civilnet.am: Մարտի 30-ից Մոսկվայում ուժի մեջ կմտնի համընդհանուր ինքնամեկուսացման ռեժիմ, հաղորդում են ռուսաստանյան լրատվամիջոցները։ Տնից կթույլատրվի դուրս գալ միայն աշխատանքի, մոտակա խանութ կամ դեղատուն գնալու համար, հնարավոր կլինի դուրս գալ նաև աղբ թափելու և կենդանիներին զբոսանքի տանելու նպատակով։

Տրանսպորտի տեղաշարժի սահմանափակում չի լինի, քաղաքից ելումուտը չի փակվում։

Կորոնավիրուսի պատճառով աշխատանքը կորցրած անձինք պարբերաբար փոխհատուցում կստանան մոսկովյան իշխանություններից։ Գործազրկության նպաստի հետ միասին այն կկազմի 19 500 ռուբլի։

Ինքնամեկուսացման ռեժիմի խախտման համար պատժի կարգը կորոշվի առաջիկայում։

Ռուսաստանում պաշտոնապես գրանցվել է կորոնավիրուսի 1 534 դեպք, որոնցից մոտ մեկ տասնյակը՝ մահվան ելքով։