեթոդաբանությունը և ռիսկայնություն որոշող չափանիշների ընդհանուր նկարագիրը հաստատելու մասին որոշման նախագիծն է: Միաժամանակ, սույն որոշման նախագծով նախատեսվում է ուժը կորցրած ճանաչել նախորդ մեթոդաբանությունն ու չափանիշները, որոնք ընդունվել էին դեռևս 2012 թվականին:

Վերոնշյալ նախագծով սահմանվում է Բնապահպանության և ընդերքի տեսչական մարմնի կողմից իրականացվող ստուգումների մեթոդաբանությունը տնտեսական գործունեության շուրջ 96 ոլորտների (իրենց ենթաոլորտներով) մասով: Սահմանվել է նաև նախնական ոլորտային ռիսկի հաշվարկման կարգ, որը ներկայացնում ենք ստորև.

Ըստ որոշման նախագծի՝ նախնական ոլորտային ռիսկի գնահատում է իրականացվում, այնուհետև անհատական ռիսկն է գնահատվում: Նախնական ոլորտային ռիսկի առավելագույն արժեքը սահմանվել է 100 միավոր:

Անհատական ռիսկայնության հաշվարկը նախկին 2 բաղադրիչի փոխարեն կընդգրկի 3 բաղադրիչ: Փոփոխվել են նաև բաղադրիչների բովանդակությունները: Նախկինում անհատական ռիսկը հաշվարկվում էր տնտեսվարողների կողմից ներկայացված հաշվետվության և Բնապահպանության ու ընդերքի տեսչական մարմնի կողմից ստուգման ընթացքում ստուգաթերթում նշված գնահատականի հիման վրա:

Նախագծի ընդունումից հետո անհատական ռիսկը կհաշվարկվի հետևյալ 3  բաղադրիչների հանրագումարով.

• գնահատվող օբյեկտում առկա տեղեկատվության հիման վրա բնապահպանական հիմնական չափանիշներով հաշվարկված ռիսկայնության գնահատական, որն ունի առավելագույնը 70 միավոր կշիռ,
• ստուգաթերթերի միջոցով հաշվարկված ռիսկայնության գնահատական` առավելագույնը 50 միավոր կշիռ,
• հայտնաբերված թերությունների և խախտումների վերացմանն ուղղված գործողությունների գնահատական` առավելագույնը 30 միավոր կշիռ:

Այնուհետև տնտեսվարող սուբյեկտները կդասակարգվեն ըստ բարձր, միջին և ցածր ռիսկայնության աստիճանների: Հետագա տարիներին ստուգումները կանցկացվեն նշված երեք դասակարգումներից ելնելով: Տարվա ընթացքում բարձր ռիսկայնության տնտեսվարող սուբյեկտների մոտ անցկացվող ստուգումները կկազմեն ստուգման ենթակա տնտեսվարողների ցանկի 70 %-ը:

Ի հավելումն նշենք, որ Բնապահպանության և ընդերքի տեսչական մարմնի կողմից ներկայացված հանձնարարականների չկատարումը տնտեսվարող սուբյեկտների ռիսկայնության աստիճանը ևս կբարձրացնի: Հանձնարարականները կատարման և չկատարման միավորները՝ ստորև.