armenpress.am: Ազգային ժողովի «Լուսավոր Հայաստան» խմբակցության պատգամավոր Գևորգ Գորգիսյանի դեմ դատական հայց է ներկայացրել «Արմոս» ընկերությունը:

«Արմոս» ՍՊԸ-ն պահանջում է Գորգիսյանից հերքել գործարար համբավն արատավորող տեղեկությունները, ինչպես նաև հրապարակայնորեն ներողություն խնդրել և փոխհատուցում վճարել: Հայցը մակագրվել է Երևանի ընդհանուր իրավասության դատարանի դատավոր Ժաննա Ասատրյանին:

Պատգամավորը Ազգային ժողովի ամբիոնից տեղեկացրել էր, որ իրեն են դիմել «Արմոս» ՍՊ ընկերության կոշիկի ձեռնարկության աշխատակիցները և նշել, որ ընկերությունը չի վճարել իրենց աշխատավարձը:

Անդրադառնալով իր դեմ ներկայացված դատական հայցին` «Արմենպրես»-ի հետ զրույցում Գորգիսյանը նշեց, որ դա իրենց իրավունք է, սակայն չի կարծում, որ ինչ-որ խախտում կատարել է:

«Այն բոլոր հարցերը, որ բարձրացրել եմ Ազգային ժողովի ամբիոնից, բարձրացրել եմ քաղաքացիների դիմումի հիման վրա: 6 քաղաքացի ինձ դիմել է, որ իրենք աշխատել են, և իրենց հրաժարվել են գրանցել ու աշխատավարձ վճարել, որի վերաբերյալ նամակ եմ գրել Պետական եկամուտների կոմիտեին: ՊԵԿ-ի պատասխանը շատ տարակուսելի էր և ասում էին, որ որևէ խնդիր չեն գտել, սակայն ինձ մոտ կա ձայնագրություն, որտեղ լսվում է, թե ինչպես է տնօրենը հրաժարվում գրանցել և վճարել աշխատողներին ու նաև սպառնում է նրանց, ասելով, որ այս քաղաքում երբեք որևէ տեղ աշխատանք չեն գտնի: Տնօրենը նաև ասել է, որ այնպիսի մեջք ունի, որ ոչ-ոք ոչինչ չի կարող անել»,- ասաց Գորգիսյանը:

Պատգամավորը ասաց, որ իր հարցադրումը ուղղված էր Կառավարությանը, թե կա՞ն արդյոք նման իրողություններ Հայաստանում, որի դեմ ժամանակին պայքարում էին:
«Չեմ կարծում, որ ընկերության հեղինակության հետ եմ խաղացել: Եթե կարող է որևէ ընկերության ղեկավար նման արտահայտություն անել և հետո որևէ կերպ չպատժվել, ուրեմն ուներ այդ հայտարարություն անելու հիմքերը»,- ասաց Գորգիսյանը՝ հավելելով, որ ամենայն հավանականությամբ կհրապարակի ձայնագրությունը: